‘Kumwail En Sawaspene Oh Mahkpene Nanpwungamwail’
“Kumwail en sawaspene oh mahkpene nanpwungamwail.”—KOLOSE 3:13.
1. (a) Ni ahnsou me Piter nda me kitail en mahkong mehteikan pahn “pak isuh,” dahme kahrehda e lemeleme me e nohn kadek? (b) Ia wehwehn mahsen en Sises ni e mahsanih me kitail anahne kasalehda mahk “pahn pak isisek isuh”?
“MAING ei Kaun, pak depe I pahn mahkohng rieio me kin wia dihpiong ie? E itar ma I pahn mahkohng pak isuh?” (Madiu 18:21) Piter pein lemeleme me e nohn kadek sang ah koasoi wet. Ni ahnsowo, tiahk en mehn Suhs iei, me emen sohte pahn kak kasalehda mahk daulih pak silu ong dihpohte me wiawihda.a Medewehla ahn Piter pwuriamwei ni ahnsou me Sises sapengki ih: “Soh, e sohte itar pahn pak isipak, ahpw pahn pak isuh wad isihsek”! (Madiu 18:22) Pwurpwurehng doadoahngki nempe isuh kin wehwehki “ahnsou kohkohlahte.” Ong madamadau en Sises, en Kristian men mahkong mehteikan sohte pahn uhdi.
2, 3. (a) Ia ekei irair kan, me pahn karehda apwal en kasalehda mahk? (b) Dahme kahrehda kitail kak kamehlele me kitail pahn pil paiekihda laud ma kitail pahn mahkong meteikan?
2 Ahpw, kapwaiada kaweid wet, sohte kin ahnsou koaros mengei. Ihs rehtail me sohte kin medekihla wiewia sapwung sang rehn aramas teikan? Ele mwein sang rehn emen ke kin liki, sohte kin kolokolte eh likilik. (Lepin Padahk 11:13) Kompoakpomw keren men ele mwein sohte medemedewe mwahu oh uhd doadoahngki ‘lokaia mwahl kin kauwehla wasa rasehng kedlas.’ (Lepin Padahk 12:18) Mwein emen me ke poakohng de liki kin koasoi keng de lemei ong uhk, oh met kahrehong ken nsensuwed laud. Ni ahnsou me met kin wiawi, ananehpatail iei me kitail kin lingeringerda. Ele kitail pahn sohla koasoiong meno emen me wia dihp ong kitail, oh kitail kin liksang ih ni uwen me kitail kak. Kaselehda mahk ong ih, ele pahn mwomwen se mweidong ih en kamedek kitail oh pitsang kalokepe. Ahpw, ma kitail pahn kou imwintihtih, kitail pahn pein kamedekihla pein kitail.
3 Sises padahkiong kitail en kasalehda mahk—“pahn pak isuh wad isihsek.” Ni mehlel, sapwellime padahk kan sohte pahn imwila suwed ong kitail. E padahk kan koaros kohsang rehn Siohwa, ‘Kauno, me kupwurki padahkihiuk pwe en wia kamwahu ehu ong uhk.’ (Aiseia 48:17; Sohn 7:16, 17) Kitail pahn paiekihda ma kitail pahn mahkong mehteikan. Mwohn kitail pahn koasoiapene duwen dahme kahrehda kitail anahne kasalehda mahk oh iaduwen kitail kak wia met, e pahn sawas laud ong kitail ma kitail pahn wehwehki ia wehwehn mahk. Atail pahn wehwehkihla dahkot mahk pahn kak sewese kitail en kaselehda mahk ni ahnsou me mehteikan pahn kainsensuwedih kitail.
