Kaweid Loalokong Ong Pwopwoud Kan
“Kumwail lih pwopwoud kan, kumwail pein uhpah amwail pwoud kan, duwehte amwail kin uhpah Kauno. Kumwail ohl pwopwoud kan, kumwail poakohng amwail werek kan.”—EPISOS 5:22, 25.
1. Ia madamadau pwung ieu me pid koasondi en pwopwoud?
SISES mahsanih me pwopwoud kin wia koasoandi ehu me Koht ketin kapatapenehr ohl emen oh lih emen en wiahla “warteieu.” (Madiu 19:5, 6) Koasondi wet kin pid aramas riemen me kin ahneki irair wekpeseng ahpw ira kin nantiong ehupene oh doadoahkpene pwen ahneki mehn akadei ehute. Pwopwoud iei koasondi ieu me aramas riemen inoukihpene me ira pahn mihpene lao lel emen rehra pahn mehla, met kaidehn inou ieu ong ahnsoukiste me kak mwadangete ohla. Nan sahpw tohto, pwopwoud tohto kin kakete mwadang mweipeseng, ahpw ong Kristian kan, koasondi en pwopwoud kin wia mehkot sarawi. Mweipeseng kak wiawi ihte, ma mie kahrepe mwahu.—Madiu 19:9.
2. (a) Sawas dah kan mie ong pwopwoud kan? (b) Dahme kahrehda e kesempwal atail pwopwoud kan en pweida?
2 Emen sounkaweid en pwopwoud koasoiada: “Pwopwoud ieu me kin pweida iei ma irail kak wekidekala arail madamadau kan ni ahr kin lelohng irair kapw kan de powehdi kahpwal akan oh doadoahngki sawas kan me mie ong arail mour en pwopwoud.” Ong pwopwoud en Kristian akan, sawas pwukat iei kaweid loalokong kan me kohsang Pwuhk Sarawi, sawas sang iengerail Kristian akan, oh kapakap karanih Siohwa. Pwopwoud ieu me kin pweida kin kak dadaurete mendahki kahpwal akan, oh erein sounpar en ara pwopwoud, ohl oh lih pwopwoud pahn diarada peren oh nsenamwahu. Ahpw kesempwal sang met, e pahn kawauwih Siohwa Koht, me wiahda koasondi en pwopwoud.—Senesis 2:18, 21-24; 1 Korint 10:31; Episos 3:15; 1 Deselonika 5:17.
Kahlemengih Sises oh Sapwellime Mwomwohdiso
3. (a)Kasalehda iren kaweid me Pohl ketikihda me pid duwen koasoandi en pwopwoud. (b) Mehn kahlemeng mwahu dahieu me Sises wia?
3 Sounpar riekid samwalahro, wahnpoaron Pohl kihda kaweid loalokong ong irail pwopwoud Kristian kan ni e ntingihdi: “Ihme lih pwopwoud kan uhdahn pahn pein uhpah arail werek kan duwehte mwomwohdiso eh kin uhpah Krais. Kumwail ohl pwopwoud kan, kumwail poakohng amwail werek kan duwehte Krais eh ketin poakohng mwomwohdiso oh ketin pangala pein ih pwehki mwomwohdiso.” (Episos 5:24, 25) Karasaras mwahu kan kin sansal nan iren Paipel wet! Irail Kristian lih pwopwoud kan kin, ni aktikitik, uhpah arail werek kan kin alasang mwomwohdiso ni arail pohnese oh kapwaiada koasondi en tapwi. Ohl pwopwoud pwoson akan kin pil poakohng arail werek kan, edetehn ahnsoun mwahu de kahpwal akan, oh met kin kasansalehda me irail kin idawehn mehn kahlemeng en Krais ni ah kin poakong tohn mwomwohdiso kan oh apwalih irail.
