Pwaredo ieu me Wiahda Wekidekla Laud nan Ahi Madamadau
“SOHTE kak awiawih ien koasoiong ahi peneinei duwen ‘tohnleng’ riemen me Koht ketin pwaredohng ie.” Ohl emen me Sounkadehdehn Siohwa sister riemen pwarek, me ntingihdi met. Wihk kei mwohn ara pwarek reh, ah pwoud erein sounpar 45 mehla. E inenen loal ohkihla mehlel. Nah seri laud kan kin wia koasoi kan mehn kamweit, ahpw irail kin kousoan dohsang ih. Sohte kompoakepah kan pil sohte mehn mpe kan me kin pwarek reh.
Ohlo ndaiong sister riemen me pwaredo reh, “Ngehi oh Koht solahr kerenpene.” Ahpw, ira poakehla ih oh kihong ih kisin doaropwe me audepe poahsoankihda Paipel me oaralap koasoia Koapworopwor Dahieu Mie Ohng Kompoakpatail me Mehlahr akan? Ni soutiko e wadek oh diar kamweitpen ah lamalam sang loale.
Ahnsou kis mwuri Sounkadehdehn Siohwa riemen ko pil pwurodo reh. Ira tamanda uwen pahtou me e mih loale nin tepin ara pwarek reh oh ira pwurodohn tehk ia ire. Ohlo mwuri ntingihdi, “E kapwuriamwei ong ie me aramas riemen me sehse ihs ngehi ahpw nsenohkin ie oh men ese ma ngehi me nsenamwahu de soh.” Ah lamalam inenen kehlailkihda mahsen akan me ira kasalehiong sang nan Paipel. Sister kan padahkiong ih me ira pahn pil pwurodo. Ohlo perenkihda oh lemehda ntingihada kisinlikou ong Kingdom Hall en Sounkadehdehn Siohwa kan nan ah wasa, oh ih kisinlikou me kitail kilang ni tepin koasoi wet.
Mwohn ah keseulahng ehu wasa me karanih nah pwutak ko, ohlo iang mihding en Sounkadehdehn Siohwa kan pak ehu oh kohla iang peneinei en emen peinakapw oko mwenge rehrail. E ntingihdi: “I pahn soudahsang wasaht, ahpw peinakapw pwulopwul oko oh amwail sarawien pahn mihmi nan mongiongiet oh ai kapakap akan ahnsou koaros. Ei, met I kin kapakap—ahnsou koaros. Ai mour inenen wekidekla laud. Peinakapw riemeno me kamwakid laud wekidekla wet, oh I pahn kalahngan kihong ira kohkohlahte.”