Mwomwohdiso Pahn Kapinga Siohwa

“I pahn lohkihong riei kan duwen wiepen limwomwi, I pahn kapinga komwi ni ar kin pokonpenehng kaudok [“nan mwomwohdiso,” NW].”—IPRU 2:12.

1, 2. Dahme kahrehda koasoandi en mwomwohdiso kin wia kamwahupatail, oh ia kahrepen mwomwohdiso me keieu kesempwal?

SANG mahsie, aramas akan kin diarada kompoakparail kan oh pil irair en popohl nan peneinei. Ahpw, Paipel kin kasalehda ehu pwihn tohrohr me aramas tohto nin sampah pwon kin diar kompoakparail kan oh popohl me sikla. Pwihn wet iei mwomwohdiso en Kristian. Sohte lipilipil ma ke kin kohsang nan soangen peneinei me kin kerenpene oh sawaspene de soh, ke kak paiekihda oh anahne kalahnganki dahme Koht kin ketin koasoanehdi nan mwomwohdiso. Mehlel, ma ke kin iang mwomwohdiso en Sounkadehdehn Siohwa kan, ke pahn kak diar nsenamwahu oh ahneki pepehm en sohte perki mehkot.

² Mwomwohdiso sohte kin wiahte wasa me pwihn en aramas akan kin kohpene ie. E sohte kin doakedoake tohn kousoan ieute, de pwihn en aramas me ahnekihpene irair tehieu, de irail akan me perenkihpene soahng tehieu. wia pwihn en aramas akan en wasahn kousoan ehu de pwihn en aramas akan me kohsang irair tehieu de aramas akan me kin pwungkihpene dahme re mwahuki duwehte mwadong ape. Ni pali teieu, koasoandi en mwomwohdiso kin wiawi keieu ong kapingpen Siohwa Koht. Sang mahsie, sapwellimen Koht aramas akan kin pokonpene ong kahrepe wet nin duwen pwuhken Melkahka ah kin kasalehda. Melkahka 35:18 mahsanih: “I ahpw pahn kapingkalahngan ong komwi mwohn pokon en sapwellimomwi aramas akan; I pahn kapinga komwi mwohrail koaros.” Duwehte met, Melkahka 107:31, 32 kin kangoange kitail: “Re uhdahn pahn kapinga KAUN-O pwehki sapwellime limpoak poatopoat, oh manaman kapwuriamwei kan me e ketin wiahiongirailehr. Re uhdahn pahn kalohki roson lapalap wet nan pokon en aramas akan oh kapinga mwohn wie kupwur en me mah kan.”

3. Nin duwen Pohl kin kasalehda, dahme mwomwohdiso kin wia?

³ Kristian wahnpoaron Pohl kin kasalehda pil ehu kahrepen me mwomwohdiso miehki ni ahnsou me e kahdaneki mwomwohdiso “peneinei en Koht, met wehwehki mwomwohdisohn Koht ieias, me wia uhr oh poahsoanpen me mehlelo.” (1 Timoty 3:15) Mehnia mwomwohdiso me Pohl kin koasoakoasoia? Ni ahl dahieu Paipel kin doadoahngki lepin lokaia “mwomwohdiso”? Oh Iaduwen mwomwohdiso wet pahn dokedoke atail mour oh mehkan me kitail kin kasikasik? Pwe kitail en kak diarada pasapengpen peidek pwukat, keieu, kitail pahn tehkpene ni ahl dah kan Mahsen en Koht kin doadoahngki lepin lokaiao “mwomwohdiso.”

4. Pali laud en ahnsou, iaduwen lepin lokaia “mwomwohdiso” kin kadoadoahk nan Paipel en pali nting en lokaiahn Ipru?

⁴ Ni lokaiahn Ipru, lepin lokaia ehu me kin kalapw kawehwehdiong “mwomwohdiso” wehwehki “kapokonpene” de “pokonpene.” (Deuderonomi 4:10; 9:10) Sounmelkahka men kin doadoahngki lepin lokaiahn Ipru wet ong tohnleng kan en nanleng, oh e pil kak wehwehki pwihn en aramas suwed akan. (Melkahka 26:5; 89:5-7) Ahpw, pali laud en ahnsou, Paipel en pali nting en lokaiahn Ipru kin doadoahngki lepin lokaia wet ong mehn Israel kan. Koht mahsanih me Seikop pahn “wiahla wehi ngeder [“mwomwohdiso en aramas akan,” NW],” oh met wiawiher. (Senesis 28:3; 35:11; 48:4) Mehn Israel kan pilipildahr pwehn wiahla “sapwellimen Siohwa mwomwohdiso,” “mwomwohdisohn Koht mehlel.”—Nempe 20:4, NW; Nehmaia 13:1, NW; Sosua 8:35; 1 Samuel 17:47; Maika 2:5.

