Sampah Paradais Ehu Mwohtail!
“Samat me ketiket nanleng: Mwaromwi en sarawihla rehn aramas koaros, mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.”—Madiu 6:9, 10.
KAPAKAP en Samat de Kauno me aramas tohto ese kin kihda koapworopwor ong aramas akan. Iaduwen?
Nin duwen me kapakap en Kauno kasalehda, Wehin Koht pahn kahrehiong kupwuren Koht en pweida nin sampah duwehte e pweidahier nanleng. Oh kupwuren Koht iei en pwurehng wiahla sampah paradais. (Kaudiahl 21:1-5) Dahkot Wehin Koht, oh iaduwen e pahn pwurehng wiahla sampah paradais?
Koperment Mehlel Ehu
Wehin Koht uhdahn koperment mehlel ehu. Pwe koperment ehu en doadoahk, e anahne kaun akan, kosonned kan, oh towe kan. Wehin Koht kapwaiada koasoandi pwukat? Tehk pasapengpen Paipel ong peidek siluh pwukat:
Ihs irail me kaun akan nan Wehin Koht? Siohwa sapwellimaniki pwung en kaunda. (Aiseia 33:22) Siohwa Koht ketin idihdda sapwellime Ohl, Sises Krais, en kakaun nan Wehio. (Madiu 28:18) Uwen pwihnen aramas kei me kohsang “kadaudok koaros, oh lokaia koaros, wehi koaros, oh sahpw koaros” me pahn iang ih kaunda sampah nin duwen nanmwarki kan.—Kaudiahl 5:9, 10.
Kosonned dah kan me Wehin Koht ketikihda ong towe kan en peikiong? Mie soangen wiewia kan me ekei kosonned kan de kehkehlik kan kasalehda. Sises ketin kasalehda kosonned me keieu kesempwal ni eh mahsanih: “‘Ke pahn poakohng Kaun-o omw Koht sang nan kapehdomw unsek, sang ni ngenomw unsek, sang ni omw lamalam koaros unsek.’ Ih met kosonned me keieu lapalap oh kesempwal. A me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.’”—Madiu 22:37-39.
Kosonned teikan kehkehlikihong towe kan en Wehin Koht en liksang ekei wiewia kan. Karasepe, Paipel ketikihda mahsen sansal wet: “Kumwail dehr nan kapehd rotorot, pwe me kin nenek kan, me kin pwongih dikedik en eni kan, me kamwahl akan, me wia dipen Sodom kan, me lipirap akan, me noahroke kepwe kan, me kamamsakau kan, me karaunlikamw akan, oh me loallap suwed kan, re sohte pahn iang sohsohki Wehin Koht.”—1 Korint 6:9, 10.
Ihs irail me towe kan en Wehin Koht? Sises karasahiong towe kan en Wehin Koht duwehte sihpw. E mahsanih: “Re pahn rong ngilei. Eri, re pahn wiahla pwihn sihpw teieu, oh sileparail pahn mehtehmen.” (Sohn 10:16) Pwehn wia towe men en Wehin Koht, aramaso sohte itar en ndahte me e kin idawehn Silepe Mwahu Sises, ahpw e anahne wia dahme e ketin kehkehlingki. Sises mahsanih: “Kaidehn aramas koaros me kin likwerih ie, ndinda, ‘Maing ei Kaun, Maing ei Kaun,’ me pahn pedolong nan Wehin Koht, pwe irail kan me kin kapwaiada kupwur en Semei me ketiket nanleng.”—Madiu 7:21.
Eri, irail kan me towe Wehin Koht kin doadoahngki oh kawauwih mwaren Koht, Siohwa, duwehte Sises ketin wia. E mahsanih nan sapwellime loulou: “Ngehi me kahrehiong irail en esei mwaromwi, oh I pil pahn usehla wiewia met.” (Sohn 17:26, NW) Re kin peikiong sapwellimen Sises kehkehlik en padahkihong meteikan duwen “Rongamwahu en Wehin Koht.” (Madiu 24:14; 28:19, 20) Oh re kin kasalehda limpoak mehlel ong emenemen.—Sohn 13:35.
Ahnsoun “Kauwehla Irail kan me Kin Kauwehla Sampah”
Mwekimwekid en sampah ahnsoun pwukat kasalehda me Wehin Koht pahn kereniong wia wekidekla laud nan sampah. Iaduwen kitail ese duwen met? Sounpar riekid samwalahro, Sises kasalehda soangen kilel kan me pahn kasalehda me “Wehin Koht kerendohr.” (Luk 21:31) Nin duwen artikel en mwoweo kasalehdahr, pweidahn kilel pwukat sansalehr nan sampah pwon.
