“Kamakamki ah Pwoson”

KAHNIMW tikitik en Cernobbio ni paliepeng en wehin Italy kauwada mehn kataman ieu nan mohs ehu wasao pwehn kataman irail oko me arail pwung en wia aramas oh sang irail. Ehu mehn kataman pwukat kin ong Narciso Riet. E ipwidi nan Germany oh ah pahpa oh nohno mehn Italy, ahpw Narciso Riet wiahla emen Sounkadehdehn Siohwa kan nan pahr 1930 samwa. Ahnsou me Hitler wie kakaun, Sounkadehdehn Siohwa kan iang kalokolok pwehki irail kahng wiahki Hitler en laudsang Koht mehlel Siohwa.

Ni police en German (Gestapo) diarada me Riet kin iang wahdo The Watchtower nan wasa me aramas akan kin selidi ie, e tangala nan Cernobbio. Wasao e uhd kawehwehdi The Watchtower ong lokaiahn Italy oh kihpeseng ong ienge me pwoson akan me kerendohng ah wasa. Ah pwerisek sohte ohla mwahl. Emen SS officer oh nah kan wainehdi imwen Riet oh poarokedi ih, oh wahda arail mehn kadehde​—Paipel riau oh ekei kisin likou pwe dene e kauwehla kosonned! Riet kalipiliplahng Germany, oh selidi nan Dachau concentration camp, oh e kamala ekiste mwohn Mahwen en Sampah Kariau ah imwsekla. Mehn kataman nan Cernobbio koasoia “e kalokoloki ah pwoson.”

Ahn Narciso Riet ah pwoson oh iangahki ahn Sounkadehde tohto me lokolok pahn Nazi pwehki arail pwoson wia me kakehlaka kapehden Kristian tohto nan rahnwet ong kolokol arail lelepek ong Siohwa, me Ih kelepw nanleng oh sampah me warohng arail kaudok. (Kaudiahl 4:11) Sises mahsanih: “Meid pai irail oko me kin lokoloki pwung pwehki ngehi.” Koht pahn ketin tamataman arail wiewia kan oh kapai irail pwehki arail lamalam kehlail.​—Madiu 5:10; Ipru 6:10.