Ohl Pwopwoud kan—Alasang Mwomwen en Krais Kaunda
“Krais eh tapwin aramas koaros.”—1 KORINT 11:3.
1, 2. (a) Iaduwen ahmw pahn kin sohng pweida en ohl pwopwoud men? (b) Dahme kahrehda e kesempwal kitail en pohnese me Koht me tepin koasoanehdi pwopwoud?
IADUWEN ahmw pahn sohng uwen pweida en ohl pwopwoud men? Sang ni ah koahiek en madamadau de kehlail en paliwar? Sang ni ah koahiek en wiahda mwohni? De sang ni ah kin kasalehda limpoak oh kadek ohng ah pwoud oh nah seri kan? Ohl pwopwoud tohto sohte kin pweida ohng ni pelien kasalehda limpoak oh kadek ohng ah peneinei, pwehki irail mihla pahn ngehn en sampah oh aramas akan. Pwekida? Pali laud en ahnsou pwehki arail sohte kin tehk oh kapwaiada kaweid kan en Ih me wiahda pwopwoud—Meno me “ketin wiahda lih emen sang tihnkopwou me e ketikihsang rehn aramaso, oh ketin kahrehdohng aramaso.”—Senesis 2:21-24.
2 Sises Krais kin kasalehda me koasoandi en pwopwoud uhdahn tepisang rehn Koht, ni ah mahsanihong irail me kin kauwe ih: “Kumwail sohte kin wadek mahsen wet nan Pwuhk Sarawi duwen Sounwiepen aramas eh ketin wiahda ohl oh lih nin tapio? Oh Koht mahsanih, ‘Iei kahrepen me ohl pahn mweikihsang seme oh ine oh patehng eh pwoud, oh ira riemen pahn wiahla warteieu.’ Ira eri solahr wia riemen, pwe warteieu. Eri, kaleke aramas de kamweidpeseng me Koht ketin kapatapenehr.” (Madiu 19:4-6) Ni mehlel, pwe pwopwoud ehu en kak pweida, ira anahne en pohnese me Koht me tepin koasoanehdi pwopwoud ihme ira anahnehki kapwaiada kaweid kan me dierek nan Paipel pwe ara pwopwoud en kak pweida.
Iaduwen Ohl Pwopwoud Men Kak Pweida
3, 4. (a) Dahme kahrehda Sises ahneki wehwe laud duwen pwopwoud? (b) Ihs me wia sapwellimen Sises werek ni karasaras oh iaduwen ohl pwopwoud kan pahn kin apwalih arail pwoud kan?
3 Ehu mehn sawas ohng ohl pwopwoud emen pwe en kak pweida iei en sukuhliki dahme Sises mahsanih oh alasang Ih. E inenen wehwehki laud duwen pwopwoud pwehki e ketier ni ahnsou me tepin pwopwoudo kapikipikda oh nih ahnsou me ira pwopwoudla. Siohwa Koht mahsanihong ih: “A met [kita] pahn wiahda aramas, [kita] pahn wiahda aramas rasehng [kita].” (Senesis 1:26) Ei, Koht mahmahsaniong Ih me E ketin kapikada mwohn aramas koaros oh mehkoaros oh ih me “mi limwah, duwehte sounsawas emen.” (Lepin Padahk 8:22-30) Menet iei Ih me “mesenih en soahng kan koaros me kepikipikda.” Ih me “tepin mehkoaros me Koht ketin wiahda,” miehier mwohn kapikipik kan koaros.—Kolose 1:15; Kaudiahl 3:14.
4 Sises kin mwarenki “Sihmpwul en Koht,” oh e kin ni karasaras, e wia ohl pwopwoud emen. Tohnleng emen mahs mahsanih: “Kohdo mahs, pwe I en kasalehiong uhk lih kamwohdo, werek en Sihmpwulo.” (Sohn 1:29; Kaudiahl 21:9) Eri ihs me wia lih pwopwoudo? “Werek en Sihmpwulo” iei sapwellimen Krais keidi kan, me kin ieiang ih nan sapwellime kaunda nanleng. (Kaudiahl 14:1, 3) Eri, mwomwen ahn Sises kin apwalih sapwellime tohnpadahk kan ni ahnsou me e ketiket sampah wia mehn kahlemeng mwahu ohng irail ohl pwopwoud kan ohng ia mwomwen arail pahn kin apwalih arail pwoud lih kan.
