Mweidohng Mwomwohdiso en Kekeirada
“Mwomwohdiso . . . meleileidi . . . ahpw pil kekeirda oh towe kan ngederla.” —WIEWIA 9:31.
1. Soangen peidek dah kan me ele pahn pwarada me pid duwen “mwomwohdisohn Koht”?
NI RAHN en Pendekos 33 C.E., Siohwa ahpw ketin alehdahr pwihn ehu me wiawihkihda sapwellimen Krais tohnpadahk kan pwehn wiahla wehi kapw ehu, “Israel en Koht.” (Kalesia 6:16, NW) Kristian keidi pwukat pil wiahla dahme Paipel kin kahdaneki “mwomwohdisohn Koht.” (1 Korint 11:22) Dahme met pidada? Iaduwen “mwomwohdisohn Koht” e pahn koasoansoandi? Iaduwen mwomwohdiso wet pahn kadoadoahk pohn sampah wet nan wasa soh lipilipil kan me towe kan pahn mih ie? Iaduwen atail mour oh nsenamwahu pidada met?
2, 3. Iaduwen Sises kasalehda me mwomwohdiso pahn soandi?
2 Nin duwen me kileldi nan artikel en mwowe, Sises kohpada duwen mwomwohdiso wet me wiawihkihda tohnpadahk keidi kan, ni eh mahsanihong wahnpoaron Piter: “Pohn paipalap wet [Sises Krais] I pahn kauwada ei mwomwohdiso. Oh mehla sohte pahn kak kalowehdi.” (Madiu 16:18) Pil patehng met, ni ahnsou me Sises ketiketselite rehn sapwellime wahnpoaron ko, e kaweidkin irail duwen soangen koasoandi kan me pahn wiawi nan mwomwohdiso wet me pahn kokouda.
3 Sises kin kasalehda sang ni eh mahsen oh wiewia me mie irail akan me pahn tiengla mwowe oh kahluwa mwomwohdiso. Irail pahn wia met ni arail pahn kin papah, de apwalih anahn akan en irail akan me mih nan ahr pwihn. Krais mahsanih: “Kumwail ese duwen me lapalap en me rotorot akan, duwen ar kin kolokol kehlail manaman en kaunda me rotorot akan, oh kaun akan kin ahneki manaman unsek. eri, kaidehkin ih pahn duwen met rehmwail. Mehmen rehmwail me men lapalapala, e uhdahn pahn wiahla papahmwail. A mehmen me men soumas, e pahn wiahla ladun koaruhsie.” (Mark 10:42-44) Eri e sansal me “mwomwohdisohn Koht” sohte pahn mwerpeseng, towe kan sohte pahn tohrohrpeseng, oh e sohte pahn wia mwomwohdiso ehu me liseliping oh sohte soandi. Weksang met, e pahn soandi mwahu oh towe kan pahn kin doadoahkpene oh koasoakoasoipene.
4, 5. Dahme kahrehda kitail ese me mwomwohdiso anahne ale kaweid en pali ngehn?
4 Sises me wia Tapwin “mwomwohdisohn Koht” kasalehda me sapwellime wahnpoaron kan oh mehteikan me ale kasukuhl sang ih pahn ahneki pwukoa en sewese mehteikan nan mwomwohdiso. Dahme irail pahn wia? Ehu pwukoa me keieu kesempwal iei en kihda kaweid ngenin kan ohng irail kan me mih nan mwomwohdiso. Na tamanda dahme Sises me kaiasadahr mahsanihong Piter mwohn ekei irail wahnpoaron ako: “Saimon, nein Sohn, ia duwe, ke poakohng ie?” Piter ahpw patohwanohng, “Ei Maing ei Kaun, komw mwahngiher me I poakohng komwi.” Sises ahpw mahsanihong, “Kamwenge nei sihmpwul kan. . . . Apwalih nei sihpw kan. . . . Kamwenge nei sihpw kan.” (Sohn 21:15-17) Ia wen kesempwal en pwukoa wet!
5 Kitail kilang sang ni sapwellimen Sises mahsen me irail kan me kin pokonpene nan mwomwohdiso kin duwehte sihpw kan me kohpene. Sihpw pwukat—Kristian ohl, lih, oh seri kan—anahne ale mwengehn ngehn oh ale epwel mwahu. Pil patehng met, pwehki Sises kehkehlikihong sapwellime tohnpadahk kan koaros en padahk ohng mehteikan oh katohnpadahk, irail me kapw kan me wialahr sapwellime sihpw pahn anahne ale kasukuhl me pid duwen en kapwaiada pwukoa sarawi wet me kohsang rehn Koht.—Madiu 28:19, 20.
