En Mahkpene Nanpwungatail

“Kumwail en sawaspene oh mahkpene nanpwungamwail.”​—KOL. 3:13.

IA OMW PASAPENG?

Dahme kahrehda kitail en kin men mahkohng meteikan?

Karasaras dah me Sises ketin doadoahngki pwehn kasalehda kahrepen atail anahne mahkohng meteikan?

Ia duwen atail pahn paiekihda ma kitail kin men mahkohng meteikan?

1, 2. Dahme kahrehda ke anahne medemedewe ma ke men mahkohng meteikan?

PAIPEL kin sewese kitail en sukuhlki ia sapwellimen Siohwa madamadau ong dihp oh duwen eh kin ketin mwekidki atail wiahda dihp. E pil kin padahkihong kitail duwen Siohwa eh ketin kupwurki mahkohng kitail. Nan iren onop en mwoweo, kitail sukuhlki dahme kahrehda Siohwa ketin mahkohng Depit oh Manase. Ira uhdahn nsensuwedkihla dahme ira wiahda ko, wehkada ong Siohwa oh koasoanehdi teng ira en dehr pwurehng wiahda dihp ko. Ira uhdahn koluhla, kahrehda Siohwa ketin kupwurki mahkohng ira.

² Kitail uhd koasoiapene atail pahn kin men mahkohng meteikan. Ia pahn omw pepehm ma emen kisehmw mehla pwehki dahme Manase wiahdao? Ke pahn kak mahkohng Manase? Rahnwet, kitail mi nan sampah ehu me suwed, tiahk lemei oh roporop. Dahme kahrehda kitail anahne sukuhlki en kasalehda mahk? Ma emen wiahiong uhk mehkot suwed, dahme kak seweseiuk ken powehdi omw lingeringer, mwekid ni ahl ehu me Siohwa ketin kupwurki oh men kasalehda mahk?

KAHREPEN ATAIL EN KIN MAHK

3-5. (a) Karasaras dahieu me Sises ketin doadoahngki pwehn kasalehiong kitail me kitail anahne kasalehda mahk? (b) Dahme kitail anahne sukuhlki sang sapwellimen Sises mahsen nan Madiu 18:21-35?

³ Kitail en kin men mahkohng meteikan me kin kansensuwedih kitail sohte lipilipil ma irail kisehn mwomwohdisohn Kristian de soh. Atail pahn wia met pahn sewese kitail en kolokol popohl nanpwungen tohn atail peneinei, kompoakepatail, rehn meteikan oh Siohwa. Paipel kasalehda me kitail Kristian kan anahne mahkohng meteikan sohte lipilipil pak depe re kansensuwedih kitail. Sises mahsanih duwen karasaras en lidu men me pweipwandkihong eh soumaso lapalahn mwohni, oh karasaras wet pahn sewese kitail en kilang kahrepen atail anahne kasalehda mahk.

⁴ Liduo pweipwandkihong eh soumaso uwen mwohni me pahrekiong pweinen rahnen doadoahk wenedep (60,000,000), ahpw eh soumaso kasohrehla eh pweipwando. Ahpw dahme lidu menet pahn wia nan soangen irairohte? Emen lidu peki reh mwohni oh e kihong. Uwen mwohnio pahrekiong pweinen rahnen doadoahk 100 te. Lidu keieuo sohte men mahkohng lidu teio oh ndahng en pwainohng mwohnio. Lidu teio peki en kihong ih ahnsou pwehn pwainohng mwohnio, ahpw e salihdi nan imweteng. Soumaso, me kasalehda mahk ong keieu en liduo, uhdahn lingeringerda. E ndaiong keieu en liduo me e anahne kasalehda mahk ong lidu teio. Soumaso eri salihdi keieu en liduo nan imweteng lao e kak pwainohng eh pweipwando.​—Mad. 18:21-34.