5. Sises kin wia mehn kahlemeng mwahu ohng ihs?
5 Mehlel, Paipel kasalehda me Sises wia mehn karasepe mwahu ohng irail sapwellime werek kan koaros ni ah ntingihdi wasaht: “Krais eh lokolongkin kumwail oh ketikihong kumwail karasepe mwahu, ih pil duwen amwail pahn idawehn oh kahlemengih.” (1 Piter 2:21) Ahpw, ih me keieu wia mehn kahlemeng mwahu ohng ohl akan. Paipel mahsanih: “Krais eh tapwin aramas koaros, duwen ohl pwopwoud eh moangen eh pwoud, oh duwen Koht eh tapwin Krais.” (1 Korint 11:3) Pwehki Krais iei tapwin ohl kan, eri ohl pwopwoud kan anahne en alasang ah mehn kahlemeng mwahu. Eri, mehn kahlemeng en tapwi anahne en kadoadoahk pwe peneineio en pweida oh peren. Pwe en alehdi met, ohl pwopwoud kan anahne en kin apwalih arail pwoud lih kan ni ahl en limpoak nin duwen me Sises kin wia ohng ah pwoud lih ni karasaras, de irail sapwellime tohnpadahk ko.
Iaduwen Ahmw Pahn Kin Apwalihala Kahpwal kan nan Pwopwoud
6. Iaduwen irail ohl pwopwoud kan kin werekiong arail pwoud kan?
6 Nan sampah suwed wet rahnwet, ohl pwopwoud kan keieu anahne en alasang mehn kahlemeng mwahu en Sises me pid kanengamah, limpoak, oh tengeteng oh kolokol dahme pwung. (2 Timoty 3:1-5) Me pid mehn kahlemeng mwahu me Sises ketikihda, kitail wadek nan Paipel me mahsanih: “Kumwail ohl pwopwoud kan pil duwehte, ni amwail pahn kin werekiong amwail pwoud kan [ni elen loalokong].” (1 Piter 3:7, NW) Ei, irail ohl pwopwoud kan anahne en apwalihala kahpwal kan nan pwopwoud ni elen loalokong duwehte Sises kin wia ni ah kin lelohng kahpwal. E lelohng lokolok laudsang dahme aramas teikan kin lelohng, ahpw e kin wehwehki me Sehdan oh nah ngehn saut kan oh pil sampah suwed wet me kin pwukoahki mepwukat. (Sohn 14:30; Episos 6:12) Sises sohte kin pwuriamweiki kahpwal kan me kin pwarada, ihme kahrehda irail me pwopwoud kan en dehr pil pwuriamweikihla ma irail lelohng “apwal tohto nan mouren sampah.” Paipel pil kehkehlikihong irail me pwopwoud kan irail en kasik soangen kahpwal pwukat.—1 Korint 7:28.
7, 8. (a) Dahme kin pidada en werekiong ahmw pwoud ni loalokong? (b) Dahme kahrehda lih pwopwoud kan warohng ale wahu?
7 Paipel mahsanih me irail ohl pwopwoud kan pahn kin werekiong arail pwoud kan “[ni elen loalokong] oh pohnese me iei irail me luwet, oh . . . uhdahn pahn waunekin irail.” (1 Piter 3:7) E sohte pahn kin kaunda ah pwoud ni lemei nin duwen me Paipel kohpada ahpw ohl pwopwoud men me kin men ale kupwuramwahu en Siohwa pahn kin wauneki ah pwoud. (Senesis 3:16) E pahn apwalih ih nin duwen kisakis pweilaud ehu oh e sohte pahn kin doadoahngki ah kehl en paliwar pwe en kamedekihala ih. Weksang met, e pahn kin nsenohki ah pepehm kan oh kin ahnsou koaros wauneki ih.
