Ia Duwen Ke Kak Wia Pahpa Mwahu Men

“Kumwail pahpa . . . kan, kumwail dehr kamwakara mwahl noumwail seri kan, pwe re dehr mworusala.”—Kolose 3:21.

IA DUWEN pahpa men kak kanahieng pwehn dehr kamwakara mwahl nah seri kan? Pahpa men anahne wehwehki eh pwukoa kesempwal. Ehu makasihn en roson en madamadau koasoia: “Pwukoahn pahpa men kak kamwakid laud kekeirdahn pepehm oh madamadau en seri kan.”

Ia pwukoa en pahpa men? Nan peneinei tohto, pahpa men me kin kalapw kihda peneu. Pak tohto ma seri men kin ketihwo, eh nohno pahn ndaiong ih, ‘Ahmw pahpa pahn keme iuk!’ Mehlel seri kan anahne kaiahn me pwung oh inen pwehn wiahla aramas koahiek kan. Ahpw pahpa men anahne wia laud sang en kihda peneu.

Kaidehn pahpa koaros kin tikida nan peneinei me arail pahpa kin wia mehn kahlemeng mwahu. Ekei tikida nan peneinei me sohte arail pahpa. Ahpw ekei me arail pahpao kin lemei oh sohte kadek, met kin kahrehda irail en pil lemeiong neirail seri kan. Ia duwen pahpa men en dehr alasang soangen mehn kahlemeng suwed oh wiahla pahpa mwahu men?

Mie kaweid mwahu me kitail kak likih me pid iaduwen emen kak wia pahpa mwahu men. Kaweid en Paipel iei me keieu mwahu ong mouren peneinei. Eh kaweid kaidehn en aramas madamadaute, oh e sohte kin kaweid sapwungih kitail. Kaweid en Paipel kin kasalehda erpit me kohsang rehn Siohwa Koht me ketin koasoanehdi koasoandi en peneinei. (Episos 3:14, 15) Ma kowe pahpa men, e pahn mwahu ken tehk kanahieng dahme Paipel mahsanih duwen ahmw pwukoa.a

En wia pahpa mwahu men kin kesempwal kaidehn ongete roson mwahu oh pepehm en noumw seri kan ahpw pil ong kekeirdahn arail nanpwungmwahu rehn Koht. Seri men me ahneki nanpwungmwahu rehn eh pahpa pahn kak mengeiong kakairada eh nanpwungmwahu rehn Koht. Paipel kin kasalehda me Siohwa, atail Sounkapikada, iei Samatail. (Aiseia 64:8) Kitail tehkpene ire weneu me seri kan anahne sang rehn arail pahpa. Nan ehuehu ire, kitail pahn tehk iaduwen en doadoahngki kaweid kan en Paipel me kak sewese pahpa men en kaitarala anahn pwukat.

1 Limpoak en Arail Pahpa

Siohwa kin ketin wia mehn kahlemeng me keieu mwahu nin duwen Pahpa men. Paipel mahsanih: “Sahmo ketin kupwur limpoak ong Sapwellime Iehros.” (Sohn 3:35; Kolose 1:15) Pak tohto Siohwa kin ketin kasalehda me e ketin poakohng oh kupwurperenki sapwellime Ohlo. Ni ahnsou me Sises ketin papidaisla, Siohwa ketin mahsanih sang nanleng: “Kowe, me iei nei pwutak kompoake, me I kin kupwurperenki.” (Luk 3:22) Sises sohte kin ketin peikasalki limpoak en Semeo. Dahme pahpa men kak sukuhliki sang sapwellimen Koht mehn kahlemeng wet?

Dehr pweiek en ndahng noumw seri kan me ke poakohng irail. Kelvin me naineki seri limen koasoia: “Ahnsou koaros I kin kasalehda ei limpoakohng nei seri kan sang ni ei kin nsenohki emenemen irail ah kaidehn ndahte me I poakohng irail. I kin iang wilian arail daiper oh kaduhp irail.” Noumw seri kan pil anahne ese me ke perenki irail. Ke dehr kin kalapw kauwe de kapwungih irail, ahpw ke anahne en kin kapinga irail. Donizete me naineki serepein riemen kihda kaweid wet, “Pahpa men anahne rapahki ahnsou kan en kapinga nah seri kan.” Ma noumw seri kan ese me ke kin perenki irail, met pahn sewese irail en ese me irail aramas katapan kei. Oh e pahn sewese irail en karanihala Koht.

