Ke Kak Kasapahldo Riomw

“Ma riomw wiahda dihpiong uhk, kohwei reh oh kapwungohng dipeo. Ahpw met en wiawi nanpwungamwahte. Ma e pahn rong uhk, eri a, ke kasapahldohr riomw.”​—MADIU 18:15.

1, 2. Kaweid mwahu dah kan me Sises kihda me kin pid kapwungala kahpwal akan rehn Kristian akan?

MWOTOMWOT sang sounpar ehu me luwe ong Sises en wia doadoahk en kalohk, ahpw Sises pil anahne padahkiong sapwellime tohnpadahk kan padahk kesempwal kan. Ke kak wadek met nan pwuhken Madiu irelaud 18. Ehu iren mehn kasukuhl me E men kawehwe ong irail kin pid kesempwalpen ahneki lamalam en aktikitik duwehte seri kan. E pil kasansalehda me kitail anahne liksang kadipekelekel “me tikitik kan” oh me kitail anahne en rapahkihda “me tikitik kan” me salongala pwe irail en dehr mehla. Mwurin met, Sises pil kapataiong kaweid kesempwal oh katepe kan ong kapwungala kahpwal akan me kin wiawi nanpwungen Kristian akan.

² Ele mwein ke tamanda sapwellime mahsen kan: “Ma riomw wiahda dihpiong uhk, kohwei reh oh kapwungohng dipeo. Ahpw met en wiawi nanpwungamwahte. Ma e pahn rong uhk, eri a, ke kasapahldohr riomwo. A ma e sohte pahn rong uhk, a emen de riemen en ianguhkada, pwe me riemeno de silimeno en wia kadehdehn soahng koaros nin duwen me Pwuhk Sarawi mahsanih. A ma e pil sohte men rong irail, a ke lelki mwomwohdiso. A ma e pil sohte men rong mwomwohdiso, a wiahkihla ih mehn liki men de sounrik daksis men.” (Madiu 18:15-17) Soangen ahnsou dah kan me kitail anahne kapwaiada kaweid wet, oh kitail pahn ahneki madamadau dah kan ni atail kapwaiada kaweid wet?

3. Pali laud en ahnsou, dahme pahn keieu mwahu en wia ma emen wiahda sapwung ong komwi?

³ Artikel en mwowe kasansalehda me kitail koaros aramas soh unsek oh kin kalapw wia sapwung kan, ihme kahrehda, kitail anahne kasalehda mahk. Met keieu kesempwal en kasalehda mahk ni ahnsou me emen kin nsensuwedki dahme pil emen Kristian koasoia de wia. (1 Piter 4:8) Ahpw, ni mehlel, pali laud en ahnsou e pahn keieu mwahu en pohnsehsehla sapwungo​—kasalehda mahk oh manokehla. Kitail kak kilangwong wiewia wet nin duwen atail sawas en kaminiminpene mwomwohdiso en Kristian. (Melkahka 133:1; Lepin Padahk 19:11) Ahpw, mwein pahn mie ahnsou me ke lemeleme me ke anahne kapwungala kahpwal ehu rehn riomw ni pali ngehn me ka nsensuwediukala. Pahn soangen irair wet, mahsen en Sises me ntingihdi powe kin kihda kaweid.

