Kapinga Siohwa nan Sukuhl
NAN SAMPAH pwon, Sounkadehdehn Siohwa pwulopwul akan kin diar ahl en kapinga Koht nan sukuhl—ni arail kin lokaia oh pil arail wiewia. Tehk ekei ekpiriens kan me karasa arail eimah.
Sounkadehde pwulopwul emen nan Greece kohiong en ntingihada ripoht me pid saminlahn nan wehwe. Serepein menet rapahki nan Watch Tower Publications Index, oh diarada duwen saminlahn nan wehwe sang nan Awake! makisihn oh ntingihdi me e kihsang mepwukat sang nan Awake! Ah sounpadahk ndahiong ih me dene met iei ehu doaropwe me keieu mwahu me e wadekehr. Sounpadahko eri doadoahngki audepen ripohto nan ehu tuhpene lap, oh aramas akan mwahuki audepe. Sister pwulopwulo eri medewehda en pil kihong sounpadahko pil ekei Awake! makisihn oh ehu me pid duwen oaralap me koasoia “Teachers—What Would We Do Without Them?” Mwurin mwo, sounpadahko kapingahki makisihn Awake! ong tohnsukuhl akan, oh ekei tohnsukuhl eri peki rehn sistero en wahdo neirail Awake! makisihn. Sistero wahdo Awake! tohto ni imwen sukuhlo oh kihong irail.
Nan Benin, Africa, emen peinakapw Kristian lelong kahpwal laud ehu. Nin duwen tiahk en wasao, pahpa oh nohno en seri sukuhl tohto kohpene oh kihpene mwohni pwehn pwainda sawasepen tohnsukuhl kan pwe en padahkiong seri kan mehn kasukuhl apwal akan pwe ren kak onopadahng sikeng laud kan. Ahpw, soun sawas akan pilada en wia kasukuhl ni menseng en Rahn Kaunop. Sounkadehde pwulopwulo sapwungki oh nda: “Ni menseng en Rahn Kaunop wia ahnsou ehu me tohnmwomwohdiso pwon kin kalohkpene. Met iei ahnsou me keieu kaperen ong ie nan wihko, oh I sohte pahn kesehkihla met mehkot tohrohr!” Ahn serepeino pahpa, me sohte ah pwoud oh ih Sounkadehdehn Siohwa men, pwungki oh ih eri song ndaiong ekei peneinei ko oh pil sounkasukuhlo en wekidala ahnsou en kasukuhlo. Ahpw irail koaros kahng. Serepein pwulopwulo pilada en dehr iang kasukuhlo. Ih eri pilada en kin iang kalohk ni rahno. Ienge tohnsukuhl kan kin kapailoke ih, oh kangoangehki en dehr iang kalohk oh dehr iang sarawi. Irail kamehlele me e sohte pahn pweida nan sikengo. Ni imwio irail seri me ale kasukuhl tohrohr koaros sohte pweida nan sikengo ah kisin sister pwulopwulo pweida. Irail sohla kapailoke ih. Met tohnsukuhl ko kin ndaiong ih, “Nantihong papah omw Koht.”
Nan Czech Republic, serepein sounpar 12 men pahn wadek pwuhk oh eri koasoia. Ah nohno ndaiong en wadek pwuhk me oaralap koasoia The Greatest Man Who Ever Lived. E tepikihda ah ripohto ki peidek wet: “Ia ahmw madamadau? Ihs ohl me keieu wadawad me mour pohn sampah?” E kawehwehda duwen Sises, ah mour pohn sampah, oh duwen ah padahk kan.” Mwuri, ih eri koasoia duwen oaralap me koasoia “Padahk Duwen Mahkpene.” Lih sounpadahko ndahla, “Ripoht wet me keieu mwahu nan ripoht koaros me ke wiahier!” oh ih eri ale nah ehu pwuhko. Ienge tohnsukuhl teikan pil peki neirail. Rahn en mwurio, serepeino peren ni ah kihpeseng pwuhk 18.
Soangen aramas pwulopwul pwukat kin diar peren ni arail kin wahdo kaping ong Siohwa nan wasahn sukuhl. Kitail koaros en alasang eimah en me pwulopwul pwukat.