Mahsen en Siohwa Kin Ieias
Ire Kesempwal akan Sang Nan Pwuhken Ester
PILAHNO sohte pahn mengei en ohla. Kamakamala lemei en mehn Suhs akan pahn mwuledek oh idipek. Nan rahn ieu me pahn koasoandi, mehn Suhs koaros me kin koukousoan sang India lel Idiopia pahn kamwomwmwomwla. Met iei me soun pilahno medemedewe. Ahpw, ire ieu pwupwusang nan ah madamadau. Koht en nanleng kak doarehla sapwellime aramas pilipil kan sang nan soangen irair apwal soh lipilipil kan. Poadoandoarala wet ntingihdi nan Pwuhk Sarawi pwuhken Ester.
Pwuhken Ester kin koasoia wiewia kan ong erein pahr 18 ni mwehin Nanmwarki en Persia Ahasuerus, de Serksihs I, oh ohl mah en Suhs emen me ede Mordekai me ntingihdi. Koasoi lingan wet kasalehda iaduwen Siohwa kin ketin doarehla sapwellime aramas akan sang widing suwed akan en arail imwintihti kan, mendahte ma sapwellime ladu kan kin marakpeseng nan wehio. Nan rahnwet, wehwehkihla koasoi pwoatet kin wia mehn kakehlepen pwoson ong sapwellimen Siohwa aramas akan, me kin papah Ih nan sahpw 235 nan sampah. Oh pil, aramas akan nan koasoia en nan pwuhken Ester kin kihda ong kitail mehn kahlemeng kan ni kitail en kahlemengih oh pil soahng kan me kitail en kalekehkin kitail. Mehlel pwoat me “mahsen en Koht me ieias oh roson.”—Ipru 4:12.
LIH NANMWARKI UHDAHN PAHN LIDEREHDA
(Ester 1:1–5:14)
Ni kesiluh en pahr me Nanmwarki Ahasuerus kakaun, e wiahda kamadipw en soupeidi kan. Lih Nanmwarki Pasdi, me ndandki ah kaselel, alehdi kupwursuwed en nanmwarkio oh ih eri kesepwilidi. Lihen Ipru Adassa iei me pilipildahr nanpwungen meipwon masamwahu koaros nan sahpwo pwe en uhd wiliandi. Sang ni kaweid en ah cousin me ede Mordekai, e ekihla me ih lihen Suhs emen oh ih eri doadoahngki ede ni lokaiahn Persia, me iei Ester.
Ahnsou ehu dower powe, ohl suwed emen me ede Aman eri kesepwildahng nan pwukoa ieu en Prime Minister. Aman mwakarkihda kowahlap pwe Mordekai kahng iang ‘kelepwikihdi oh poaridi mwohn Aman’ kahrehda e koasoanehdi me e pahn kamwomwasang mehn Suhs koaros me mih nan irepen wasa me mih pahn manaman en Wehin Persia. (Ester 3:2) Aman kapiheki Ahasuerus en pwungki oh ketikihda ehu kosonned pwehn kamana kamakamalahn mehn Suhs pwukat. Mordekai eri mih nan “likoun nsensuwed oh kamwerehdiong pehs pohn moange.” (Ester 4:1) Ahnsou wet, Ester uhdahn anahne iang sawas. Ih eri lukehdohng nanmwarkio oh sapwellime Prime Minister ong kamadipw ehu. Ni ara pereperen ni tehpelo, Ester eri peki ira en pil pwurodo ong pil ehu kamadipw ni rahn en mwurio. Aman inenen peren. Ahpw, e lingeringerkihda Mordekai ah kahng wauneki ih. Aman eri wiahda pilahn ieu en kemehla Mordekai mwohn kamadipwo ah pahn wiawi ni rahn en manda.
Pasapengpen Peidek kan me Pid Duwen Iren Paipel kan:
1:10-12—Dahme Lih Nanmwarki Pasdi sohte men pwarkihda mwohn nanmwarkio? Ekei soun kasukuhl Paipel nda me lih nanmwarki menet wia met pwehki e kahng “e dehr mwamwahlla mwohn sapwellimen nanmwarki tohn sakau me luhkpene kan.” De ele mwein lih kaselel menet sohte kin uhpah nanmwarkio. Pwuhk Sarawi sohte kasalehda ah madamadau, ahpw ohl erpit en rahn pwuko leme me peikiong ah pwoud ohl wia kahpwal ieu oh me Pasdi mehn kahlemeng suwed pahn kak kaweid sapwungihala lih pwopwoud koaros nan kahnimw en Persia.
