Kitail Anahne Mesaia?
E KONEHNG ken peidengki, “Kitail anahne Mesaia?” Ehi, e konehng kitail en madamadau laudiki ma Mesaia pahn uhdahn mie katepe nan atail mour.
Paipel ni sansal kin kamehlelehiong kitail me kitail uhdahn anahne Mesaia. Semen kosonned en Suhs men nan tepin senturi akan ntingihdi: “Pwehki iei ih me ‘Ei’ ni sapwellimen Koht inou kan koaros.” E oaralapihada pwukoa kesempwal me Mesaia wia nan sapwellimen Siohwa koasoandi pwe en kak ketikihda kapai laud ong wehi koaros nan sampah. (2 Korint 1:20) Sapwellimen Mesaiao pwukoa inenen kesempwal me kahrehda sapwellime ketido oh sapwellime ieias iei me poahsoanpen kokohp en Paipel. Ahpw, sapwellime ketido e wia mehkot me anahnepe mie? Dahme kahrehda ke anahne nsenohki me e pahn wiawi de soh?
Ni mehlel, “Mesaia” kin wehwehki “Me Keidi Men” oh iei pil wehwehn lepin mahsen me kitail kin ahnlahr karonge “Krais.” Mesaia uhdahn pahn ketido pwehki wiewia sapwung kan me tepin pwopwoudo, Adam oh Ihp, wiadahro. Ira kepikpikda unsek, oh ira ahneki koapworopwor en mour soutuk nan Paradais, ahpw ira katihasang kapai wet. Tohnleng sapeik men, me adanekihla Sehdan me Tepil, men ira en kamehlele me Sounkapikpara me nohn limeidihd, oh me e pahn mwahu ong ira ma ira pahn pein wia ara pilipil ong dahme mwahu oh dahme suwed.—Senesis 3:1-5.
Ihp kamehlele likamw wet. Adam kesempwaliki ah pwoudo laud sang ah lelepek ong Koht, oh wiahlahr kisehn uhwong me Tepil wiahiong Koht. (Senesis 3:6; 1 Timoty 2:14) Sang ni ara wiewia kan, ira wiadahr mehkot me laudsang kesehlahte ara koapworopwor en mour soutuk. Ira pil kadauralahngehr dihp ong neira kan me saikinte ipwidi oh irail pahn alehier kalokepen mehla.—Rom 5:12.
Mwurinte mwo, Sounkapikpatail, Siohwa, mwahngih ahl en kapwungala lipwen wiewia suwed me kohsang tepin uhwongo. Ni ahnsou me Siohwa Koht kadeikada Tepilo, Koht mahsanihada mahsen kan me wiawihkihda tepin kokohp nan Paipel: “Kowe oh liho pahn kin imwintihtipene; nein liho oh pil noumw kan pahn pil kin imwintihtipene kohkohlahte. Aramas akan pahn sok pohn moangomwen pwe en kamwutepene; oh ke pahn ke keimwen neh.” (Senesis 3:15) Emen semenih Paipel koasoia me Mesaia iei sapwellimen Koht tohndoadoahk emen me pahn “ketin kasaledekirailla,” oh wahdo kapai kan ong aramas akan.—Ipru 2:15.
Ahpw, mwein ele ke kin kilang me aramas akan ni ahnsouwet saikinte warohng en ale kaping wet. Weksang met, aramas akan kin mihla nan irair en sohte koapworopwor. Ihme kahrehda, The World Book Encyclopedia koasoia me “mehn Suhs tohto kin kasikasik emen Mesaia pahn kohdo” oh e “pahn kapwungala sapwung kan oh kasohrehla imwintihti kan.” Ahpw, Paipel mahsanih me Mesaia samwadohr, oh e kadehdehr me Sises iei Mesaiao. Kitail kak ahnsou koaros likih dahme Paipel mahsanih.