5. Mehnia lepin lokaia en Krihk kin kalapw kawehwehdi ong “mwomwohdiso,” oh iaduwen lepin lokaia wet kak kadoadoahk?

⁵ Ni lokaiahn Krihk, lepin lokaiao iei ek·kle·siʹa, me kohsang lepin lokaia riau me wehwehki “sang” oh “likwerih.” E kak kadoadoahk ong pwihn en aramas akan me sohte kin pid sarawi, me rasehng “pokono” me Demihtrius kamwekid en uhwong Pohl nan Episos. (WIewia 19:32, 39, 41) Ahpw pali laud en ahnsou, Paipel kin doadoahngki lepin lokaiao ong mwomwohdisohn Kristian. Ekei sounkawehwe kan kin kawehwehdi lepin lokaia wet ong “ihmw sarawi,” ahpw ehu dictionary en Paipel ripohtki me “e sohte . . . kin wehwehki ihmw ehu me Kristian akan kin pokonpene ong arail kaudok en wehipokon.” Ahpw, nan Paipel en pali nting en lokaiahn Krihk, kitail kin diar me lepin lokaiao “mwomwohdiso” kin kadoadoahk ni ahl pahieu.

Mwomwohdisohn me Keidi kan en Koht

6. Dahme Depit oh Sises ketin wia nan mwomwohdiso?

⁶ Wahnpoaron Pohl kin doadoahngki mahsen en Depit me dierek nan Melkahka 22:22 ong Sises oh mahsanih: “‘I pahn lohkihong riei kan duwen wiepen limwomwi, I pahn kapinga komwi ni ar kin pokonpenehng kaudok [“nan mwomwohdiso,” NW].’ Eri, met wehwehki me [Sises] uhdahn duwehla rie ko ni soahng koaros pwe en wiahla arail samworo lapalap, loalopwoat oh kalahngan, ni sapwellime doadoahk ong Koht, pwe aramas akan en kin ale lapwepen diparail kan.” (Ipru 2:12, 17) Depit kapinga Koht nan mwomwohdisohn Israel mahs. (Melkahka 40:9) Ahpw, dahme Pohl kin koasoakoasoia duwe ni ahnsou me e mahsanih me Sises kapinga Koht “nan mwomwohdiso”? Mehnia mwomwohdiso me e kin koasoia duwe?

7. Ni ahl dahieu iren Paipel en pali nting Krihk kan kin kalapw doadoahngki lepin lokaia “mwomwohdiso”?

⁷ Dahme kitail diarada nan Ipru 2:12, 17 me kesempwal. E kin kasalehda me Krais pil wia kisehn mwomwohdiso, wasa me e kin pakairki mwaren Koht ong rie brother kan. Ihs irail rie kan? Iei irail kan me kin kohpene wiahda “kadaudok en Eipraam,” rien Krais kan me keikihdi ngehn sarawi, irail kan me “Koht pil ketin malipeier.” (Ipru 2:16–3:1; Madiu 25:40) Mehlel, pali laud en ahnsou, nan iren Paipel en pali nting en Krihk kan, “mwomwohdiso” kin wehwehki pwihn en tohnpadahk en Krais me keidi kan. Irail meh 144,000 me keidi kan kin wiahda “mwomwohdiso en meseniho me kileledier nanleng.”—Ipru 12:23, NW.

8. Iaduwen Sises ketin kasalehda kokoudahn mwomwohdisohn Kristian?

⁸ Sises ketin kasalehda me “mwomwohdiso” en Kristian wet pahn wiawihda. Mpen sounpahr ehu mwohn sapwellime pwoula, e ketin mahsanihong emen wahnpoaron: “Kowe Piter, . . . oh pohn paipalap wet I pahn kauwada ei mwomwohdiso. Oh mehla sohte pahn kak kalowehdi.” (Madiu 16:18) Piter oh Pohl koaros kin wehwehki mwahu me Sises iei paipalapo me mih nan kokohp. Piter ntingihdi me irail kan me pahn kokouda pohn paipalapo, me iei Krais, nin duwen arail wia “takai mour kei” en imwen pali ngehn ehu, kin wia “sapwellimen Koht aramas kei, me pipildahng kalohkiseli wiewia kapwuriamwei kan” en Meno me ketin malipeiiraildo.—1 Piter 2:4-9; Melkahka 118:22; Aiseia 8:14; 1 Korint 10:1-4.

