Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • w00 5/1 pp. 8-13
  • Mahkohng Meteikan Sang Nan Kapehdomw

Sohte kasdo ong met

Kupwurmahk, mehkot sapwung en kihda kasdo

  • Mahkohng Meteikan Sang Nan Kapehdomw
  • Kahn Iroir Pakpakairki Wehin Siohwa—2000
  • Sawaspen Oaralap kan
  • Ire kan me Duwehte Met
  • Mahk Me Mie Anahnepe​—Oh Kin Wiawiong Kitail
  • Kitail Anahne Nantihong Kasalehda Mahk
  • Kapwungala Kahpwal kan​—Kasalehda Mahk
  • ‘Kumwail En Sawaspene Oh Mahkpene Nanpwungamwail’
    Kahn Iroir Pakpakairki Wehin Siohwa—1998
  • En Mahkpene Nanpwungatail
    Kahn Iroir Pakpakairki Wehin Siohwa—2012
  • Siohwa me Kin Keieu Ketin Kasalehda Mahk
    Kahn Iroir Pakpakairki Wehin Siohwa (Ong Onop)—2022
  • Ia Duwen Omw Kak Kasalehda Mahk Duwehte Siohwa?
    Kahn Iroir Pakpakairki Wehin Siohwa (Ong Onop)—2025
Kilang Pil Ekei
Kahn Iroir Pakpakairki Wehin Siohwa—2000
w00 5/1 pp. 8-13

Mahkohng Meteikan Sang Nan Kapehdomw

“Ih duwen me Semei me ketiket nanleng pahn ketin wiahiong kumwail, ma emenemen kumwail sohte pahn mahkohng rie sang nan kapehde.”​—MADIU 18:35.

1, 2. (a) Iaduwen lih emen me kin ndandki dipe kan kin kasalehda ah kalahngan ong Sises? (b) Ia mouren padahk en Sises?

LIHO soangen lih me kin netkihla paliwar, ih kaidehn soangen aramas me ke pahn kak kilang nan imwen aramas poadidi ong sarawi. Ma ekei aramas pahn pwuriamwekihla kilangada liho wasao, dahme e wia wasao me kapwuriamwei sang eh mihmi nan imwen aramas poadidi kan. Lih menet keila limwahn ohl men me kin keieu kasalehda tiahk mwakelekel ahpw kasansalehda ia uwen laud eh kalahnganki doadoahk kan en ohl menet, e ahpw tepida kawisekesekehkihla aluweluwe ko pilen mese, e ahpw limwilimwiheki pitenmoange.

2 Ohl menet, Sises, sohte suwedila liho, me ndandki “nan kahnimwo ah inenen mour suwed.” Ahpw met wiawi nan imwen Saimon, ih mehn Parisi, oh e kin nsensuwed pwehki lih menet wia aramas dipan men. Sises ahpw padahkiong Saimon duwen karasaras en ohl riemen me pweipwand ong ohl emen. Emen rehra (keieun ohl) ah pweipwand inenen laud​—uwehte pweinen tohndoadoahk men me e kin ale erein sounpar riau. Keriemen en ohlo kin pweipwandki pak eisek tikitik sang ahn keieun ohlo ah pweipwand​—met tikitik sang pweinen aramas men ong sounpwong siluh. Ira koaros sohte kak kapwungala ara pweipwand, ohlo eri “mahkikihong ira koaros” ara pweipwand ako. E sansal, me keieun ohl me ah pweipwand me inenen laud pahn ahneki kahrepe laud en mwekidki limpoak. Mwurin met, Sises uhd koasoiahda duwen ahn liho wiewia kadek, oh e kapataiong kaweid wet: “Pwe me pahn ale mahk tikitik en dipe kan, eh limpoak kin tikitik.” Eri, e mahsanihong liho, “Eri, dipomw kan lapwasanguhkehr.”​—Luk 7:36-48.