8 Dahme kahrehda irail ohl pwopwoud kan anahne en wauneki arail pwoud lih kan? Paipel sapengki met mahsanih: “pwe irail pil pahn ale kapai en mour sang rehn Koht duwehte kumwail. Kumwail pahn kin wia met pwe en dehr mie mehkot me pahn kerempwa amwail kapakap akan.” (1 Piter 3:7) Ohl pwopwoud kan anahne en wehwehki me Siohwa sohte kin kilangwohng ohl kan me kin kaudokiong Ih ni ahl ehu me irail lapalapasang irail lih kan me pil kin kaudokiong Ih. Irail lih kan me pahn iang ale kupwuramwahu en Koht, pahn iang ale soangen kapai ohte me irail ohl akan pahn pil ale me iei kisakis en mour soutuk—me tohto pil iang perenki mour nanleng, wasa me “sohte wekpeseng en nanpwungen . . . ohl akan oh lih akan.” (Kalesia 3:28) Eri ohl pwopwoud kan anahne en tamataman me ahn aramas emen lelepek me kin kesempwal mwohn Koht. E sohte lipilipilki ma aramaso ohl de lih, de ohl pwopwoud men de lih pwopwoud men, de ma pil seri men.—1 Korint 4:2.
9. (a) Nin duwen me Piter mahsanih, dahme kahrehda irail ohl pwopwoud kan anahne wauneki arail pwoud lih kan? (b) Iaduwen Sises kasalehda wahu ohng lih kan?
9 Kesempwalpen ohl pwopwoud men en apwalih ah pwoud ni wahu kin sansalda nan mahsen kan en Piter ni eh mahsanih, “pwe en dehr mie mehkot me pahn kerempwa amwail kapakap akan.” Ia uwen keper en soangen mehn kerempwa wet! E pil kakete kahrehiong en ohl pwopwoudo kapakapo en sohte kak pweida nin duwen me pil wiawihongehr ekei sapwellimen Koht ladu kan mahs me sohte kin lelepek. (Koulen Kedepwidepw kan 3:43, 44) Ni loalokong, irail ohl Kristian kan—me kin pwopwoud de me pil kin medemedewe pwopwoud—pahn sukuhliki duwen ahn Sises kin apwalih lih akan ni ahl en wahu. E kin kasamwo irail nin duwen pwihn ehu me kin iang ih nan ah doadoahk en kalohk, oh kin apwalih irail ni kadek oh wahu. Ehu ahnsou, Sises pil kasalehiong mahs irail lih kan duwen ehu ire mehlel oh mwuhr padahkiong irail en padahkiong irail ohl akan duwen met!—Madiu 28:1, 8-10; Luhk 8:1-3.
Mehn Kahlemeng kan me Keieu Konehng Ohl Pwopwoud kan
10, 11. (a) Dahme kahrehda irail ohl akan me keieu anahne en sukuhliki mehn kahlemeng en Sises? (b) Iaduwen irail ohl pwopwoud kan pahn kasalehda limpoak ohng arail pwoud lih kan?
10 Nin duwen me sansalehr mwowe, Paipel kin karasahiong nanpwungen ohl pwopwoud men oh ah pwoud lih duwehte nanpwungen Krais oh ah “werek lih” me iei sapwellime mwomwohdiso en irail me keidi kan. Paipel mahsanih: “Ohl pwopwoud ih me moangen eh pwoud, duwehte Krais me tapwin mwomwohdiso.” (Episos 5:23) Mahsen pwukat en kin kangoange irail ohl pwopwoud kan en kin kasawih iaduwen Sises kin wia tapwi de kaun ohng sapwellime werek kan. Ihte ma e pahn wia soangen kasawih duwehte met me ohl pwopwoudo pahn kak en idawehn ni pwung mehn kahlemeng en Sises oh pahn kak kasalehiong arail pwoud kan ahl pwung, limpoak oh nsenoh nin duwen me Sises kin ketin wiaiong sapwellime mwomwohdiso.