⁵ Dahme Sises kupwurki kitail en sukuhlki sang karasaras wet? E ketin kawehwehda me Siohwa sohte pahn ketin kupwurki mahkohng kitail ma kitail sohte uhdahn mahkohng meteikan. (Mad. 18:35) Kitail soh unsek oh kalapw wiahda dihp. Kitail sohte kak peikiong Siohwa ni unsek. Ahpw e ketin kupwurki mahkohng kitail. Ni mehlel, e ketin kupwurki wiahki atail sapwung kan me re sohte wiawi. Eri ma kitail men kompoakepahnki Siohwa, kitail anahne mahkohng meteikan. Ih wehwehn sapwellimen Sises mahsen ko nan sapwellime Kapahrek en Pohn Dohl: “Pwe ma kumwail pahn mahkikihong meteikan sapwung kan me re wiahiong kumwail, nahn Samamwail me ketiket nanleng pahn pil ketin mahkikihong kumwail dipamwail kan. A ma kumwail sohte pahn mahkikihong meteikan ar sapwung kan ong kumwail, eri, Samamwail me ketiket nanleng pil sohte pahn ketin mahkikihong kumwail sapwung kan me kumwail kin wiahda.”​—Mad. 6:14, 15.

6. Dahme kahrehda e sohte kin ahnsou koaros mengei en mahkohng meteikan?

⁶ Ele ke pwungki me kitail anahne mahkohng meteikan, ahpw mwein ke medewe me e sohte kin ahnsou koaros mengei. Met pwehki kitail kak uhdahn nsensuwedkihla en meteikan ar kin kansensuwedih kitail. Karasepe, kitail kakete lingeringerda de medewe me re mwersuwedih kitail. Ele kitail kin medewe me aramaso anahne ale kalokepen dahme e wiahdao de mwein kitail men en lelohng soangen lokolok me kitail lelohng. Kitail kakete uhdahn nsensuwedla kahrehda kitail medewe me kitail sohte douluhl pahn kak mahkohng aramaso. Ma ke ahneki soangen pepehm wet, dahme ke kak wia pwe ken kak men mahkohng meteikan duwehte Siohwa ketin kupwurki kitail en wia?

WEHWEHKI DAHME KAHREDA KE AHNEKI SOANGEN PEPEHMO

7, 8. Dahme kak sewese iuk ken kasalehda mahk ni emen eh sohte kadek ong uhk?

⁷ Ma emen kin kansensuwedih kitail de kitail kin medewe me re kansensuwedih kitail, kitail kak uhdahn lingeringerda. Emen pwutak pwulopwul kawehwehda dahme wiawi ehu pako ni eh uhdahn lingeringerda: ‘I kohkohsang nihmwo oh nda me I sohte douluhl pahn pwurala. Rahno uhdahn kaselel oh kisin ahl me I alu ieo pil kaselel. Nan soangen wasa meleilei oh kaselel wet, I tepida meleileidi. Mwuhr, I pwurala nihmwo oh koluhkihla ei uhdahn lingeringerda.’ Ma ke pahn kihong ahnsou en meleileidi duwehte me pwutak menet wia, ke kak medewe mwahu omw irairo oh sohte mwekid ni ahl ehu me ke pahn koluhkihla mwuhr.​—Mel. 4:4; Lep. Pad. 14:29; Seims 1:19, 20.

⁸ Ahpw dahme ke anahne wia ma ke lingeringerte mwurin omw kihong ahnsou en meleileidi? Medewe dahme kahrehda ke lingeringerki. Ke lingeringer pwehki dahme wiawio sohte pwung? Pwehki emen sohte kadek ong uhk? De pwehki ke medewe me aramaso kin men kansensuwedihukala? Ia duwe, dahme e wiao uhdahn suwed? Ma ke kin song en diarada dahme kahrehda ke nsensuwedla, ke kak esehda mehnia kaweid kan en Paipel me pahn seweseiuk ken wekidala omw pepehm ko. Eri, ke kak mwekid ni ahl ehu me Siohwa ketin kupwurki. (Wadek Lepin Padahk 15:28; 17:27.) Ma ke medewe kanahieng duwen dahme uhdahn wiawi a kaidehn omw pepehm kan, mwein ke pahn kak men mahkohng meteikan. Mendahki met kak apwal, Paipel kak seweseiuk ken wehwehki ia uhdahn omw pepehm duwen irairo oh alasang Siohwa eh kin ketin kupwurki mahkohng aramas akan.​—Ipru 4:12.