3. Dahme kitail anahne tehk duwen pein kitail?

3 Idek pein rehmw, ‘Ma ngehi liho, de ma I mih pahn soangen irair duwehte met, oh mahk kalahngan kohwongie, I pahn uhd lemei ong meteikan oh sohte mahkohng irail?’ Ele mwein komw pahn sapengki, ‘Uhdahn soh!’ Ahpw, komw uhdahn kamehlele me komw soangen aramas me kin kalapw mahk ong aramas teikan? Iaduwen​—met uhdahn mehkot me komw kin kalapw wia? Ke kin kalapw mwadangete mahk ong meteikan, oh aramas teikan kin kilangwong komwi nin duwen aramas men me kin kasalehda mahk? Kitail pahn tehk ni ahnsouwet duwen ia kahrepe emen emen kitail pahn anahne ni mehlel tehk pein atail pepehm kan duwen ire wet.

Mahk Me Mie Anahnepe​—Oh Kin Wiawiong Kitail

4. Dahme kitail anahne wehkada duwen pein kitail?

4 Komw inenen wehwehki me komwi aramas soh unsek men. Ma emen pahn idek rehmw ma ke kin sapwungala, ke pahn wehkada oh mwein pil tamanda mahsen kan me dierekda nan pwuhken 1 Sohn 1:8: “Ma kitail koasoia me sohte dipatail, eri, kitail kin pitih pein kitail, oh me mehlelo sohte mih rehtail.” (Rom 3:23; 5:12) Ekei aramas kin wiahda dihp toutou kan. Ahpw mehnda ma ke sohte kin wiahda dihp laud kan, uhdahn mie ahnsou kan me ke sohte kapwaiada sapwellimen Koht koasoandi kan​—eri, ke dipada, kaidehn?

5. Dahme kitail pahn kak kalahnganki Koht?

5 Eri, ahmw mour mwein pahn duwehte dahme wahnpoaron Pohl kawehwehda: “Mahso kumwail mehkilahr dipamwail kan ni pali ngehn, oh pil pwehki amwail sohte ahneki Kosonnedo. Ahpw met, Koht ketikihongehr Krais mour iangahkin kumwail. Koht ketin kupwur mahkikihongkitailehr dipatail kan koaros.” (Kolose 2:13; Episos 2:1-3) Tehk duwen mahsen pwukat “mahkikihongkitailehr dipatail kan koaros.” Met kin padahkiong kitail me sapwellime mahk kin pwaindi dihp tohto. Pein emenemen kitail kin ahneki kahrepe mwahu en wia atail pekipek kan duwehte me Depit wia: “Maing Kaun [“Siohwa,” New World Translation], komw ketin kapwaiada omwi inowo, oh ketin mahkikihong ie dipei kan, pwe dipei kan me ngeder.”​—Melkahka 25:11.

6. Dahme kitail kak kamehlele me pid Siohwa oh irairen mahk?

6 Iaduwen komwi​—de sohte lipilipil ihs rehtail—​pahn kak ale mahkpen dipatail kan? Kahrepe kesempwal ehu iei pwehki Siohwa Koht kin wia Emen me kin kasalehda mahk. Mahk kin wia irair ehu me Koht kin sapwellimanki. (Eksodus 34:6, 7; Melkahka 86:5) E sansal, me Koht kin kupwurki kitail en sohpeiwong Ih ni kapakap oh peki me E pahn mahk ong dipatail kan. (2 Kronikel 6:21; Melkahka 103:3, 10, 14) Oh pil, E ketin koasoanehdi poahsoan manaman ong kasalehda mahk​—tomw meirong en Sises.​—Rom 3:24; 1 Piter 1:18, 19; 1 Sohn 4:9, 14.