4. Mahkong mehteikan sohte kin wehwehki dah, ahpw ia wehwehn mahkong meteikan?
4 Mahkong mehteikan pwehki mehkot me aramas teikan wiahong pein kitail sohte kin wehwehki me kitail kin pwungki de katikitikiala sapwung me irail wiahda; e pil sohte wehwehki en mweidong mehteikan en isaneki kitail. Pwe, ni ahnsou Siohwa kin kasalehda mahk, e sohte kin katikitikiala atail sapwung kan, oh e sohte pahn mweidong aramas soh unsek kan en mwamwalehki sapwellime mahk. (Ipru 10:29) Nin duwen pwuhken Insight on the Scriptures, kasalehda irairen mahk kin wehwehki “wiewia ehu en kasalehda mahk ong emen me wia sapwung ong uhk; oh sohte pahn kouimwintihti.” (Volume 1, pali 861)b Paipel kin ketikihong kitail kahrepe mwahu kan en mahkong meteikan.
Dahme Kahrehda Mahkong Mehteikan?
5. Kahrepe kesempwal dahieu en mahkong mehteikan me ntinghdi nan pwuhken Episos 5:1?
5 Ehu kahrepe kesempwal en mahkong mehteikan kileledi nan pwuhken Episos 5:1: “Ihme karehda, nan amwail wialahr sapwellimen Koht seri kompoak kei, kumwail song en kahlemengih ih.” Iaduwen kitail pahn “kahlemengih Koht”? Lepin lokaia “ihme karehda” kin kapatepene iren Paipel en mwowe, me mahsanih: “A kumwail en kin kadekpene oh loallamwahupene, oh mahkpene duwen Koht eh ketin mahkohng kumwail rehn Krais.” (Episos 4:32) Ei, kitail anahne alasang Koht en mahkong meteikan. Duwehte kisin pwutak kis, me kin song en alasang eh pahpa, kitail nin duwen seri kan me Siohwa kin poakong, anahne en alasang Samatail Nanleng me kin kasalehda mahk. Ia uwen laud e kin kaperenda mohngiong en Siohwa ni ahnsou me e pahn kilang sapwellime seri kan nin sampah kin nantiong song en alasang ih en mahkpene nanpwungarail!—Luk 6:35, 36; pil kilang Madiu 5:44-48.
6. Ni ahl dahieu me sapwellimen Siohwa mahk ileilei sang atail?
6 Mehlel, kitail sohte kak mahkong mehteikan ni unsek duwehte Siohwa. Ahpw, ih kahrepe kitail anahne en mahkpene. Medemedewe duwen met: Sapwellimen Siohwa mahk me ileile sang atail kin mahkong mehteikan. (Aiseia 55:7-9) Ni ahnsou me kitail kin mahkong irail akan me wia dihp ong kitail, pali laud en ahnsou pwehki kitail ese me ehu rahn kitail anahne irail en pil mahkong kitail. Ih duwen aramas akan, aramas dipan akan kin mahkong aramas dipan akan. Ahpw, ong Siohwa, ahnsou koaros ih me kin mahkong kitail, ahpw kitail sohte anahne mahkong ih. Eri, ma Siohwa, me sohte kin ketin wiahda dihp kak ni limpoak mahkong kitail ni unsek, e soh konehng kitail aramas dipan akan en mahkpene nanpwungatail?—Madiu 6:12.
7. Ma kitail sohte men mahkong mehteikan ni ahnsou me e konehng sen kasalehda mahk, iaduwen met pahn kak koarompwa pein atail nanpwungmwahu rehn Siohwa?
7 Ahpw me kesempwal sang met, ma kitail sohte men mahk ong mehteikan ni ahnsou me e konehng en kasalehda mahk, met pahn kak koarompwa pein atail nanpwungmwahu rehn Koht. Siohwa sohte kin peki kitail en mahkpene; e kupwureki kitail en wia met. Nin duwen Iren Paipel kan kasansalehda, ehu irair me pahn kamwekid kitail en kasalehda mahk iei pwehki Siohwa pil pahn mahkong kitail oh pil pwehki Siohwa mahkong kitailehr. (Madiu 6:14; Mark 11:25; Episos 4:32; 1 Sohn 4:11) Eri, ma pein kitail sohte men mahkong mehteikan ni ahnsou me e konehng en kasalehda mahk, kitail pahn kak kasik me Siohwa pahn mahkong kitail?—Madiu 18:21-35.