9. Iahd mwomwohdisohn Koht tepida wiawihda?

⁹ Iahd “sapwellimen Koht aramas kei” wet tepidahr wiawihda ong mwomwohdisohn Kristian? E wiawi ni Pendekos 33 C.E. ni ahnsou me Koht kamwerehdi ngehn sarawi ong tohnpadahk kan me kohpene nan Serusalem. Mwurin rahno, Piter wia kapahrek kaselel ehu ong mehn Suhs akan oh mehn liki kan me wekiong pelien lamalam en mehn Suhs. Me tohto pahtoukihla mehlel duwen pwoulahn Sises; irail koluhla oh papidaisla. Kitail kin kilangasang nan ripoht en Paipel me aramas silikid me wia met, oh mwurinte met, re wiahla kisehn mwomwohdisohn Koht kapwo me kin kekeirada. (Wiewia 2:1-4, 14, 37-47) E kin kekeirada pwehki mehn Suhs tohto oh irail mehn liki kan me wekiong pelien lamalam en mehn Suhs tohto wehwehki me nin duwen arail wia wehi ehu, Israel sohlahr kin wia mwomwohdisohn Koht. Ni pali teio, Kristian me keidi kan me kin wiahda “Israel en Koht” en pali ngehn wiahlahr mwomwohdiso mehlel en Koht.—Kalesia 6:16, NW; Wiewia 20:28.

10. Ia mwomwen nanpwungen Sises oh mwomwohdisohn Koht?

¹⁰ Paipel kin kalapw kasalehda wekpeseng en Sises oh me keidi kan, ni soangen mahsen kan duwehte “Krais oh mwomwohdiso.” Sises iei Tapwin mwomwohdiso en irail Kristian me keidi kan. Pohl ntingihdi me Koht “ketin kasapwilada [Sises] en wiahla Kaunen mehkoaros oh tapwin mwomwohdiso, me iei paliwere.” (Episos 1:22, 23; 5:23, 32; Kolose 1:18, 24) Rahnwet, pwihn tikitik ieu en luhwen me keidi kan me kin wia kisehn mwomwohdiso wet pohn sampah. Kitail kak kamehlele me arail Kaun, Sises Krais, kin ketin limpoakohng irail. Sapwellime pepehm ong irail kin kileldi nan Episos 5:25: “Krais eh ketin poakohng mwomwohdiso oh ketin pangala pein ih pwehki mwomwohdiso.” E ketin limpoakohng irail pwehki irail kin kaukaule kihong Koht “meirong en kaping . . . me kin kadehdehda” duwen mwareo, duwehte me Sises kin ketin wia ni ahnsou me e kin ketiket pohn sampah.—Ipru 13:15.

“Mwomwohdiso”—Ni Wehwe Teikan

11. Ia keriaun ahl me Paipel en pali nting en lokaiahn Krihk kin doadoahngki lepin lokaiao “mwomwohdiso”?

¹¹ Ekei pak nan Paipel, lepin lokaia “mwomwohdiso” sohte kin oarepene pwihn en 144,000 en me keidi ko pwon me kin wiahda “mwomwohdisohn Koht.” Karasepe, Pohl ntingihdi ong pwihn en Kristian akan: “Kumwail dehr wia mehkot me kak wiahla kahrepen dihp [“dipekelekel,” NW] rehn mehn Suhs akan de mehn liki kan, de rehn tohn mwomwohdisohn Koht.” (1 Korint 10:32) E sansal, ma emen Kristian nan Korint mahs kin wia mehkot me sohte konehng, met pahn wiahla kahrepen dipekelekel ong ekei. Ahpw, met pahn kadipikelekelih mehn Krihk pwon de mehn Suhs pwon, de me keidi kan sang ahnsowo lel rahnwet? E sansal me soh. E kin kasalehda me nan iretikitik wet, “mwomwohdisohn Koht” kin wehwehki Kristian akan me kin momour ni ahnsou ehu. Kahrehda emen kak nda me Koht kin ketin kahre, sewese, oh kapaiada mwomwohdiso, oh met kin dokedoke Kristian koaros en ahnsowo, sohte lipilipil iawasa irail kin mihmi ia. De kitail kak nda me nsenamwahu oh popohl kin mie rehn sapwellimen Koht mwomwohdiso rahnwet, oh met kin wehwehki nanpwungen pwihn en pirien en Kristian pwon nan sampah.