KE ANAHNE NSENSUWEDLA?

9, 10. (a) Dahme ke pahn wia ma ke nsensuwedla? (b) Ia pahn omw pepehm ma ke esehla dehr mwadang en nsensuwedla oh kin men mahkohng meteikan?

⁹ Mie irair tohto me kak kahrehiong emen en lingeringerda. Karasepe, ni omw tangatangahki sidohsa, mwein oapwoat sidohsa kereniong lel weromw sidohsao. Dahme ke pahn wia? Ekei aramas kin lingeringerda oh akamai de peiong soun tangahki sidohsa teio. Ahpw nin duwen Kristian men, ke sohte pahn men wia soahng wet.

¹⁰ E pahn mwahu en medewe mwohn omw pahn mwekid. Mwein ni omw tangatang, ke sapwungala pwehki mehkot kerempwaiukala. De mwein mie kahpwal ehu ni sidohsa teio. Kitail kak sohte nohn lingeringer de nsensuwedkihla sapwung en meteikan ma kitail kin song en wehwehki dahme kahrehda re kin sapwungala, pohnese me kitail ele sohte ese kahrepe koaros en sapwung ko oh en men mahkohng meteikan. Kitail en dehr keh nsensuwedla. Eklesiasdes 7:9 koasoia: “Kanengamahiong omw lingeringer; pwe aramas pweipwei me kin mwakar.” Pak tohto kitail kin ele medewe me meteikan kin men wiahiong kitail mehkot pwehn kansensuwedih kitail. Pwehki re soh unsek, re kin sapwungala. De mwein kitail sohte wehwehki dahme uhdahn wiawi. Song tamataman me ele ke sohte ese ire mehlel koaros duwen dahme aramaso wia de nda. Ken kin men kasalehda limpoak ong aramaso oh mahkohng. Ke pahn peren ma ke pahn wia met.​—Wadek 1 Piter 4:8.

‘AMWAIL POPOHL EN PWURODOHNG KUMWAIL’

11. Ia pahn atail pepehm sohte lipilipil dahme aramas wiahiong kitail nan kalohk?

¹¹ Ia duwen omw kak kolokol kanengamah ma emen laumwaumwih iuk nan kalohk? Ni ahnsou me Sises ketin poaronepeseng sounkalohk 70,a e mahsanihong irail ren ndaiong peneinei koaros me re tuhwong: “Popohl ong tehnpas wet.” E pil mahsanih: “A ma aramas en popohl emen mie nan tehnpaso, amwail popohl pahn mihla reh; a ma sohte, e pahn pwurodohng kumwail.” (Luk 10:1, 5, 6) Kitail kin peren ni ahnsou me aramas akan kin alehda rongamwahwo me kitail kin kalohki, pwehki re pahn paiekihda. Ahpw ekei pak aramas akan sohte kasalehda popohl. Eri dahme kitail pahn wia? Sises mahsanih me kitail anahnehte ahneki popohl. Loalatail en meleileite ni atail kin kohkohsang ni ehuehu ihmw, sohte lipilipil mwomwen ahn tohnihmwo wiewia ong kitail. Ma kitail lingeringerda pwehki tohnihmwo sohte kadek ong kitail, kitail sohte kak pousehlahte ahneki popohl me Sises mahsanih duwe.

