Ke Lemeleme Suwed Pahn Uhdi Ehu Rahn?
Kisin pwutak tikitik kis pwekada mehkot ieu sang nan mohs ehu me mie pakudang ie—oh mwuri maskunla oh sohla ekei kisehn paliwere kan erein ah mour. Nohno men ekihla nah seri pwelelo nan kihd limwahn nanial ehu oh tangasang. Tohn doadoahk men me kommoaldihsang nan doadoahk pwurala nan ah wasahn doadoahk, kemehla ienge kan koaros oh mwuri, pil kemehla pein ih. Ohl mehlel men me wahu kin kohwohng nan ah wasahn kousoan kin wia tiahk suwed ong seri soakoahiek kan.
KANSENSUWED pwe ripoht kan kin kasalehda me suwed kin wie tohtohla. Oh pil me kansensuwed sang met, pali laud en ahnsou ripoht pwukat kin pid duwen mahwen nanpwungen keinek kan oh terrorism. Ehu ripoht en pahr 1995 koasoia: “Senturi wet, me keieu sakanakan, ih met ahn Sehdan ahnsou. Sohte ahnsou ieu me duwehte atail ahnsou me aramas kin ahneki koahiek oh ineng laud en kemehla aramas teikan pwehki ar keinek, sarawi de daidel me irail ahneki.”
Ni ahnsowohte, aramas akan kin kasaminehla nan wehwe, kauwehla sampah, oh kihsang tuhke oh mahn akan pohn sampah. Iaduwen, aramas akan kak powehdi soahng pwukat koaros oh wiaiong sampah en wiahla wasa mwahu ehu? De e pahn sohte katepe ma kitail song en wia met? Emen professor me kin kalapw ntingihdi duwen suwed kan koasoia: “I uhdahn men wekidala dahme kin wiawi nan sampah pwe en mwahula. Ahpw sampah sohte mwamwahula.” Ele ke kin ahneki soangen pepehm me duwehte met.
Mwekimwekid en sampah nan rahnwet duwehte sohp ehu me seiseiloak kohwei nan sehd ieu me susuwedla oh kepekeperla rahn koaros. Mendahki sohte me men kohlahng nan irair keper, kitail sohte kin pweida ni atail kin song en wetsang met. Sohpo kin inenlahngete nan melimelo oh sohte uhdi.
Ekei pak, suwed pwukat kin wiawi pwehki soh unsek en aramas. (Rom 3:23) Mendahki met, uwen laudlahn suwed mwomwen pil laudsang dahme aramas kelehpw kak wia. Iaduwen, e soh mie ehu kehl kehlail me kitail sohte kak kilang me kin kamwakid aramas akan en wia met? Ma ei, eri dahkot met, oh iaduwen kitail kak pere kitail sang met? Artikel en mwuri pahn sapengla peidek pwukat.
[Kawehwehpen kilel kan nan ehu ehu pali 3]
© Heldur Netocny/Panos Pictures