4. Iaduwen ohl pwopwoud kan kak kahlemengih mehn kahlemeng en Sises?
4 Kristian ohl pwopwoud kan kin wia tapwin arail peneinei kan, ahpw pil mie arail tapwi, iei Sises. (1 Korint 11:3) Nin duwen Sises kin ketin apwalih sapwellime mwomwohdiso, eri, ohl pwopwoud kan kin pil ni limpoak apwalih arail peneinei kan duwen ahr anahn en pali ngehn oh paliwar, mendahki irail anahne tohnmeteikihla pein arail ahnsou oh kehl. Irail kin kesempwaliki anahn en arail peneinei kan laudsang pein arail ineng kan oh pilipil kan. Sises mahsanih: “Eri, kumwail wiahiong meteikan me kumwail kin anahne aramas akan en kin wiahiong kumwail. (Madiu 7:12) Kaweid wet kin keieu mwahu ong pwopwoud kan. Pohl kin kawehwehda duwen met: “Ohl akan uhdahn pahn poakohng ahr werek kan duwehte ar kin poakohng pein paliwararail kan. . . . Sohte me kin kailongki pein paliwere. Pwe e kin kamwenge oh e kin kanai.” (Episos 5:28, 29) Ohl emen anahne kamwenge oh poakohng ah werek duwehte eh kin kamwenge oh poakong pein ih.
5. Iaduwen lih pwopwoud kan kak kahlemengih mwomwohdisohn Kristian?
5 Lih pwopwoud kan me kin kaudokiong Koht kin kilangwong mwomwohdiso en Kristian nin duwen mehn kahlemeng mwahu ehu. Ni ahnsou me Sises ketiket nin sampah, sapwellime tohnpadahk kan perenki kesehla ahr doadoahk kan oh iangala ih. Mwurin ah pwoula, sapwellime kan kin uhpah ih, oh sounpar 2,000 samwalahro, mwomwohdisohn Kristian kin uhpah Sises oh sapwellime kaunda ni ahr wiewia koaros. Kristian lih pwopwoud kan kin sohte kin mwamwahleki ahr werek kan de mwamwahleki koasoandi en Pwuhk Sarawi me pid tapwin pwopwoud kan. Ahpw, irail kin sewese oh uhpa ahr werek kan, miniminpene oh kangoange irail. Ni ahnsou me ohl oh lih pwopwoud kin kin limpoakpene duwehte met, ara pwopwoud pahn pweida oh ira koaros pahn diar peren nan pwopwoud.
Ni Amwail Pahn Kin Werekiong Amwail Pwoud kan
6. Mehnia kaweid Piter ketikihong ohl pwopwoud kan, oh dahme kahrehda kaweid wet kesempwal?
6 Wahnpoaron Piter pil kin kihda kaweid ong pwopwoud kan, oh ah kaweid ong ohl pwopwoud kan kin inenen kehlail. E mahsanih: “Kumwail ohl pwopwoud kan pil duwehte, ni amwail pahn kin werekiong amwail pwoud kan, kumwail uhdahn pahn kin pohnese me iei irail me luwet, oh kumwail uhdahn pahn waunekin irail; pwe irail pil pahn ale kapaien mour sang rehn Koht duwehte kumwail. Kumwail pahn kin wia met pwe en dehr mie mehkot me pahn kerempwa amwail kapakap akan.” (1 Piter 3:7) Ahn Piter kaweid kin wia sansal ni kaimweseklahn mahsen kan en iretikitiko. Ma ohl pwopwoud emen sohte pahn kawahuwih ah werek, eri, e sohte kak ahneki nanpwungmwahu rehn Siohwa. Met pahn kerempwa ah kapakap kan.
7. Iaduwen ohl pwopwoud men anahne wauneki ah pwoud lih?
7 Iaduwen ohl pwopwoud kan kak kasalehda wahu ong arail werek kan? Ma ohl pwopwoud men pahn kasalehda wahu ong ah pwoud, e anahne apwalih ih ni limpoak oh wahu. Ma ohl pwopwoud men pahn ni kadek apwalih ah werek, aramas teikan sohte pahn perenki kilang. Pwe sounpadahk en mehn Krihk men ntingihdi: “Kosonned en mehn Rom akan sohte kin mweidong lih emen ah pwung. Ah pwung kan me pid kosonned kin duwehte seri men. . . . E anahne ni unsek uhpa ah werek, oh kosonnedo sohte pahn perehla ih sang ah pwoud ohl.” Weksang padahk kan en Kristian! Kristian ohl pwopwoud kan kin waunekin ah pwoud. E wiewia kan ong ah pwoud lih kin poahsoanda pohn kaweid en Kristian akan kaidehn pein ah pepehm kan. Oh pil, ki “loalokong” e kin pohnese me iei irail me luwet.
