IRELAUD LIMAU

Kaiahne Noumw Seri Sang Eh Pwelel

1, 2. Ihs me pahpa nohno anahne ale sawas sang reh ni ara kakairada neira seri kan?

SOUNPAR 3,000 samwa samwalahro, aramas men me naineki seri nda: “Seri kan iei kisakis ehu sang rehn KAUN-O.” (Melkahka 127:3) Ei, kaperenpen naineki seri iei kisakis kaselel ehu sang rehn Koht ong pali laud en me pwopwoud kan. Ahpw, irail me naineki seri kin ese me pwukoa kin iang peren wet.

² Nan rahnpwukat, kakairada seri iei doadoahk ehu me uhdahn apwal. Ahpw me tohto kin pweida ni arail kin wia doadoahk wet. Sounmelkahkao kasalehda ia duwen atail kak pweida. E nda: “Ma KAUN-O sohte ketin kauwada ihmwo, doadoahk en sounkou ihmw kan sohte pahn katepe.” (Melkahka 127:1) Ni omw kin nantihong idawehn sapwellimen Siohwa kaweid kan, ke pahn wiahla pahpa de nohno mwahu men. Paipel mahsanih: “Likih KAUN-O ni mohngiongomw unsek. Dehr koapworopworki mehkan me ke pein lemeleme me ke ese.” (Lepin Padahk 3:5) Ia duwe, ke pahn perenki rong sapwellimen Siohwa kaweid kan ni omw kin tapihada doadoahk en kakairada seri men erein sounpar 20?

ALE KAWEID EN PAIPEL

3. Pwukoa dahieu me pahpa kan ahneki ong kakairada seri kan?

³ Nan peneinei tohto nan sampah pwon, ohl akan kin medewe me lih akan me keieu pwukoahki kaiahne seri kan. Mehlel me Mahsen en Koht kin kasalehda me pahpa men me pahn pwukoahki wahdo mwohni ong peneinei. Ahpw Koht ketin kupwurki pahpa oh nohno kan ren sawaskipene doadoahk en kaiahne seri.—Lepin Padahk 1:8, 9.

4. Dahme kahrehda kitail en dehr kesempwalki pwutak laudsang serepein?

⁴ Ia duwen omw kin kilangwohng noumw seri kan? Ripoht kan nan Eisia koasoia me “pahpa nohno kan sohte kin kalapw perenki ipwidi en serepein kan.” Madamadau en sohte kesempwalki serepein kin wihwiawihte nan Latin Amerika, pil nanpwungen “peneinei marain kan.” Ahpw ni mehlel, serepein kan pil kesempwal. Seikop, pahpa ndand men mahso, nda me nah seri ko koaros iangahki nah serepein ko me ipwidi ahnsowo iei “ei tungoal seri kan me Koht ketin kupwurehkin ie.” (Senesis 33:1-5; 37:35) Pil duwehte, Sises pil kupwuramwahwih “kisin seri” (pwutak oh serepein) ko koaros me wisikdohng reh. (Madiu 19:13-15) Kitail kak kamehlele me e ketin kasalehda sapwellimen Siohwa madamadau.—Deuderonomi 16:14.

5. Soangen madamadau dah me pwopwoud ehu anahne ahneki ni ara pahn koasoanehdi uwen tohtohn ara peneinei?

⁵ Ia duwen, aramas akan nan omw wasa kin kasik lih emen en naineki seri tohto ? Pwopwoud ehu kin pein pilada seri depe me ira pahn naineki. Ia duwen ma pwopwoud ehu sohte naineki mwohni laud kahrehda ira sohte kak kamwenge, kalikawih oh kihong nan sukuhl seri tohto? Eri pwopwoudo anahne medemedewe duwen met ni ara pahn koasoanehdi seri depe ira pahn naineki. Ekei pwopwoud kan me sohte kak apwalih koaros neirail seri kan kin kihong arail peneinei teikan ren uhd pwukoahki apwalih ekei seri ko. Ia duwe, tiahk wet mwahu? E sohte uhdahn mwahu. Pahpa nohno pwukat pil sohte saledek sang arail pwukoa ong neirail seri ko. Paipel mahsanih: “Ma emen sohte kin apwalih kiseh kan, ahpw mehlel uhdahn kisehn pein eh peneinei, e kahmahmkilahr eh pwoson.” (1 Timoty 5:8) Pwopwoud kan me kin kesempwalki arail pwukoa kin song koasoanehdi seri depe ren naineki pwe ren kak apwalih ‘uhdahn kisehn pein arail peneinei.’ Ia duwe, irail kak doadoahngki wiepen irehdi naineki seri ong ire wet? Met pil pein arail pilipil oh ma pwopwoud kan koasoanehdi ren wia met, re pahn pil pein pilada soangen wiepe dah me re pahn doadoahngki. “Emenemen kitail koaros uhdahn pahn pein wa eh wisik.” (Kalesia 6:5) Ahpw wiepen irehdi naineki seri me kin kauwehla mouren seri me saikinte ipwidi kin uhwong padahk en Paipel. Siohwa Koht iei “poahsoan en mour koaros.” (Melkahka 36:9) Ihme kahrehda, en kauwehla mouren seri men mwurin eh apadahr nan kepehden ine kin kamwamwahlih Siohwa oh e kin duwehte kamaramas.—Melkahka 139:16; Seremaia 1:5.

