Kesempwalki Omw Pwais Nan Mwomwohdiso
“Koht ketikipene ni paliwar en aramas kakon koaros duwen me e ketin kupwurki.” —1 KOR. 12:18.
1, 2. (a) Dahme kasalehda me koaros nan mwomwohdiso kak ahneki pwais me re kak kesempwalki? (b) Peidek dah kan me kitail pahn tehkpene nan iren onop wet?
SANGETE mahs ni mwehin mehn Israel kan, mwomwohdiso kin wia sapwellimen Siohwa koasoandi en apwalih oh kaweidih sapwellime aramas akan. Karasepe, mwurin men Israel kan kalowehdi kahnimw en Ai, Sosua “wadekohng irail Kosonnedo pwon iangahki kupwuramwahu kan oh keria kan, nin duwen ar ntingdier nan Pwuhken Kosonnedo . . . ong pokono, iangahki lih akan oh seri kan, pil mehn liki kan me kin kousoan rehrail.”—Sos. 8:34, 35.
2 Ni mwehin tepin Kristian kan, wahnpoaron Pohl padahkihong Timoty me wia elder ni ahnsowo, me mwomwohdisohn Kristian kin wia “peneinei en Koht” oh pil “uhr oh poahsoanpen me mehlelo.” (1 Tim. 3:15) Sapwellimen Koht “peneinei” rahnwet iei pirien en Kristian mehlel kan nan sampah pwon. Nan irelaud 12 en tepin nah kisinlikou ong mehn Korint kan, Pohl karasahiong mwomwohdiso duwehte paliweren aramas men. E koasoia me mehnda ma ehuehu kakon kan kin ahneki pwukoa kan me wekpeseng, koaros kin kesempwal. E ntingihdi: “Koht ketikipene ni paliwar en aramas kakon koaros duwen me e ketin kupwurki.” E pil kasalehda me “kakon teikan me kitail kin lemeleme me sohte nohn kesempwal, ih me kitail kin apwalih mwahu.” (1 Kor. 12:18, 23) Eri, pwukoahn aramas pwung men nan sapwellimen Koht peneinei sohte kin mwahusang en Kristian lelepek teio. Ihte e wekpeseng. Eri, ia duwen atail kak ese oh kesempwalki atail pwais nan sapwellimen Koht koasoandi? Soahng dah kan me kakete pidada omw pwukoa nan mwomwohdiso? Oh ia duwen atail kak kasalehiong ‘aramas koaros en kak kilang atail kekeirda’?—1 Tim. 4:15.
Ia Duwen Atail Kin Kesempwalki Atail Pwais?
3. Ia ehu ahl me kitail kak ese atail pwais nan mwomwohdiso oh kasalehda me kitail kin kesempwalki?
3 Ehu ahl me kitail kin ese atail pwais nan mwomwohdiso oh kadehdehda me kitail kesempwalki iei en uhpahiong mehlel “ladu lelepek oh loalokong” oh wilieperail Pwihn me kin apwalih mwomwohdiso nan sampah pwon. (Wadek Luk 12:42-44.) Kitail anahne kasawih ia uwen atail kin peikiong kaweid kan sang pwihn en laduwo. Karasepe, erein sounpar tohto, kitail kin alehdi kaweid me pid atail likou oh kapwat, mehn kamweit kan oh duwen atail en dehr doadoahngki Internet ni ahl sapwung. Ia duwe, kitail kin nsenohki kapwaiada kaweid mwahu pwukat pwe kitail en pere atail nanpwungmwahu rehn Koht? Ia duwen kaweid ong koasoandi en kaukaule wia kaudok en peneinei? Kitail kin mwekidki oh koasoanehdi ehu ni soutik pwehn wia koasoandi wet? Ma kitail kiripw, kitail kin koasoanehdi ahnsou ong onopki ire kan en Pwuhk Sarawi? Siohwa pahn ketin kapaikitailda oh pil peneinei kan ma kitail kin idawehn kaweid kan sang pwihn en laduwo.