2:14-17—Ester wia dipen nenek rehn nanmwarkio? Pasapeng iei soh. Koasoi wet kasalehda me ni menseng lih teikan me wisikdohng rehn nanmwarkio eri pwuralahng ni keriau en ihmwo pahn epwelpen ohl “me kin apwahpwalih sapwellimen nanmwarki pekehi ko.” Lih pwukat me kin wendi ni pwong rehn nanmwarkio kahrehda re wiahla ah pekehi kan. Ahpw, Ester sohte pakairdohng nan imwen sapwellimen nanmwarkio pekehi kan, mwurin ah tuhwong nanmwarkio. Ahnsou me Ester pwarodo mwohn Ahasuerus, “nanmwarkio ahpw inenen kupwure Ester sang serepein teiko, oh Ester pil kaperenihada laudsang meteiko. E ahpw ketikidiong lisoarop en lih nanmwarki pohn moange oh kasapwiladahng nan dewen Pasdi.” (Ester 2:17) Ia mwomwen ahn Ahasuerus ah kak “inenen kupwure Ester”? Ni soangen ahlohte me aramas teikan poakohngala ih, sang ni mwomwe oh pil ah wiewia kan.
3:2; 5:9—Dahme kahrehda Mordekai sohte men poaridi mwohn Aman? E sohte sapwung ong mehn Israel akan en pohnese lapalap en aramas oh poaridi mwowe. Ahpw, ong Aman mie mehkot tohrohr. Aman kohsang rehn mehn Agag, oh ele wia mehn Amalek, oh Siohwa kileledier Amalek en kamwomwmwomwla. (Deuderonomi 25:19) Ong Mordekai, poaridi mwohn Aman wia irair kahpwal ehu me pid ah lelepek ong Siohwa. E uhdahn kahng, ih eri nda me ih mehn Suhs emen.—Ester 3:3, 4.
Mehn Kasukuhl kan ong Kitail:
2:10, 20; 4:12-16. Ester kin peikiong kaweid oh peneu sang rehn tohnkaudok en Siohwa me mah men. E wia elen erpit ong kitail en “peikiong amwail sounkaweid akan oh kapwaiada ar kosonned kan.”—Ipru 13:17.
2:11; 4:5. Kitail en “pohnese ineng mwahu en meteikan, kaidehn atail kante.”—Pilipai 2:4.
2:15. Ester kasalehda lamalam toupahrek oh kanengamah ni ah sohte peki kalaudepen mehn kapwat akan de likou kaselel kan en kapatapatong dahme Ekai kihdahr oko. E duwehte Sara me tiengehr mwowe, me ah “lingan en mihmi loale ni mour mwakelekel en nan kapehde, me iei ih lingan poatopoat ong me kin kadek oh meleilei” me kamwekidada nanmwarkio ah poakepoakehla Ester.—1 Piter 3:4.
2:21-23. Ester oh Mordekai wia mehn kahlemeng mwahu ong duwen “aramas koaros uhdahn pahn peikiong pwungen wehi kan.”—Rom 13:1.
3:4. Nan ekei irair akan, e kak wia irair kesempwal en dehr kasalehda ihs kowe,duwehte me Ester wia. Ahpw, ni ahnsou me kitail en uhkihda ire kesempwal kan, me duwehte sapwellimen Siohwa irair en wia Kaun Lapalap en lahng oh sampah oh atail lelepek ong sapwellime kaunda, kitail dehr masak en kehsehki aramas me kitail Sounkadehdehn Siohwa kan.
4:3. Ni atail kin lelohng kasongosong kan, kitail en sohpeiong Siohwa ni kapakap pwehn ketikihdo kehl oh erpit.
4:6-8. Mordekai repen pwungiong ire keper me Aman wiahdahr.—Pilipai 1:7.
4:14. Ahn Mordekai koapworopworki Siohwa wia mehn kahlemeng mwahu.
4:16. Pwehki Ester kehliki Siohwa ni unsek, e lelepek oh kommwad ni ah lelohng irair ieu me kakete kahrehiong ih en kamala. E inenen kesempwal kitail en sukuhliki kehliki Siohwa oh kaidehn pein kitail.
EHU WEKIDEK PWAKIETE EHU
(Ester 6:1–10:3)
Ni wiewiao ah sansalda, soahng koaros eri wekidekla. Aman eri kalusiamalahr ni tuhke me e kaunopada ong Mordekai oh Mordekai uhd wiahla Prime Minister! Dahme wiawihong pilahn en kemehla mehn Suhs akan? E pil pahn wekidekla laud.