KAITARALA ANAHN EN NOUMW SERI

6. Iahd me kaiahne seri men anahne tepida?

⁶ Lepin Padahk 22:6 mahsanih: “Padahkihong kisin seri men duwen eh pahn momour.” Kaiahne seri kan iei pil ehu ahn pahpa nohno pwukoa laud. Ahpw iahd me kaiahn wet pahn tepida? E anahne tepida mwadang. Wahnpoaron Pohl ese me Timoty kaiahnda ‘sang ni eh kisin seri.’ (2 Timoty 3:15) Lepin lokaiahn Krihk me doadoahk wasaht kak dokedoke seri pwelel men de seri men me saikinte ipwidi. (Luk 1:41, 44; Wiewia 7:18-20) Ihme kahrehda Timoty kin ale kaiahn sang ni eh uhdahn tikitik oh met kin konehng. Ahnsou me keieu mwahu en tapihada kaiahne seri men iei ahnsou me e wia seri pwelel. Mehnda ma pil kisin seri men, mie eh ineng en esehla mehkot.

7. (a) Dahme kahrehda e kesempwal pahpa oh nohno en kakairada ehupene nanpwungen ira oh neira serio? (b) Ia mwomwen nanpwungen Siohwa oh sapwellime Iehroso?

⁷ Emen nohno nda: “Ni ei tepin kilang nei serio, I uhdahn poakepoakehda.” Pali laud en nohno kan pil kin wia met. Soangen pepehm kaselel wet nanpwungen nohno oh nah serio kin lalaudla ni ara mihpene mwurin serio ipwidi. Kadihdi pil kin kalaudehla pepehm wet. (Pil kilang 1 Deselonika 2:7.) En nohno men eh damwedamwer nah serio oh lokolokaiahiong kin kesempwal pwe en kaitarala ahn serio pepehm. (Pil kilang Aiseia 66:12.) Ahpw ia duwen ahn serio pahpa? E pil anahne karanihala nah seri me ahpwtehn ipwidio. Siohwa ketikihda mehn kahlemeng me pid met. Nan pwuhken Lepin Padahk, kitail sukuhlki duwen nanpwungmwahu me Siohwa oh sapwellime Iehroso ketin sapwellimanki. Sapwellime Iehroso mahsanih: “KAUN-O ketin kapikiehda mwohn mehkoaros, iei keieun sapwellime doadoahk mahsie. . . . Ngehi me kin kapakaparanih rahn koaros.” (Lepin Padahk 8:22, 30; Sohn 1:14) Pahpa mwahu men pil kin kakairada ehupene ni limpoak nanpwungen ih oh nah serio sangete serio eh tepin ipwidi. Pahpa men nda: “Kasalehda limpoak laud. Saik pak ehu seri men mehkihla emen en kin pwoalepwoale oh metimetik.”

8. Dahme pahpa oh nohno anahne mwadang wia?

⁸ Ahpw kisin seri kan kin anahne me laudsang met. Sang ni ahnsou me re ipwidi, arail mwahliel kakehr esehla oh koledi soahng kei, oh pahpa nohno me pahn kin padahkihong irail. Karasepe, lokaia. Soun wia roporop kan nda me uwen mwahu en seri men eh kak esehla lokaia oh wadawad “ele kin kohsang dahme kin wiawi nanpwungen serio oh eh pahpa oh nohno sangete nin tapio.” Koasoiong oh wadawadohng noumw serio sang ni eh pwelel. E pahn kin mwadang men alasang uhk oh sohte pwand, ke pahn padahkihong ih wadawad. E pahn kakete esehla wadawad mwohn eh pahn tepida iang sukuhl. Met pahn sawas laud ma ke kousoan nan sahpw ehu me sounpadahk kan malaulau oh perehn sukuhl kan dirala.