4. Dahme kitail anahne medemedewe ni atail kin wiahda pein atail pilipil kan?
4 Ekei kin medewe me emenemen Kristian kak wiahda pein eh pilipil duwen ire kan me pid mehn kamweit, likou oh kapwat. Ahpw Kristian me inoukidahr arail mour ong Siohwa oh kin kesempwalki arail pwais nan mwomwohdiso sohte anahne wiahki dahme re nsenki en wia poahsoanpen arail pilipil kan. Re anahne medemedewe mahs sapwellimen Siohwa madamadau me sansalda nan Paipel. Mahsen en Paipel anahne wia ‘serepatail, mehn kaweidpatail, oh kamarainpen eletail kan.’ (Mel. 119:105) E wia elen erpit en tehk ia duwen atail pilipil kan eh kin pidada atail doadoahk en kalohk, meteikan nan mwomwohdiso oh likin mwomwohdiso.—Wadek 2 Korint 6:3, 4.
5. Dahme kahrehda kitail en pere kitailsang madamadau en uhtohrda?
5 “Ngehn [“irair en madamadau,” NW] me kin kamwakamwakid oh kakaun irail kan me kin uhwong Koht” uhdahn rekla wasa koaros oh e duwehla ahng me kitail kin esingengki. (Ep. 2:2) Madamadau wet kak kahrehiong kitail en medewe me kitail sohte anahne kaweid sang sapwellimen Siohwa pwihn. Uhdahn kitail sohte men duwehte Diohtrepihs me ‘sohte men rong en wahnpoaron Sohn koasoi.’ (3 Sohn 9, 10) Kitail anahne kanaiehng en dehr kakairada madamadau en uhtohrda. Eri, kitail en dehr nda de wia mehkot me pahn uhwongada irail kan me Siohwa kin ketin doadoahngki rahnwet. (Nemp. 16:1-3) Ahpw kitail anahne en kesempwalki atail pwais en peikiong pwihn en laduwo. Kitail sou pil anahne nantihong peikiong oh uhpa irail akan me kin apwalih atail mwomwohdiso?—Wadek Ipru 13:7, 17.
6. Dahme kahrehda kitail en kasawih atail irair kan?
6 Pil ehu ahl kitail en kasalehda atail kesempwalki atail pwais nan mwomwohdiso iei en kasawih atail irair kan oh wia uwen atail kak koaros en ‘kalinganahla atail doadoahk’ oh kawauwih Siohwa. (Rom 11:13, NW) Ekei kin kak wia pioneer kan. Ekei kin kak papah nin duwen misineri kan, sounapwalih kan me kin seiloak, oh iang doadoahk nan Pedel nan sampah pwon. Riatail Kristian tohto kin iang doadoahk en kauwada Wasahn Kaudok en Sounkadehdehn Siohwa kan. Pali moron en sapwellimen Siohwa kan kin wia uwen arail kak en sewese arail peneinei en kin papah Siohwa oh pil doadoahngki pali laud en arail ahnsou en iang kalohk ehuehu wihk. (Wadek Kolose 3:23, 24.) Kitail kak kamehlele me ni ahnsou me kitail kin toukihda pein kitail ong sapwellimen Koht doadoahk oh wia uwen atail kak en papah ih ni mour unsek, kitail pahn kolokolete atail pwais nan sapwellime koasoandi.
