Dahme Kahrehda en Wia Dahme Pwung?

EMEN ohl me iang sukuhl laud koasoia: “I ese me mwahu sohte mi loalei—met wehwehki nin duwen ahnepen ngehi aramas. Pwe mehnda ma I kin inengieng wia me mwahu, ahpw I kin sohte kakohng. I sohte kin wiahda me mwahu me I kin inengieng wia; ahpw I kin wiahda me suwed me I sohte men wia.” Dahme kahrehda ohl menet diarada me e kin apwaliki wiahda me mwahu me e kin inengieng wia? E kawehwehda: “Eri, I diarada me soangen koasoandi wet kin doadoahk rehi: ni ahnsou me I kin inengieng wia dahme mwahu, mehkot me suwedte me mie me I kak pilada. Nan kapehdi kin perenkihda kosonned en Koht. Ahpw I kin kilang ehu soangen koasoandi tohrohr me kin wia eh doadoahk ni paliwereiet—ehu soangen koasoandi me kin uhwong kosonnedo me mohngiongi kin pwungki. Koasoandi tohrohr wet kahrehiong ei selidi pahn kosonned en dihp me kin wia doadoahk ni paliwereiet.”—Rom 7:18, 19, 21-23.

Mahsen pwukat en wahnpoaron Pohl, me ntingdier kereniong sounpahr 2,000 samwalahr, kin kawehwe duwen dahme kahrehda en wia dahme pwung kin wia mehkot apwal ong aramas soh unsek kan. Emen anahne kehl en wia me pwung pwehn peikiong mouren padahk pwung kan, ahpw keieu nan irair en kasongosong kan. Kahrehda kitail anahne pein kalelapek rehtail, Ia kahrepe keieu kesempwal ong wia dahme pwung?

Medewehla dahme iren Paipel kan kin mahsanih duwen ahnsou kohkohdo en aramas pwung men. Melkahka 37:37, 38 mahsanih: “Tehk mwahu aramas mwahu, kilang aramas pwung; aramas meleilei kin mie kadaudoke, a me dipan akan pahn mwomwla douluhl, oh kadaudokarail kan pahn kamwomwmwomwla.” Lepin Padahk 2:21, 22 mahsanihong kitail: “Aramas pwung—aramas lelepek—pahn kousoan nan sahpw wet. Ahpw Koht pahn ketin koahkoahsang aramas suwed kan nan sahpwo oh usadahsang me dipan akan rasehng dihpw eh kin usuhsdahsang nan pwehl.”

Inou pwukat oh meteikan me dierek nan Paipel kin kihong kitail kahrepe mwahu pwehn idawehnla elen mour me pahn kaperenda Koht.