Tehk Kamwahu Kan En Sapwellimen Siohwa Pwihn
“Se pahn nsenamwahukihla soahng mwahu kan en nan tehnpasomwi sarawi.”—MELKAHKA 65:4.
1, 2.(a) Iaduwen koasoandi en tehnpaso pahn kamwekid sapwellimen Koht aramas kan? (b) Sawas dah kan me Depit wia ohng kokouda en tehnpaso?
DEPIT en Israel en mahs iei emen me inenen ndand me koasoiepe pwarada nan Pwuhk en Ipru kan. Sounsilepen sihpw, soun melkahka, soukohp oh nanmwarki menet, kin likih Siohwa Koht ni unsek. Ahn Depit nanpwung mwahu oh keren rehn Siohwa kin kamwekid ih en ahneki ineng en men kauwada tehnpas ohng Koht. Soangen tehnpas wet me pahn wia poahsoan en kaudok mehlel nan Israel. Depit wehwehki me koasoandi en kokou tehnpas en tehnpaso pahn wahdo peren oh kapai ohng sapwellimen Koht aramas akan. Depit eri koulki: “Meid pai irail kan me komwi ketin pilada, me komwi ketikiniraildo pwe re en kin kousoan nan mwoalomwi sarawi. Se pahn nsenamwahukihla soahng mwahu kan en nan tehnpasomwi sarawi, kapai kan en Tehnpasomwi Sarawio.”—Melkahka 65:4.
2 Depit sohte mweimwei en kihda kaweid me pid duwen kokouda en sapwellimen Siohwa Tehnpas Sarawio. Ahpw, pwukoa wet kohwong sapwellimen Depit pwutak Solomon. Depit sohte lipahnedki duwen pwukoah wet me e kin inenen inengieng en wia eh kohwong emen tohrohr. Me e keieu kesempwalki iei tehnpaso en kokouda. Ni mohngiong unsek eh kin kasalehda ah utuht ni ah kin kihong Solomon pilahn kan me e ale sang rehn Siohwa. Depit pil kin katohrepeseng mehn Lipai kan nin duwen pwihn oh koasoanehong irail arail pwukoah kan oh e kin kihda kohl oh silper tohto ohng kokoudahn tehnpaso.—1 Kronikel 17:1, 4, 11, 12; 23:3-6; 28:11, 12; 29:1-5.
3. Lamalam dah me sapwellimen Koht ladu kan pahn ahneki me pid padahk mehlel?
3 Mehn Israel lelepek kan kin utungada koasoandi kan me pid kokouda en sapwellimen Koht tehnpas ohng kaudok mehlel. Nin duwen sapwellimen Siohwa ladu kan rahnwet, kitail pil kin utungada koasoandi kan en kaudok nan sapwellimen Siohwa pwihn nin sampah. Eri kitail kin kasalehda me kitail kin ahneki lamalam en Depit. Kitail en dehr lipahned. Weksang met, kitail en tehk kamwahu kan en sapwellimen Koht pwihn. Iaduwen, mie pak ke kin medewe duwen soahng mwahu tohto me kitail kak kalahnganki? Kitail pahn tehkpene ekei ire pwukat.
Kalahnganki Irail Akan me kin Apwalih Mwomwohdiso
4, 5. (a) Iaduwen “ladu lelepek oh loalokong” kin kapwaiada arail pwukoa? (b) Ia pepehm en ekei irail Sounkadehde kan ni arail kin ale mwengehn ngehn kan?
4 Kitail ahneki kahrepe mwahu kan en kalahnganki “ladu lelepek oh loalokong” me Sises Krais ketin pilada pwe irail en apwalih sapwellime dipwisou kan pohn sampah. Pwihn en ladu wet me kin wiawihkihda Kristian keidi kan kin tiengla mwowe nan doadoahk en kalohk, koasoanehdi mihding en kaudok kan, oh wiahda sawasepen Paipel kan me kin wiawihda ni lokaia tohtohsang 400. Aramas rar kei nan sampah kin kalahnganki arail kak alehda “kisin mwenge” en ngehn kan me kin kohda “ahnsou me konehng.” (Madiu 24:45-47) Met kahrehda sohte kahrepe kitail en lipahned.