4. Iaduwen kitail kak doadoahngki kaweid nan Madiu 18:15 ni ahnsou aramas teikan wia suwediong kitail?

⁴ Sises kaweidkin kitail en “kohwei reh oh kapwungohng dipeo. Ahpw met en wiawi nanpwungamwahte.” Met iei elen loalokong. Nan ekei kawehwe kan ni lokaiahn Sehmen kin uhd kawehwehda mahsen pwukat, nin duwen emen pahn kaselehda eh sapwung “mwohn pwoaron mahs pahieu,” met kin wehwehki mesomw kan oh mese ko. Ni ahnsou ke pahn koasoiapene duwen kahpwalo nanpwungamwahte, e pahn kak ekis mengei en kapwungala. E pahn mengei ong riomw me wia de nda mehkot me kansensuwediukala en wehkada sapwung me e wia ma kumwa pahn koasoiapene nanpwungamwahte. Ahpw, ma aramas teikan kin rongorong, pwehki soh unsek, e pahn kakete kahmahmki me e sapwung de song en akpwungki sapwung me e wia. Ahpw ma kumwa pahn koasoiapene duwen kahpwal “mwohn pwoaron mahs pahieu,” ke pahn kak diarada me mie sawehwehpene nanpwungamwa, kaidehn dihp de mehkot me e men nseneki wia sapwung ong uhk. Ni ahnsou kumwa koaros pahn kilang me kumwa sawehwehte, kumwa pahn kak kapwungala, oh sohte pahn mweidong mehkot tikitik en kekeirada oh kauwehla amwa nanpwungmwahupene. Ihme, kitail kak doadoahngki kaweid nan Madiu 18:15 ong kahpwal tikitik kan me kin pwarada nanpwungen Kristian akan.

Ia Wehwehn Sapwellime Mahsen kan?

5, 6. Nin duwen me irelaudo pwon kin kasansalehda, soangen dihp dah kei me Madiu 18:15 kin koasoia, oh dahme kin kadehde duwen met?

⁵ Ahpw, ni mehlel, dahme Sises kaweidkin wasaht kin pidada sapwung laud kan. Sises mahsanih: “Ma riomw wiahda dihpiong uhk.” Kitail kak nda ni oaralap, me lepin lokaia wet “dihp” pahn kak wehwehki sohte lipilipil sapwung dahieu. (Sohp 2:10; Lepin Padahk 21:4; Seims 4:17) Ahpw, lepin lokaia wet dihp, me Sises doadoahngki, me sansal sang nan iretikitik kan nan irelaud wet, me dihp wet kin wehwehki dihp toutou kan. Pwe e pahn kakete kahrehong mwomwohdiso en “wiahkihla ih mehn liki men de sounrik daksis men.” Ia wehwehn mahsen pwukat?

⁶ Ni ahnsou sapwellimen Sises tohnpadahk kan rong mahsen pwukat, irail ese me mehn Suhs akan sohte pahn werekiong mehn liki kan. (Sohn 4:9; 18:28; Wiewia 10:28) Oh pil, re kin soikala sounrik daksis kan, pwehki irail mehn Suhs ohl akan me kin pitihdi aramas akan. Ihme kahrehda, ni uhdahn mehlel oh pwung, iren Paipel wet nan Madiu 18:15-17 kin pidada dihp toutou kan, kaidehn kisin nanpwung suwed akan me aramas riemen pahn kak mahkpene oh manokehla.​—Madiu 18:21, 22.a

7, 8. (a) Dihp dah kei me elder kan pahn anahne esehla? (b) Soangen dihp dah kei me kin wiawi nanpwungen Kristian riemen me ira kelepwte pahn kak kapwungala nin duwen me ntingihdi nan Madiu 18:15-17?

⁷ Ekei dihp kan pahn Kosonnedo, pahn anahne laudsang mahk me kin kohsang rehn emen me kansensuwedih emen. Dihp me re anahne ripohtkihong elder kan (de samworo kan) kin duwehte soangen lahlahwe koaros iangahki lahlahwe pwoson mehlel, pwongih dikedik kan, nenek, kamwahl, ohl mwahuki ohl, oh lih mwahuki lih. Met pil pahn duwehte nan mwomwohdiso en Kristian. (Lipai 5:1; 20:10-13; Nempe 5:30; 35:12; Deuteronomi 17:9; 19:16-19; Lepin Padahk 29:24) Ahpw, soangen dihp me Sises kasalehda nan Madiu 18:15-17 kak kapwungpwungla nanpwungen aramas riemente. Met iei ekei karasepe kan: Emen Kristian lingeringerda de peirinki ienge Kristian men, eri, e kauwe ih. De emen Kristian ale contrak ehu en wia doadoahk me e pahn doadoahngkihte dipwisoun doadoahk kan, oh e kileledi rahn me e pahn kanokehla eh doadoahk. De emen Kristian inoukihda me e pahn ekis ekis kapwungala eh pweipwand nin duwen koasoandi ehu de e kileledi rahno me e pahn kapwungala pweipwando pwon. De emen Kristian inoukihda me ma eh kaun en pisnes ehu pahn kasukuhliki ih duwen eh pisnes, e sohte pahn (mehnda ma e pahn uhd kohla doadoahk ong ehu pisnes tohrohr) ni erein ahnsou ehu de wasa kan siaiong de song en wia pisnes ong aramas akan me eh kaun kin wia pisnes ong.b Ma emen Kristian sohte kolokolte eh inou oh e pil sohte koluhkihla eh sapwung, met kin wia dihp toutou. (Kaudiahl 21:8) Ahpw sapwung pwukat pahn kak kapwungpwungla nanpwungen aramas riemente.