7. Ni ahl dahieu ke kak kahlemengih Siohwa?

7 Ke anahne kilang iaduwen Koht kin kasalehda mahk pwe ken kak pil kasalehong aramas teikan mahk. Pohl kasalehda met ni e ntingihdi: “A kumwail en kin kadekpene oh loallamwahupene, oh mahkpene duwen Koht eh ketin mahkohng kumwail rehn Krais.” (Episos 4:32) Sohte peikidpe me Pohl kin kawehwehda me kitail anahne sukuhliki sang mehn kahlemeng mwahu en Koht, pwe iretikitik en mwuri mahsanih: “Nan amwail wialahr sapwellimen Koht seri kompoak kei, kumwail song en kahlemengih ih.” (Episos 5:1) Ke kilang ia wehwehn met? Siohwa kin ketin mahk ong uhk, eri​—Pohl ni sansal oh kehlail kawehwehda met—​ke anahne kahlemengih Ih oh “kadekpene oh loallamwahupene, oh mahk ong” meteikan. Ahpw idek pein rehmw peidek wet, ‘I kin wia met? Ma met kaidehn mehkot me I kin ahn wia, eri, I kin nantiong kahlemengih Koht en mahk ong meteikan?’

Kitail Anahne Nantihong Kasalehda Mahk

8. Dahme kitail pahn anahne pohnese duwen tohnmwomwohdiso kan nan atail mwomwohdiso kan?

8 E pahn inenen kaselel ma nan mwomwohdiso en Kristian, ekeite ahnsou kitail pahn anahne kasalehda mahk. Ahpw ni mehlel, kitail anahne kasalehda mahk pak tohto. Ahpw kitail wehwehki me riatail Kristian brother oh sister kan kin nantihong kahlemengih sapwellimen Sises irairen limpoak. (Sohn 13:35; 15:12, 13; Kalesia 6:2) Riatail kan kin ni ahnsou reirei nantihong kesehla ahr madamadau suwed kan, lokaia sohte konehng kan, oh wiewia kan me kin pid irairen sampah wet. Re uhdahn men wiahla aramas kapw. (Kolose 3:9, 10) Kitail sohte kak pohnsehsehla me irail koaros nan mwomwohdiso wasa koaros nan sampah, oh nan ehu ehu mwomwohdiso, kin wia aramas soh unsek kei. Ahpw, nin duwen pwihn ehu, irail mwahusang mahs, ahpw ihte, re saikinte unsek.

9, 10. Dahme kahrehda kitail en dehr pwuriamweikihla ni ahnsou me kitail kin kilang kahpwal akan pwarada nanpwungen riatail ni pali ngehn?

9 Nan Paipel, Koht padahkiong kitail, ni sansal, me kitail pahn kasik uhdahn pahn mie aramas soh unsek kan nan mwomwohdiso, nanpwungen riatail brother oh sister kan. Menlau tehk mahsen kan en Pohl me ntingihdi nan Kolose 3:13: “Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kauno [“Siohwa,” NW] eh ketin mahkohngkumwailehr.”

10 Ni sansal, Paipel kin katamankin kitail duwen sapwellimen Koht mahk ong kitail me kin pidada atail pwukoah en kasalehda mahk ong aramas teikan. Dahme kahrehda mahk ong meteikan kin apwal? Pwehki Pohl wehkada me emen ele mwein pahn “kin kaulime emen.” E wehwehki me kahrepe kan en kaulime meteikan pahn mie. Met pil wiawi nan keieun senturi, nanpwungen Kristian “sarawi kan,” me ahneki ‘koapworopwor me nekinek mwahu nanleng.’ (Kolose 1:2, 5) Eri kitail soh kak kamehlele me met pil pahn wiawi nan rahnpwukat, ni ahnsou me pali moron en Kristian mehlel akan sohte ahneki kadehde sang ngehno me irail “sapwellimen Koht aramas pilipil kan”? (Kolose 3:12) Kahrehda, kitail dehr mwadangete lemehda me mehkot inenen sapwung wiawiher ma nan atail mwomwohdiso mie soahng kei me kansensuwed pwarada​—pepehm en medekla pwehki mehkot uhdahn sapwung de mehkot me aramas lemelemeki me e sapwung pwarada.

