Mesaiao Iei Sapwellimen Koht Sounkomour!
“Pwe duwen aramas koaros ar kin mehkihla ar miniminiong Adam, ih duwen koaros pahn iasadahng mour pwehki ar miniminiong Krais.”—1 KOR. 15:22.
1, 2. (a) Dahme Andru oh Pilip wia ni ara tuhwong Sises? (b) Dahme kahrehda kitail kak nda me rahnwet mie mehn kadehde tohtohsang ni mwehin tepin Kristian kan me Sises iei Mesaia?
PWEHKI Andru uhdahn kamehlele me Sises mehn Nasaret iei Ih me Koht ketin Idihada, e ndaiong rieo Piter, “Se diaradahr Mesaiao!” Pilip pil kamehlele met oh kin rapahki kompoakepaho Nadaniel pwehn ndaiong: “Se diaradahr ohlo, nin duwen me Moses ntingihedier nan Pwuhken Kosonnedo, oh pil soukohp ako. Iei ih Sises nein Sosep, sang Nasaret.”—Sohn 1:40, 41, 45.
2 Ia duwe, ke uhdahn kamehlele me Sises iei Mesaia me inoupe mie, sapwellimen Siohwa “Kaun oh Sounkomour”? (Ipru 2:10; Wiewia 5:31) Rahnwet, mehn kadehde kan me Sises iei Ih me Koht ketin idihada kin tohtohsang dahme mie ni mwehin sapwellime tohnpadahk kan. Sangete ni en Sises ketin ipwidi lao lel eh iasada, Mahsen en Koht kin ketikihda mehn kadehde mehlel me iei ih me Krais. (Wadek Sohn 20:30, 31.) Paipel pil kasalehda me Sises pahn ketin doulahte kapwaiada sapwellime pwukoahn Mesaia nanleng. (Sohn 6:40; wadek 1 Korint 15:22.) Sang dahme kitail sukuhlkiher nan Paipel, kitail pil kak nda me kitail “diaradahr Mesaiao” rahnwet. Ahpw kitail en tehk mahs ia duwen tohnpadahk kan ni mwehin Sises arail esehda ni pwung me re diaradahr Mesaiao.
“Kupwur Rir” Duwen Mesaia Ekisekis Sansalda
3, 4. (a) Ia duwen tepin tohnpadahk kan ni mwehin Sises arail ‘diar Mesaiao’? (b) Dahme kahrehda ke kak nda me Sises kelehpw me kak ketin kapwaiada kokohp koaros me pid Mesaia?
3 Ia duwen sapwellimen Sises tohnpadahk kan arail ese ni pwung me iei ih me Mesaia? Siohwa ketin doadoahngki soukohp kan en ekisekis kasalehda kilel kan duwen Mesaia eh pahn ketido. Emen me samanih Paipel kin karasahiong met duwehte ahn aramas ar pahn kapwurepene sansal takai ehu me pwalpeseng. Nna medewehla ma ohl kei me saikinte koasoipene pak ehu wahpene ehuehu pelien sansal takaio nan pere ehu. Ma pelien sansal takai ko pahn patpene oh wiahda sansal takaio ni pwung, ke sou pahn kamehlele me mie emen likin irail me pwalangpeseng takaio oh kadarala ehuehu pelien takai ko rehn ohl pwukat? Pil duwehte ehuehu pelien sansal takai ko, kokohp koaros duwen Mesaia pahn kihda ire kesempwal ehu me pid Mesaia.
4 Eri ia duwe, mehlel e kak wiawi me emente ohl kak depweila kapwaiada kokohp kan koaros me pid Mesaia? Emen ohl me sukuhl laud koasoia me en Sises ketin kapwaiada kokohp kan koaros duwen Mesaia sohte kak depweila wiawi. Kahrehda, e kaimwisekala eh koasoi ni pwung oh nda me “nan poadopoad koaros, Sises kelehpw me kak ketin wia met.”
5, 6. (a) Ia “kupwur rir” en Koht me Sises ketin tepin kapwaiada? (b) Ia duwen Koht eh ketin ekisekis kasalehda ihs “kadaudok” me inoupe mie?