5 Sounpar tohto, sounkadehde en Siohwa mah men me adaneki Elfi kin ale kamweit oh sawas sang ni eh kin alehda oh doadoahngki kaweid en Pwuhk Sarawi me kin pwarada nan pwuhk kan me irail pwihn en ladu lelepek kan kin wiahda. Elfi kin inenen kalahnganki mepwukat ihme e ntingihdi: “Dahme ih pahn kak wia ma sohte sapwellimen Siohwa pwihn?” Peter oh Irmgard pil kin wia sapwellimen Koht ladu kei sounpahr tohto. Irmgard kin kasalehda kalahnganki pwuhk kan me kin kohsang rehn “sapwellimen Siohwa pwihn limpoak oh nsenoh.” Pwuhk kan kin pil wiawihda ohng irail akan me kin ahneki anahn tohrohr kan me duwehte irail me maskun oh salengepon kan.
6, 7. (a) Iaduwen mwekid en mwomwohdiso nan sampah pwon kin epwella? (b) Iaduwen ekei kin kasalehda arail pepehm kan me pid sapwellimen Siohwa pwihn nan sampah?
6 Governing Body en Sounkadehdehn Siohwa kan, pwihn tikitik ehu me wiawihkihda irail ohl keidi malaulau kei me kin papah nan poahsoan kaun en Sounkadehdehn Siohwa kan me kin mihmi Brooklyn, New York, iei irail me kin weliwelian ‘ladu lelepeko.’ Governing Body kin pilada irail ladu koahiek kan en Siohwa en kin papah nan Branch Ohpis kan oh kin apwalih mwomwohdiso kan me tohtohsang 98,000 nan sampah. Irail ohl akan me kin lel de kapwaiada kosonned kan en Pwuhk Sarawi kin wiahla elder de ministerial servant kei nan mwomwohdiso. (1 Timoty 3:1-9, 12, 13) Elder kan kin tiengla mwowe oh apwalih sapwellimen Koht sihpw kan ni limpoak. Ia uwen a wia kapai ehu en iang kisehn pwihn en sihpw wet oh iang pehm limpoak oh ehupene me kin mie nanpwungen “pwihn en pirien wet pwon”!—1 Piter 2:17; 5:2, 3.
7 Aramas kan sohte kin lipahned ahpw irail kin kalapw kasalehda arail kalahnganki kaweid ngenin limpoak kan me irail kin ale sang rehn elder kan. Karasepe ehu, tehk duwen Birgit, lih pwopwoud Kristian men me mahkier sounpahr silihsek samwa. Ni ahnsou me e pwulopwul, e tepida werek suwed oh kereniong en wiahda tiahk sapwung. Ahpw sang kaweid sansal kan en Paipel me irail elder kan kin kihda oh sawas me kin kohsang irail Kristian teikan, mehpwukat sewese ih en dehr lelohng nan irair apwal me e kakete lelohng. Ia pepehm en Birgit met? E nda: “I inenen kalahnganki ahi kak mihmihte nan sapwellimen Siohwa pwihn kaselel wet.” Andreas, pwutak sounpar 17 men nda: “Uhdahn met iei sapwellimen Siohwa pwihn, oh met iei pwihn me keieu mwahu nan sampah.” E sou konehng kitail en pil kalahnganki kamwahu en sapwellimen Siohwa pwihn en sampah?
Irail kan me Apwalih Mwomwohdiso Sohte Unsek
8, 9. Iaduwen nein Depit sounpei kan mwekid oh iaduwen Depit mwekidki met?
8 Ehi, irail me pilipilda en apwalih mwomwohdiso en kaudok mehlel sohte unsek. Irail koaros kin sapwungala, oh ekei irail kin ahneki luwet kan me irail kin nantihong doadoahk laud en powehdi. Kitail anahne en nsensuwedkihla met? Soh. Pil irail akan me kin ale pwukoa laud kan ni mwehin Israel pil kin wiahda dihp laud. Karasepe, ni ahnsou me Depit pwulopwul, e kohieng ih pwukoa en wia soun kamweit oh soun kesengiong Nanmwarki Sohl. Mwuri, Sohl song en kemehla Depit, oh en anahne en tang pwe en doarehla ah mour.—1 Samuel 16:14-23; 18:10-12; 19:18; 20:32, 33; 22:1-5.