Lih lelepek Ester pwurehng koasoia. Ni ah mendahkihla eh mour, Ester pwarodo mwohn nanmwarkio oh peki ahl ehu en kauwehla ahn Aman koasoandio. Ahasuerus mwahngih dahme anahn en wiawi. Kahrehda, ahnsou rahn en kamakamala leledo, kaidehn mehn Suhs akan me kamakamala, ahpw irail oko me pahn wia me suwed oko me uhd kamakamala. Mordekai wiahda kosonned me Kasarawi en Purim en kin wiawi nan pahr koaros pwe en wia katamanpen arail komourala. Pwehki ih me keriemen en lapalap me mihte pahnangin Nanmwarki Ahasuerus, Mordekai ‘wia aramas wahu oh keniken rehn ienge mehn Suhs kan oh e kin wiahda doadoahk mwahu ong nah aramas akan oh kamwahu ong kadaudokarail kan koaros.’—Ester 10:3.
Pasapengpen Peidek kan me Pid Duwen Iren Paipel kan:
7:4-Iaduwen kamwomwmwomwlahn mehn Suhs akan pahn “suwediong nanmwarkio”? Ni lokaia keneinei Ester kasalehda me mehn Suhs akan kak netila wia lidu kei, met elehda nanmwarkio en kilangada suwed en irail en kamakamala. Silper 10,000 me Aman inoukihda wia mehkot inenen tikitik ong nanmwarkio sang ma e netikihirailla ong ladu kan. Pilahn en kamalao pil wehwehki me lih nanmwarkio pahn pil iang kamala.
7:8—Dahme lapalap en mwoalen kopwung kan pwainkihdi mesen Aman? Met kak pwehki e wia mehkot kanamenek de pil pwehki dahme pahn wiawi. Ehu mehn kaweid nda me “ekei pak mehn mahs akan kin pwaindi moangen aramas me koasoandi en kamala.”
8:17—Ni soangen ahl dah me ‘aramas tohto lohkihda me irail mehn Suhs’? Mehn Persia tohto iangala kaudok en mehn Suhs akan, medemedewe me wekideklahn kosonnedo kasalehda me Koht ketin ieiang mehn Suhs akan. Soangen madamadauohte me doadoahk ni pweidahn kokohp me dierek nan pwuhken Sekaraia. E mahsanih: “Ni rahn pwuko mehn liki ehk pahn kohdo rehn mehn Suhs men oh nda, ‘Se pahn ianguhkala nan omw pelien lamalam en, pwe se rong me Koht kin ketin ieiang uhk.’”—Sekaraia 8:23.
9:10, 15, 16—Mendahki kosonnedo mweidala mehn Suhs akan en ale dipwisou me lohdi nan mahwen, dahme kahrehda irail sohte alehki? Arail kahng ale kasalehda mwahu me arail koasoandi iei emenemen en mourla kaidehn emenemen en kepwehpwehla.
Mehn Kasukuhl kan ong Kitail:
6:6-10. “Lemei kin kahrehiong aramas paisuwed, oh aklapalap kin kahrehiong aramas en pwupwudi.”—Lepin Padahk 16:18.
7:3, 4. Kitail kin kommwad oh kadehdehda me kitail Sounkadehdehn Siohwa kan mehnda ma e pahn kahrehda kitail en alehdi kalokolok?
8:3-6. Kitail kak oh iei me kitail en wia en peki lapalap en koperment kan oh palien mwoalen kopwung en pere kitail sang imwintihti kan.
8:5. Ni wiepe keneinei Ester sohte koasoia sapwellimen nanmwarkio pwukoa nan kosonned me pilahnihada en kamwomwala ah aramas akan. Ni ahlohte, kitail anahne en koasoanehdi atail koasoia ni atail kihda kadehde ong irail me lapalap akan.
9:22. Kitail dehr manokehla me paisuwed nanpwungatail.—Kalesia 2:10.
Siohwa Pahn Ketikihda “Kamaiau oh Komour”
Mordekai katamanda sapwellimen Koht koasoandi pwe Ester en alehdi irair en soupeidi. Ni mehn Suhs akan lelohng irair kamasepwehko, irail kaisihsol oh kapakap ki sawas. Lih nanmwarkio eri pwarowohng mwohn nanmwarkio ni ah sohte alehdi luhk oh pak koaros me e wia met sohte kahpwal lelohng ih. Nanmwarkio sohte kak meirkihla ni pwong me irairo pahn wiawi. Ni mehlel pwuhken Ester kin pid duwen sapwellimen Siohwa elen wiewia kan me pahn kin wia kamwahupen sapwellimen aramas akan.
Koasoia kaselel wet en Ester wia mehn kangoang laud ong kitail me mihmi nan “ahnsou en imwi.” (Daniel 12:4) “Ni kaimwisekpen rahn akan,” iei kaimwisekpen imwin ahnsou, Kok en Makok iei Sehdan me Tepil pahn wia peiong sapwellimen Siohwa aramas akan. Ah koasoandi iei en kamwomwasang sounkaudok mehlel koaros. Ahpw duwehte nan mwehin Ester, Siohwa pahn ketikihda “kamaiau oh komour” ong sapwellime tohnkaudok akan.—Esekiel 38:16-23; Ester 4:14.