5 Dahme keieu kesempwal duwen kokohp kan en Mesaia kin wia “kupwur rir” ehu en Koht me inenen kesempwal ong tohnsampah oh nanleng me Siohwa mahsanih nan mwetuwel en Ihden. (Kol. 1:26, 27; Sen. 3:15, NW) Ehu ire nan kupwur rir wet iei kadeik me pahn kowohng Sehdan me Tepil, “serpent en mahso,” me kahrehiong aramas akan en mihla nan dihp oh mehla. (Kaud. 12:9) Ia duwen kadeik wet pahn wiawi? Siohwa ketin kohpada me “kadaudok” en “liho” pahn kamwutepene moangen Sehdan. “Kadaudok” me kokohpdahr pahn kamwutepene moangen serpento pwehn kihsang koasoandi en uhwong kan, soumwahu, oh mehla. Ahpw, Koht pahn ketin mweidohng mahs Sehdan en ke keimwen nehn “kadaudoko.”
6 Siohwa pahn ketin ekisekis kasalehda ihs me wia “kadaudok” me inoupe mie. Koht ketin inoukihong Eipraam: “Oh pwehki kadaudokomw wehi koaros en sampah pahn uhdahn kapaiairailda pwehki omw rongehr ngilei.” (Sen. 22:18, NW) Moses kohpadahr me Menet pahn wia “soukohp men” oh e pahn ketin lapalap sang Moses. (Deud. 18:18, 19) Depit kamehlele, oh pil soukohp kan mwuhr pil kadehdehda, me Mesaia pahn wia kadaudok en Depit oh e pahn ketin ale sohsohn wia nanmwarki kohkohlahte.—2 Sam. 7:12, 16; Ser. 23:5, 6.
Dahme Kahrehda Sises Ketin Warohng Wia Mesaia?
7. Ia duwen Sises eh ketido sang sapwellimen Koht “liho”?
7 Koht ketin poaronehdo sapwellime Ohl, tepin sapwellime kapikipikda, sang sapwellime pwihn en tohnleng kan nanleng, me ni karasaras wia lih kamwohd men, pwehn wiahla “kadaudok” me inoupe mie. Met wehwehki me sapwellimen Koht Iehros anahne ketin “tounmeteikihla mehkoaros” nanleng pwehn ketido oh ipwidi nin duwen aramas unsek men. (Pil. 2:5-7; Sohn 1:14) Ni en sapwellimen Koht manaman ‘kipehdi’ Mery, met kin kadehdehda me “seri sarawio pahn mwarenki Sapwellimen Koht.”—Luk 1:35.
8. Ia duwen Sises eh ketin kapwaiada kokohp en Mesaiao ni ahnsou me eh ketin papidaisla nan pihl?
8 Kokohp kan duwen Mesaiao kin kasalehda iahd oh ia wasa me Sises pahn ketin ipwidi ie. Sises ketin ipwidi nan Pedleem nin duwen me kokohpdahr. (Maika 5:2) Ni mwehin tepin Kristian akan, mehn Suhs kan kin kasik laud. Pwehki re kasik ketidohn Mesaia, ekei kin idek duwen Sohn Sounpapidais: “Ma kaidehn Sohn, Mesaiao?” Ahpw Sohn sapeng irail nda: “Mie emen me uhdahn lapasang ie, me pahn ketido mwuri.” (Luk 3:15, 16) Ni eh sounpar 30, Sises ketin kasalehda me iei ih Mesaiao ni eh ketila rehn Sohn pwehn papidaisla nan pahr 29, pahr ehu me pwungiong kokohp kan. (Dan. 9:25) Ih eri tapiada sapwellime doadoahk en kalohk, ni eh mahsanih: “E lelehr ahnsowo, oh Wehin Koht kerendohr!”—Mark 1:14, 15.
9. Mendahki sapwellimen Sises tohnpadahk kan sehse oaritik kan, dahme irail kin uhdahn kamehlele?
9 Ahpw aramas akan anahne wekidala soahng kan me re kin kasik. Mendahki aramas akan ahneki kahrepe mwahu en kawauwih Sises nin duwen Nanmwarki, irail sohte uhdahn wehwehki me ahnsoun sapwellime kaunda pahn wiawi ni ahnsou kohkohdo sang nanleng. (Sohn 12:12-16; 16:12, 13; Wiewia 2:32-36) Ahpw ni ahnsou me Sises keinemwe rehrail, “A kumwail, ihs me kumwail wiahkin ie?” Piter ahpw sapeng patohwanohng: “Komwi me Mesaiao, Sapwellimen Koht ieias.” (Mad. 16:13-16) Piter pil wia soangen pasapengohte ni ahnsou me irail me tohto kohkohla pwehki re sapwungki sapwellimen Sises padahk.—Wadek Sohn 6:65-70.
