Sises Sapwellimaniki Paipel?
SOH, Sises sohte sapwellimaniki Paipel. Pwekida? Pwehki Paipel pwon me duwehte kitail naineki rahnwet saikinte mie nan mwehin Sises. Ahpw nan sinakoke kan irail kolokol en tehn doaropwe kan me dahrpene me ntingdi me kin kisehn Paipel me kitail ese. Sises wadekada doaropwe en Aiseia ni ehu sinakoke nan Nasaret. (Luk 4:16, 17) Wahnpoaron Pohl rongada “wadawad en Kosonned en Moses oh pil pwuhken soukohp ako” nan Andiok en Pisidia. (Wiewia 13:14, 15) Oh tohnpadahk Seims koasoia me dahme Moses ntingihdi “kin wie wadawad ahnsou reirei nan en mehn Suhs akan arail sinakoke kan ni rahnen Sapad koaros.”—Wiewia 15:21.
Emenemen irail ni mwehin Sises naineki tehn doaropwe me dahrpene en Pwuhk sarawi? Ohlen Idiopia me lek wusol men en lih nanmwarkien Idiopia sansal naineki tehn doaropwe dahrpene en Pwuhk Sarawi, pwe e “dake were kuruma, e ahpw wadewadek pwuhken soukohp Aiseia” ni ahnsou me tohnpadahk Pilip tuhwong ih ni ahl me kohlahng Kasa. (Wiewia 8:26-30) Wahnpoaron Pohl idek rehn Timoty en wahdo “pwuhk kan [“tehn doaropwe kan me dahrpene,” NW] me wiawihkihda kilin sihpw.” (2 Timoty 4:13) Mendahki Pohl sohte koasoia soangen doaropwe dah, mwein irail kisehn iren Paipel kan en lokaiahn Ipru.
Nin duwen Alan Millard, emen me samanih lokaiahn Sehm, nanpwungen mehn Suhs, naineki tehn doaropwe me dahrpene en iren Paipel kan kohwongete “irail me pilipilda kan nan Palestin, ong irail me dene iang sukuhl laud, ong ekei Parisi kei oh sounpadahk kan duwehte Nikodihmus.” Kisehn kahrepe iei pweilaud. Millard kendohki “pweinen doaropwe me ntingdi pwuhken Aiseia iei mwohni silper weneu lel eisek” oh pil koasoia me e “anahne naineki 15 lel 20 tehn doaropwe me dahrpene” pwe en ntingihdi Paipel en lokaiahn Ipru pwon, met wehwehki me e kakete pweinen doadoahk en elep en sounpar.
Paipel sohte mahsanih ma Sises de sapwellime tohnpadahk kan sapwellimaniki tehn doaropwe me dahrpene en Paipel kan. Ahpw, e sansal me Sises uhdahn loalokongki iren Paipel kan, e kak koasoia de wadlikihla iren Paipel kan sang eh mohngiong. (Madiu 4:4, 7, 10; 19:4, 5) Met sou kin kamwakid kitail en men wehwehkihla Paipel, pwe pali laud en aramas rahnwet kak pwainda oh naineki Paipel?