11 Paipel kin kangoange Kristian akan: “Kumwail ohl pwopwoud kan, kumwail poakohng amwail werek kan duwehte Krais eh ketin poakohng mwomwohdiso oh ketin pangala pein ih pwehki mwomwohdiso.” (Episos 5:25) Nan irelaud en mwowe kan en nan pwuhken Episos, “mwomwohdiso” kin adaneki “paliwar en Krais.” Paliwar karasaras wet kin wiawihkihda ohl oh lih koaros, oh koaros kin patpene wiahda paliwar ehu me kin mwekid ni ahl pwung oh pweida. Ei, Sises me kin wia “tapwin paliwere, iei mwomwohdiso.”—Episos 4:12; Kolose 1:18; 1 Korint 12:12, 13, 27.
12. Iaduwen Sises kasalehda limpoak ohng tohn mwomwohdiso kan?
12 Sises ketin kasalehda limpoak ohng “mwomwohdiso” ahpw ni mehlel sang ni ah kin papah ni keneinei anahn akan en irail kan me pahn iang wiahla kisehn ah mwomwohdiso. Karasepe, ni ahnsou me irail tohnpadahk ko kin pwangada, e mahsanih: “Kitail kohla kalapwukala mahs . . . wasa kumwail kak kommoal ie.” (Mark 6:31) Emen wahnpoaron ko ntingihdi met duwen Sises mwohnte en Sises kamatala: “E kin ketin loalloale sapwellime kan [kisehn paliwere ni karasaras] . . . , lel ni imwi.” (Sohn 13:1) Ia uwen kaselel en mehn kahlemeng wet me Sises ketikihda wasaht duwen iaduwen ohl pwopwoud kan pahn kin apwalih arail pwoud lih kan!
13. Iaduwen ohl pwopwoud kan pahn kin poakohng arail pwoud?
13 Wahnpoaron Pohl pil doadoahngkihte mehn kahlemeng mwahu en Sises ohng ohl pwopwoud kan ni ah kehkehliki: “Ohl akan uhdahn pahn poakohng ar werek kan duwehte ar kin poakohng pein paliwararail kan. Ohl me kin poakohng eh werek, kin poakohng pein ih. Sohte me kin kailongki pein paliwere. Pwe e kin kamwenge oh e kin kanai, duwehte Krais eh kin ketin apwalih mwomwohdiso.” Pohl doula kapatahiong: “Eri, emenemen ohl pwopwoud en poakohng eh werek duwehte eh kin poakohng pein ih.”—Episos 5:28, 29, 33.
14. Iaduwen ohl pwopwoud men kin apwalih pein paliwere me soh unsek, oh dahme met kin kasalehda duwen iaduwen ah pahn apwalih ah pwoud ni ahl me konehng?
14 Medewe duwen mahsen kan en Pohl. Ohl loalokong men kak pein kauwehla paliwere? Ma sendin nehn ohl emen kahrehda en dipekelekel, eri met wehwehki me e pahn wokih sendin neho? Uhdahn soh! Ohl pwopwoud men kin pein kasarowe pein ih mwohn ienge kan oh kin lipahnede duwen pein ah sapwung kan? Soh! Eri, dahme kahrehda e kin nda mehkan me kin kamedekehla ah pwoud de pil wia suwed sang, ma liho kin sapwungala? Ohl pwopwoud kan anahne en kin medewe kaidehn ihte dahme mwahu ohng irail ahpw pil ohng arail pwoud lih kan.—1 Korint 10:24; 13:5.
15. (a) Dahme Sises wia ni ahnsou me sapwellime tohnpadahk kan kin kasalehda duwen arail luwet en war kan? (b) Soangen iren kasukuhl dah kan kitail kak kihsang sapwellimen Sises mehn kahlemeng mwahu wet?
15 Medewehla iaduwen Sises kasalehda duwen ah kin nsenohki sapwellime werek kan ni pwohng mwohn ah mehla, ni ah kin kasalehda duwen luwet en aramas. Mendahki e kin pwurehng pekipeki irail en kapakap, irail meirla pahn pak siluh nan mwetuwel en Ketsemeni. Ekiste mwurin mwo, sounpei kan pidakihpene irail. Sises idek rehn ohl ako: “Ihs me kumwail raparapahki?” Ni ahnsou me irail sapengki: “Sises mehn Nasaret,” e sapengki: “Ngehi iei ih.” E mwahngih me ‘awao leledohr’ me e pahn kamakamala, e ahpw mahsanih: “Eri, ma kumwail raparapahkin ie, kumwail mweidohng ohl pwukat re en kohkohla.” Sises kin ahnsou koaros nsenohki irail sapwellime tohnpadahk kan—me iang wia kisehn sapwellime werek ni karasaras—oh e rapahki ahl me irail kak pitila. Ni ohl pwopwoud kan kin sukuhliki duwen mwomwen Sises kin apwalih sapwellime tohnpadahk kan, irail pahn diarada mehn kasukuhl mwahu kan me irail kak doadoahngki ohng iaduwen irail pahn kin apwalih arail werek lih kan.—Sohn 18:1-9; Mark 14:34-37, 41.