12. Nin duwen me Pohl koasoia nan Episos 4:31, 32, ia mwomwen atail wiewia?

¹² Wia uwen omw kak ken kolokol popohl nan soangen irair koaros, kaidehn ihte nan kalohk. Ele ke kin men mahkohng meteikan, ahpw met sohte wehwehki me ke anahne pwungki arail wiewia sapwung kan de mwomwehda me e sohte kin kamedekihala meteikan. Ahpw e wehwehki me ke sohte kak pousehlahte nsensuwedki arail wiewia sapwung. Ke anahne song ahneki meleilei loalomw. Ekei aramas kin kalapw medemedewehte soahng suwed kan me kin wiawihong irail oh re sohte kin ahneki meleilei. Dehr mweidohng omw lingeringer en kaunuhkada. Ke sohte kak peren ma ke kin mwemwehlte pahn meteikan. Eri kasalehda me ke men mahkohng meteikan.​—Wadek Episos 4:31, 32.

MWEKID NI AHL ME PAHN KAPERENDA SIOHWA

13. (a) Ia pahn duwen wiewiahn Kristian men ong imwintihti men? (b) Dahme kakete wiawi ma kitail kin aktikitik ong emen me wiahiong kitail suwed?

¹³ Ele ekei pak emen me kaidehn Kristian kin wiahiong uhk mehkot suwed. Ahpw ke kak sewese ih en perenki rong dahme Paipel padahngki. Wahnpoaron Pohl ntingihedi: “Ma omw imwintihti men men mwengedahr, eri, kamwenge; ma e men nimpildahr, eri, kanampile; pwe ma ke pahn wia met, ke pahn inenen kanamenekihala mehlel, rasehng mwoalus mwehl pohn moange. Eri, dehr mweidohng me suwed en poweiukedi, ahpw omw mwahu en powehdi me suwed.” (Rom 12:20, 21) Ma ke kin kadek, mendahki aramas akan kin lingeringer pahmw, ele re pahn wekidala arail madamadau oh kakete kasalehda kadek. Ma ke kin kanengamah oh kadek ong aramas me wiahiong uhk mehkot suwed, ke kakete kahrehiong ih en men kalaudehla eh sukuhlki Paipel. Sohte lipilipil mwomwen eh pahn lokaiahiong uhk, omw aktikitik oh kadek kak kahrehiong aramaso en men ese dahme kahrehda ke weksang meteikan.​—1 Pit. 2:12; 3:16.

14. Dahme kahrehda ke anahne men kasalehda mahk, mendahki aramaso wiahiong uhk mehkot me uhdahn suwed?

¹⁴ Mie ekei aramas me kitail en dehr patehng. Karasepe, kitail en dehr patehng emen me piskenla. Re pisikensang mwomwohdiso pwehki re wiahda dihp laud ehu oh sohte koluhla. Ma ke medengkihla emen eh wiahda dihp laud, ele e pahn uhdahn apwal en mahkohng ih. Mehnda ma e koluhla, mwein ke pahn nsensuwedte pwehki dahme wiawio. Ma ke mi nan soangen irairo, ke anahne pekipekihte rehn Siohwa en ketin seweseiuk pwe ken kak men mahkohng aramaso me wiahda dihp. Met kesempwal pwehki ke sohte kak uhdahn ese madamadau oh pepehm en aramaso. Ahpw Siohwa kin ketin mwahngih. E ketin mwahngih loalen emenemen aramas, wasa me keieu rir oh e kin ketin kanengamahiong aramas akan me kin wiahda dihp. (Mel. 7:9; Lep. Pad. 17:3) Ihme kahrehda Paipel padahkihong kitail en dehr wia me suwed ong meteikan mehnda ma re kansensuwedihala kitail. E koasoia: “Ma emen pahn wiahiong kumwail me suwed, kumwail dehr dupungkihong me suwed. Kumwail nantihong kapwaiada soahng mwahu kan me aramas koaros kin pwungki. Kumwail wia uwen amwail kak pwe kumwail en ahneki popohl rehn aramas koaros. Eri, riei ko, kumwail dehr pein dupuk, ahpw kumwail mweidohng engieng en Koht en doadoahk. Pwe Pwuhk Sarawi mahsanih, ‘Kaun-o ketin mahsanih, ngehi me pahn dupuk, ngehi me pahn ikih.’” (Rom 12:17-19) Kitail sohte kak ese soahng koaros me Siohwa ketin mwahngih, oh Paipel padahkihong kitail en dehr kadeik meteikan. (Mad. 7:1, 2) Ahpw ke kak kamehlele me Siohwa pahn ketin wia kadeik ni pwung.