9 Pil mehn Israel teikan pil kin wiahda tiahk keper kan. Karasepe, sapwellimen Depit kaun en sounpeio Sohap kemehla en Sohl peneinei me adaneki Apner. Apsalom uhwongada semeo, Depit, oh song kihsang sapwellime kaunda. Sapwellimen Depit sounkaweid likilik Ahidopel pil pangala ih. (2 Samuel 3:22-30; 15:1-17, 31; 16:15, 21) Ahpw Depit sohte wiahla soun lipahned men me diren kailok. E sohte pil kin kesehla kaudok mehlel. Ahpw e kin wia weksang met. Kahpwal kan kin kamwekid Depit en likih Siohwa oh kolokolete soangen madamadau kaselel me e kin ahneki ni e tangasang Sohl. Ahnsowo Depit koulki: “Komw ketin kupwure ie, Maing Koht, komw ketin kupwure ie, pwe I patohdohng rapahki sawasepei rehmwi. Ih kin diar silepei pahn mwetehn nin limomwi kan lao I daulih soangen apwal koaros.”—Melkahka 57:1.
10, 11. Dahme emen Kristian m adaneki Gertrud lelohng ni ah pwulopwul oh dahme e ndahki duwen sapwung me e wiahda me pid irail me pwoson kan?
10 Sohte kahrepen kitail en lipahnedki suwed kan me kin pwarada nan sapwellimen Koht pwihn rahnwet. Siohwa, sapwellime tohnleng ko oh pil irail soun silepen sihpw kan koaros sohte mweidohng suwed de irail me suwed kan en mih nan mwomwohdiso en Kristian kan. Ahpw, kitail koaros kin lelohng soh unsek en aramas kan—pein atail soh unsek kan de pil sang ladu en Koht teikan.
11 Gertrud, me wia tohnkaudok en Siohwa men ni ahnsou werei, kin lelohng karaun likamw kan me dene ih emen me kin likamw ahpw kaidehn sounkalohk kaukaule men ni ahnsou me e pwulopwul. Iaduwen e mwekidki met? E kin kaulimki met? Soh. Ekiste mwohn e mehla nan pahr 2003, ni ah mahkier sounpar 91, e koasoia met me pid duwen eh mour: “Soahng kan me kin wiawi nan ahi mour kin padahkiong ie me mendahki sapwung kan me emen kin wiahda, Siohwa kin kaweid sapwellime doadoahk kesempwal, sang ni ah kin doadoahngki aramas soh unsek kan.” Ni ahnsou me Gertrud kin lelohng nan kahpwal me kin pwarada pwehki soh unsek en irail sapwellimen Koht ladu teikan, e kin sohpeiong Siohwa oh kapakap ni ngidingid.
12. (a) Ia ekei mehn kahlemeng suwed kan me irail Kristian kan nan senturi keieu wiahda? (b) Dahme kitail anahne en medewe?
12 Pwehki irail Kristian kan me keieu lelepek oh loalopwoat pil soh unsek, kitail nantiong en “dehr lipahned” ni ladu pilipilda men kin wiahda sapwung. (Pilipai 2:14) Ia uwen kansensuwed ma kitail pahn alasang kahlemeng suwed en irail me malaulau kei nan mwomwohdiso en Kristian kan nan senturi keieu! Tohnpadahk Sud kawehwehda me irail sounpadahk likamw akan en ahnsowo “kin mwamwahleki koasoandi en kaunda; re kin lahlahwe aramas akan me Siohwa pilada.” Oh pil, sounpadahk likamw pwukat pil kin “lipahned oh kaulime meteikan ahnsou koaros.” (Sud 8, 16) Kitail en soikala oh dehr idawehn irail akan me kin lipahned oh kitail en kihong atail lamalam ohng mehkan me mwahu me kin kohieng kitail sang rehn ‘ladu lelepeko.’ Kitail en kalahnganki kamwahu kan en sapwellimen Siohwa pwihn oh “nantihong en dehr lipahned ni mehkan koaros me kitail kin wia.”