Rong Mesaiao
10. Dahme kahrehda Siohwa ketin kasalehda kesempwalpen rong sapwellime Ohlo?
10 Sapwellimen Koht Iehroso kin ketin wia tohnleng kehlail men nanleng. Nin sampah, Sises ketin wia “wiliepen Semeo.” (Sohn 16:27, 28, NW) E mahsanih: “Kaidehn pein ei padahk me I kin kihda, ahpw sapwellimen Koht me ketin kadariehdo.” (Sohn 7:16) Pwehn kadehdehda me mehlel Sises iei Mesaiao, Siohwa mahsanih ni ahnsou me Sises lingalingla: “Kumwail rong eh padahk!” (Luk 9:29-35) Ei, kitail en rong de peikiong Menet me pilipildahr. Met kin anahne pwoson oh doadoahk mwahu. Mepwukat koaros kesempwal pwehn kaperenda Koht oh ale mour soutuk.—Sohn 3:16, 35, 36.
11, 12. (a) Dahme kahrehda mehn Suhs kan sohte pwungki me Sises iei Mesaiao? (b) Ihs me pwoson Sises?
11 Mendahki Sises sapwellimanki mehn kadehde tohto pwehn kasalehda me ih iei Mesaiao, pali laud en mehn Suhs kan soikala ih. Dahme kahrehda? Pwehki mie pein arail madamadau kan me pid duwen Mesaiao, oh re pil medewe me Mesaiao pahn wia arail kaun me pahn kapitirailla sang kaunda lemei en mehn Rom kan. (Wadek Sohn 12:34.) Kahrehda irail sohte kak pwungki Mesaia menet me kapwaiadahr kokohp koaros me mahsanih me aramas pahn kailongkin ih, re sohte pahn pohnese, e pahn wia ohlen lokolok men oh kin ahnlahr kilang me soumwahu kan, oh eri kamakamala. (Ais. 53:3, 5) Pil lella ekei sapwellime tohnpadahk ko, re nsensuwedla pwehki e sohte ketin kapitala irail nin duwen kaun emen. Ahpw mendahki met, irail kolokolete arail lelepek oh mwuhr irail ahpw wehwehkihda soahng kan ni sansal.—Luk 24:21.
12 Pil ehu kahrepe me aramas akan soikala Sises nin duwen Mesaia me inoupe mie iei pwehki re sohte kak pwungki sapwellime padahk kan. Re pahn anahne ‘tounmeteikihla pein irail,’ “tungoale” uduk oh ntahn Sises, “ipwsapahl,” oh sohte wia “kisehn sampah,” ma re pahn iang pidelong nan Wehio. (Mark 8:34; Sohn 3:3; 6:53; 17:14, 16) Irail me pohnmwahso, kepwehpwe, oh mwalaun kan kin kilangwohng mepwukat nin duwen soahng kei me apwal en kapwaiada. Ahpw irail mehn Suhs aktikitik kan kin pwungki Sises nin duwen Mesaiao, duwehte irail mehn Sameria kan me nda: “Ih me uhdahn Sounkomourpen sampah.”—Sohn 4:25, 26, 41, 42; 7:31.
13. Ia duwen keimwen nehn Sises eh ohla ni karasaras?
13 Sises kohpada me samworo lapalap akan pahn pangala ih oh mehn likih kan pahn kemehla oh langahda ih pohn tuhke, ahpw ni kesiluhwen rahn e pahn iasada. (Mad. 20:17-19) Ni eh kadehde ong Tohn Mwoalen Kopwung Lapalapo me ih iei “Mesaiao, Sapwellimen Koht,” irail kadeikada oh nda me e lahlahwe. (Mad. 26:63-66) Pailet “sohte diarada sapwung reh,” ahpw pwehki mehn Suhs ko ar nda me e ketin kamwoakamwoaronge tohn arail wehi, Pailet eri kihong “irail Sises pwe re en wiahiong nsenarail.” (Luk 23:13-15, 25) Irail eri “kahmahmki” oh koasoanehdi ni widing pwehn kemehla “Sounkomouro,” mendahki mehn kadehde tohto kasalehda me Koht me ketin poaronehdo ih. (Wiewia 3:13-15) Mesaiao “kamakamala” nin duwen me kokohpdahr ni eh langada pohn tuhke ni Rahnen Pahsohpa pahr 33. (Dan. 9:26, 27; Wiewia 2:22, 23) Sang ni kamakamala lemei wet, e lokolongki ohla ni “keimwen neh” me Senesis 3:15 kohpdahr.