⁸ Eri, dahme ke pahn wia pwehn kapwungala kahpwal pwukat? Sapwellimen Sises mahsen me pid irewet kin wiawi ni ewen kahk siluh. Kitail pahn koasoiapene ehu ehu ewen kahk. Kitail en dehr kilangwong ewen kahk pwukat nin duwen kosonned kakos kan, ahpw kitail en nantihong wehwehkihla mouren sapwellimen Sises kaweid pwukat, oh dehr manokehla ahmw mehn akadei me pid limpoak.

Nantihong en Kasapahldo Riomw

9. Madamadau dahieu kitail en ahneki ni ahnsou kitail kin doadoahngki kaweid en Madiu 18:15?

⁹ Sises tepida: “Ma riomw wiahda dihpiong uhk, kohwei reh oh kapwungohng dipeo. Ahpw met en wiawi nanpwungamwahte. Ma e pahn rong uhk, eri a, ke kasapahldohr riomwo.” Ni sansal, ewen kahk wet sohte kak poahsoanehda pohn ahmw madamadaute de lemelemehkte. Ahpw ke anahne uhdahn ahneki mehn kadehde kan duwen sapwung me e wiahda pwe ke kak sewese ih en kilang duwen sapwung me e wia oh en kapwungala kahpwalo. E pahn mwahu en mwadang wia met, pwehn dehr mweidong sapwungo en lalaudla de pein eh madamadau en suwedla. Pwe koasoia wet pahn wiawi nanpwungamwahte, dehr koasoiaiong aramas teikan duwen kahpwal wet pwehn song en kamwahuiala edomw de kahrehong meteikan en poakepoake iukala. (Lepin Padahk 12:25; 17:9) Pwekihda? Tamataman ahmw mehn akadei.

10. Dahme pahn kak sewese kitail en kasapahldo riatail?

¹⁰ Ahmw mehn akadei iei en kasapahldo riomw, kaidehn en kaloke, kasarohdi, de kauwehla ede. Ma e wiahda sapwung, e kakete kauwehla eh nanpwungmwahu rehn Siohwa. Ke men sewese ih pwehn wiwiahte riomw Kristian. Ni ahnsou kumwa kelekelehpw, ma ke pahn ni meleilei koasoiong ih, oh liksang doadoahngki lokaia lemei, ke kak lel ahmw mehn akadei oh ke pahn pweida mwahu ni ahmw men kamwahuiala kahpwalo. Ni ahnsou kumwa pahn koasoiapene, tamantaman me kumwa koaros aramas soh unsek kan. (Rom 3:23, 24) Ni ahnsou e diarada me ke sohte lipanede ih oh e kilang me ke uhdahn men sewese ih ni mehlel, pwunglahn kahpwal wet pahn mengei en diarekda. Elen erpit wet pahn sansalda ma kumwa pahn diarada me kumwa koaros sapwung de poahsoanpen kahpwal wet iei ihte sawehwe.​—Lepin Padahk 25:9, 10; 26:20; Seims 3:5, 6.