Ire kan me Pid Atail Pwais nan Mwomwohdiso
7. Ia duwen atail irair kan kak pidada pwais me kitail ahneki nan mwomwohdiso.
7 E kesempwal kitail en tehk duwen atail irair pwehki met pahn pidada uwen me kitail kak wia ong atail pwais nan mwomwohdiso. Karasepe, pwais en brother men kak weksang pwais me sister men ahneki. Sounpar, irair en roson mwahu oh soahng teikan pil kin kasalehda uwen me kitail kak wia nan sapwellimen Siohwa doadoahk. Lepin Padahk 20:29 mahsanih: “Kitail kin kapinga kehlail en me pwulopwul kan oh wauneki me moangepwet kan.” Me pwulopwul kan nan mwomwohdiso ele kak wia doadoahk laud pwehki kehl me re ahneki, ah mwomwohdiso kin paiekihda me mah kan pwehki arail erpit oh pil sang dahme re lelohngehr nan arail mour. Kitail pil anahne tamataman me sohte lipilipil dahme kitail kak wia nan sapwellimen Siohwa pwihn kin kohsang sapwellimen Koht kalahngan.—Wiewia 14:26; Rom 12:6-8.
8. Ia duwen atail ineng eh kin pidada dahme kitail kin wia nan mwomwohdiso?
8 Karasepen pirien pwulopwul ehu kin kasalehda pil ehu ire me pid atail pwais me kitail pahn ahneki nan mwomwohdiso. Ira koaros kesepwil sang pwihn kaeisek riau. Ara irair duwehpene. Ara pahpa oh nohno kin wia uwen ara kak pwehn kangoange ira en iang pioneer mwurin ara kesepwil. Mwurin kesepwil, emen wiahla pioneer ah emen tepida doadoahk en mwohni. Dahme kahrehda? Pwehki ara ineng wekpeseng. Ni imwi, emenemen wiahda dahme re men wia. Met sou pil mehlel rehtail? Kitail anahne medewe mwahu dahme kitail men wia nan sapwellimen Koht doadoahk. Kitail kak kalaudehla atail papah Koht mehnda ma met wehwehki me kitail anahne wekidala atail irair kan?—2 Kor. 9:7.
9, 10. Dahme kitail en wia ma sohte atail ineng en men kalaudehla atail papah Siohwa?
9 Ia duwen ma sohte atail ineng en men kalaudehla atail papah Siohwa oh kin ihte ieiang wiewiahn mwomwohdiso kan? Nan nah kisinlikou ong mehn Pilipai kan, Pohl koasoia: “Pwe Koht kin ketin wie doadoahk loalamwail ahnsou koaros, pwe kumwail en materek oh kak kapwaiada kupwure.” Ei, Siohwa kak kamwakid oh ketikihong kitail ineng en papah ih.—Pil. 2:13.
10 Eri, e sou konehng kitail en peki rehn Siohwa en ketikihong kitail ineng en men kapwaiada kupwure? Nanmwarki Depit en Israel wia met. E kapakap patohwan: “Maing KAUN, komw ketin padahkihong ie, oh kasalehong ie sapwellimomwi ahl akan. Komw ketin padahkihong ie duwen ei pahn momourki sapwellimomwi mehlel, pwe komwi me ei Koht, komwi me ketin doareiehla. I kin likih komwi ahnsou koaros.” (Mel. 25:4, 5) Kitail pil kak wia soahngohte ni atail kapakap pwe Siohwa pahn ketin sewese kitail en men wia dahme kin kaperenda ih. Ni atail kin medewe duwen sapwellimen Siohwa pepehm oh pepehm en sapwellime Ohl ong atail doadoahk en papah ira, atail mohngiong kin dirkihla kalahngan ong ira. (Mad. 26:6-10; Luk 21:1-4) Pepehm en kalahngan wet pahn kamwakid kitail en peki Siohwa en ketikihong kitail ineng en kalaudehla atail papah nan sapwellime doadoahk. Soukohp Aiseia wiahda mehn kahlemeng mwahu duwen soangen madamadau me kitail en kakairada. Ni e rongada kapitien Siohwa me mahsanih: “Ihs me I pahn kadarala, oh ihs me pahn wia atail meninkeder?” Soukohpo sapeng patohwan: “Iet ngehi, Maing, komwi ketin poaroneiehla.”—Ais. 6:8.