8. Dahme kahrehda kasalehda mahkong mehteikan pahn imwila mwahu ong pein kitail?
8 Siohwa kin padahkiong sapwellime aramas akan “pwungen elen komour.” (1 Nanmwarki 8:36) Ni ahnsou me e padahkiong kitail en mahkpene, kitail kak liki me Siohwa kin medemedewe dahme pahn keieu mwahu ong kitail. Ihme kahrehda Paipel mahsanih “mweidohng engieng en Koht en doadoahk.” (Rom 12:19) E inenen toutou en kolokolte kou imwintihti ong emen. Met pahn koarompwa atail madamadau kan ahnsou koaros oh kihsang atail popohl oh peren. En kolokolte omw lingeringer oh mwakar, pahn duwehte peirin, me kak imwila suwed ong paliwaratail. (Lepin Padahk 14:30) Oh kitail mwein pahn kolokolte atail mwakar ong emen, ahpw meno me wiahda dihp ong kitail ele mwein sohte pahn wehwehki me e kainsensuwedihkitail! Atail Sounkapikada ese me kitail anahne mahkong mehteikan, kaidehn ihte pwehki ong kamwahuperail, ahpw pil ong pein kamwahupatail. Kaweid en Paipel iei en kasalehda mahk, ‘pwungen elen kamour.’
“Kumwail Uhdahn Pahn Mahkpene Nanpwungamwail”
9, 10. (a) Soahngen irair dah kei me emen sohte anahne pehkmahk rehtail? (b) Ia wehwehn “mahkpene nanpwungamwail” [“continue putting up with one another”?]
9 Ohlahn paliwar kan kakete sang ohla tikitik lel ni ohla me loal, oh epwelpen ohla pwukat pahn wekpeseng. E pahn duwehte pepehm akan me kin ohla—ekei ohlahn pepehm kin loal sang mehteikan. Ni ahnsou me aramas teikan kin wiahda sapwung tikitik ong kitail, e pahn konehng kitail en wiahkihla mehkot laud? Met iei kisehn atail mour en ekei pak lingeringerda de limwesou nanpwungatail, oh kitail en dehr wiahkihla tiahk ehu me meteikan anahne mahkong kitail ahnsou koaros. Ma kitail kin wia soahngen aramas me ni ahnsou me emen pahn wiahda sapwung tikitik ong kitail, oh kitail eri kin uhd liksang ih oh idingkihong ih en pehk mahk mwohn kitail pahn kak pwurehng koasoiong ih, met pahn kak kahrehong irail en kanahieng ahnsou kan me re mihmi rehtail—de re sohla pahn karanih kitail!
10 Ahpw, e pahn mwahu ma kitail “pahn kadekohng aramas koaros.” (Pilipai 4:5, Phillips) Nin duwen aramas soh-unsek kan me kin kerenpene papah Siohwa, kitail ese me ekei pak riatail brother kan kak kadongodongki kitail, oh kitail mwein pahn wia met ong irail. Kolose 3:13 kaweidkin kitail: “Kumwail uhdahn pahn mahkpene nanpwungamwail.” Met kin wehwehki me kitail en kanengamahiong mehteikan, kanengamahiong arail irair kan me kitail kin kadongodongki. Irair en kanengamah pahn kak sewese kitail en powehdi ohla tikitik kan—oh sohte pahn kauwehla popohl nan mwomwohdiso.—1 Korint 16:14.
Ni Ahnsou me Ohla kan me Loal
11. Ni ahnsou me mehteikan wia dihp ong kitail, dahme pahn kak sewese kitail en mahkong irail?
11 Ahpw, iaduwen ma aramas teikan pahn wia dihpong kitail, oh lipwen dihpo me sansal? Ma dihp sohte nohn laud, ele kitail pahn kak nantiong en kapwaiada kaweid en Paipel en ‘mahkpene.’ (Episos 4:32) En ngoangki kasalehda mahk kin parekiong dahme Koht padahkiong Piter en ntingihdi: “Mwohn mehkoaros kumwail nantihong en limpoakpene, pwe limpoak kin mahkohng soahng tohto.” (1 Piter 4:8) Tamataman me pein kitail aramas dipan akan pahn kak sewese kitail en mahkong mehteikan. Ni ahnsou me kitail kin kasalehda mahk, kitail kin kesehla lingeringer oh sohte men kouimtintihti. Met pahn imwikihla, nanpwungmwahu rehn emen me kansensuwediala kitail, oh kitail pahn pil kak sewese kolokolte popohl nan mwomwohdiso. (Rom 14:19) Oh ahnsou mwuhr, kitail pahn manokehla dahme e wiaiong kitail.
