Ahnsou Apwal Ekei Met
PAIPEL kohpadahr me aramas akan pahn lelohng “ahnsou apwal ekei.” E kawehwehda me ahnsou wet iei “imwin rahn akan.” (2 Timoty 3:1-5; 2 Piter 3:3-7) Sises Krais mahsanih duwen mwehi wet ni eh sapengla peidek me sapwellime tohnpadahk ko kihda me pid duwen “kaimwiseklahn koasoandi en mehkan.” (Madiu 24:3, New World Translation) Kitail momour ni imwin rahn akan? Kapahrekpene dahme Paipel kohpadahr oh ripoht kan me kileldi pah, oh pein kasawih.
Dahme Paipel kohpadahr duwen: pingiping kan sampah pwon—Luk 21:10; Kaudiahl 6:4.
Dahme ripoht kan en rahnpwukat koasoia: “Erein sounpar 100 samwalahro mehla me kin pidada mahwen pak siluh laudsang sounpar 1,900 samwalahro pil lella pahr me Sises ipwidi.”—Worldwatch Institute.
Dahme Paipel kohpadahr duwen: lehk lapalap oh soumwahu laud—Luk 21:11; Kaudiahl 6:5-8.
Dahme ripoht kan en rahnpwukat koasoia: Nan pahr 2004 aramas rar pak 863 samwa nan sampah pwon sohte itar en mwenge, meh rar pak 7 laudsang nan pahr 2003.—United Nations Food and Agriculture Organization.
Aramas lik samwa kousoan nan ihmw kan me sohte mwahu ong kousoan; aramas lik pak 2.6 sohte arail wasahn kainen oh wasahn kihd; aramas lik pak 1.1 sohte nimarail pihl mwakelekel.—Worldwatch Institute.
Aramas rar pak 500 soumwahukihda malaria; aramas rar pak 40 kin ahneki soumwahu en HIV-AIDS; Soumwahu en limengimeng kemelahr aramas rar pak 1.6 nan pahr 2005.—World Health Organization.
Dahme Paipel kohpadahr duwen: kauwehla sampah—Kaudiahl 11:18.
Dahme ripoht kan en rahnpwukat koasoia: “Dahme aramas kan wiahier imwikihla solahn soangsoangen mahn akan oh tuhke kan.” Mie koasoandi kan me kin kolokol mour pohn sampah. Ahpw riakis siluh en koasoandi pwukat kin sosohrala.—Millennium Ecosystem Assessment.
“Aramas kan kin kasaminehla nan wehwe kahrehiong iren mesenlahng kereniong ohla.”—NASA, Goddard Institute for Space Studies.
Dahme Paipel kohpadahr duwen: rongamwahu en Wehin Koht pahn lohkseli wasa koaros nin sampah—Madiu 24:14; Kaudiahl 14:6, 7.
Dahme ripoht kan en rahnpwukat koasoia: Erein 2007, sounkalohk meh 6,957,854 en Sounkadehdehn Siohwa kan wiahda awa tohtohsang lik pak 1.4 ni arail kalokalohki rongamwahu en Wehin Koht nan sahpw 236.—2008 Yearbook of Jehovah’s Witnesses (Pwuhken Pahr en Sounkadehdehn Siohwa kan 2008).
Nin duwen me kileldi powe, Paipel kohpadahr me mendahki rohng suwed kan koaros, mie kahrepe en ahneki koapworopwor. Sises mahsanih duwen “rongamwahu” en Wehin Koht. Dahkot Wehin Koht? Iaduwen met kin pidada koapworopwor ong ahnsoun kohkohdo? Iaduwen Wehin Koht kamwakid uhk?
[Kawehwehpen kilel kan nan ehu ehu pali 3]
Paipel kohpadahr irair en sampah me kitail kilang rahnpwukat