12. Ia kesiluh en ahl me Paipel kin doadoahngki lepin lokaia “mwomwohdiso”?

¹² Kesiluh en ahl me Paipel kin doadoahngki lepin lokaia “mwomwohdiso” iei Kristian koaros nan ehu wasa. Kitail kin wadek: “Mwomwohdiso ahpw meleileidi wasa koaros nan Sudia, Kalili, oh Sameria.” (Wiewia 9:31) Mie pwihn en Kristian tohto sang ehu nan soangen wasa laud pwukat, ahpw pwihn pwukat koaros nan Sudia, Kalili, oh Sameria kin adaneki “mwomwohdiso.” Ni atail kin medemedewe duwen uwen tohtohn aramas akan me papidaisla ni Pendekos 33 C.E. oh mwurinte mwo kin kasalehda, mwein mie pwihn tohto sang ehu me kin kaukaule pokonpene nan Serusalem. (Wiewia 2:41, 46, 47; 4:4; 6:1, 7) Erod Akripa I kin kaunda Sudia lao lel ah mehla nan 44 C.E., oh e sansal sang 1 Deselonika 2:14 me mpen pahr 50 C.E., mie mwomwohdiso tohto nan Sudia. Kahrehda, ni ahnsou me kitail wadek me Erod kin “keme ekei tohn mwomwohdiso,” met kin pid tohtohsang pwihn ehu me kin pokonpene nan Serusalem.—Wiewia 12:1.

13. Ia kapahieu en ahl me Paipel kin kalapw doadoahngki ong lepin lokaiao “mwomwohdiso”?

¹³ Kapahieu, lepin lokaiao “mwomwohdiso” pil kin wehwehki Kristian akan me kin wiahda ehute mwomwohdiso, duwehte mwomwohdiso me mih nan ehu ihmw. Pohl kin koasoia duwen “mwomwohdiso kan en Kalesia.” Mie mwomwohdiso tohto sang ehu nan kousapw laud en wehin Rom. Pak riau Pohl doadoahngki lepin lokaia “mwomwohdiso kan” me pid duwen Kalesia, oh met kin wehwehki mwomwohdiso kan nan Andiok, Derpe, Listra, oh Aikoniomw. Ohl mah kan de sounapwalih kan kin idihdda nan soangen mwomwohdiso pwukat. (1 Korint 16:1; Kalesia 1:2; Wiewia 14:19-23) Nin duwen iren Paipel kan ar kin kasalehda, mwomwohdiso pwukat koaros kin wia “mwomwohdiso kan en Koht.”—1 Korint 11:16; 2 Deselonika 1:4.

14. Dahme kitail kak wehwehki sang mwomwen ekei iren Paipel kan kin doadoahngki lepin lokaia “mwomwohdiso”?

¹⁴ Ekei ahnsou, pwihn kan me kin pokonpene ni ahnsou mihding en Kristian akan kin tikitik, me kak kohpene nan imwen aramas. Ahpw, soangen pwihn tikitik pwukat pil kin adaneki “mwomwohdiso.” Mwomwohdiso pwukat me kitail ese iei mwomwohdiso kan en imwen Akwila oh Persila, Nimpa, oh Pailimwon. (Rom 16:3-5; Kolose 4:15; Pailimwon 2) Met kin wia mehn kangoang ong mwomwohdiso kan rahnwet me kin wia pwihn tikitik kan oh kin kaukaule pokonpene nan pein imwen aramas. Siohwa ketin pohnese soangen mwomwohdiso tikitik pwukat nan keieun senturi, oh e pil ketin wia met ni atail ahnsou, oh kapaiada irail ki sapwellime ngehn sarawi.

Mwomwohdiso kan me Kin Kapinga Siohwa

15. Ia duwen doadoahk en ngehn sarawi kin sansalda nan ekei mwomwohdiso en mahs akan?

¹⁵ Kitail tehkpenehr mwowe me nin duwen me Melkahka 22:22 kohpadahr, Sises kin ketin kapinga Koht nan mwomwohdiso. (Ipru 2:12) Sapwellime tohnpadahk lelepek kan pil kin wia duwehte. Nan keieun senturi, ni ahnsou me Kristian mehlel kan kin keikihdi ngehn sarawi ni arail pahn wiahla sapwellimen Koht seri kan oh pil rien Krais kan, ngehn sarawi kin doadoahk ong ekei irail ni ehu ahl tohrohr. Irail alehdi kisakis en manaman en ngehn sarawi kan. Ekei kasansalepen soangen kisakis pwukat iei arail kin wia lokaia tohrohr ni erpit oh loalokong, oh ale manaman en kamwahuiala soumwahu kan de pil wia kohpada, de koahiek en lokaia ni lokaia kan me irail sehse mahs.—1 Korint 12:4-11.