Dahme pahn kohdo mwuhr? Sises ketin sapeng: “Pwe kahn kamakam kowahlap en ahnsowo pahn laudsang apwal me kin wiawi sang mahs kohdo lel met, pil sohte me pahn duwe sang met kohla.” (Madiu 24:21, NW) Met kaidehn kahpwal me aramas me wiahda. Ahpw met iei sapwellimen Koht mwekid en “kauwehla irail kan me kin kauwehla sampah!” (Kaudiahl 11:18) Aramas suwed kan, arail mwekid roporop akan me kahrehiong sampah kereniong ohla, ih irail me Koht pahn ketin “koahkoahsang”sang sampah. Ahpw aramas pwung kan me kin papah koht ni ahl pwung me “pahn kousoan nan sahpw wet.”—Lepin Padahk 2:21, 22.
Siohwa Koht sapwellimaniki pwung en wia soangen mwekid laud wet. Pwekida? Tehk duwen karasaras wet: Medewehla komwi me imwaneki apartment tikitik ehu. Ekei towe kan kin wia tiahk mwahu, kadek lamalam, re kin pwain arail pweinen ihmwo oh apwalih mwahu. Ahpw ekei towe kan kin kalapw wiahda pingiping oh kin roporop, re sohte men pwain pweinen ihmwo oh kin kauwehla ihmwo. Mendahki re kin pwurepwurehng ale mehn kataman, arail mwekid suwed lalaudla. Dahme ke pahn wia? Pwehki komwi me imwaneki ihmwo ke pahn uhdahn kihsang towe kan me suwed.
Duwehte met, Siohwa Koht, nin duwen Sounkapikadahn sampah oh audepe kan, e sapwellimaniki pwung en pilada ihs me pahn kousoan ie. (Kaudiahl 4:11) Siohwa mahsanih me sapwellime kupwur iei en kihsang aramas suwed kan sang sampah wet me kin pohnsehse kupwure oh adihasang pwung en meteikan.—Melkahka 37:9-11.
Paradais Kapwurpwurdo
Ni ahnsou keren, Wehin Koht ki limen Sises pahn kaunda sampah. Sises kahdaneki tapihada kapw wet “sapwellime Mwei Kapw.” (Madiu 19:28) Ia pahn duwen irair en ahnsowo? Tehk dahme Paipel inoukihda:
Melkahka 46:9. “E kin ketin katokehdi mahwen wasa koaros nin sampah.”
Aiseia 35:1. “Sapwtehno pahn perenda, oh rohs akan pahn mpwek oh masalpeseng nan sahpw madekeng kan.”
Aiseia 65:21-23. “Arail doadoahk kan pahn kin pweida mwahu.”
Sohn 5:28, 29. “Ahnsou ehu pahn kohdo me irail koaros me mihmi nan sousou kan pahn rong kapitie [Sises], oh re pahn pedoisang nan arail sousou kan.”
Kaudiahl 21:4. “[Koht] pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”
Kahrepe kan en Kamehlele
Ke kin kamehlele dahme Paipel inoukihda? Paipel kohpada me tohto sohte pahn kamehlele. E mahsanih: “Kumwail en ese pwe ni imwin ahnsou kan aramas ekei pahn pwarodo me pahn kin kaweidki ar mour pein ar ineng suwed kan. Re pahn kin kepitkin kumwail, ndinda, ‘E soh inoukihong kumwail me e pahn pwurodo? Eri, ia ih? Samatail ko melahr, a mehkoaros duweduwehte sang nin tepin sampah eh wiawihda!’” (2 Piter 3:3, 4) Ahpw irail me kin kapailok inenen sapwung. Tehk kahrepe pahieu me ke kak kamehlele dahme Paipel mahsanih:
(1) Koht ketin kadeikada aramas suwed kan mahs. Nohlik lapalap en mwehin Noha iei ehu mehn kataman.—2 Piter 3:5-7.
(2) Mahsen en Koht kohpada ni pwung duwen irair en sampah rahnpwukat.
(3) Mehkoaros sohte “duweduwehte sang nin tepin sampah eh wiawihda.” Sampah ohkihlahr en aramas kauwehla koasoandi, tiahk, oh sahpw oh nan wehwe.
(4) “Rongamwahu en Wehin Koht” pahn lohkiseli wasa koaros nin sampah, kasalehda “imwin sampah” pahn kereniong kohdo.—Madiu 24:14.
Sounkadehdehn Siohwa kan luke iuk en iang irail en onopki Paipel, Mahsen en Koht, pwe ken sukuhliki duwen koapworopwor en mour soutuk pahnangin kaundahn Wehin Koht. (Sohn 17:3) Ei, ahnsou kaselel ehu awiawih aramas akan. Ahnsou keieu mwahu mi mwohtail! Ke pahn iang kisehn mour wet ahnsou kohkohdo?
[Kawehwehpen kilel kan nan ehu ehu pali 5]
Irail kan me kin nda soahng koaros pahn duweduwehte sang ni tepio uhdahn sapwung
[Kawehwehpen kilel kan nan ehu ehu pali 6]
Ke pahn iang kisehn mour wet ahnsou kohkohdo?