11. Dahme Seims kasalehda me kitail anahne liksang?

11 Mahsen akan en rien Sises ohl, Seims, pil kasalehda me kitail pahn kasik me kitail uhdahn pahn loi ong irair ekei me pahn kahrehong kitail en uhdahn anahne kasalehda mahk ong riatail kan. “Mie aramas erpit men rehmwail me kak wehwehki soahng koaros? Eri, en kasalehda sang ni eh mour mwahu oh sang ni eh wiewia mwahu kan me e kin wia ni mpahi oh erpit. Pwe ma peirin, akatat, oh mehwo kin mie nan mohngiongimwail, eri, kumwail dehr wia dihpiong me mehlelo ni amwail kin suweiki amwail erpit.” (Seims 3:13, 14) “Peirin oh akatat” kin mihmi nan mohngiong en Kristian mehlel akan? Ei, mahsen en Seims kin kasalehda me soahng pwukat kin wiawi nan mwomwohdiso en keieun senturi oh pil kak wiawi nan rahnpwukat.

12. Kahpwal dahieu pwarada nan mwomwohdiso en Pilipai en mahs?

12 Mie Kristian keidi riemen me kin ahneki adamwahu pwehki ira kin ngoangki iang Pohl nan doadoahk en kalohk. Mwein ke tamanda me ke kin wadek duwen Iuodia oh Sindiki, re iang mwomwohdiso en Pilipai. Mendahki Paipel sohte kin kawehwehda ni oaritik duwen dahme wiawi nanpwungara, pwuhken Pilipai 4:2, 3 kin kasalehda me mie nanpwung suwed rehra. Met tepkihda lokaiahn salamalam, de kauwe emen ara peneinei, de peirin oh aksiaipene? Sohte lipilipil ia kahrepen ara nanpwung suwed, ara nanpwung suwed me inenen laud, pwehki Pohl rong duwen kahpwalo ni ahnsou me e mihmi nan Rom, me doh sang ira. Mwein sister riemenet ni pali ngehn sohte kin koasoiapene nanpwungara, oh ira kin doh sang emen emen nan mihding kan de ira kin koasoiaiong kompoakpara kan koasoi kan me sohte konehng duwen mehteio.

13. Dahme Iuodia oh Sindiki wia pwehn kamwahuiala kahpwal nanpwungara, oh met kin wia mehn kasukuhl dahieu ong kitail?

13 Dahme wiawi nanpwungara uhd pil kin wiawi nan ahmw mwomwohdiso de ke kak iang pidada kahpwal ieu? Soangen kahpwal kan ele mwein pil kin wiawi nan ahmw mwomwohdiso. Dahme kitail kak wia? Ong kahpwalo me wiawi mahs, Pohl kangoange sister riemenet me inoukihda ara mour ong Koht “en miniminpene nanpwungamwa duwehte pirien ehu rehn Kauno.” Ele mwein ira pwungkipene en koasoiapene pwehn kapwungala sawehwe kan oh ara nanpwung suwed, oh ira koaros mahkpene, oh kahlemengih mehn kahlemeng mwahu en Siohwa ni eh kin kasalehda mahk. Kitail kak kamehlele me Iuodia oh Sindiki kamwahuiala kahpwal nanpwungara, oh kitail pil kak kamwahuiala kahpwal kan me kin wiawi nan atail ahnsou. Ma kitail ahneki madamadau me kitail en mwadang mahk ong meteikan nan rahnpwukat, kitail pahn pweida mwahu ni atail men kamwahuiala kahpwal kan.

