Ke Kin Ese Semomw me Ketiket Nanleng?

IA UWEN omw ese omw pahpao? Peidek wet pahn mwomwen kapwuriamwei ma ke keirda nan peneinei limpoak ehu. Ke mwein pahn nda ‘I ese ih!’ Ei, pali laud en aramas ese dahme arail pahpa kin mwahuki oh dahme e sohte kin mwahuki, duwen mwomwen eh mwekid nan soangsoangen irair kan oh duwen e kin apwalih eh peneinei.

Ahpw, mie pak me ke pahn pwuriamwei ni omw kilang omw pahpao e wia mwekid me ke sohte lemehiong. Karasepe, pwutak emen mwein kin ese me eh pahpao wia aramas emen me kin nennen oh meleilei—ahpw ehu pak mehkot karuwaru pwarada. Ahnsowo e kilangada me eh pahpao ahneki lamalam kehlail ni eh doare eh peneinei.

Ia uwen omw ese atail Sounkapikada? Kitail sukuhliki me: “Kitail kin momourki ih, oh mwekimwekidki ih, oh pil mihmi pwehki ih.” (Wiewia 17:28) Kitail pweipwandkihong Koht atail mour, eri pwehki kahrepe wet eh wia Semen koaros me momour. (Aiseia 64:8) Mwein ih duwen omw pepehm ong Koht, oh met me mwahu oh konehng. Mie soahng tohto me kitail kak esehla duwen ih—ong kamwahupatail oh kitail pahn peren.

Omw pepehm oh wahu ong omw pahpa kin pid ia uwen omw ese ih. Me duwehte met, uwen laud en omw ese Koht pahn kahrehong ken karanih ih. Koht kak ketin sewese iuk en powehdi omw kahpwal akan en mour ma ke pahn esehla ih mwahu oh sukuhliki en wia kupwure.

Soangen aramas dah men Koht? Iaduwen sapwellime irair kan kak kamwakid omw pepehm ong ih? Omw esehla ih pahn wehwehki me mie pwukoa kan me ke anahne kapwaiada? Ke pahn diar pasapengpen peidek pwukat nan iren onop en mwuhr.

[Kawehwehpen kilel kan nan ehu ehu pali 3]

Ia uwen omw ese meteikan pahn kamwakid omw pepehm ong irail