Ni Ahl Dahieu “Irail me Luwet”?
8, 9. Ni ahl dah kei me irail lih akan kin pahrekiong ohl akan?
8 Ni ahnsou me Piter ndinda me irail lih akan “me luwet,” met sohte kin wehwehki me lih luwet ni pali ngehn sang ohl de lih sohte loalokong duwehte ohl. Ni mehlel, Kristian ohl tohto kin ahneki pwais kaselel kan nan mwomwohdiso me lih akan sohte kak ahneki, oh nan koasoandi en peneinei, lih kin uhpah ahr pwoud ohl. (1 Korint 14:35; 1 Timoty 2:12) Eri, ohl akan oh lih akan koaros duwehpenehte, irail anahne kasalehda pwoson, kanengamah, oh tiahk mwakelekel. Oh nin duwen Piter mahsanih, ohl pwopwoud oh lih pwopwoud pahn “sohsohki . . . kapaien mour sang rehn Koht.” Me pid komour, ohl oh lih koaros kin pahrekpene mwohn silangin Siohwa Koht. (Kalesia 3:28) Piter ntingwohng Kristian me keidi kan nan keieun senturi. Ihme kahrehda, ah mahsen kan kin katamankin Kristian ohl pwopwoud kan me nin duwen “iengen Krais kan,” irail oh arail lih pwopwoud kan kin ahneki koapworoapwor ehute, iei nanleng. (Rom 8:17) Ehu rahn, ohl akan oh lih akan pahn papah nin duwen samworo kan oh nanmwarki kan nan sapwellimen Koht Wehin nanleng!—Kaudiahl 5:10.
9 Ohl pwopwoud Kristian me keidi kan sohte kesempwal sang arail pwoud lih me pil keidi kan. Ni ahlohte, irail ohl oh lih pwopwoud kan me kin ahneki koapworopwor en mih nin sampah—irail koaros soangen kesempwal tehieu. Irail ohl oh lih akan me kin iang “pokon kalaimwun” kamwakeledahr ahr likou kan oh pwetepwetkihlahr ntahn Sihmpwulo. Nin sampah pwon, irail ohl oh lih akan koaros kin kapinga Siohwa “ni rahn oh ni pwong.” (Kaudiahl 7:9, 10, 14, 15) Ohl oh lih akan koaros kin kasikasik en paiekihda wiahla “sapwellimen Koht seri kan nan arail saledek lingan” ni “mouro me uhdahn mour mehlel.” (Rom 8:21; 1 Timoty 6:19) Edetehn irail kin iang pwihn en me keidi kan de sihpw teikan, Kristian akan koaros kin papah Siohwa nin duwen “pwihn sihpw teieu” oh “sileparail pahn mehtehmen.” (Sohn 10:16) Mehpwukat wia kahrepe mwahu me Kristian ohl oh lih pwopwoud kan en kasalehda wahu ong emen emen!
10. Ni ahl dahieu me irail lih akan ‘luwet’?
10 Ni soangen ahl dahieu me irail lih akan ‘me luwet’? Mwein Piter kin koasoia met pwehki, ni oaralap, paliwar en lih kan kin tikitik oh luwet sang ohl akan. Patehng met, pwehki irairen soh unsek, pwais kaselel en neitik me lih kan ahneki kin pil kahrehiong lih tohto luwet en paliwar. Lih akan me mih nan sounpar en neitik mwein ele kin kalap soumwahu. Irail kin anahne epwel mwahu oh limpoak ni ahnsou me irail kin soan suwed de pwang me kin kohsang ni arail liseian de neitik. Ohl pwopwoud men me kin wauneki ah werek oh pohnese me e anahne sawas ni pali en pepehm, met pahn kak sewese ara pwopwoud en pweida.