12. (a) Dahme kitail anahne tiengla mwowe oh wia pwen kak mahkong emen me kansensuwediala kitail laud? (b) Iaduwen mahsen en Episos 4:26 kasansalehda me kitail anahne mwadang kapwungala kapwal akan?
12 Ahpw, iaduwen ma emen pahn wia dihp ong kitail oh kansensuwediahla kitail laud? Karasepe ieu, koampoakapomw men me komw kin liki ele mwein pahn padahkiong mehteikan duwen mehkot me ke koasoiaiong ih ni likilik. Ke inenen nsensuwedkihla, namenekihla, oh pehm me e pitihuhkdi. Ke song en manokehla met, ahpw ke sohte kak. Ma ihduwen, ke anahne tiengla mwowe kapwungala kahpwal wet sang ni omw pahn koasoiong aramaso me kansensuwediala iuk. E pahn konehng en wia met mwohn irair wet pahn suwedla. Pohl panawih kitail: “Ma kumwail pil lingeringer, kumwail dehr mweidong amwail lingeringer en kahrehiong kumwail nan dihp; pil dehr kolokol amwail lingeringer rahn ehu pwon.” (Episos 4:26) Kapataiong wehwehn mahsan kan en Pohl iei ire mehlel me nanpwungen mehn Suhs akan, iei me kihrlahn ketipino kin kaimwsekala ehu rahn oh tepidahn ehu rahn kapw. Eri, kaweido iei met: Mwadang kapwungala kahpwalo!—Madiu 5:23, 24.
13. Ni ahnsou me kitail kin pwarwohng emen me kansensuwediala kitail, ia atail mehn akadei, oh sawas dahkei pahn kak sewese kitail en lel atail mehn akadei?
13 Iaduwen ke pahn pwarwohng emen me kansensuwediukala? “Rapahki popohl ni ehkehl unsek,” pwuhken 1 Piter 3:11 mahsanih. Komw sohte pahn lingeringerda ahpw ke pahn popohl ong riomw. Met kak pweida, ma ke sohte pahn doadoahngki lokaia keng kan oh mwekid kan me sohte konehng; pwe met pahn kahrehong ih en kahpwurehong uhk soahngen irair pwukat. (Lepin Padahk 15:18; 29:11) Patehng met, liksang lepin koasoi pwukat, “Ahnsou koaros ke kin . . . !” de, “Ke sohte . . . !” Koasoi nohn daulihla pwukat kin kak imwikihla e pahn tepida ahneki madamadau en uhwong uhk pwehn pere pein ih. Ahpw, doadoahngki soangen ngihl oh mahs me pahn kasalehda me ke men kapwungala kahpwal wet me pwarada oh me e kansensuwediukala. Kawehwehda mwahu omw pepehm kan ong duwen dahme wiawi. Mweidong ih en kawehwehda eh wiewia kan. Rong duwen dahme eh pahn nda. (Seims 1:19) Met pahn imwikihla kamwahu dah kan? Lepin Padahk 19:11 kawehwehda: “Ma ke me loalokong, ke pahn kak kanengamahiong omw lingeringer. Ma emen pahn wiahiong uhk sapwung ehu, e pahn wia tiahk mwahu ehu make pohnsehsehla.” En wehwehkihla pepehmw akan en aramas teikan oh pil kahrepen ahr kin wia dahme re wiahda, pahn kak kihsang atail madamadau oh pepehm sapwung akan. Ni ahnsou me kitail pahn kapwungala kahpwal akan oh ahneki mehn akadei en kolokolte popohl, e pahn kak pweida oh mahkpene ni ahl me konehng pahn wiawi.