6. Koasoandi dah kei me wiawihda nan “mwomwohdisohn Koht” me ahpwtehn kokouda?
6 Ni ahnsou me “mwomwohdisohn Koht” kokouda, irail kan me wia towe anahne kaukaule tuhpene pwehn ale kaweid kan oh sawaspene oh kangoange emen emen: “Re kin poadidiong ale padahk sang rehn wahnpoaron ko, oh miniminiong me pwosonlahr akan; re pil kin iang irail sakpene ni ar kin iang kapakap.” (Wiewia 2:42, 46, 47) Ehu me pil sansal sang poadoapoad iei me mie irail kan me kin kapwaiada irair akan en Paipel me kin idihda pwehn sewese apwalih irair akan nan mwomwohdiso. Irail pilipilda kaidehn pwehki wen sounpar me irail suksukuhliki de pwehki soangen koahiek kan me irail ahneki. Ohl pwukat kin “diren Ngehn Sarawi oh erpit.” Emen iei Stipen, oh ire kan kasansalehda me e wia “ohl emen me diren pwoson oh Ngehn Sarawi.” Pwehki koasoandi kan en mwomwohdiso kin soandi, “mahsen en Koht eri lolohkseli. Tohnpadahk ko nan Serusalem ahpw wie tohtohla.”—Wiewia 6:1-7.
Ohl Akan Me Koht Kin Ketin Doadoahngki
7, 8. (a) Pwukoa dah me irail wahnpoaron kan oh ohl mah kan kin wia ni mwein Kristian en mahs ako? (b) Ia imwilahn en koasoandi kan kohda ki mwomwohdiso?
7 E sansal me irail wahnpoaron ko kin tiengla mwowe oh apwalih koasoandi kan en mwomwohdiso, ahpw irail sohte kelepw apwalih pwukoa pwukat. Mie pak ehu me Pohl oh ienge ko pwuralahng Siria nan Andiok. Wiewia 14:27 mahsanih: “Ni ara lellahng nan Andiok, ira ahpw kapokonepene tohn mwomwohdiso kan oh padahkihong irail mehkoaros me ira wiadahr sang ni roson en Koht.” Ni ahnsou me irail mihmihte ni mwomwohdiso wet, peidek ehu pwarada me pid duwen ma irail mehn liki kan anahne en sirkumsais de soh. Pwehn kak kapwungala ire wet, Pohl oh Parnapas pekederla “Serusalem oh tuhkihong wahnpoaron ko oh me mah kan,” me sansal kin doadoahk nin duwen governing body.—Wiewia 15:1-3.
8 Rien Sises ohl Seims, me wia elder Kristian men ahpw kaidehn wahnpoaron men, kin wie apwahpwalih mwomwohdiso ni ahnsou me “wahnpoaron ako oh me mah ko ahpw pokonpene pwe re en wie kupwurki ire wet.” (Wiewia 15:6) Mwurin ahr tehkpeneier ire wet ni keneinei oh alehier sawas sang ngehn sarawi, irail ahpw wiadahr koasoandi ehu me pahrekiong iren Paipel. Irail ahpw ntingkihlahng mwomwohdiso kan en wasao. (Wiewia 15:22-32) Irail kan me alehdier rohng wet ahpw pwungki met oh kapwaiadahr. Ia imwilahn met? Met kakehlailihala oh kangoangehda irail brother oh sister pwukat. Paipel ripohtki: “Eri, mwomwohdiso kan pil kehlaillahr nan pwoson oh towe kan wie tohtohla rahn koaros.”—Wiewia 16:5.
9. Soangen pwukoa dah kan me Paipel kasalehda me irail akan me kapwaiada iren Paipel kan kak wia?
9 Ahpw ia koasoandi kan en mwomwohdiso nan ehu ehu rahn? Karasepe ehu, na song medewehla duwen mwomwohdiso kan pohn dekehn Krihd. Mendahki pali laud en aramas en wasao kin adsuwed, ekei irail wekila oh wiahla Kristian mehlel kei. (Taitus 1:10-12; 2:2, 3) Irail kin mih nan kahnihmw wekpeseng kan oh dohsang irail governing body nan Serusalem. Ahpw met sohte wia kahpwal ehu pwe mie irail “me mah kan” ni pali ngehn me kin idihda nan ehu ehu mwomwohdiso kan nan Krihd me pahrekiong dahme kin wiawi nan mwomwohdiso teikan. Ohl pwukat kin ahneki koahiek kan me kileledi nan Paipel. Irail kin pilipilda nin duwen elder kei, sounapwalih kei, me kak “kakehlakahki meteikan padahk mehlel, oh . . . kasalehda sapwung en irail kan me kin uhwong padahk wet.” (Taitus 1:5-9; 1 Timoty 3:1-7) Ohl ngenin teikan me ahr wiewia kin pahrekiong Paipel kin sawas nan mwomwohdiso kan nin duwen ministerial servant kei de sounsawas akan.—1 Timoty 3:8-10, 12, 13.
