Ke Kin Rasehng Tuhke me Ede “Lagani Auna”?

NAN kahnimw ieu likin wasa nan Papua New Guinea me ede Port Moresby, sounkalohk riemen pwurasang ara kalohk. Ni ara alialu kohla ira kilangada tuhke pwoat me inenen lingan. Ohl me mah rehra eri nda, “Eia, lagani auna pwoat!” Ih eri sohpeilahng me pwulopwul rehra oh kawehwehiong ih met: “Ahd wet kin wehwehki ‘tuhkehn sounpar ehu!’ E kin weksang tuhkehn wasa karakar teikan, pwe nan pahr koaros tuhke pwoatet kin mwerasang teh koaros oh likamwete e melahr. Ahpw, ahnsoun keteu, e kihda wahn rohs akan oh pwurehng linganla.”

Mie mehn kasukuhl me kitail kak sukuhliki sang tuhke me ede lagani auna de Royal Poinciana. Nin duwen ekei semen kan ahr koasoia, tuhke pwoatet kin iang wadehng tuhke limau me keieu lingan nan sampah. Mendahte ah kin sohla teh oh wahnrohs akan ni ahnsoun ketipin kehlail, tuhke wet kin kak nekidala uwen lapalahn pihl ieu. Kalewe kan kin kehlail oh kak wos limwahn takai me katengeteng kehlail ni ahnsoun kisinieng. Ni lokaia mwotomwot, tuhke pwoatet kin kak mour wasa suwed akan.

Kitail kak lelohng irair akan me pahn wia kasongepen atail pwoson. A dahme pahn sewese kitail en tengetengete? Duwehte tuhke lagani auna, kitail kak nimada oh nekidala pilen komour me iei Mahsen en Koht. Kitail en pasehng teng ‘atail Paip,’ Siohwa oh pil sapwellime pwihn. (2 Samuel 22:3) Ni mehlel, tuhke lagani auna kin wia mehn kataman kaselel ong kitail me mehnda ma ahnsou apwal, kitail kak kolokol atail kehl oh lingan en pali ngehn ma kitail isaneki oh idawehn sapwellimen Siohwa koasoandi kan me mie ahnsouwet. Ni atail pahn wia met, kitail pahn “sohsohki inou kan” me e ketikihda, oh pil iangahki inoupen mour soutuk.—Ipru 6:12; Kaudiahl 21:4.