11. Ma emen wiahda sapwung ong komwi oh e sohte men rong uhk, dahme ke pahn kak wia?

¹¹ Ma ke kak sewese ih en kilang me e wiahda sapwung laud, ele mwein e pahn kakete koluhkihla eh sapwung. Ahpw, ni mehlel, aklapalap kin kak kahrehda aramas en sohte koluhla. (Lepin Padahk 16:18; 17:19) Eri, mehnda ma nin tepio e sohte pahn wehkada eh sapwung oh koluhla, ke kak awih ekis mwohn ke pahn pousehla ewen kahk teikan. Sises sohte mahsanih ‘kohwei reh pak ehute oh kapwung ohng dipeo.’ Pwehki met dihp ehu me kumwa pahn kak kapwungala, eri, pilahni en pwurehng kohwei reh ni ahmw pahn doadoahngki dahme ntingihdi nan Kalesia 6:1 oh “mwohn pwoaren mahs pahieu.” Ele, ke pahn kak pweida. (Pil kilang Sud 22, 23.) Ahpw, dahme ke pahn wia ma e sohte pahn koluhla, ahpw ke uhdahn ese me e wiahda dihp?

Alehdi Sawas Sang Rehn Irail me Mah Ni Pali Ngehn

12, 13. (a) Sises kawehwehda duwen mehnia keriaun ewen kahk ong kapwungala kahpwal akan? (b) Ia ekei kaweid konehng kan me kitail pahn kak kapwaiada ni ahnsou kitail kin wia kariaun ewen kahk wet?

¹² Ma ke wiahda sapwung laud, ke men aramas teikan en mwadangete sohla sewese iuk? Uhdahn soh. Nin duwen me Sises kasalehda me mwurin keieun ewen kahk, ke sohte pahn uhdi sang ahmw pahn song en kasapahldo riomw, oh ke pahn nantihong ehu ong ih oh pil meteikan ni amwail pahn kaudokiong Koht ni pwung. Sises pil kileledi keriaun ewen kahk: “A ma e sohte pahn rong uhk, a emen de riemen en ianguhkada, pwe me riemeno de silimeno en wia kadehdehn soahng koaros nin duwen me Pwuhk Sarawi mahsanih.”

¹³ E mahsanih “a emen de riemen en ianguhkada.” E sohte mahsanih me mwurin keieun ewen kahk, ke kak ni saledek koasoiaiong meteikan duwen kahpwalo, de koasoiaiong Sounapwalih en Circuit, de ntingihlahng brother kan duwen kahpwalo. Mendahki ke kamehlele me e wiahda sapwungo, irair wet saikinte uhdahn sansalda. Ke sohte men padahkiong meteikan mehkot me sapwung, pwe met pahn kak wehwehki me ke wiahda lokaia likamw. (Lepin Padahk 16:28; 18:8) Ahpw Sises mahsanih me emen de riemen kak ianguhkada. Dahme kahrehda? Oh ihs me pahn mwahu en iang komwi?

14. Ihs kak iang kitail wia keriaun ewen kahko?

¹⁴ Ahmw mehn akadei iei en kasapahldo riomw oh met kin wehwehki me ke men sewese ih en kilang me e wiahda dihp oh sewese ih en koluhla pwe e pahn kak ahneki popohl rehmw oh popohl rehn Koht. Pwehn pweida mwahu, e pahn keieu konehng me irail akan me pahn iang uhk “emen de riemen” iei irail me kadehde duwen sapwung me wiawi. Mwein irail me mihmi rehmw ni ahnsou me sapwungo wiawihda, de irail me kin ese duwen dahme konehng en wiawi (de sohte konehng en wiawi) me pid pisnes. Ma sohte emen de riemen me kadehde duwen met, irail akan me pahn iang uhk iei irail akan me kin ekspiriens de ese duwen irairo pwe e pahn kak wehwehki ma dahme wiawi uhdahn sapwung de soh. Ni ahnsou mwuhr, ma anahne, irail pahn kak wiahla sounkadehde kan ong dahme ira riemen koasoiapenehr, oh pil re kak kadehdehda ire mehlel kan me pwarada ahnsowo. (Nempe 35:30; Deuderonomi 17:6) Re sohte pahn poupali; ahpw re pahn iang pwehn song en kasapahldo riomw kan oh pil riarail.