10. Nin duwen me sansalda nan Madiu 18:15-17, dahme Kristian akan kak wia ni ahnsou me dihp toutou pwarada?
10 Sises kasalehda me pahn mie soangen koasoandi wet. Tamanda dahme kileldi nan Madiu 18:15-17, wasa me e koasoia me pahn kin mie kahpwal kan me pahn kin pwarada nanpwungen riemen me wia sapwellimen Koht aramas, emen me pahn kin wia dihp ohng meteio. Aramas me sapwungo wiawiong pahn pwarala rehn mehteio kelehpwikihla oh “kapwungohng dipeo”. Met en wiawi nanpwungarahte. Ahpw ma met sohte kapwungala ireo, e kak kahrehdo emen de riemen me wehwehki duwen ireo pwehn kak sawas. Iaduwen ma ireo pil sohte mwahula? Sises mahsanih: “A ma e pil sohte men rong irail, a ke lelki mwomwohdiso. A ma e pil sohte men rong mwomwohdiso, a wiahkihla ih mehn liki men de sounrik daksis men.” Ni ahnsou me Sises mahsanih met, irail mehn Suhs akan wiewiahte kisehn “mwomwohdisohn Koht,” kahrehda ni ahnsowo, sapwellime mahsen dokedoke irail.a Ahpw ni ahnsou me mwomwohdisohn Kristian wiawihda, sapwellimen Sises kaweid uhd dokedoke Kristian akan. Met wia kasalepen me sapwellimen Koht aramas akan pahn ahneki koasoandi ehu me pahn kangoange oh kaweid emen emen Kristian akan.
11. Soangen pwukoa dah me elder kan kin ahneki ni ahnsou me petehk oh kapwungpen kahpwal ehu kin wiawi?
11 Pahrekiong met, ohl mah kan, de sounapwalih kan, kin weliandi mwomwohdiso oh apwalihala iren kahpwal de dihp me kin pwarada. Met kin pahrekiong soangen irair kan me elder kan anahne kapwaiada me kileledi nan Taitus 1:9. Ni mehlel, elder kan wia aramas soh unsek kei, duwehte Taitus me Pohl kadaralahng mwomwohdiso kan pwehn “kapwungala soahng koaros me anahnepe mie en wiawi.” (Taitus 1:4, 5) Nan rahn pwukat, mwohn emen pahn wiahla elder men, e anahne wia aramas emen me, ni ahnsou reirei, kin kasalehda mehn kadehdepen ah pwoson oh poadidi. Kahrehda mehteikan nan mwomwohdiso kak ahneki kahrepen irail en kak likih kaweid kan me irail kin kihda ki koasoandi wet.
12. Soangen pwukoa dah me elder kan ahneki me pid duwen mwomwohdiso?
12 Pohl mahsanihong elder kan nan Episos: “Eri, kumwail mwasamwasahn pein kumwail oh pil sihpw akan koaros me Ngehn Sarawi ketikihong kumwail en apwahpwalih. Kumwail en wia silepen mwomwohdisohn Koht, me e ketin sapwellimankilahr pwehki ntahn sapwellime Iehros.” (Wiewia 20:28) Pil duwehte met, irail sounapwalih kan nan mwomwohdiso pil kin idihda pwe irail en kin “wia silepen mwomwohdisohn Koht.” Irail anahne wia met ni elen limpoak, ahpw kaidehn irail en aksoupeidi ong irail pwihn sihpw. (1 Piter 5:2, 3) Sounapwalih kan anahne nantiong kakairada oh sewese irail “sihpw akan koaros.”