9. Ia mehn akadei me keieu kesempwal me pahpa nohno anahne tamataman?

⁹ Dahme pahpa oh nohno Kristian kan anahne keieu nsenohki iei en sewese neirail seri en ahneki nanpwungmwahu rehn Koht. (Pil kilang Deuderonomi 8:3.) Ia arail mehn akadei? Ren sewese neirail seri en kakairada sapwellimen Sises irair kan, me wehwehki pwuhriong “aramas kapw.” (Episos 4:24) Pwe ren kak wia met, re anahne medemedewe soangen dipwisou kan oh wiepen kokou.

PWUREPWUREHNG PADAHKIHONG NOUMW SERIO ME MEHLEL

10. Irair dah kan me seri kan anahne kakairada?

¹⁰ Kehlail en ihmw ehu kin poahsoankihda soangen dipwisou me e wiawihkihda. Wahnpoaron Pohl nda me dipwisou me keieu mwahu ong irair en Kristian men iei “kohl, de silper, de takai kesempwal akan.” (1 Korint 3:10-12) Soahng pwukat kin kak wehwehki pwoson, erpit, dehdehki, loalopwoat, wahu, poakohng oh kalahnganki Siohwa oh sapwellime kosonned kan. (Melkahka 19:7-11; Lepin Padahk 2:1-6; 3:13, 14) Ia duwen pahpa nohno kan ar kak sewese neirail seri kan ren kakairada irair pwukat sangete ni ar wia kisin seri? Ren wia met sang ni arail pahn idawehn koasoandi ehu me wiawihda mahsie.

11. Ia duwen pahpa nohno kan en Israel ar kin sewese neirail seri kan ren kakairada irair kan me Koht kupwurki?

¹¹ Mwohnte wehin Israel eh pedolong nan Sapwen Inowo, Siohwa ketin padahkihong irail pahpa nohno kan en Israel: “Dehr manokehla kosonned pwukat me I kihong kumwail rahnwet. Padahkihong noumwail seri kan. Kataman kin irail ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.” (Deuderonomi 6:6, 7) Ei, pahpa nohno kan anahne wia mehn kahlemeng, werekiong seri kan, koasoakoasoiong seri kan oh pil wia arail sounpadahk.

12. Dahme kahrehda e kesempwal pahpa nohno kan ren kin wia mehn kahlemeng mwahu?

¹² Wia mehn kahlemeng. Keieu, Siohwa ketin mahsanih: “Dehr manokehla kosonned pwukat.” Mwuri, e ketin kapatahiong oh mahsanih: “Padahkihong noumwail seri kan.” Ihme kahrehda pahpa nohno anahne ahneki mahs irair kan me Koht ketin kupwurki nan ara mohngiong. Ira anahne poakohng padahk mehlel oh kapwaiada nan ara mour. Ihte ahl me ira kak doadoahngki me kak sair mohngiong en serio. (Lepin Padahk 20:7) Dahme kahrehda? Pwehki seri kan kin mwekidki dahme re kin kilang laudsang dahme re kin rong.—Luk 6:40; 1 Korint 11:1.

13. Ia duwen pahpa nohno Kristian kan ar kak alasang sapwellimen Sises mehn kahlemeng ni arail pahn tehk neirail seri kan?

¹³ Werekiong serio. Siohwa ketin padahkihong pahpa nohno kan en Israel: ‘Kataman kin noumw seri kan ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr.’ Met anahne irail en kihong neirail seri kan arail ahnsou mehnda ma re kedirepw. Sises ketin pehm me e ketin anahne doadoahngki ahnsou ong seri kan. Ni kaimwiseklahn sapwellime ahnsoun doadoahk en kalohk, “aramas ekei ahpw patohwandohng Sises kisin seri kei pwe en ketin doahke irail.” Dahme Sises ketin wia? “Ih eri pwoalehdi seri ko oh ketikidahng lime ko pohn emenemen irail oh kupwuramwahwihirailla.” (Mark 10:13, 16) Nna medewehla, ahnsou me Sises pahn ketin pwoula kerendohr. Ahpw e ketin doadoahngki eh ahnsou ong seri ko. Ia uwen mwahu en mehn kasukuhl wet!

14. Dahme kahrehda e mwahu papah nohno kan en kin mi rehn neirail seri kan?

¹⁴ Koasoakoasoiong serio. Omw kin mi rehn noumw serio pahn seweseiuk ken kin koasoakoasoiong. Ni omw kin kalaudehla ahnsou en koasoakoasoiong, ke pahn esehla mwahu soangen aramas dahmen e pahn wiahla. Ahpw tamataman me omw kin koasoakoasoiong serio kin wia mehkot me laudsang lokolokaiahte. Nohno men nan Brazil nda: “I anahne mweidohng dahme I kin rong en kamwakid ei mohngiong.” Eh kin kanengamah imwilah mwahu ni ahnsou me nah pwutako tepida kasalehiong eh pepehm kan.