14. Ni ahnsou me kitail kin mahkong mehteikan, ia wehwehn kitail pahn manokehla?
14 Mahkong mehteikan kin wehwehki me kitail pahn uhdahn manokehla dahme wiawi? Tamanda kahlemeng mwahu en Siohwa, me kitail koasoi nan artikel en mwowe. Ni ahnsou me Paipel mahsanih me Siohwa kin manokehla dihpatail kan, met sohte kin wehwehki me e sohte kak tamanda dihpatail. (Aiseia 43:25) Ahpw, Siohwa kin manokehla ni ahl me ni ahnsou me e kin mahkong aramas akan, e sohte pahn doadoahngki dihp pwukat en kadeikada kitail ni ahnsou kohkohdo. (Esekiel 33:14-16) Duwehte, en mahkong iengatail aramas akan sohte kin wehwehki me kitail sohte pahn kak tamanda dahme aramas teikan wiaiong kitail. Ahpw, kitail kak manokehla ni ahl me kitail sohte pahn doadoahngki sapwung me e wiahda ong kitail ong ni ahnsou kohkohdo. Ni ahnsou me kitail pahn kapwungala kahpwalo, e sohte pahn konehng en lipanediong emen dahme wiawi; oh sohte pahn pil konehng en liksang aramaso me wia sapwung ong kitail, wia mwomwen me e piskensang mwomwohdiso. (Lepin Padahk 17:9) Mehlel, ele mwein anahne ahnsou reirei mwohn loalatail pahn mwahula; ele mwein kitail sohte pahn karanih meno duwehte mahs. Ahpw kitail pahn poakohng ih nin duwen riatail brother ni pali ngehn oh nantiong en nanpwungmwahupene.—Pil kilang Luk 17:3.
Ni Ahnsou me Mwomwen Komw Sohte Kak Kasalehda Mahk
15, 16. (a) Kristian akan anahne kasalehda mahk ong emen me wia dihp ong ih ahpw sohte men koluhla? (b) Iaduwen kitail kak doadoahngki kaweid en Paipel me diarekda nan pwuhken Melkahka 37:8?
15 Ahpw dahme kitail pahn wia ma mehteikan pahn wia dihp ong kitail oh lipwen kansensuwed me inenen laud, oh re sohte wekada me irail me wiahda dihp ong kitail, oh sohte men koluhla, oh sohte pehk mahk? (Lepin Padahk 28:13) Iren Paipel kan ni sansal kin kasalehda me Siohwa sohte kin mahkong aramas akan me sohte kin koluhkihla dihparail kan. (Ipru 6:4-6; 10:26, 27) Iaduwen kitail? Pwuhken Insight on the Scriptures koasoi: “Kristian akan sohte anahne mahkong irail akan me mwersuwed, inengieng en wia dihp ahpw sohte koluhla. Aramas pwukat kin wiahla imwintihti en Koht.” (Volume 1, pali 862) Kristian akan me kin lelong kahpwal laud sang rehn meteikan oh aramas kin lemei ong irail, oh mwersuwedih irail, sohte anahne kasalehda mahk ong irail pwukat me wiahda dihp suwed wet ma re sohte koluhla.—Melkahka 139:21, 22.
16 Sansal, me irail akan me kin mihla pahn kahpwal sang rehn aramas lemei kan pahn nsensuwedla oh lingeringerda. Ahpw, tamanda, ma kitail pahn kolokolte atail lingeringer oh kailok, met pahn suwed ong pein kitail. Ma kitail pahn awiawih meno en wekada dipe de pehk mahk rehtail ahpw aramaso sohte pahn wia met, eri met pahn ihte kalaudehla pein atail nsensuwed. Medemedewe ahnsou koaros duwen sapwung me mehteikan wia ong kitail pahn kahrehong atail lingeringer en mihmihte loalatail, oh pahn kak imwikihla suwed ong kitail ni pali ngehn, pepehm kan, oh paliwaratail. Ma ihduwen, kitail kin mweidong emen me kamedek kitail en pousehlahte kamedek kitail. Ihme kahrehda ni elen loalokong Paipel kaweidkin kitail: “Ke dehr pwunod de lingeringer.” (Melkahka 37:8) Ekei Kristian akan, kin diarada me kedekedeo re kin wiahda ahr pilipil en kasalehda mahk ni ahl me irail sohlahr pahn kolokolte ahr nsensuwed—ahpw re sohte kin pohnsowehla dahme wiawihong irail, ahpw irail sohla kin mweidong lingerlinger en powehdi irail. Irail mweidong Koht kopwungpwungo ahr kahpwalo, oh met kahrehong irail en nsenamwahula oh pousehla ahr mour oh sohlahr ahneki pepehm kehlail kan on irairo.—Melkahka 37:28.