16. Ia ehu kahrepen kisakis en manaman en ngehn sarawi kan?

¹⁶ Me pid duwen lokaia kapwonopwon kan, Pohl mahsanih: “I pahn kapakap ni ngeni, oh I pahn kapakap nan ei lamalam.” (1 Korint 14:15) E wehwehkier me e kesempwal ong meteikan en kak wehwehki ah lokaia kan pwe ren kak ale kaweid kan. Ahn Pohl mehn akadei iei en kapinga Siohwa nan mwomwohdiso. E kin kangoange meteikan me kin ahneki kisakis en ngehn: “Kumwail en ngoangki doadoahngki kisakis kan me mwomwohdiso kak kekeirkihda,” oh met wehwehki nan mwomwohdiso me re kin doadoahngki kisakiso. (1 Korint 14:4, 5, 12, 23) E sansal me Pohl kin nsenohki mwomwohdiso kan, pwe e ese me nan ehu ehu mwomwohdiso, Kristian akan pahn ahneki ahnsou mwahu kan en kapinga Koht.

17. Me pid duwen ehu ehu atail mwomwohdiso kan rahnwet, dahme kitail kak kamehlele?

¹⁷ Siohwa kin ketin pousehla oh doadoahngki sapwellime mwomwohdiso. E kin ketin kapaiada pwihn en Kristian me keidi kan pohn sampah rahnwet. E kin sansaliki uwen laud en mwengehn ngehn me sapwellimen Koht aramas akan kin paiekihda. (Luk 12:42) E kin kapaiada pirien en brother kan nan sampah pwon. Oh e kin ketin kapaiada ehu ehu atail mwomwohdiso kan, wasa me kitail kin kapinga Sounkapikpatail sang ni atail wiewia kan oh atail pasapeng kan me kin kakehlailih meteikan ni pali ngehn. Nan wasao, kitail kin ale kasukuhl oh kaiahn pwe kitail en kak kapinga Koht ni ahnsou de wasa teikan, ahnsou kan me likin atail pokondohng atail mwomwohdiso.

18, 19. Dahme Kristian poadidi kan nan ehu ehu mwomwohdiso men wia?

¹⁸ Tamanda duwen ahn wahnpoaron Pohl ah kin kangoange Kristian akan nan mwomwohdiso nan Pilipai, Masedonia: “I kin kapakap pwe . . . amwail mour pil pahn audaudkihla soangen kamwahu mehlel kak koaros me Sises Krais kelehpw kak ketikihda, ong ni lingan oh kapingpen Koht.” Met pahn pid arail pahn kin koasoiaiong meteikan, me mih likin mwomwohdiso, duwen arail pwoson Sises oh arail koapworopwor kaselel kan. (Pilipai 1:9-11; 3:8-11) Kahrehda, Pohl kin kangoange ienge Kristian akan: “Kitail poaden wiahiong Koht atail tungoal meirong en kaping rehn Sises; pwe ih soangen meirong wet me kin kadehdehda duwen” mwareo.—Ipru 13:15.

¹⁹ Ke kin perenki kapinga Koht “nan mwomwohdiso” duwehte me Sises kin ketin wia, oh pil doadoahngki kilin ewomw pwehn kapinga Siohwa mwohn irail akan me saikinte esehla oh saikinte kin kapinga ih? (Ipru 2:12, NW; Rom 15:9-11) Atail pasapengpen peidek wet pahn poahsoankihda ia mwomwen atail pepehm ong duwen pwukoa en atail mwomwohdiso nan sapwellimen Koht kupwur kan. Nan artikel en mwurin met, kitail pahn tehkpene iaduwen Siohwa kin ketin kahre oh doadoahngki atail mwomwohdiso oh ia pahn dewen mwomwohdiso nan atail mour rahnwet.

Ke Tamataman?

• Iaduwen “mwomwohdisohn Koht,” me wiawihkihda Kristian me keidi kan wiawihda?

• Ia ahl siluh teikan me Paipel kin pil doadoahngki lepin lokaiao “mwomwohdiso”?

• Me pid duwen mwomwohdiso, dahme Depit, Sises, oh Kristian akan nan keieun senturi men wia, oh iaduwen met anahne kamwekid kitail?

[Kawehwehpen kilel kan nan ehu ehu pali 23]

Sises ketin wia poahsoanpen mehnia mwomwohdiso?

[Kawehwehpen kilel kan nan ehu ehu pali 25]

Pwihn en Kristian akan kin tuhpene nin duwen “mwomwohdisohn Koht”

[Kawehwehpen kilel kan nan ehu ehu pali 26]

Duwehte Kristian akan nan Benin, kitail kak kapinga Siohwa nanpwungen aramas akan me pokonpene