Nan Pwopwoud me Emen Rehn Ohlo de Liho Saikinte Iang Kaudok Mehlel
11. Ni ahl dahieu me pwopwoud ieu kak pweida edetehn ira sohte iang ehu pelien lamalam?
11 Ahpw dahme pahn wiawi nan pwopwoud kan me emen rehn ohlo de liho iang kaudok mehlel mwurin ira pwopwoudla ahpw meteio sohte iangala kaudok mehlel? Soangen pwopwoud kak pweida? Pwopwoud tohto duwehte met kin pweida. Edetehn mie pelien lamalam riau nan pwopwoud ieu, ara pwopwoud pahn kak pweida ni peren oh werei. Pwe, pwopwoud iei koasondi pwung ieu mwohn silangin Siohwa; ira wiahla “warteieu.” Kahrehda, Kristian pwopwoud kan kin ale kaweid en mih rehn ah werek me saikinte iang kaudok mehlel ma e kin pwungki. Ma mie neira seri kan, neira kan pahn ale pai kan sang pwoson en arail pahpa de nohno me iangala Kristian.—1 Korint 7:12-14.
12, 13. Iaduwen Kristian lih pwopwoud kan kak kapwaiada kaweid en Piter ong sewese ahr pwoud ohl kan me saikinte iang kaudok mehlel?
12 Piter kin ni kadek kihda kaweid ong Kristian lih akan me arail pwoud ohl sohte iang kaudok mehlel. Ah kaweid kan pil konehng ong irail Kristian ohl pwopwoud kan me kin mih nan soangen irairohte. Piter ntingihdi: “Pil duwehte kumwail lih pwopwoud kan, kumwail peikiong amwail pwoud kan, pwe ma ekei irail sohte pwoson mahsen en Koht, re en alehkihla pwoson amwail mouren wiewia mwahu. Kumwail sohte anahne kapahrekiong irail, pwe re pahn pein kilang amwail mour mwakelekel oh duwen amwail wauneki Koht.”—1 Piter 3:1, 2.
13 E pahn mwahu ma lih pwopwoud men kak, ni kadek, kawehwehong ah pwoud duwen ah pwoson. Ahpw, dahme pahn wiawi ma ohlo sohte men rong ah pwoud? Mehlel, met ahn ohlo pilipil. Ahpw, mie koapworopwor, pwe tiahk mwahu me Kristian kan kin kak wia mehn kadehde kehlail ieu. Ohl pwopwoud tohto me, nin tapio, sohte perenki rong de kin uhwong pwoson en arail pwoud lih kan kin wekila oh wiahla aramas “me konehng ale mour soutuk” mwurin irail kilangada tiahk mwahu kan en arail werek kan. (Wiewia 13:48) Edetehn ohl pwopwoud men sohte pahn ale padahk mehlel en Kristian, mwein e pahn kak pwungkihla tiahk mwahu en eh pwoud lih, oh met pahn kak kakehlahda ara pwopwoud. Ohl pwopwoud emen me eh pwoud lih iang Sounkadehdehn Siohwa kan, wehkada me pein ih sohte kak kapwaiada koasoandi ile kan en Sounkadehdehn Siohwa kan. Ahpw, nan ehu kisinlikou ong nuhspepa ieu, e kahdaneki pein ih “ohl pwopwoud peren emen me pwoudkihda lih pwopwoud mwahu men” oh e uhd kapinga ah pwoud oh ienge Sounkadehde kan.
14. Iaduwen ohl pwopwoud kan kak sewese arail werek soh pwoson akan?
14 Kristian ohl pwopwoud kan me kin kapwaiada kaweid en Piter kin pil sewese arail pwoud lih kan en pedelong nan kaudok mehlel pwehki arail tiahk mwahu kan. Lih pwopwoud kan me sohte iang kaudok mehlel kin kilang me ahnsou me arail pwoud ohl iangala kaudok mehlel, irail wiahla aramas likilik kei, solahr kesehla neirail mwohni ong simwoak, sakau, oh pilein mwohni oh solahr kin doadoahngki lokaia kamedek kan. Ekei lih pwopwoud kan me saikinte iang kaudok mehlel tuhwong tohnmwomwohdiso en Kristian kan. Irail kin pwuriamweikihla perenki kilang pirien en Kristian limpoak ieu, oh met kin sewese irail en pil men karanih Siohwa.—Sohn 13:34, 35.