17. Dahme sapwellimen Siohwa inou me kileledi nan pwuhken Kaudiahl 21:4 ketikihong kitail?
17 Ni ahnsou me ohla ehu kin loal, ele kitail mwein sohte pahn iriswei douluhl irairo sang nan atail madamadau kan, pwe e sohte kak wiawi nan koasondi wet. Ahpw Siohwa inoukihong kitail sampah kapw ehu me e pahn ketin “limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” (Kaudiahl 21:4) Ni ahnsowo, dahme kitail pahn tamanda sohte pahn kamedekih kitail, me ahnsowet kin katoutouwih mongiongiatail.—Aiseia 65:17, 18.
18. (a) Dahme kahrehda kitail anahne en mahkong riatail brother oh sister kan? (b) Ni ahnsou me mehteikan wia dihp ong kitail, ni ahl dah kitail kak kasalehda mahk oh manokehla? (c) Iaduwen kitail pahn kak paiekihda met?
18 Ahpw ni ahnsouwet, kitail anahne kousoanpene oh doadoahkpene nin duwen brother oh sister kan me soh-unsek. Kitail koaros kin wiada sapwung. Ekei ahnsou, kitail kin kainsensuwediala oh kamedekiala pein emen emen kitail. Eri, Sises ese me kitail pahn anahne mahkong mehteikan, “kaidehn pahn pak isipak, ahpw pahn pak isuh wad isihsek”! (Madiu 18:22) Mehlel, kitail sohte kak kasalehda mahk ni unsek nin duwen me Siohwa kin ketin wia. Ahpw, pali laud en ahnsou, ni ahnsou riatail brother kan kin wia suwediong kitail, kitail kak kasalehda mahk ni ahl en powehdi kou imwintihti oh sohte pahn doadoahngki irair wet ong ih ni ahnsou kohkohdo. Ni ahnsou me kitail kin kasalehda mahk oh pil manokehla, kitail pahn sewese en kolokolte popohl, nan mwomwohdiso oh pil pein kitail pahn ahneki popohl oh meleilei nan atail madamadau oh mongiongitail. Oh mwohn mehkoaros, kitail pahn paieki popohl me ihte atail Koht limpoak, Siohwa, kak ketikihong kitail—Pilipai 4:7.
[Nting tikitik kan me mi pah]
a Nin duwen Babylonian Talmud, ehu tiahk koasoi: “Ma ohl emen pahn wiahda dihp, pak keieu, keriau, oh kasiluh, mahk pahn kak kohwong ih, ahpw kapahieu, sohla mahkpen dipe kan.” (Yoma 86b) Met kin poahsoanda pohn ahr kawehwehda sapwung pwuhken Eimwos 1:3; 2:6; oh Sohp 33:29.
b Wiawihda sang Watchtower Bible and Tract Society of New York, Inc.
Peidek ong Kohsapahl
◻ Dahme kahrehda kitail men mahkong mehteikan?
◻ Soahgnen irair dah kei kitail pahn anahne “sawaspene oh mahkpene nanpwungamwail”?
◻ Ni ahnsou me aramas teikan pahn kamedekiala kitail laud, dahme kitail kak wia pwen kapwungala irairo ni elen popohl?
◻ Ni ahnsou me kitail pahn mahkong mehteikan, ia wehwehn kitail pahn manokehla?