2 Mehn Kahlemeng Mwahu

Sohn 5:19 mahsanih me Sises ketin wia dahme “e kin kilang me Sahmo kin ketin wia.” Tehk me nan ireo Sises kin mahsanih oh wia dahme Semeo kin ketin “wia.” Ihme seri kan pil kin wia. Karasepe, ma pahpa men kin wauneki eh pwoud, nah pwutako pil pahn wauneki lih akan ahnsou me e laudla. En pahpao mehn kahlemeng mwahu pahn kamwakid nah pwutak kan. Oh e pil pahn kamwakid madamadau en nah serepein kan duwen ohl akan.

Ia duwen, noumw seri kan kin apwaliki en peki mahk? Ahmw mehn kahlemeng me kesempwal. Kelvin tamanda ahnsowo me nah pwutak riemeno kauwehla nah kamera pweilaudo. Uwen eh lingeringer e pakerihte tehpelo oh katipwpeseng. Kelvin koluhkihla met oh peki mahk ong koaros iangahki eh pwoud. E lemeleme me eh peki mahko kin sewese nah seri kan en sohte apwaliki peki mahk.

3 Wasa me Kaperen

Siohwa wia Koht peren men. E sohte kapwuriamwei me sapwellime Ohl Sises pil kin perenki patopato reh. Lepin Padahk 8:30 kin sewese kitail en wehwehki duwen nanpwungmwahu en Sises oh Semeo: “I mi limwah, duwehte sounsawas emen, . . . I pil perenkihda ei patopato reh.” Ia uwen Sahmo oh sapwellime Ohlo kin kerenpene!

Noumw seri kan anahne tikida nan wasa ehu me kaperen. En iang noumw seri kan mwadong kak wiahda wasa me kaperen oh sewese iuk oh noumw seri kan en kerenpene. Felix pil kin kamehlele met. Mie nah pwutak pwulopwul men oh e nda: “En koasoanehdi ahnsou en iang nei pwutak kin inenen kesempwal ong at nanpwungmwahupene. Se kin mwadongpene, patehng iengat kan oh mwemweitla wasa kan. Met kalaudehla at ehupene nan peneinei.”

4 Sukuhliki Duwen Koht

Sises ketin ale kasukuhl sang Semeo kahrehda e kak mahsanih: “Ihete me I pahn koasoia ong sampah: mehkan me I rongasangehr [rehn Semeo].” (Sohn 8:26) Koht ketin koasoanehdi me pahpa men me pahn pwukoahki en kasukuhlih nah seri kan duwen tiahk mwahu oh pil duwen Koht. Kasukuhl wet anahne tepida mwadang. (2 Timoty 3:14, 15) Felix tepida wadek poadopoad kan en Paipel ong nah pwutak ni ahnsou me e tikitik. E kin doadoahngki kilel kan oh poadopoad kaperen kan me iangahki me kin mi nan Nai Pwuhk en Poadoapoad Kan en Paipel.b Ni ahnsou me nah pwutako laudla, Felix kin uhd doadoahngki sawaspen Paipel teikan me pahn konehng sounpar en nah pwutako.

Donizete koasoia: “E kin uhdahn apwal en wia onop en Paipel nan peneinei ni ahl me kaperen. E kesempwal pahpa oh nohno en kasalehda ara kesempwaliki mehkan me pid duwen kaudok, pwehki seri kan kin mwadang en tehkada ma ira sohte kin kapwaiada dahme re padahngki.” Carlos me naineki pwutak silimen koasoia: “Se kin tuhpene pak ehu nan wihk kan pwehn koasoiapene anahn akan en at peneinei. Emenemen kiht kak pilada dahme se pahn koasoiapene.” Kelvin kin kalapw rapahki ahnsou en koasoiong nah seri kan duwen Koht sohte lipilipil wasa me re mi ie oh dahme re wiewia. Met kin katamandohng kitail mahsen en Moses: “Dehr manokehla kosonned pwukat me I kihong kumwail rahnwet. Padahkihong noumwail seri kan. Kataman kin irail ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.”—Deuderonomi 6:6, 7.

5 Peneu

Seri kan anahne ale peneu pwe ren kak kekeirda oh wiahla aramas koahiek kei. Ekei pahpa oh nohno kan kin medewe me en panawih neirail seri kan iei en kaloke irail daulihala, lipwoare oh doadoahngki lokaia kamedek. Ahpw Paipel sohte kin kaweidih pahpa oh nohno kan en panawih seri kan ni lemei. Irail anahne panawih seri kan ni elen limpoak duwehte Siohwa kin ketin wia. (Ipru 12:4-11) Paipel mahsanih: ‘Kumwail sahm oh ihn kan, kumwail dehr kamwakara mwahl noumwail seri kan. A kumwail kaiahneirailda nan padahk en Kristian oh dahme re uhdahn pahn wia nin duwen Kristian.’—Episos 6:4.