“Lingan en Mihmi Loalamwail”
15, 16. Soangen tiahk dahieu Kristian lih pwopwoud men anahne en kasalehda ma e men sewese ah pwoud ohl en pedolong nan kaudok mehlel?
15 Soangen tiahk dah kei mwein pahn kak sewese ohl pwopwoud soh pwoson akan en pedolong nan kaudok mehlel? Ni mehlel, tiahk me Kristian lih akan kin nsenkihda kasalehda. Piter kawehwehda: “Kumwail dehr kin doadoahngki kapwat en paliwar pwe en kalinganahla pein kumwail, duwehte wiepen ingihng en pitenmoang, de mwaramwar elin takai kesempwal oh kisin kohl mehn tiati, de likou kan me kumwail kin likawih. Ahpw amwail lingan en mihmi loalamwail ni mour mwakelekel en nan kapehdomwail, me iei ih lingan poatopoat ong me kin kadek oh meleilei, mepwukat me kesempwal mehlel mwohn silangin Koht. Pwe ih duwen lih sarawien kawa ko, me kin koapworopworki Koht, re kin kalinganahla pein irail pwehki ar kin uhpahiong ar werek kan. Ih duwen Sara, me peikiong Eipraam oh kin ekerki eh kaun. Eri, kumwail wialahr nah seri, ma kumwail pahn mour mwahu oh sohte masak mehkot.”—1 Piter 3:3-6.
16 Piter kihda kaweid me lih Kristian emen en dehr kesempwaliki mehkan me mih masliki. Ahpw, ah tiahk mwahu en kahrehong ah pwoud ohl en wehwehki me padahk kan en Pwuhk Sarawi me kamwahuwiahla loalen liho. Mweidong ohlo en pein kilang me ah pwoud lih wiliakapwala. Mwein e pahn kilangada wekpeseng en ah mour en mahs oh ahnsou wet. (Episos 4:22-24) E pahn perenki kilang me ah pwoud kin “kadek oh meleilei” met. Soangen irair wet kin kaperenda ohl pwopwoud men, ahpw keieu, e kin “wia mehkot kesempwal mwohn silangin Koht.”—Kolose 3:12.
17. Iaduwen Sara kin wia mehn kahlemeng mwahu ong irail Kristian lih pwopwoud kan?
17 Pwuhk Sarawi kin doadoahngki Sara nin duwen mehn kahlemeng mwahu ong irail Kristian lih pwopwoud kan mendahki ahr werek kan kin iang pwoson de soh. E sansal me Sara kilangwong Eipraam nin duwen ah tapwi. Pil nan eh mohngiong e kin likwerih ah pwoud “kaun.” (Senesis 18:12) Ahpw, met sohte kin katikiahla ah kin waunla mwohn aramas akan. E sansal ih emen lih me kehlail ni pali ngehn oh pwoson Siohwa. E kin iang kisehn pwihn “pokon kalaimwun en sounkadehde kan” oh ah pwoson kin kamwekid kitail en “tang kehlail ni atail kin weiren tang.” (Ipru 11:11; 12:1) Met sohte pahn wia mehkot kanamenek ieu ma Kristian lih pwopwoud men pahn kahlemengih Sara.
18. Ia ekei mouren kaweid kan me pahn mwahu ong pwopwoud me emen rehn ohlo de liho sohte iang kaudok mehlelo?
18 Nan peneinei kan me emen rehn ohlo de liho me saikinte iang kaudok mehlel, ohlo iei me tapwin peneinei. Ma ohlo me iang kaudok mehlel, e pahn kadek oh medemedewe duwen pepehm en ah pwoud lih me pid ahn liho pelien lamalam ahpw e sohte pahn kahrehda en kauwehkihla pein ah pwoson. Ma liho me iang kaudok mehlel, e pil sohte pahn mweidohng ohlo en kauwehla ah pwoson. (Wiewia 5:29) Ahpw, e sohte pahn uhwong ah pwoud ohl me tapwin peneinei. E pahn wauneki ih oh kapwaiada “kosonned en ah pwoud ohl.”—Rom 7:2.