Dahme Kahrehda Mesaiao Anahne Pwoula
14, 15. (a) Kahrepe riau dah me Siohwa ketin mweidohng Sises en pwoukihla? (b) Dahme Sises ketin wia mwurin eh iasada?
14 Siohwa ketin mweidohng Sises en pwoula pwehki kahrepe kesempwal riau. Keieu, sapwellimen Sises lelepek lao lel mehla kin kapwungala ire kesempwal ehu nan ‘irair riro.’ E kadehdehda ni mehlel me aramas unsek men kak kolokolete eh “poadidi ong Koht” lao mehla oh utungada sapwellimen Koht pwung en kaunda lahng oh sampah mendahki kasongosong laud kan me Sehdan kin wia. (1 Tim. 3:16, NW) Keriau, nin duwen me Sises mahsanih, “Nein-Aramas me ketido, . . . pwe en tounmeteikihla moure, pwe me ngeder en maiauda.” (Mad. 20:28) Meirong wet pwainla dihp oh mehla me kadaudoken Adam kan sohsohki oh ritingada elen mour soutuk ong koaros me kamehlele me Sises iei sapwellimen Koht sounkomour.—1 Tim. 2:5, 6.
15 Mwurin rahn siluh nan sousou, Krais ketin iasada, oh erein rahn 40 e ketin pwarowohng sapwellime tohnpadahk ko pwehn kadehde ong irail me e ketin ieias oh pil ketikihong irail kaweid teikan. (Wiewia 1:3-5) Ih eri ketidahla nanleng pwehn patohwanohng Siohwa kesempwalpen eh meirongo oh eri awiawih lao lel ahnsou me koasoandiong ih en tepida wia Nanmwarki Mesaia. Erein ahnsowo, e ketin wiewia doadoahk tohto.
Kapwaiada ni Unsek Pwukoahn Mesaia
16, 17. Menlau kawehwehda sapwellimen Sises pwukoahn Mesaia mwurin e ketidahla nanleng.
16 Erein sounpar epwiki kei mwurin e ketin iasada, Sises ni lelepek ketin kaweidih doadoahk kan en mwomwohdisohn Kristian me e ketin kakaun nin duwen Nanmwarki. (Kol. 1:13) E pahn ketin tepida doadoahngki sapwellime manaman nin duwen Nanmwarki en Wehin Koht ni ahnsou me koasoandier. Kokohp kan en Paipel oh pil dahme kin wiawi nin sampah kin kadehdehda me e ketier nin duwen Nanmwarki men tepida sang pahr 1914, oh “kaimwiseklahn koasoandi en mehkan” pil tepida. (Mad. 24:3, NW; Kaud. 11:15) Mwurinte mwo, e ketin kahluwa tohnleng sarawi kan pwehn pisikensang nanleng Sehdan oh nah ngehn saut kan.—Kaud. 12:7-10.
17 Doadoahk en kalohk oh padahk me Sises ketin tapiada nan pahr 29 kereniongehr pahn imwisekla. Kereniong e pahn ketin kadeikada irail koaros me momour. E pahn ketin padahkihong irail akan me rasehng sihpw me kin pwungki me ih iei sapwellimen Siohwa sounkomour en “towehda wehio me [onopadahngirailehr] sang nin tepin kawa.” (Mad. 25:31-34, 41) Irail kan me soikala Sises nin duwen Nanmwarki men pahn kasohrala ni ahnsou me e pahn ketin kahluwa karis en tohnleng kan pwehn kasorehla me suwed koaros. Mwuri Sises pahn ketin salihedi Sehdan oh kesepwekehdilahng ih oh nah ngehn saut akan nan “pwoahr loal soh kapi.”—Kaud. 19:11-14; 20:1-3.