Kapwungala Kahpwal kan​—Kasalehda Mahk

14. Dahme kahrehda e pahn kakong kitail oh keieu mwahu en manokehla nanpwungsuwed?

14 Ma ehu rahn ke nanpwung suwed rehn emen Kristian, dahme ke anahne wia pwehn kasalehda mahk? Ni mehlel, sohte ahl me mengei, ahpw Paipel kin kihda mehn kahlemeng mwahu kan pwehn sewese kitail. Ahpw, iren sawas me kesempwal​—edetehn met kaidehn iren sawas me mengei en wia—​kitail en manokehla kahpwalo, oh mweidong kahpwalo en sohrala. Ni ahnsou me kahpwal ehu kin pwarada, pali laud en ahnsou nin duwen me wiawi nanpwungen Iuodia oh Sindiki, pein emen emen aramas kin lemeleme me meteikan me sapwung. Eri, pahn soangen irair duwehte met, ele mwein ke pahn lemeleme me Kristian teio sapwung de wia pali laud en sapwungo. Ahpw, ke kak manokehla kahpwalo oh kasalehda mahk? Ke anahne en wehwehki, ma Kristian teio me sapwung, ke kin iang mih nan irair ehu me komwi me kak manokehla sapwungo.

15, 16. (a) Iaduwen Maika kin kawehwehda duwen soangen Koht dah Siohwa? (b) Ia wehwehn Koht kin “pohnsehsehla dipen aramas akan?”

15 Kitail en dehr manokehla Koht nin duwen atail mehn kahlemeng mwahu nin duwen emen me kin kasalehda mahk. (Episos 4:32–5:1) Maika ntingihdi duwen sapwellimen Koht wiewia kan en manokehla atail sapwung kan: “Maing Kaun, sohte emen koht me duwehte komwi: komwi kin ketin pohnsehsehla dipen sapwellimomwi aramas akan me luhwehdi. Komw sohte kin ketin kolokolte sapwellimomwi engieng, ahpw komw kin ketin kasalehiong kiht sapwellimomwi limpoak poatopoat.”​—Maika 7:18, NW.

16 Ni ahnsou me Paipel kin kawehwehda me Siohwa kin “pohnsehsehla dipen aramas akan,” met sohte kin wehwehki me E sohte kak tamanda arail sapwung kan de E kin manokehla dahme kin wiawi mahs. Tamanda dahme Samson oh Depit wiahda: ira koaros wiahda dihp toutou kan. Ahnsou reirei mwurin ira wiahda dihp, Koht kak tamanda dipara kan; pil kitail ese ekei dipara kan pwehki Siohwa me padahkiong aramas akan en ntingihdi mehpwukat nan Paipel. Ahpw, atail Koht kin kasalehda mahk ong ira, oh ara pwoson kin wia mehn kahlemeng mwahu ong kitail en kahlemengih.​—Ipru 11:32; 12:1.

17. (a) Dahme pahn kak sewese kitail en pohnsehsehla sapwung kan en meteikan? (b) Ma kitail kin nantihong kapwaiada met, ni ahl dahieu kitail pahn kahlemengih Siohwa? (Kilang footnote.)

17 Ei, Siohwa kak ‘pohnsehsehla’a dipen aramas akan, nin duwen Depit kin ni pak tohto peki rehn Siohwa en wia. (2 Samuel 12:13; 24:10) Kitail pil kak kahlemengih Koht, en pohnsehsehla sapwung kan me iengatail kan kin wiaiong kitail nin duwen aramas soh unsek kei? Ni karasepe, mwomwehda me ke mihmi nan sompihr ehu me tangatangewei mahrahra nan skohso. Ni ahnsou me ke kilang sang nan wenihmwtok en sompihro, ke kilangada emen me ke ese kesikesihnen ni keilen skohso oh e kapailok ni mwomwen seri arail kin kapwadloh. Ke ese me lih menet nsensuwedki mehkot oh mwein e nsensuwed pahmw. De mwein e sohte kin medemedewe komwi. Ahpw, ni ahnsou me sompihro pipihr ileilela, ke kilangdi sang ni wenihmwtok oh kilang me liho mwomwen wie tikitikla ni ahnsou me sompihro dohdohla. Awa ehu mwuri, ke miher mwail epwiki kei doh sang liho, oh ah kapailok mihlahr mwurimw. Ni ahlohte, pak tohto e pahn wia sawas laud ong kitail ma kitail pahn kahlemengih Siohwa en mahk ong meteikan oh pohnsehsehla sapwung kan me aramas teikan wiaiong kitail. (Lepin Padahk 19:11) Sapwung me emen wiaiong kitail soh pahn mwomwen sohte mehkot ong kitail sounpar eisek sang met de sounpar riepwiki kei sang met? Dahme kitail soh pohnsehsehla dipen aramas teikan?

