Dahme Kitail Sukuhlki Sang Sises

Duwen Mouren Peneinei

Ia madamadau en pwopwoud me pahn kahrehiong peneinei kan en nsenamwahu?

Mouren pwopwoud iei inou sarawi ehu. Ni ahnsou me aramas akan idek rehn Sises ma pwopwoud ehu kak mweipeseng, Sises mahsanih: “Kumwail sohte kin wadek mahsen wet nan Pwuhk Sarawi duwen Sounwiepen aramas eh ketin wiahda ohl oh lih nin tapio? Oh Koht mahsanih, ‘Iei kahrepen me ohl pahn mweikihsang seme oh ine oh patehng eh pwoud, oh ira riemen pahn wiahla warteieu.’ Ira eri solahr wia riemen, pwe warteieu. Eri, kaleke aramas de kamweidpeseng me Koht ketin kapatapenehr. . . . Mehmen mweisang eh pwoud ni kahrepe ieu me kaidehn kamwahl, e ahpw pwoudikihda emen lih tohrohr, e wiadahr dipen kamwahl.” (Madiu 19:4-6, 9) Ni ahnsou me pwopwoud ehu kin idawehn sapwellimen Sises kaweid oh kin lelepekpene, koaros nan peneinei pahn nsenamwahu oh sohte perki mehkot.

Dahme kahrehda poakohng Koht kin kahrehiong peneinei en nsenamwahu?

Sises mahsanih: “‘Ke pahn poakohng Kaun-o omw Koht sang nan kapehdomw unsek, sang ni ngenomw [“mour,” NW] unsek, sang ni omw lamalam koaros unsek.’ Ih met kosonned me keieu lapalap oh kesempwal.” Ia keriaun kosonned me kesempwal? Sises mahsanih: “Ke pahn poakohng mehn mpomw [iangahki omw peneinei me mihmi rehmw] duwen omw kin poakohng pein uhk.” (Madiu 22:37-39) Eri mouren peneinei nsenamwahu kin kohsang atail ahneki nanpwungmwahu rehn Koht. Atail poakohng ih pahn kamwakid kitail en poakohng emenemen.

Ia duwen pwopwoud kan arail kak kaperenda arail werek kan?

Ohl pwopwoud kan kin kaperenda arail pwoud kan ma re kin idawehn sapwellimen Sises mehn kahlemeng. Sises kin ketin kasalehda tounmetei ni eh kin ketin poakohng mwomwohdiso, me karasahiong sapwellime werek. (Episos 5:25) E mahsanih: “Duwehte Nein-Aramas me ketido, kaidehn pwe aramas akan en papah, a pwe en papah aramas akan.” (Madiu 20:28) Sises sohte kin ketin limeidihd ong irail akan me e ketin apwalih, ahpw e kin ketin kamweitala irail. (Madiu 11:28) Kahrehda ohl pwopwoud kan anahne doadoahngki arail manaman ni ahl kadek pwehn wia kamwahu ong tohnpeneinei koaros.

Lih pwopwoud kan kak paiekihda sapwellimen Sises mehn kahlemeng. Paipel mahsanih “duwen Koht eh tapwin Krais,” oh pil “duwen ohl pwopwoud eh moangen eh pwoud.” (1 Korint 11:3) Sises sohte kin ketin mwamwahliki koasoandi en uhpah Koht. E kin ketin wauneki mehlel Semeo. Sises mahsanih me e kin ketin “poaden wiewia mehkan me e [Koht] kin ketin kupwurperenki.” (Sohn 8:29) Lih pwopwoud men me kin uhpahiong eh pwoud pwehki e poakohng oh wauneki Koht kin kaperenda mouren eh peneinei.

Dahme pahpa oh nohno kan kak sukuhlki sang sapwellimen Sises madamadau ong seri kan?

Sises kin ketikihda sapwellime ahnsou ong seri kan oh kin ketin nsenohki arail madamadau oh pepehm kan. Paipel mahsanih: “Sises ahpw malipehdo kisin seri ko oh mahsanihong tohnpadahk ko, ‘Kumwail pweisang, kumwail mweidohng kisin seri kan en kohdo rehi.’” (Luk 18:15, 16) Ehu pak, aramas kan kauwe kisin pwutak kan pwehki re koasoia duwen arail pwoson Sises. Ahpw Sises ketin kapinga me pwulopwul pwukat oh mahsanihong irail kan me kauwe: “Kumwail sohte mwahn kin wadek mahsen en Pwuhk Sarawi me mahsanih, ‘Komw ketin aleier kaping unsek sang ni ewen seri kan oh sang rehn me kin wie dihdi kan?’”—Madiu 21:15, 16.

Dahme seri kan kak sukuhlki sang Sises?

Sises kin ketikihda mehn kahlemeng mwahu ong seri kan duwen arail pahn nsenohki mehkan me pid duwen Koht. Ni eh mahki sounpar 12, re diarada ih “nan Tehnpas Sarawio, ni eh ketiket nanpwungen sounkawehwe ko, karokaronge irail oh kekeinemwe rehrail.” Dahme wiawi? “Koaros me iang rongorong inenen pwuriamweikihla sapwellime kupwurokong me pwarada ni sapwellime pasapeng kan.” (Luk 2:42, 46, 47) Mendahki kupwurokong wet, e sohte kin ketin pohnmwahso. Ahpw e kahrehiong eh kin ketin wauneki seme oh ine. Paipel mahsanih: “E kin ketin peikiong ira.”—Luk 2:51.

Pwehn kalaudehla omw wehwehki ire wet, kilang irelaud 14 nan pwuhken Dahme Paipel Uhdahn Padahngki?a

[Nting tikitik me mi pah]