Rapahki Pasapeng kan

“Pwehki ahmw esehier pasapengpen ‘iaduwen’ ahmw kak wiahda ahmw mour, oh sang ni ahmw kin kilang duwen soangen pai kan de dipwisou kan me mahs kitail sohte leme me kak mie—me duwehte air condition, mehn keseng ngilamwahu kan . . .—kitail kin uhd medemedewe ‘ia kahrepen’ kitail kin mour. Mehnda kitail en kin nannanti repen mour nan rahn pwukat me mour inenen apwal? Ia kahrepen met?”​—David G. Myers, professor en psychology ni Hope College, Holland, Michigan, U.S.A.

IADUWEN ahmw pahn sapeng peidek pwukat me sounpadahk menet kapwarehda? Ekei aramas pil kin pwonopwonki ma mie katepen arail pahn nannanti raparapahki pasapengpen peidek pwukat. Ahpw en nantihong pohnsehse soangen peidek pwukat duwehte ahmw nannantihong pohnsehse kisin takai ehu me mih nan ahmw suht—ke kak wonlahte oh alialu kohwei, ahpw ke sohte pahn nsenamwahu.

Ma mie pak ke kin medemedewe ia wehwehn mour, eri kaidehn kowe kelepw me kin medemedewe duwen met. Nin duwen me ehu roporop me keieu laud World Values Survey, me wiawiher nan sampah pwon kasalehda, tohtohlahr irail aramas akan me kohsang sahpw tohtohie kin medemedewe duwen “ia wehwehn mour.”

Ma ke men ahneki popohl mehlel, ke anahne diarada pasapengpen peidek kesempwal siluh.

Ia kahrepen mour?

Dahme pahn wiawi ni ahnsou kohkohdo?

Iawasa ke kak diarada pasapeng kan me kitail kak likih me pid duwen peidek kesempwal pwukat? Pali kan mwurin met pahn kasalehda pasapeng kan me poahsoanda sang sapwellimen Koht Mahsen, Paipel, ah kaidehn soangen pasapeng kan me poahsoanda sang pein en emen madamadau de loalokong. Se lukei komwi en pahkpeseng noumw Paipel oh pein diarada dahme e mahsanih.