15. Dahme pahn sewese kitail en dehr nohn lingeringer pahn aramas me wiahiong kitail mehkot suwed?

¹⁵ Ma ke kin apwalki mahkohng emen me wiahiong uhk mehkot suwed ahpw e koluhla, ele e kak sawas ma ke tamataman me mwein e pil ahneki kahpwal laud ehu. E ipwidi soh unsek duwehte kitail. (Rom 3:23) Siohwa ketin poakehla aramas koaros pwehki re soh unsek. Eri kitail anahne kapakapki aramaso me kansensuwedih kitail. Ni atail kin kapakapki emen, kitail kin sohla nohn lingeringer pah. Sises ketin kasalehda ni sansal me kitail en dehr mwemwehlte pahn meteikan, mehnda ma re wiahiong kitail mehkot me uhdahn suwed. E mahsanih: “Kumwail poakohng amwail imwintihti kan oh kapakapki me kin kalokei kumwail.”​—Mad. 5:44.

16, 17. Ia duwen omw pahn mwekidki ma elder kan pilada me me dipan men koluhlahr? Dahme kahrehda?

¹⁶ Siohwa ketikihong Kristian elder kan pwukoa en pilada ma aramas me wiahda dihp ehu koluhla de soh. Brother pwukat sohte ese soahng koaros me Koht ketin mwahngih duwen ehuehu irair, ahpw re kin song wiahda pilipil ehu poahsoankihda dahme Paipel mahsanih oh pil sawas en sapwellimen Koht manaman. Eri ni arail kin kapakap ong Siohwa pwehn wiahda pilipil ehu, kitail kak kamehlele me arail pilipilo kin pahrekiong sapwellimen Siohwa madamadau.​—Mad. 18:18.

¹⁷ Nan irair duwehte met, kitail anahne loalopwoat. Kitail anahne likih mwomwen Siohwa eh ketin apwalihala kahpwalo oh pwungki pilipil me elder kan wiahda. Ni en elder kan ar pilada me aramaso koluhla, ke pahn mahkohng ih oh kasalehda me ke poakepoakehte ih? (2 Kor. 2:5-8) Met sohte pahn mengei, ahpw mehlel ma dihp me e wiadahro kamedekeiukala de emen tohn omw peneinei. Ahpw ma ke kin likih Siohwa oh sapwellime ahl en apwalihala kahpwal pwukat nan mwomwohdiso, ke pahn wiahda dahme pwung. Ke pahn kasalehda me ke uhdahn men mahkohng meteikan.​—Lep. Pad. 3:5, 6.

18. Ia duwen omw pahn paiekihda ma ke kin men mahkohng meteikan?

¹⁸ Kitail pahn ahneki kapai tohto ma kitail kin men mahkohng meteikan. E kin sewese kitail en nsenamwahu pwehki kitail kin sohla lingeringer oh nsensuwed. Oh e kin sewese kitail en ahneki nanpwungmwahu rehn meteikan. Ahpw ma kitail sohte pahn kin men mahk, e kak kahrehiong kitail en soumwahu oh pwunod. Met kak kahrehda eh apwal ong kitail en ehuiong meteikan. Ahpw kapai keieu kesempwal en kin men mahkohng meteikan iei atail pahn ahneki nanpwungmwahu rehn Samatail nanleng, Siohwa.​—Wadek Kolose 3:12-14.

[Nting tikitik me kileldi pah]

[Kilel nan pali 29]

Dahme kahrehda Sises ketin wiahda karasaras en liduo oh eh soumaso?

[Kilel nan pali 32]

Tamataman me Kristian kan anahne mahkohng meteikan