18. Ma kitail kin apwaliki manokehla sapwung ehu me emen wiaiong kitail, eri kaweid dahieu kitail pahn kak kapwaiada?

18 Ahpw mwein mie ahnsou me ke kapakapki duwen kahpwalo oh nantihong kasalehda mahk, ahpw ke pehm me ke sohte kak. Eri dahme ke pahn wia? Sises kangoange aramas akan me mihmi nan soangen irairo en kelepwla tuhwong aramas teio oh song en kapwungala kahpwalo pwehn imwikihla popohl nanpwungamwa. “Eri, ni omw pahn wiahiong Koht omw meirong pohn pei sarawi ehu, ke ahpw tamanda me riomw mehn Suhs men nsensuwed pahmw, pwilikihdi mahs omw meirongo mwohn pei sarawio, ke ahpw kohwei oh kapwungala nanpwungamwa; mwuri, ke ahpw pwurodo wia omw meirong ong Koht.”​—Madiu 5:23, 24.

19. Madamadau dahieu kitail anahne ahneki oh soangen madamadau dah kitail anahne en liksang ni ahnsou me kitail kin kapwungala kahpwal rehn riatail kan?

19 Ni sansal, Sises sohte mahsanih me ke pahn kohla rehn riomw oh nantihong kamehlelehong ih me komwi me pwung ahpw ih me sapwung. Ele mwein ih me sapwung. Ahpw pali laud en ahnsou, pali koaros kin sapwung. Ahpw sohte lipilipil ihs me sapwung, dahme kitail men wia kaidehn en wiaiong aramaso en wehk ong kitail me kitail me pwung, oh ih eri poaridisang kitail oh pekimahk. Ma iei duwen me ke lemeleme en wiawiong aramas teio, eri, ke pahn kasik pali laud en ahnsou dahme ke nantihong en wia sohte pahn pweida. Oh pil, dahme ke men wia kaidehn en kohsapahlih ni oaritik duwen dahme wiawi. Ni ahnsou kumwa pahn koasoiapene ni ngehn en limpoak en Kristian oh diarada me poahsoanpen amwa nanpwung suwed iei sawehwehte, eri, kumwa pahn kak kapwungala kahpwalo. Ahpw mehnda ma kumwa sohte pahn kak pwungpene ni unsek, eri met anahn ehu me ahnsou koaros kumwa pahn pwungkipene mehkan ni unsek? E soh pahn mwahu ma kumwa pahn kak pwungkipene me kumwa men papah atail Koht me kin kasalehda mahk? Ni ahnsou ke pahn wehwehkihla duwen irair wet, ele mwein e pahn mengei en pein emenemen kitail sang mohngiongitail kan en nda met: “Komw kupwur mahk pwehki ata soh unsek me kahrehong kita sohte wehwehpene mwahu. Menlau, kita en pohnsehsehla dahme wiawi.”

20. Dahme kitail kak sukuhliki sang mehn kahlemeng mwahu en wahnpoaron kan?

20 Tamanda me wahnpoaron kan pil sohte kin wehwehpene nanpwungarail ekei pak, duwehte ahnsou me ekei rehrail nantihong en ale wahu laudsang meteikan. (Mark 10:35-39; Luk 9:46; 22:24-26) Met kin kahrehong nanpwungarail kapwunod, oh mwein pil nsensuwed, de loal ohla. Ahpw re kak pohnsehsehla arail nsensuwed akan oh doula doadoahkpene. Mwuri, emen rehrail ntingihdi met: “Mehmen me kin men nsenamwahuki mour oh rahn kaperen kan, en perehsang ewe lokaia suwed, oh tokehdihsang lokaia likamw. E uhdahn anahne mweisang me suwed oh wia me mwahu, oh rapahki popohl ni eh kehl unsek.”​—1 Piter 3:10, 11.

