Ke Kin “Kepwehpwehki Soahng kan en Koht”?

EHU kisehn sapwellimen Sises Krais karasaras tohto kan me kin inenen kamwekid madamadau en aramas, iei me kin pid duwen soun sapwasapw emen me kepwehpwe. Pwe en kak wiahda en dehr apwalada ni ahnsou kohkohdo, ohlo eri koasoanehdi en wiahda imwen nahk ieu me pahn laudsang me e ahnekiero. Ahpw, nan sapwellimen Sises karasaraso, Pwuhk Sarawi kahdaneki ohlo “aramas pweipwei men.” (Luk 12:16-21) Kawehwehn Paipel tohto pil kahdaneki ih “pweipwei.” Dahme kahrehda lokaia uhk duwehte met doadoahk wasaht?

E sansal mwahu me ohl kepwehpwe menet ah koasoandi kan sohte kin pidada Koht, oh sohte kin pohnesehki me Koht me ketikihda wahn sapwe. (Madiu 5:45) Weksang met e kin pohnmwahsohki oh nda: “Meid pai kowe, me ahneki kiden kepwe mwahu, me wia nekinekohng sounpahr tohto. Nna, kommoalla; kamakamadipw; papaieki omw dipwisou kan, oh pereperenki!” Ei, e kin medemedewe me wahn ah doadoahk kan pahn wia “kelen kahnimw kehlail ehu.”—Lepin Padahk 18:11.

Wahnpoaron Seims kin kihda kaweid en irehdi ngenen aklapalap ni ah ntingihdi: “A met, kumwail rong ie mahs, kumwail kan me kin nda, ‘Rahnwet de lakapw se pahn seiloaklahng ni kahnimwo oh mihmihki ie sounpar ehu. Eri, se pahn kauwada ehu pisnis en oh kadoahkihada kiden mwohni.’ Ahpw, kumwail sehse dahme pahn wiawihong kumwail ni rahn kohkohdo kan. Pwe kumwail rasehng pwoaiken pahnlahng me kin pwarada ahnsou kis oh kin mwadang sohrala.”—Seims 4:13, 14.

Me pwungiong mahsen oko me pid kaweid ong ohl kepwehpwe nan ahn Sises karasaras e mahsanih: “Aramas pweipwei men kowe! Pwongpwong wette ke pahn mehla; a ihs me pahn ahneki omw kepwe kan me ke koasoakepenehr?” Duwehte pwoaiken pahnlahng me kin sarpeseng ohl kepwehpwe pahn sohrala mwohn ah kak kilang pweidahn dahme e kin medemedewe. Kitail kin wehwehki mehn kasukuhl wasaht? Sises mahsanih: “Ih duwen met me kin wiawi ong aramas akan me kin koasoakepene ong pein irail kepwehn sampah, ahpw semwehmwe mwohn silangin Koht.” Eri, iaduwen—ke kin “kepwehpwehki soahng kan en Koht”?