En Ieiangete Mwomwohdiso
13. Ekei pak, dahme pahn kin pwarada nan mwomwohdiso, oh pwekida?
13 Elder kan oh koaros nan mwomwohdiso me soh unsek, kahrehda ekei pak sawehwe kan oh kahpwal akan pahn kin pwarada, duwehte dahme wiawi nan senturi keieu ni ahnsou me ekei wahnpoaron akan wie memourte. (Pilipai 4:2, 3) Emen sounapwalih de emen aramas tohrohr pahn nda mehkot me mwomwen loaumwohmw, soh kadek, de sohte nohn mehlel. De ele kitail pahn medewe me ekei mehkan me wiewiawi sohte pahrekiong iren Paipel kan, ahpw e pahn mwomwen me elder kan sohte wia mehkot pwehn kapwungala irairo mendahkihte irail wehwehki duwen irairo. Ni mehlel ele irairo epwellahr ni irair ehu me pahrekiong iren Paipel kan oh nin duwen me pwungiong ekei ire mehlel me pid kahpwalo me kitail sehse duwe. Ahpw mehnda ma irairo ele uhdahn wiawi, medewehla duwen met: Ahnsou kis, mie me suwed laud me pwarada nan mwomwohdisohn Korint, mwomwohdiso ehu me Siohwa kin ketin nsenohki. Mwurin ahnsou kis, e ketin apwalihala irairo ni ahl me pwung oh sohte kohwei kohdo. (1 Korint 5:1, 5, 9-11) Kitail ele pahn pein idek rehtail, ‘Ma I mih nan Korint mahsie, iaduwen I pahn mwekidiki irair akan me pwarada nan ahnsowo?’
14, 15. Dahme kahrehda ekei tokedihsang idawehn Sises, oh mehn kasukuhl dah kitail koledihsang met?
14 Medewe duwen pil ehu irair me kakete pwarada nan mwomwohdiso. Iaduwen ma aramas emen sohte kak wehwehki mouren ehu padahk en Paipel oh sohte kak pwungki. Ele aramas menet wiahier ah research en Paipel oh sawasepen Paipel kan me mie nan mwomwohdiso oh ele pil rapahki sawas sang Kristian mah kan, oh pil elder kan. Ahpw mendahki met, e apwal ohng ih en wehwehkihla oh pwungkihla ireo. Dahme e kak wia? Irair ehu me pahrekiong met pwarada sounpar ehu mwohn Sises pwoula. E mahsanih me ih me “pilawahn komour” oh pwe aramas emen en kak mour kohkohlahte, e pahn anahne “tungoale uduk en Nein Aramas, oh nim ntah.” Ekei nah tohnpadahk ko pwuriamweikihla duwen met. Irail sohte rapahki kawehwehpen met de ele awiawih ni kanengamah pwehki ahr ese me Siohwa pahn ketin kapwungala irairo, tohto irail tohnpadahk pwukat “mweikihsangehr oh solahr men idawehn [Sises].” (Sohn 6:35, 41-66) Eri, ma kitail mih wasao, dahme kitail pahn wia?
15 Nan rahnpwukat, ekei solahr kin werekiong mwomwohdiso kan nan arail wasa, ni ahr kin pepehm me irail kak papah Koht ni ahl me pein irail nsenki. Irail ele pahn nda me irail wia met pwehki mie me kansensuwedirailla, irail medemedewe me mie iren sapwung ehu me sohte kapwungpwungla, de irail ele sohte kak pwungkihla padahk ehu. Iaduwen, ahr mwekid me pwung? E mehlel me emen emen Kristian anahne kakairada nanpwungmwahu rehn Koht, ahpw kitail sohte kak kelikemwe me e kin ketin doadoahngki mwomwohdiso ehu en sampah pwon, duwehte me kin wiawi ni mwein wahnpoaron ako. Pil patehng met, Siohwa kin ketin doadoahngki oh kapaia mwomwohdiso kan en senturi keieu ni eh kin ketin koasoanehdi elder oh ministerial servant warohng kan en wia kamwahu kei ohng mwomwohdiso kan. Met pil pahrekiong nan ahnsouwet.
16. Ma emen ale songosong en men tohrohreweisang mwomwohdiso, dahme e anahne medemedewe?
16 Ma Kristian emen ahneki pepehm me e kak pein uhtohrda oh pein koadoahke eh nanpwungmwahu rehn Koht, eri e sohpeiweisangehr koasoandi ehu me Koht ketin koasoanehdi—iei en kisehn mwomwohdiso ehu en sampah pwon oh mwomwohdiso nan ehu ehu wasa me wiawihkihda sapwellimen Koht aramas akan. Aramas emen pahn ele pein uhtohrda de ele kin ehuiong me malaulaukeite, ahpw likin mwomwohdiso, pahn kak mie koasoandi me pid elder kan nan mwomwohdiso oh irail ministerial servant kan me pilipilda? E sansal me ni ahnsou me Pohl ntinglahng mwomwohdiso en Kolose oh kaweidki audepen kisinlikouo en pil wadawadohng mehn Laodisia, e koasoia duwen mourarail en “poadidiong reh, en pil kekeirkihda [Krais].” Irail kan me mihmi nan mwomwohdiso, kaidehn emen emen me kin katohreirailsang mwomwohdiso kan, me pahn paiekihda met.—Kolose 2:6, 7; 4:16.