Ia Duwen Omw Pahn Kekeirda
11. (a) Anahn dahieu me brother kan en akadeiong nan sapwellimen Siohwa pwihn? (b) Ia duwen brother men eh kak nantihong pwehn ale pwais kan nan mwomwohdiso?
11 E sansal me mie anahn laud ong brother kan en tiengla mwowe oh apwalih mwomwohdiso pwehki meh 289,678 papidaislahr nan pahr en kalohk 2008. Ia duwen brother men eh pahn mwekidki anahn wet? Ni mwotomwot, re anahne nantihong wia dahme Paipel kaweidki pwehn wiahla emen sounsawas de elder. (1 Tim. 3:1-10, 12, 13; Taitus 1:5-9) Ia duwen brother men kak nantihong kapwaiada dahme Paipel kaweidki? Sang ni eh iang pidada laud doadoahk en kalohk, pwerisekiong eh pwukoa kan nan mwomwohdiso, kamwahwihala eh pasapeng kan nan mihting kan en Kristian, oh pil nsenohki ienge me pwoson akan. Met kasalehda me e kin kesempwalki eh pwais nan mwomwohdiso.
12. Ia duwen me pwulopwul kan arail kak kasalehda ngoang nan padahk mehlel?
12 Dahme mwahnakapw kan, ahpw mehlel irail kan me sounpar 13-19, kak wia pwehn kekeirda nan mwomwohdiso? Irail kak nantihong kekeirda ni erpit oh wehwehkihla loalokong pwung sang ni arail kin sukuhlki Paipel. (Kol. 1:9) En wia tohnsukuhl en Paipel pwerisek men oh iang pidada laud wiewia kan nan mihting en mwomwohdiso pahn uhdahn sawas laud. Brother pwulopwul kan kak pil nantihong en doadoahngki pali laud en arail ahnsou pwehn iang ahneki “ahnsou kaselel ehu ong doadoahk laud oh katapan mehlel” nan soangsoangen pwais kan en papah Siohwa. (1 Kor. 16:9) En rapahki pwukoa kan nan sapwellimen Siohwa doadoahk pahn uhdahn wahdo nsenamwahu oh kapai tohto nan omw mour.—Wadek Eklesiasdes 12:1.
13, 14. Ni ahl dah kan me sister kan kin kasalehda me re kesempwalki arail pwais nan mwomwohdiso?
13 Sister kan pil kak kasalehda arail kin kesempwalki arail pwais ni arail kin iang kapwaiada kokohp en Melkahka 68:11. Wasaht mahsanih: “Kaun-o ketin poahngoak, oh lih ngeder me waseli poaron en poahngok wet.” Ehu ahl me keieu sansal me irail kin kasalehda arail kalahnganki arail pwais nan mwomwohdiso iei en iang wia doadoahk en katohnpadahk. (Mad. 28:19, 20) Eri, ni arail kin iang pidada laud kalohk oh men wiahda tounmetei kan ong doadoahk wet, irail kin kadehde me re kesempwalki arail pwais nan mwomwohdiso.
14 Ni eh ntinglahng Taitus, Pohl koasoia: “Pil duwehte ong lih mah kan, padahkihong irail re en kin mour nin duwen me konehng lih poadidi kan. . . . Re en kin kihwei padahk mwahu, pwe re en kak kaiahnehda peinakapw akan pwe re en poakohng arail pwoud kan oh neirail seri kan, re en kin kanahieng pein irail pwe re en min, re en wiahla lih wiewia mwahu en nan ihmw oh peikiong arail pwoud kan; pwe emen dehr lahlahwehki mahseno sang rehn Koht.” (Taitus 2:3-5) Ia uwen sister kan me koahiek ar kin wia kamwahu ong mwomwohdiso! Ni arail kin wauneki brother kan me kin apwalih mwomwohdiso oh sang ni arail wiahda pilipil erpit kan me pid arail likou oh kapwat oh mehn kamweit kan, re kin wiahda mehn kahlemeng mwahu ong meteikan oh kasalehda me re kesempwalki arail pwais nan mwomwohdiso.