“Koasoi Wet Kapwuriamwei”
13. Iaduwen ekei kin mwekidki padahk kan en Sises Krais?
13 Ni ekei nan senturi keieu kin lipahnedih irail ladu kan me pilipilda, oh pil ekei aramas kin lipahnede sapwellimen Sises padahk kan. Nin duwen me kileledi nan Sohn 6:48-69, Sises mahsanih: “Mehmen me pahn tungoale udukei oh nim ahi nta pahn ale mour soutuk.” Ni arail rong met, “pali laud en sapwellime tohnpadahk ko . . . nda: ‘Lokaia wet meid nohn kapwuriamwei, ihs me kak rong met?’ ” Sises mwahngih me “sapwellime tohnpadahk ko lipahnedkihla met.” Eri, “pwehki padahk wet, me tohto sang nanpwungen irail kan me ideidawehn Sises mweikihsangehr oh solahr men idawehn.” Ahpw kaidehn irail koaros iang lipahned. Tehk dahme wiawi ni Sises idek rehn wahnpoaron 12: “Iaduwe, kumwail pil men keseiehla?” Wahnpoaron Piter sapeng nda: “Maing, ihs me se pahn patohla reh? Sapwellimomwi mahsen kan, iei mahsen en mour soutuk. Eri, met se pwosonlahr oh esehier me Sapwellimen Koht me Sarawio komwi.”
14, 15. (a) Dahme kahrehda ekei me malaulauie sohte kin pwungki mwomwen padahk en Kristian kan? (b) Dahme kitail kak sukuhlikihsang ekspiriens en Emanuel?
14 Nan ahnsou pwukat, aramas malaulau kei me nanpwungen sapwellimen Koht aramas kan me sohte kin pwungki ekei mwomwen padahk en Kristian kan oh kin lipahnede sapwellimen Siohwa pwihn nan sampah. Dahme kahrehda met kin wiawi? Pali laud en lipahned kan kin kohsang sohte wehwehki itar duwen elen sapwellimen Koht doadoahk. Sounkapikadao kin ekis ekis kalaudehla marain duwen me mehlelo ohng sapwellime aramas akan. Kahrehda, ekei pak kin mie wekidekla kan ohng mwomwen atail wehwehki iren pwuhk sarawi kan. Pali laud en sapwellimen Siohwa aramas akan kin perenkihda soangen wekidekla pwukat. Me malaulau kei kin “nohn men wia aramas pwung” kan, oh kin sapwungki wekidekla pwukat. (Eklesiasdes 7:16) Aklapalap me kin kak kahrehda met oh e kin kahrehda ekei kin pwupwudiong nan lidip en lamalam en uhtohrda. Sohte lipilipil kahrepe kan, ahpw soangen lipahned wet kin keper, pwehki e kak kahrehda kitail en pwuralahng sampah oh mour en sampah kan.
15 Karasepe, Emanuel, Sounkadehde men me kin kauwe ekei soahng kan me e kin wadek nan pwuhk kan me kohsang irail “ladu lelepek oh loalokong kan.” (Madiu 24:45) E uhdi oh sohla kin wadek pwuhk en Kristian kan oh mwuhr padahkiong elder kan nan ah mwomwohdiso me e sohla men wia emen Sounkadehdehn Siohwa. Ahpw mwurin ahnsou kis, Emanuel diarada me padahk kan en sapwellimen Siohwa pwihn me pwung. E pil tuhwong irail sounkadehde kan oh wehkada ah sapwung oh pil ehu pwurodo iang wia emen Sounkadehdehn Siohwa. Imwilahn met, e pil ehu wia ohl peren men.
16. Dahme kak sewese kitail en kihsang peikasal kan me pid padahk en Kristian kan?
16 Iaduwen me kitail kin lel songosong en men lipahned pwehki kitail sohte uhdahn kamehlele padahk kan en sapwellimen Siohwa aramas akan? Eri kitail en kanengamah. ‘Ladu lelepeko’ ele mwuhr pahn wiahda ehu pwuhk me pahn sapengla atail peidek kan oh kihsang soangen peikasal kan. E wia ahl en loalokong en rapahki sawas sang rehn elder kan. (Sud 22, 23) Kapakap, pein onop Paipel oh patehng iangatail me pwoson kan kak sewese kitail en kihsang soangen peikasal kan nan atail lamalam oh kak kalaudehla atail kalahnganki padahk mehlel kan me kin kakehlailih atail pwoson me kitail kin sukuhliki sang sapwellimen Siohwa elen padahk.