Sapwellimen Sises Limpoak Sohte Kohsang Pepehm Kelehpw
16. Ia pepehm en Sises ohng Marda, ahpw iaduwen e kin kapwungala ih?
16 Paipel mahsanih: “Sises kin ketin loalloale Marda, oh rie lih, oh pil Lasarus,” me kin kalapw luke ih ohng nan imwarail. (Sohn 11:5) Ahpw, Sises sohte pweiek en panawih Marda ni ahnsou me e kin nohn kedirepwkihla mwenge kan me e kin kaukaunop, oh kahrehda sohla ah ahnsou en ale padahk en ngehn kan sang reh. E mahsanih: “Marda, Marda! Ke pwunodkidahr oh soupisengkilahr soahng tohto. A ke en ese pwe soahng teieu me kesempwal kowahlahpie.” (Luk 10:41, 42) E sansal duwen ah limpoak ohng Marda me kahrehda e mengei ohng Marda en ale ah kaweido. Duwehte met, irail ohl pwopwoud kan anahne en apwalih arail pwoud kan ni ahl en kadek, limpoak,oh kin pilada mwahu ah lokaia kan. Ahpw, ma e anahne en kapwungala, e pil konehng en kasalehda met, nin duwen me Sises ketin wia.
17, 18. (a) Iaduwen Piter uhwongada Sises oh iaduwen ah ale kaweid de kapwungala? (b) Pwukoa dah me ohl pwopwoud men ahneki?
17 Ni ehu ahnsou, Sises kawehwehiong sapwellime wahnpoaron ko me e anahne kohla Serusalem, wasa me e pahn ale kalokolok sang rehn “soumas oh samworo lapalap oh sounkawehwehn Kosonnedo kan. [E] pahn kamakamala, a [e] ahpw pahn iasada ni kesiluhwen rahn.” Piter eri tapihada kapwung ih oh nda: “Maing ei Kaun, Koht ketin keinapwih soahng wet, mepwukat sohte mwahn pahn lelohng komwi.” Sansal me pepehm kin karotongehla Piter wasaht. Eri, anahne en kapwungala met. Eri Sises ahpw mahsanih ong ih: “Kohla mwuri, kowe Sehdan! Meninkau men kowe rehi, pwe ke kin lemelemehte mehkan me en aramas, a kaidehkin mehkan me sapwellimen Koht.”—Madiu 16:21-23.
18 Sises kasalehda dahme Siohwa kupwurki—me e pahn lokolok pahn soahng tohto oh pahn kamakamla. (Melkahka 16:10; Aiseia 53:12) Eri Piter sapwung ni ah song en kauhdi Sises. Ehi, Piter anahne kaweid kehlail duwehte kitail kin pil anahne ekei ahnsou. Nin duwen tapwin peneinei ehu, ohl pwopwoud kan ahneki pwung oh pwukoa en kapwungala tohn ah peneinei, iangahki ah pwoud. Mendahki anahne en kehlail, ahpw kapwungala wet anahne en wiawi ni ahl en kadek oh limpoak. Eri, duwehte Piter kin anahne Sises en kapwungala ah lamalam ohng mehkan, ohl pwopwoud kan ekei pak pil anahne wia duwehte met ohng arail pwoud lih kan. Karasepe, ohl pwopwoud men ele anahne en padahkiong ah pwoud ni ahl en kadek dahme kahrehda ekei wekidekla kan anahne en wiawi me pid duwen ah likou de kapwat teikan ma eh kapwat sohte nohn konehng dahme Pwuhk Sarawi kaweidki.—1 Piter 3:3-5.