Uhr oh Poahsoanpen Me Mehlel
17. Dahme 1 Timoty 3:15 kasalehda me pid duwen mwomwohdiso?
17 Nan nein Pohl tepin kisinlikou ohng Timoty me wia elder men nan mwomwohdiso, e kilelehdi duwen koahiek kan me irail elder kan oh ministerial servant kan ahneki nan mwomwohdiso. Mwurinte mwo Pohl koasoiahda duwen “mwomwohdisohn Koht ieias” ni eh mahsanih me met wia “uhr oh poahsoanpen me mehlelo.” (1 Timoty 3:15) Mwomwohdiso en irail Kristian keidi kan pwon wia soangen uhr wet nan tepin senturi keieu. Oh e sansal me ih soangen mouren koasoandi wette, me pid duwen emen emen Kristian en kin alehdi padahk mehlel sang nan ahr mwomwohdiso, me pahn kin wiawi. Iei nan mwomwohdiso me irail pahn rong duwen kasukuhlpen padahk mehlel oh wasa me kadehdehpen poahsoanpen padahk mehlel pahn kin kohda oh kakehlakahda irail.
18. Dahme kahrehda mihding kan en mwomwohdiso inenen kesempwal?
18 Pil duwehte met, mwomwohdisohn Kristian en sampah pwon iei me wia tehnpas en Koht, “me wia uhr oh poahsoanpen me mehlelo.” Atail kin kaukaule iang towehda mihding kan en atail mwomwohdiso oh iang pasapeng iei me pahn sewese kitail en kekeirada atail nanpwungmwahu rehn Koht, oh kaunopkitaildahng wia kupwure. Ni en Pohl ntinglahng mwomwohdisohn Korint, e kin tehk duwen ire kan me kin kohda nan mihding kan. E ntingihdi me e kupwurki padahk kan me kin wiawi nan mihding kan en kin sansal oh wehwe pwe irail kan me towehda en kak “kekeirada.” (1 Korint 14:12, 17-19) Kitail kak kekeirada ma kitail pahn pohnese me Siohwa Koht ketin mweidada koasoandi kan me kin wiawi nan atail mwomwohdiso kan oh e kin ketin utung.
19. Dahme kahrehda ke pehm me ke pweipwandiong ahmw mwomwohdiso?
19 Ehi, ma kitail inengieng kekeirada nin duwen Kristian kei, kitail anahne wiewiahte kisehn atail mwomwohdiso. Atail mwomwohdiso kin pere kitailsang padahk likamw akan, oh Koht kin ketin doadoahngki mwomwohdiso pwehn kalohkipeseng duwen sapwellime Wehin Mesaiao nan sampah pwon. Ni mehlel, Koht ketin wiahda soahng tohto pwehki mwomwohdisohn Kristian.—Episos 3:9, 10.
[Nting tikitik me mi pah]
a Albert Barnes me wia ohl emen me ahneki sukuhl laud duwen Paipel kin pohnese me sapwellimen Sises kaweid me pid duwen en “lelki mwomwohdiso” kin wehwehki “irail kan me ahneki manaman en tehkada oh kapwungala soangen ire kan me pwarada—sounweliepen mwomwohdiso. Nan en mehn Suhs sinakoke kan, kin mie irail elder kan me kin wia sounkopwung kan me kahpwal kan kin wisikdohng.”
Ke Tamataman?
• Dahme kahrehda kitail kak kasik me Koht pahn ketin doadoahngki mwomwohdiso kan pohn sampah?
• Dahme elder kan kin wia ohng mwomwohdiso, mendahki ahr soh unsek?
• Iaduwen ahmw mwomwohdiso seweseiuk en kehlailda?
[Kawehwehpen kilel kan nan ehu ehu pali 28]
Wahnpoaron ko oh ohl mah kan nan Serusalem kin papah nin duwen governing body
[Kawehwehpen kilel kan nan ehu ehu pali 30]
Elder kan oh ministerial servant kan kin ale mehn kaweid kan pwe irail en kak kapwaiada ahr pwukoah kan ohng mwomwohdiso