Mehn Aperika Karakarahk Emen Me Limpoakohng Mahsen en Koht I

RAIL akan me kin pwarek Aperika kin kalap pwuriamweiki me tohn wasao kan kin mengei en tapiada koasoakoasoi kan sang nan Pwuhk Sarawi. Soangen peidek me duwehte, “Dahkot Wehin Koht?” de “Mie pasapeng ong dahme pahn kihsang kahpwal en duhpek, soumwahu, mahwen, oh kauwehla kosonned, kohkohlahte?” aramas kin perenki koasoia. Irail me tohto me kin lukehlong aramas me irail kin sehse en kihong irail pasapeng sang nan Pwuhk Sarawi. Oh ni ahnsou me re kin kekeirada ni pali ngehn, irail kin wiahla Kristian papidais kan.

Emen aramas en Aperika me tepin wia met iei me koasoiepe mih nan Pwuhk Sarawi nan pwuhken Wiewia 8:26-​40. Ih ohlen Idiopia men me seiseiloaklahng Serusalem pwen iang kaudokiong Koht, Siohwa.

Nin duwen ah sansal nan kilel en pah, ohlen Idiopia menet pwuropwuralahng ni imwe oh dakedake kuruma, ahpw wie wadewadek pwuhk ieu. Aramas me e sawehwehki men ahpw idek reh: “Ia duwe, komw wehwehki dahme komw wadewadeken?” Ni elen karakarahk, ohlen Idiopia menet pohnese me e anahne sawas oh ih peki rehn aramas emen me e sehse, me iei ih Pilip, en doudahdo pohn were kurumwa. Eri, ih peki rehn Pilip en kawehwehiong ih iren Pwuhk Sarawi pwukat me e wadekehr oko. Pilip kawehwehda me met kokohp pwoat me pid duwen matala en Mesaia, Sises Krais, me ahpwtehn wiawi. Pilip pil padahkiong soahng teikan me pid “rongamwahu duwen Sises,” oh ele pil iangahki duwen sapwellimen Sises iasada.

Ni ohlen Idiopia ah rongadahr soangen padahk mehlel kaselel pwukat, e men wiahla tohnpadahk en Sises ih eri wia peidek wet: “Dahme kerompwa pwe I en dehr papidaisla?” Mwurin ah papdaiso, ohlen Aperika karakarahk menet perenda oh pwurala ni imweo oh mwuri Pwuhk Sarawi sohte pwurehng mahsanih duwen ih.

Rahnwet, Sounkadehdehn Siohwa kan kin sewese aramas rar kei nin sampah pwon ren sukuhliki soangen “rongamwahuohte.” Mpen aramas wenarar me kin ale sukuhl en Pwuhk Sarawi nan pein sapwarail akan ni sohte pweipwei.