Kolokol Lamalam en Ehi
17, 18. En dehr lipahned ahpw en ahneki soangen lamalam dahieu oh pwekida?
17 Ni mehlel, aramas soh unsek kan kin kalapw mengeiong en wiahda dihp, oh ekei kin mwahuki wia lipahned kan me sohte nohn kesempwal. (Senesis 8:21; Rom 5:12) Ahpw ma kitail pahn kin ahnla wia soun lipahned kei, kitail kin kihong atail nanpwung mwahu rehn Siohwa Koht nan keper. Kahrehda kitail anahne en tehk mwahu atail ineng en lipahned.
18 Kitail en dehr lipahnede mehkan me kin wiawi nan mwomwohdiso, ahpw kitail en kolokolete lamalam en ehi oh kin pwakih koasoandi kan me kin kahrehiong kitail en kedirepw, peren, toupahrek oh ahneki pwoson kehlail. (1 Korint 15:58; Titus 2:1-5) Siohwa kin katanga mwahu mehkoaros nan sapwellime pwihn, oh Sises kin pohnese duwen kekeirada kan nan ehu ehu mwomwohdiso duwehtehte dahme e kin wia nan senturi keieu. (Kaudiahl 1:10, 11) Kanengamah oh awih koasoandi en Koht oh Krais, me wia Tapwin mwomwohdiso. Irail silepen sihpw nsenoh kan ele kin doadoahk en kapwungala irair kan me anahne en wiahda wekidekla kan.—Melkahka 43:5; Kolose 1:18; Taitus 1:5.
19. Lao Wehio pahn kaunda ahn aramas koasoandi kan koaros ni unsek, dahme kitail anahne en tetehk mwahu?
19 Kereniongehr koasoandi suwed wet pahn kohsang oh Wehin Mesaiao pahn uhd kaunda koasoandi en aramas akan koaros. Erein ahnsou saikinte leledo, ia uwen kesempwal emenemen kitail en kolokolete lamalam en ehi! Met pahn sewese kitail en kak kilang kamwahu en riatail me pwoson kan ah kaidehn arail suwed kan. Ni atail pahn kin tehk arail mwahu kan, met pahn kahrehda kitail en peren. Kitail sohte pahn pwangada sang atail lipahned kan, ahpw kitail pahn ale kangoang kan oh kehlailla ni pali ngehn.
20. Lamalam en ehi pahn sewese kitail en perenki soangen kapai dah kei?
20 Lamalam en ehi pahn pil sewese kitail en taman soangen kapai tohto kan me kitail kin paiekihda sang atail iang kisehn sapwellimen Siohwa pwihn nan sampah. Pwihn wet kelepw nan sampah me kin lelepek ohng Kaun en lahng oh sampah. Ia ahmw pepehm me pid duwen met oh me pid duwen pwais kaselel en iang kaudokiong Koht mehlelo Siohwa? Ahpw lamalam en duwehte Depit ni e koulki: “pwehki omwi kin ketin sapeng ar pekipek kan. Aramas koaros pahn pwarowei rehmwi. Meid pai irail kan me komwi ketin pilada, me komwi ketikiniraildo pwe re en kin kousoan nan mwoalomwi sarawi. Se pahn nsenamwahukihla soahng mwahu kan en nan tehnpasomwi sarawi, kapai kan en Tehnpasomwi Sarawio.” (Melkahka 65:2, 4)
Ke Tamataman?
• Dahme kahrehda kitail en kalahnganki irail akan me kin apwalih mwomwohdiso?
• Iaduwen atail pahn mwekidki ma riatail kan me kin apwalih mwomwohdiso kin wiahda sapwung kan?
• Iaduwen atail pahn kilangwohng wekidekla kan me pid kawehwehn iren pwuhk sarawi kan?
• Dahme kak sewese Kristian kan en kihsang arail peikasal kan?
[Kawehwehpen kilel kan nan ehu ehu pali 28]
Depit kihong Solomon koasoandi en tehnpaso oh ni mohngiong unsek utungada kaudok mehlel
[Kawehwehpen kilel kan nan ehu ehu pali 28]
Elder Kristian kan kin ni peren kihda sawas en pali ngehn