21. Sises kin kihda kaweid loal dahieu me pid duwen mahk?

21 Kitail ahpwtehn sukuhlikier duwen koasoandi ehu me kin wiawi: Koht kin mahk ong kitail dihp tohto kan, eri, kitail pil anahne kahlemengih Ih en kasalehda mahk ong riatail kan. (Melkahka 103:12; Aiseia 43:25) Ahpw pil mie ehu koasoandi likin met. Mwurin Sises padahkiong sapwellime tohnpadahk kan duwen kapakap en Kauno, E mahsanih: “Pwe ma kumwail pahn mahkikihong meteikan sapwung kan me re wiahiong kumwail, nahn Samamwail me ketiket nanleng pahn pil ketin mahkikihong kumwail dipamwail kan.” Sounpar ehu mwurin met, Sises pil pwurehng koasoia duwen mouren eh padahk ni E padahkiong sapwellime tohnpadahk kan en kapakapki met: “Komw ketin mahkikihong kiht dipat akan, pwehki at kin mahkohng koaros me kin wia sapwung ong kiht.” (Madiu 6:12, 14; Luk 11:4) Oh pil, ekei rahn mwohnte eh pwoula, Sises kapataiong met: “Eri, ni amwail pahn kin uhda oh kapakap, kumwail mahkikihong sapwung koaros me aramas emen wiahiong kumwail, pwe Samamwail me ketiket nanleng en pil ketin mahkikihong kumwail dipamwail kan.”​—Mark 11:25.

22, 23. Ma kitail pahn kin kasalehda mahk ong riatail kan, iaduwen met pahn kak pidada atail mour ni ahnsou kohkohdo?

22 Ei, ma pein kitail men ale sapwellimen Koht mahk, eri, pali laud pahn pid ma pein kitail kin kasalehda mahk ong riatail kan. Ni ahnsou me nanpwungsuwed nanpwungen Kristian kan kin pwarada, idek pein rehmw, ‘E soh pahn mwahu en mahk ong riei pwehn ale sapwellimen Koht mahk sang nantihong kasalehda me riei wia kisin sapwung tikitik kis ong ie?’ Ke esehier pasepengpen peidek wet.

23 Eri, iaduwen ma kahpwal nanpwungen brother kan me laudsang kahpwal tikitik kan? Oh ni ahnsou dah kitail pahn kak doadoahngki kaweid en Sises nan Madiu 18:15-18? Kitail pahn sukuhliki duwen met.

[Nting tikitik me mi pah]

a Emen me sukuhl laud kin kawehwehda me lepin lokaiahn Ipru nan Maika 7:18 kin “kohsang ni madamadau en wiawiahn emen me kin seiloaklahng ehu sahpw oh sohte tehk mehkot ni ah dauli pwehki e sohte kesempwal reh. Wehwehn koasoi wet sohte kin wehwehki me Koht sohte kin ese dipen aramas akan, de E sohte kin nsenohki ma aramas wiahda dihp de soh, ahpw E kin wehwehki me Koht sohte kin kolokol sapwungo pwehn kihong kalokepe; E sohte kin kaloke ahpw E kin kasalehda mahk.”​—Sounkopwung 3:26; 1 Samuel 16:8.

Komw kin Tamanda?

◻ Mehn kahlemeng dahieu me Siohwa ketikihong kitail me kin pid duwen mahk?

◻ Dahme kitail anahne tamanda duwen irail akan me mih nan mwomwohdiso?

◻ Pali laud en ahnsou, dahme kitail kak wia ni ahnsou me riatail kan kansensuwedkitailla?

◻ Ma anahne, dahme kitail kak wia pwehn kapwungala kahpwal nanpwungen kitail oh riatail kan?

[Kilel nan Pali 11]

Ni ahnsou me kahpwal nanpwungen komwi oh riomw Kristian emen pwarada, song en pohnsehsehla; ni ahnsou ah pahn dower powe, kahpwalo pahn tikitikala

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share