Ke Kin Men en Mie Kompoakpahmw Aramas Mwahu kan?

PALI laud en aramas kin men en mie kompoakparail aramas mwahu kan. En kak ehukihong kompoakepahmw mehlel akan mehkan me kin wiawihong uhk kin wia mehkot me kin kihong kansenamwahupen ahmw mour. Ahpw, iaduwen ahmw pahn kak diar kompoakpahmw men me mehlel? Mpen pahr 2,000 samwalahr oko, Sises kasalehda me utupen pweidahn ehupenehn mour iei limpoak soh roporop. E padahngki me: “Duwen me ke men aramas en wiahiong uhk, ih duwen me ke pahn wiahiong irail.” (Luk 6:31) Mahsen wet me kin kalap adaneki Kosonned Kesempwal, pwehki e kin kasalehda me ke anahne ken ahneki irair en soh roporop oh sapan pwe en mie kompoakepahmw. Ma ke men en mie kompoakepahmw, ke anahne kompoakepahnki aramas. Iaduwen?

Irair en kompoakepahnki aramas sohte kin wiawihda kisin ahnsou kiste. Ni mehlel, kompoakepahnki aramas weksang pehsehiong aramas emen. Irail wia aramas akan me ke kin inenen men karanih. Tapihada oh kolokol pepehm en kerenpene anahne doadoahk laud. Irair en kompoakepahnkihla emen kin anahne ken mwohneki anahn akan en kompoakpahmwo mwohn pein ahmw nsenamwahu. Kompoakepah kin pelikidkihpene kaidehnte ara nsenamwahu kan ah pil ara katoutou kan.

Ke kin kasalehda irair en kompoakepahnki emen ni mehlel, ni omw kin utung ah doadoahk oh ah pepehm ni ah mih nan anahn. Lepin Padahk 17:17 mahsanih: “Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte sewese iuk ni ahnsou apwal?” Ni mehlel, irair en kompoakepahnki emen ele mwein kin kehlail sang ekei tohnpeneinei kan. Lepin Padahk 18:24 mahsanih: “Ekei kompoakepah sohte kin poakpene ahnsou werei, ahpw ekei kin loalopwoatpene laudsang pirien kan.” Ke men ese iaduwen omw pahn wiahda soangen irair en kompoakepah wet? Ke men iang wia kisehn pwihn en aramas ieu me sansaliki arail kin limpoakpene nanpwungarail? (Sohn 13:35) Ma ei, eri Sounkadehdehn Siohwa kan nan ahmw wasahn kousoan pahn perenki kasalehiong uhk duwen rapahkihda kompoakepahmw mehlel akan.