15. Dahme kahrehda Kristian elder kan pahn kak kihda sawas laud ma kitail pahn doadoahngki ni keriaun ewen kahk?

¹⁵ Ke sohte anahne kahre ohl akan me wia elder kan nan mwomwohdiso. Ahpw, ni mehlel, ohl mah kan iei irail elder kan pahn kakete kihda sawas laud pwehki arail koahiek kan ni pali ngehn. Elder pwukat kin rasehng “wasahn rukusang kisinieng oh melimel. Re pahn rasehng piletik kansenamwahu kan me kin tangatang nan wasa karakar kan, oh mwetehn paipalap ehu nan sapwtehn.” (Aiseia 32:1, 2) Irail akan me koahiek ni ahr kin sewese de kapwungala brother oh sister kan. Oh mehmen me wiahda sapwung kin ahneki kahrepe mwahu en likih “kisakis kan me mih rehn ohl akan.”c (Episos 4:8, 11, 12) En kasalehda ireo mwohn me mah kan ni pali ngehn oh iang irail kapakap pahn kak kahrehong irair kapw en wiawi nanpwungamwa oh kumwa pahn kak kapwungala kahpwalo.​—Pil kilang Seims 5:14, 15.

Kaimwiseklahn Ewen Kahk Pwehn Kasapahldo Ih

16. Ia ewen kahk kasiluh me Sises kaweidkin kitail en wia?

¹⁶ Ma ewen kahk keriau sohte pweida, elder kan anahne iang pidada kasiluh en ewen kahk. “A ma e pil sohte men rong irail, a koasoiong mwomwohdiso. A ma e pil sohte men rong mwomwohdiso, a wiahkihla ih mehn liki men de sounrik daksis men.” Met pahn pidada dah?

17, 18. (a) Mehn kahlemeng dahieu kin kak sewese kitail en wehwehkihla mahsen pwukat: ‘koasoiong mwomwohdiso’? (b) Iaduwen kitail kin kapwaiada ewen kahk wet nan rahnpwukat?

¹⁷ Met sohte kin wehwehki me kitail pahn koasoiapene dihpo de sapwungo ong tohnmwomwohdiso koaros nan mihding kan de wiahda mihding tohrohr ehu ong met. Kitail kak dehdehkihla koasoandi pwung ehu sang Mahsen en Koht. Menlau tehk duwen dahme wiawi wehin Israel mahs, ni ahnsou aramas me kataiau, mehwo, oh kamam sakau: “Ma ohl emen naineki pwutak emen me ketihwo oh kin kahngohdiong eh pahpa oh nohno, mehnda ma ira pil kin keme, eh pahpa oh nohno pahn kahrehla pwutako rehn ohl mah kan en kahnimwo. Ira pahn patohwanohng ohl mah kan, ‘Nait pwutaket me ketihwo oh kangohdiong kiht. Pwutak menet kin mehwo oh kamam sakau.’ Eri, ohl kan koaros en kahnimwo pahn kate pwutak menet.”​—Deuderonomi 21:18-21, New World Translation.

¹⁸ Kaidehn wehio pwon oh pil kaidehn pein ah keinek pwon me pahn wia kadeikpen dipen ohl menet. Ahpw, irail “ohl mah kan” kin wiliandi mwomwohdiso oh kadeikada ih. (Pil kilang Deuderonomi 19:16, 17, duwen kopwung me ‘samworo kan oh sounkopwung akan wia nan rahnpwuko.’) Duwehte nan rahnpwukat, ni ahnsou e konehng en wia kasiluhn ewen kahk, irail pwihn en elder kan, me kin wiliandi mwomwohdiso pahn apwalih met. Arail mehn akadei iei en sewese Kristian menet ni uwen me re kak pwehn kasapahldo ih. Re kin kasansalehda met sang ni ahr pahn toupahrek, oh sohte pahn lipilipilki aramas, de kadeikada aramas menet nan arail madamadau mwohn re rong ire mehlel kan koaros.

19. Dahme elder kan me pilipilda en rong duwen ireo kin nantihong wia?

¹⁹ Elder kan pahn nantihong wehwehkihla mwahu ire kan oh pil karonge sounkadehde kan pwehn tehk mwahu ma aramas menet wiahda dihp ehu (oh pil ma aramas menet kin pousehlahte wiewia dihp wet). Re men perehla mwomwohdiso sang irair suwed akan oh ngehnen sampah wet. (1 Korint 2:12; 5:7) Irail pahn nantihong “kakehlakahki meteikan padahk mehlel, oh pil kasalehda sapwung en irail kan me kin uhwong padahk wet.” (Taitus 1:9) Mehlel, kitail koapworopworki me aramas me wiahda sapwungo sohte pahn duwehte irail mehn Israel akan me sapwellimen Siohwa soukohp akan ntingihdi duwen: “Kumwail pahn mehkihla mehla eikek, pwehki amwail sohte sapeng ni ei malipei kumwail de rong ei mahsen. Kumwail pilada en sapeikiong ie oh wia me suwed.”​—Aiseia 65:12.