Ekei pak seri kan anahne en kalokolok. Ahpw seri men anahne wehwehki kahrepen eh kalokolok. Peneu me pahpa oh nohno kin kihda en dehr kahrehiong serio en lemeleme me ira sohte poakepoake ih. Paipel sohte pwungki kamakam daulihala me kak kauwehla serio. (Lepin Padahk 16:32) Kelvin koasoia, “Ni ahnsou me I kin kapwungi nei seri kan duwen arail sapwung laud, I kin ahnsou koaros kawehwehiong irail me kahrepen I kin wia met, iei pwehki I poakohng irail.”

6 Pahpa oh Nohno en Pere irail

Pahpa oh nohno kan anahne pere neira seri kan sang soahng keper kan oh pil aramas keper kan. E kansensuwed me mie “aramas suwed” kan nan sampah wet me kin nantihong mwersuwedih seri kan. (2 Timoty 3:1-5, 13) Ia duwen ke kak pere noumw seri kan? Paipel kin kihda kaweid mwahu: “Aramas me eh lamalam mie kak kilangada kahpwal me kohkohdo oh wetsang; ahpw aramas tohto kin inenwohngete, ahpw nsensuwedkihla mwuhr.” (Lepin Padahk 22:3) Pwehn pere noumw seri kan, ke anahne tetehk soahng keper kan. Medewe duwen irair kan me kak wahdo kahpwal kan oh wia soahng koaros pwehn perehla irail. Karasepe, ma ke pahn mweidohng noumw seri kan en doadoahngki Internet, ke anahne padahkihong irail en doadoahngki ni pwung. E pahn keieu mwahu en kihla computer nan wasakis me ke kak tetehk irail.

Pahpa men anahne kaunopada oh kaiahne nah seri kan ong keper kan me re kak lelohng pwehki ekei aramas men mwersuwedih seri kan. Ia duwe, noumw seri kan ese dahme re anahne wia ma emen pahn song en mwersuwedih irail ni ahnsou me ke sohte mie? Noumw seri kan anahne ese duwen ahl me konehng oh sohte konehng ong doadoahngki dipwisou en kaparapar. Kelvin koasoia: “I sohte mweidohng meteikan en padahkihong nei seri kan duwen met, pil kaidehn arail sounpadahk kan. I lemeleme me ngehi me pwukoahki en padahkihong nei seri kan duwen met oh duwen keper en aramas akan me men mwersuwedih irail.” Nah seri kan koaros laudlahr oh pwopwoudla nsenamwahu.

Rapahki Sapwellimen Koht Sawas

Kisakis me keieu mwahu me pahpa men kak kihong nah seri kan iei en sewese irail en kakairada arail nanpwungmwahu rehn Koht. Kahlemeng en pahpa men inenen kesempwal. Donizete koasoia: “Pahpa kan anahne kasalehda ia uwen re kin kesempwaliki arail nanpwungmwahu rehn Koht. Met anahne sansalda ni ahnsou me irail lelohng kahpwal kan. Nan soangen ahnsowo, pahpa men anahne kasalehda ia uwen laud e kin likih Siohwa. Kapakap nan peneinei me kin kalapw kasalehda arail kalahnganki sapwellimen Koht kamwahu pahn padahkihong seri kan kesempwalpen en kompoakepahnki Koht.”

Ia ahl me kak seweseiuk en wia pahpa mwahu men? Ale kaweid sang Siohwa Koht, ih me keieu ese iaduwen en apwalih seri kan. Ma ke kin kaiahnehda noumw seri kan ni ahl me pahrehkiong kaweid en Mahsen en Koht, ke pahn kak diarada imwila mwahu duwehte Lepin Padahk 22:6 kin kasalehda: “E pahn tamatamante erein eh mour.”

[Nting tikitik me mi pah]

[Kilel nan pali 11]

Pahpa men anahne wia kahlemeng mwahu ong nah seri kan

[Kilel nan pali 12]

Pahpa men anahne kaitarala en seri kan anahn en karanih Koht

[Kilel nan pali 13]

Seri kan anahne peneu ni elen limpoak