Dahme Kitail Sukuhliki Sang Sises

Duwen Atail Kin Ehuiong Meteikan

Ia kahrepen en kadek?

Ke kin kadek mendahki aramas sohte kin kadek ong uhk? Ma kitail men alasang Sises, kitail anahne kadek ong irail kan me kailongki kitail. Sises mahsanih: “Ma kumwail pahn poakohngete irail kan me poakohng kumwail, soangen pai dah me kumwail koapworopworki en ale? Pwe me dipan akan pil kin poakohng irail kan me kin poakohng irail. . . . Eri soh, kumwail poakohng amwail imwintihti kan . . . oh kumwail pahn wiahla sapwellimen Koht, Wasa Lapalahpie. Pwe e kin ketin kalahngan ong me kin dup suwed kan oh me suwed akan.”—Luk 6:32-36; 10:25-37.

Ia kahrepen en mahk?

Ni ahnsou me kitail wiahda sapwung kan, kitail men Koht en ketin mahkohng kitail. Sises padahkihong kitail me e konehng en kapakapki sapwellimen Koht mahk. (Madiu 6:12) Ahpw, Sises pil mahsanih me Koht pahn ketin mahkohng kitail ma kitail kasalehda mahkohng meteikan. E mahsanih: “Ma kumwail pahn mahkikihong meteikan sapwung kan me re wiahiong kumwail, nahn Samamwail me ketiket nanleng pahn pil ketin mahkikihong kumwail dipamwail kan. A ma kumwail sohte pahn mahkikihong meteikan ar sapwung kan ong kumwail, eri, Samamwail me ketiket nanleng pil sohte pahn ketin mahkikihong kumwail sapwung kan me kumwail kin wiahda.”—Madiu 6:14, 15.

Iaduwen peneinei ehu en ahneki nsenamwahu?

Mendahki Sises sohte pwopwoud, kitail kak sukuhlikihsang reh iaduwen wiahda mour en peneinei nsenamwahu. E ketikihda mehn kahlemeng mwahu me kitail kak alasang ni eh koasoi oh wiewia kan. Tehkpene ire siluh pwukat:

1. Ohl pwopwoud men anahne poakohng eh pwoud duwehte pein paliwere. Sises ketikihda mehn kahlemeng ong ohl pwopwoud kan. E mahsanihong sapwellime tohnpadahk kan: “I pahn kihong kumwail kosonned kapw ehu: kumwail en poakpene nanpwungamwail. Duwen ei poakohng kumwail.” (Sohn 13:34) Doadoahngki kaweid wet ong irail ohl pwopwoud kan, Paipel mahsanih: “Kumwail ohl pwopwoud kan, kumwail poakohng amwail werek kan duwehte Krais eh ketin poakohng mwomwohdiso oh ketin pangala pein ih pwehki mwomwohdiso. Ohl akan uhdahn pahn poakohng ar werek kan duwehte ar kin poakohng pein paliwararail kan. Ohl me kin poakohng eh werek, kin poakohng pein ih. Sohte me kin kailongki pein paliwere. Pwe e kin kamwenge oh e kin kanai, duwehte Krais eh kin ketin apwalih mwomwohdiso.”—Episos 5:25, 28, 29.

2. Ohl oh lih pwopwoud kan anahne loalopwoatohng emenemen. En wia nsenen pwopwoud ong emen me kaidehn ahmw pwoud kin wia dihp ehu ong Koht oh kauwehla mouren peneinei. Sises mahsanih: “Kumwail sohte kin wadek . . . ‘Iei kahrepen me ohl pahn mweikihsang seme oh ine oh patehng eh pwoud, oh ira riemen pahn wiahla warteieu’? Ira eri solahr wia riemen, pwe warteieu. Eri, kaleke aramas de kamweidpeseng me Koht ketin kapatapenehr. . . . Kumwail en ese pwe mehmen mweisang eh pwoud ni kahrepe ieu me kaidehn kamwahl, e ahpw pwoudikihda emen lih tohrohr, e wiadahr dipen kamwahl.”—Madiu 19:4-9.

3. Seri kan anahne peikiong arail pahpa oh nohno kan. Nin duwen seri men Sises peikiong eh pahpa oh nohno mendahki Sises aramas unsek men ahpw eh pahpa oh nohno soh. Paipel mahsanihki duwen Sises ni ahnsou me e sounpar 12: “Sises eri ketin iang ira [eh pahpa oh nohno] ketiketlahng Nasaret, wasa e kin ketin peikiong ira.”—Luk 2:51; Episos 6:1-3.

Ia kahrepen en doadoahngki kaweid pwukat?

Me pid duwen kasukuhl me e padahkihong sapwellime tohnpadahk ko, Sises mahsanih: “Kumwail eseier padahk mehlel wet; eri, ia uwen amwail peren ma kumwail pahn kapwaiada!” (Sohn 13:17) Pwehn wia Kristian mehlel men, kitail anahne doadoahngki kaweid kan me Sises ketikihong kitail ong duwen atail kin ehuiong meteikan. E mahsanih: “Ihme aramas koaros pahn esehki me kumwail nei tohnpadahk, ma kumwail pahn limpoakpene.”—Sohn 13:35.

Pwehn kalaudehla ahmw wehwehki ire pwukat kilang irelaud 14 en pwuhken What Does the Bible Really Teach?a (Dahme Paipel uhdahn padahngki?)

[Nting tikitik me mi pah]

[Kawehwehpen kilel kan nan ehu ehu pali 16]

Sapwellimen Sises karasas en pwutak me salongala kin padahkihong kitail kesempwalpen kadek oh mahk.—Luk 15:11-32

[Kawehwehpen kilel kan nan ehu ehu pali 17]

Ohl oh lih pwopwoud kan anahne loalopwoatohng emenemen