Kesempwalpen Ohl Pwopwoud kan en Kin Kanengamah
19, 20. (a) Kahpwal dah me pwarada nanpwungen sapwellimen Sises wahnpoaron ko oh iaduwen Sises mwekidki met? (b) E kin pweida en Sises kin song en kapwungala irail?
19 Ma mie sapwung ehu me anahne petehk en kohieng, ohl pwopwoud kan en dehr kasik me arail doadoahk pahn mwadang pweida oh pahn kapwungala sapwungo ahnsowohte. Sises kin songosong ahnsou kei pwe en kak kapwungala tiahk en sapwellime wahnpoaron ko. Karasepe, uhpene ehu me wiawiher nanpwungen wahnpoaron ako pil pwurehng pwarada ni kerenlahn imwin sapwellimen Sises doadoahk sampah. Irail akamaikihda ihs me keieun lapalap nanpwungarail. (Mark 9:33-37; 10:35-45) Sohte pwand mwurin keriau en arail wia soahngohte, Sises koasoanehdi irail en kelehpwla oh wia arail kasarawih en Pahsohpa. Ni kamadipwo, sohte emen irail men tiengla mwowe oh wia tiahk karakarahk en widen pwehl en nehn mehteikan. Sises eri wia met. Mwuri e mahsanih: “I wiahiong kumwail mehn kahlemengih ehu.”—Sohn 13:2-15.
20 Irail ohl pwopwoud kan me kin ahneki soangen lamalam en karakarahk duwehte ahn Sises, kin mengeiong liho en kin peikiong oh utung ih. Ahpw kanengamah kin anahn wasaht. Pwongohte en Pahsohpa, irail wahnpoaron ko pil akamaikihda ihs me lapalap nan pwungarail. (Luhk 22:24) Wekidekla en lamalam oh tiahk kin anahne ahnsou oh e kin wiawi ekis ekis. Ahpw ia uwen eh wia kapai ehu ni ahnsou me e kin imwila mwahu duwehte dahme kin wiawihong irail wahnpoaron ko!
21. Dahme ohl pwopwoud kan en tamanda oh wia ni ahnsou me irail pahn kin lelohng kahpwal kan rahnwet?
21 Rahnwet, pwopwoud kan kin lelohng kahpwal tohto sang mahso. Me tohto sohlahr kin kesempwaliki arail inou en pwopwoud. Ahpw, ohl pwopwoud kan, tehk oh medemedewe duwen tepidahn pwopwoud. Tamanda me pwopwoud tepisang rehn Koht, e wiawihdahr oh koasoandier sang atail Koht limpoak Siohwa. E ketikihdo sapwellime Iehros Sises kaidehn en wiahte emen me pahn tomwki dipatail kan—atail Sounkomour—ahpw pil nin duwen mehn kahlemeng mwahu ehu ohng irail ohl pwopwoud kan en alasang.—Madiu 20:28; Sohn 3:29; 1 Piter 2:21.
Iaduwen Ahmw Pahn Sapeng?
• Dahme kahrehda e kesempwal kitail en tehk iawasa pwopwoud tepisang ie?
• Ni ahl dah kan me kangoang kohieng ohl akan en kin limpoak ohng arail pwoud kan?
• Mehn kahlemeng dah kan me pid duwen ahn Sises kin apwalih sapwellime wahnpoaron kan me kasalehda iaduwen ohl pwopwoud kan pahn kin wia tapwi kei me duwehte ih?
[Kawehwehpen kilel kan nan ehu ehu pali 20]
Dahme kahrehda irail ohl pwopwoud kan anahne sukuhliki mehn kahlemeng kan ohng iaduwen Sises kin apwalih lih akan?
[Kawehwehpen kilel kan nan ehu ehu pali 19]
Ni ahnsou me sapwellime wahnpoaron kan kin pwangada, Sises kin kasalehda ah nsenohkin irail
[Kawehwehpen kilel kan nan ehu ehu pali 18]
Ohl pwopwoud kan en kin kapwungala arail pwoud kan ni ahl en kadek, oh pilada lokaia konehng kan