Mehnia Poahsoan Me Ke Wie Kokou Powe?

KEHLAIL en ihmw ieu kin kohsang ni kehlail poahsoan en ihmwo. Pwuhk Sarawi ekei pak kin doadoahngki madamadau wet nan karasaras.

Soukohp Aiseia, ni karasepe, kin mahsanih me Siohwa Koht iei me “kin ketin poasonihada sampah.” (Aiseia 51:13, NW) Poahsoan wet kin direki kosonned teng kei me sapwellimen Koht me kin apwalih mwekimwekid en sampah oh kolokol ong sampah nan dewe. (Melkahka 104:5) Mahsen en Koht me iei Pwuhk Sarawi, pil mahsanih duwen “poahsoan akan” me mih rehn tohnsampah. Mepwukat iei kopwungpwung, kosonned, oh kaweid. Ni ahnsou me irail kin luwetala pwehki kopwung sapwung, widing oh mwekid lemei, ehupenehn kousoan en pwihn en aramas ieu kin ohla.​—Melkahka 11:2-6; Lepin Padahk 29:4.

Mour en kaweid wet kin pil mehlel nan mour en emen emen aramas. Sises Krais kaimwisekihla nan sapwellime Kapahrek en Pohn Dohl mahsanih: “Eri, mehmen me kin rong ei padahk pwukat oh kin kapwaiada, e pahn rasehng ohl loalokong men me kin kauwada imwe pohn paip ehu. Ni ahnsou eh pahn keteuda oh lapakehda, oh lapalahn kisinieng ipidohng ihmwo, e sohte pahn ohla, pwehki e kokoudahr pohn paip ehu. A mehmen me kin rong ei padahk pwukat oh sohte kin kapwaiada, e pahn rasehng ohl pweipwei men me kauwada imwe pohn pihken ni oaroahr. Ni eh pahn keteuda oh lapakehda, oh lapalahn kisinieng ipidohng ihmwo, e pahn pwupwudi ohla. Oh ia pahn uwen ohla wet.”​—Madiu 7:24-​27.

Mehnia poahsoan me ke kauwada omw mour powe? Pohn pihk en padahk en aramas akan me sohte kamehlele Koht, me pahn imwikihla ohla? De ke kin kauwada pohn paip kekeluwak me kin wehwehki peikiong mahsen akan en Sises Krais, me pahn sewese iuk nan engimah karasaras en mour et?