18, 19. Dahme Sises ketin kapwaiada ni e wia sapwellime pwukoahn Mesaia? Dahme met pahn wiahiong irail me peik kan?
18 Erein sapwellime Kaundahn Pahr Kido, Sises pahn ketin kapwaiada ni unsek sapwellime pwukoa kan nin duwen “Sounkaweid Kupwurokong, Koht Lapalap, Sahm Poatopoat, Nanmwarkien Popohl.” (Ais. 9:6, 7, NW) Sapwellime kaunda pahn kamaiauda aramas akan pwe ren unsekla, oh pil iangahki irail akan me e pahn ketin kaiasada. (Sohn 5:26-29) Mesaiao pahn ketin kahluwairaillahng ni “pilen komour,” pwe aramas peik kan en kak paiekihda nanpwungmwahu rehn Siohwa. (Wadek Kaudiahl 7:16, 17.) Mwurin kaimwiseklahn kasongosong pahn wiawi, koaros soun uhwong kan iangahki Sehdan oh nah ngehn saut akan pahn “lekdeklahng nan lehn kisiniei oh suwepel,” ih duwen moangen ‘serpento’ eh pahn mwutpene douluhl.—Kaud. 20:10.
19 Ia uwen kaselel oh unsek en Sises eh ketin kapwaiada sapwellime pwukoahn Mesaia! Sampah pahn wiahla paradais oh pahn audaudki aramas maiauda kan me pahn mourki mour unsek oh nsenamwahu kohkohlahte. Karaun likamw koaros me kowohng sapwellimen Siohwa mwar sarawi pahn kapwungpwungla oh e pahn sansalda ni unsek me ih me sapwellimanki pwung en kaunda lahng oh sampah. Ia uwen kaselel en sohso wet ong koaros me kin peikiong sapwellimen Koht me Idihdao!
Ke Diaradahr Mesaiao?
20, 21. Ia kahrepe kan me ke ahneki pwehn padahkihong meteikan duwen Mesaiao?
20 Sang 1914 lel met, kitail kin momour ni ahnsoun Krais eh ketier (pa·rou·siʹa ni lokaiahn Krihk). Mendahki kitail sohte kak kilangki mesetail me e ketier nin duwen Nanmwarki men en Wehin Koht, pweidahn kokohp kan kin kasalehda met ni sansal. (Kaud. 6:2-8) Ahpw, duwehte mehn Suhs kan ni mwehin Sises, pali laud en aramas akan rahnwet kin pohnsehsehla mehn kadehde kan me Mesaia ketier. Irail pil mwahuki kaun emen de emen me pahn kin ehuong kaunen wehi kan. Ahpw ke eseier me met Sises kin ketin kakaun nin duwen Nanmwarki men en Wehin Koht. Ia duwe, ke sou perenkihda omw diarada met? Duwehte irail tepin tohnpadahk kan ni mwehin Sises, ke pil kin mwekidki en nda: “Se diaradahr Mesaiao.”
21 Rahnpwukat, ni ahnsou me ke kin koasoia duwen padahk mehlel, ke kin kasalehda ni sansal pwukoahn Sises nin duwen Mesaia? Omw wia met pahn kalaudehla omw kalahnganki dahme e ketin wiahiong uhk, dahme e ketin wiewia met, oh dahme e pahn ketin wia ni ahnsou kohkohdo. Duwehte Andru oh Pilip, ele ke koasoiongehr kisehmw kan oh pil kompoakepahmw kan duwen Mesaiao. Ni eimah, ke sou pwurehng tuhwong irail oh kasalehiong irail me Sises Krais iei Mesaia me inoupe mie, sapwellimen Koht sounkomour.
Ke Kak Kawehwehda?
• Ia duwen tohnpadahk kan ni mwehin Sises arail kak diaradahr Mesaiao?
• Ia kahrepe kesempwal riau me Sises ketin pwoukihla?
• Dahme Sises pahn ketin wia ni eh pahn kapwaiada sapwellime pwukoahn Mesaia?
[Kawehwehpen kilel kan nan ehu ehu pali 25]
Ia duwen aramas akan ni mwehin Sises ar kak ese me iei Ih Mesaiao me inoupe mie?
[Kawehwehpen kilel kan nan ehu ehu pali 27]
Ni omw kin koasoiong meteikan, ke kin kasalehda ni sansal duwen pwukoahn Sises nin duwen Mesaia?