15. Dahme sister kiripw men ele kak wia pwehn powehdi pepehm en sangat?
15 Ekei pak e kin apwal ong sister kiripw kan en kalahnganki arail pwais nan mwomwohdiso. Emen sister me lelohng met koasoia: “Mour en me kiripw men kin ekei pak kahrehda ken sangat.” Eri, ia duwen e powehdi met? E nda: “Kapakap oh onop kin sewese ien pwurehng wia ei pwais. I kin onopki ia duwen Siohwa eh kin ketin kilangwohng ie. Ngehi eri kin nantihong en song sewese meteikan nan mwomwohdiso. Met sewese ien kin medemedewe meteikan ah kaidehn pein ngehi kelehpw.” Nin duwen Melkahka 32:8, Siohwa mahsanihong Depit: “I pahn kaweid uhk oh panawihiuk.” Ei, Siohwa kin ketin nsenohki emenemen sapwellime ladu kan, iangahki sister kiripw kan oh e pahn pil ketin sewese koaros en kalahnganki arail pwais nan mwomwohdiso.
Kolokolte Omw Pwais!
16, 17. (a) Dahme kahrehda en pwungki ale sapwellimen Siohwa luhk pwehn wia kisehn sapwellime pwihn iei pilipil keieu mwahu me kitail kak wiahda? (b) Ia duwen atail kak kolokolte atail pwais nan sapwellimen Siohwa pwihn?
16 Siohwa ni limpoak kin ketin kainangihedo emenemen sapwellime ladu kan en ahneki nanpwungmwahu reh. Sises mahsanih: “Sohte emen me pahn kak kohdo rehi, ma Semei me ketin kadariehdo sohte kainangihedo rehi.” (Sohn 6:44) Nanpwungen aramas lik lik kei nin sampah, Siohwa ketin luke kitail pwehn wia kisehn sapwellime mwomwohdiso rahnwet. En pwungki oh ale luhk wet iei pilipil keieu mwahu me kitail wiahdahr. E kihong wehwehn atail mour. Ia uwen kaperen oh kansenamwahu pwehki mie atail pwais nan mwomwohdiso!
17 Soun Melkahkao patohwan: “Maing Siohwa, I patohwan poakohng tehnpasomwi.” E pil koulki: “Nehi kat kin kesikesihnen pohn wasa patapat; Nan pokon en aramas akan I pahn kapinga Siohwa.” (Mel. 26:8, 12, NW) Koht mehlelo kin ketikihong emenemen kitail atail pwais nan sapwellime pwihn. Ni atail pousehlahte oh idawehn kaweid kan me Koht ketikihda oh kin pwerisekiong sapwellime doadoahk, kitail kak kolokolte atail pwais kesempwal nan sapwellimen Siohwa koasoandi.
Ke Tamataman?
• Dahme kahrehda e pwung en nda me Kristian koaros ahneki pwais nan mwomwohdiso?
• Ia duwen atail kin kasalehda me kitail kesempwalki atail pwais nan sapwellimen Koht pwihn?
• Ire dah kan me kak pidada atail pwais nan mwomwohdiso?
• Ia duwen Kristian pwulopwul kan oh me laud kan ar kak kasalehda me re kesempwalki arail pwais nan sapwellimen Koht koasoandi?
[Kawehwehpen kilel kan nan ehu ehu pali 20]
Ia duwen brother kan ar kak nantihong pwehn ale pwais kan nan mwomwohdiso?
[Kawehwehpen kilel kan nan ehu ehu pali 19]
Ia duwen sister kan ar kak kasalehda me re kesempwalki arail pwais nan mwomwohdiso?