Sapwellimen Pwuhk Sarawi Kaweid Loalokong
19. Ia ekei kahpwal akan me kin kak kaluwetala pwopwoud kan, oh iaduwen kitail kak powehdi soangen kahpwal pwukat?
19 Rahnwet, irair tohto kan kak kaluwetehla ehupenehn pwopwoud. Ekei ohl pwopwoud kan sohte kin kapwaiada arail pwukoa kan. Ekei lih pwopwoud kan kin kahng uhpah arail pwoud ohl kan. Nan ekei pwopwoud, ohl de lih kin wia kauwehla arail pwoud ni arail kin keme irail de pil wiahda soangen lokaiahn mwamwahliki meteio. Ong Kristian akan, kahpwal en mwohni, soh unsek en aramas, oh ngehnen sampah wet me kin utungada dipen nenek oh kesempwaliki irair soh katepe kan pahn kak kasonge atail lelepek ong atail pwopwoud kan. Ahpw, irail Kristian ohl oh lih akan me kin kapwaiada mouren kaweid kan en Pwuhk Sarawi, pahn pil kak ale sapwellimen Siohwa kapai kan sohte lipilipil soangen irair me re kin lelong. Edetehn emen rehn ohl de lih nan pwopwoud ieu kin kapwaiada mouren kaweid kan en Pwuhk Sarawi, met kin mwahu sang ira koaros en sohte kapwaiada kaweid kan. Oh pil, Siohwa kin ketin poakohng oh sewese sapwellime aramas akan me kin lelepek ong arail inou en pwopwoud kan mendahki kahpwal akan. E sohte pahn likidmiehla arail kasalehda loalopwoat.—Melkahka 18:25; Ipru 6:10; 1 Piter 3:12.
20. Mehnia kaweid me Piter kihda ong Kristian akan koaros?
20 Mwurin wahnpoaron Piter kihda kaweid ong ohl oh lih pwopwoud kan, ni kaimwiseklahn sapwellime kisinlikou, e kangoange irail. E mahsanih: “Eri, kumwail en kin soangen lamalamteieu oh kupwurteieu; kumwail limpoakpene nin duwen Kristian, oh kadekpene oh aktikitikpene. Kumwail dehr dupungki me suwed ong me suwed, de lokaia suwed ong lokaia suwed, ahpw dupungkihong me suwed amwail kupwuramwahu, pwe iei kupwuramwahu me Koht ketin inoukihong kumwail ni eh ketin malipei kumwail.” (1 Piter 3:8, 9) Met iei kaweid loalokong ong koaros, keieu ong irail pwopwoud kan!
Ke Tamatamante?
• Iaduwen Kristian ohl pwopwoud kan kak kahlemengih mehn kahlemeng mwahu en Sises?
• Iaduwen Kristian lih pwopwoud kan kin kahlemengih mwomwohdiso?
• Ni ahl dahieu me irail ohl pwopwoud kan kak wauneki arail pwoud lih kan?
• Dahme keieu mwahu emen Kristian lih pwopwoud en wia ma ah pwoud ohl sohte iang pwosono?
[Kilel nan Pali 27]
Kristian ohl pwopwoud men kin poakohng oh apwalih ah pwoud lih
[Kilel nan Pali 27]
Kristian lih pwopwoud men kin wauneki ah pwoud ohl
[Kilel nan Pali 29]
Weksang kosonned kan en mehn Rom, padahk kan en Kristian akan kin padahkiong ohl pwopwoud en wauneki ah pwoud lih
[Kilel nan Pali 30]
Ohl oh lih kan koaros en “pokon kalaimwun” kin kasikasik en ale mour soutuk nan Paradais
[Kilel nan Pali 31]
Sara kin kilangwong Eipraam nin duwen ah kaun