“Irail Sohte Kin Kahmahmkihla Arail Pwoson”

SISES mahsanih ong sapwellime tohnpadahk kan: “Meid pai kumwail ma aramas akan pahn lahlahwe kumwail oh kaloke kumwail oh karaunkin kumwail soangen suwed oh likamw koaros pwehki ngehi.” (Madiu 5:11) Sounkadehdehn Siohwa kan nan rahnwet kin peren pwehki ni arail kin kapwaiada sapwellimen Krais padahk oh kahlemeng kan, irail “sohte wia kisehn sampah” oh kolokol uhtohr sang palien politiks oh loalopwoat ong Koht nan soangen irair koaros. (Sohn 17:14; Madiu 4:8-10)

Me pid duwen pilipil en sohte kahmahmkihla arail pwoson me Sounkadehdehn Siohwa kan wia nan Soviet Union mahso, oh nan Estonia, emen ohl palien sarawi en Lutheran oh pil sounkawehwe Paipel Toomas Paul ntingihdi nan nah pwuhk me ede Kirik keset küla (The Church in the Middle of the Village): “Aramas malaulaute me rongehr dahme wia ni menseng en April 1, 1951. Koasoandi kehlail ieu kaunopadahr pwehn kihsang Sounkadehdehn Siohwa koaros oh pil iangahki iengerail akan me kin pwungkin irail---aramas 279 irail koaros me poaridi oh kalipiliplahng Siberia. . . kisin doaropwe kis kohieng irail en sain pwehn kasalehda me re pahn pwilikihdi arail pelien lamalam pwe irail en sohte kalipilipala de selidi . . . Irail koaros, patehng irail akan me poaridihier mwowe kan patpene wiahda aramas 353, oh nanpwungarail aramas 171 me re wia kin iang towehda mihding ahpw saikinte papidaisla. Irail sohte kahmahmkihla arail pwoson​—pil nan Siberia. . .Sohte me tohto tohn sarawi en Estonian Lutheran ahneki soangen poadidi duwehte Sounkadehdehn Siohwa kan.”

Sounkadehdehn Siohwa kan wasa koaros nin sampah kin likih Koht me e pahn ketin sewese irail pwe ren wie kolokolete arail poadidi oh peikiong ih mendahki ma re pil lel kamakam. Irail kin pereperen ni arail kin wehwehki me katingpen arail lelepek me inenen laud.​—Madiu 5:12.