20. Dahme Sises mahsanih pahn anahne wiawi ma aramas dipano kahng rong duwen kaweid oh pil sohte men koluhla?

²⁰ Ekei pak, ekei Kristian kan me wia sapwung kin ahneki soangen lamalamohte. Ma ih duwen, kaweid en Sises me inenen sansal: “A ma e pil sohte men rong mwomwohdiso, a wiahkihla ih mehn liki men de sounrik daksis men.” Kauno sohte kupwurki tiahk lemei ong aramas de soahng kan me kin kauwehla emen. Ahpw, kaweid en wahnpoaron Pohl me inenen sansal, iei en piskensang mwomwohdiso aramas me sohte kin koluhkihla diparail kan. (1 Korint 5:11-13) Ni mehlel, ekei pak, mwuhr, emen me piskensang mwomwohdiso kak koluhkihla dihp me e wia oh pwurodo nan mwomwohdiso.

21. Koapworopwor dahieu mie ong irail akan me piskensang mwomwohdiso?

²¹ Kitail kak kamehlele sang karasaras en Sises duwen pwutak me salongala, me aramas me piskensang mwomwohdiso pahn kakete pwurodo. Nin duwen karasaraso kasalehda, mwurin ahnsou ehu me aramas dipan menet kin sohlahr mih pahn epwelipen seme limpoak men, e “koluhlahr nan kapehde.” (Luk 15:11-18) Pohl padahkiong Timoty me ekei aramas akan me wiahda dihp kan pahn ehu rahn kolukihlahr diparail kan oh “koluhla” oh “tangasang lidip en Tepil.” (2 Timoty 2:24-26) Kitail pahn koapworopworki me irail akan me sohte koluhkihla diparail kan oh piskensang mwomwohdiso pahn pehmada me pein irail sohlahr kenikenla rehn Koht oh Kristian lelepek limpoak kan oh re pahn koluhkihla diparail kan.

22. Iaduwen kitail pahn kak kasapahldo riatail kan?

²² Sises sohte kin kilangwong aramas akan en wehi kan oh sounrik daksis kan nin duwen aramas akan me sohte warohng en paiekihda tomw. Emen sounrik daksis, Madiu Lipai, koluhla, oh ni mehlel ‘ideidawehnseli Sises,’ oh mwuhr e pilipilda en wiahla wahnpoaron men. (Mark 2:15; Luk 15:1) Duwehte nan rahnpwukat, ma aramas me wiahda dihp oh “sohte rong mwomwohdiso” oh e piskensang mwomwohdiso, kitail kak awih ma ehu rahn e pahn koluhla oh kapwungala eh mour. Ni ahnsou e pahn koluhla oh pwurehng wiahla tohnmwomwohdiso men, kitail pahn peren pwe kitail me riatail pwurodo nan mwomwohdiso en kaudok mehlel.

[Nting tikitik me mi pahs]

Komw Tamanda?

◻ Ni mehlel, soangen dihp dahieu me Madiu 18:15-17 kin kadoadoahkong?

◻ Dahme kitail pahn tamanda ma kitail wia keieun ewen kahk?

◻ Ihs me pil kak kihda sawas me kitail pahn anahne wia keriaun ewen kahk?

◻ Ihs me kin pidada nan kasiluhn ewen kahk, oh iaduwen kitail pahn kak kasapahldo riatail kan?

[Kilel nan Pali 14]

Mehn Suhs akan kin soikala sounrik daksis kan. Madiu wiliakapwala oh idawehnla Sises

[Kilel nan Pali 16]

Kitail kak pali laud en ahnsou kapwungala kahpwalo “mwohn pwoaron mahs pahieu”