15. Dahme pahpa nohno kan en tamataman me pid mehn kamweit de mwadong?

¹⁵ Seri kan kin anahne “ahnsoun peren . . . oh ahnsoun kahlek,” me wehwehki ahnsoun mwadong. (Eklesiasdes 3:1, 4; Sekaraia 8:5) Mwadong de kamweit kin uhdahn katapan ma pahpa nohno kan oh seri kan kin perenki wiapene. E kansensuwed pwe nan peneinei tohto, kamweit kin wehwehki kilikilang TV. Ekei prokram en TV ele pahn kaperen, ahpw pali laud kin kauwehla madamadau mwahu oh kin kihsang ahnsoun koasoakoasoipene nan peneinei. Eri, e sou mwahu en wia mehkot me mwahu ong noumw seri kan? Soahng kan me duwehte koul, mwadong, werekiong kompoakepahmwail kan oh kohla wasahn mwemweit kan. Soangen wiewia pwukat kin kalaudehla ahn peneinei ar kin koasoipene.

16. Dahme pahpa nohno anahne padahkihong neirail seri kan me pid Siohwa? Ia duwen arail pahn wia met?

¹⁶ Wia sounpadahk. Siohwa ketin mahsanih: “Padahkihong noumwail seri kan [kosonned pwukat].” Iretikitik teikan nan irelaud wet padahkihong uhk dahme oh ia duwen omw pahn padahk. Keieu, “ke en poakohng KAUN-O omw Koht sang nan mohngiongomw unsek, ni [“omw mour,” NW] unsek, oh ni omw kehl koaros.” (Deuderonomi 6:5) Mwuri, “padahkihong noumwail seri kan [kosonned pwukat].” Ken padahkih noumw seri kan pwe ren kak kakairada limpoak ong Siohwa oh sapwellime kosonned kan nan arail mour unsek. (Pil kilang Ipru 8:10.) Omw kin padahkih noumw seri kan ni “ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk” kin wehwehki me ken pwurepwurehng padahkih irail. Eri Siohwa kin ketin padapadahkihong uhk wiepen omw pahn sewese noumw seri kan ren wiahla soangen aramas me E ketin kupwurperenki.Wiepe wet iei en kin koasoia duwen Koht ahnsou koaros. Met pil iangahki omw kaukaule onop Paipel rehrail.

17. Dahme pahpa nohno kan ele pahn anahne kakairada rehn neirail seri kan? Dahme kahrehda?

¹⁷ Pali laud en pahpa nohno kan kin ese me e sohte mengei en audehda mohngiong en neirail seri kan. Wahnpoaron Piter kangoange ienge Kristian akan: “Kumwail duwehla seri pwelel kan, me kin ngoangkihte kang pilen dihdi mehlel en [“mahseno,” NW].” (1 Piter 2:2) Pwehki kaidehn aramas koaros kin ngoangki esehla padahk mehlel, pahpa nohno kan ele pahn anahne ese wiepen sewese neirail seri kan pwe ren duwehla seri pwelel me kin ngoangkihte kang pilen dihdi en mahsen en Koht.

18. Ia ekei sapwellimen Sises wiepen padahk me pahpa nohno kan anahne alasang?

¹⁸ Sises kin ketin sair mohngiong en aramas akan sang ni eh ketin doadoahngki karasaras kan. (Mark 13:34; Luk 10:29-37) Wiepen padahk wet kin keieu mwahu ong seri kan. Padahngki ire mehlel en Paipel kan sang ni omw doadoahngki soangsoangen poadopoad kan, mwein ekei me mi nan Nai Pwuhk en Poadoapoad Kan en Paipel.a Mweidohng seri kan ren iang wia met. Irail en doadoahngki arail koahiek ni arail pahn mahlenihada dahme wiawi oh ren kin mwomwehda irail kan me mi nan poadopoad ko. Sises pil kin ketin doadoahngki peidek kan. (Madiu 17:24-27) Alasang wiepen sapwellime padahk nan amwail onop en peneinei. Ke sohte pahn kin ndahlahte ehu kosonned en Koht ko, ahpw e pahn mwahu ma ke doadoahngki peidek pwukat, Dahme kahrehda Siohwa ketikihong kitail kosonned wet? Dahme pahn wiawi ma kitail kin kapwaiada met? Dahme pahn wiawi ma kitail sohte kapwaiada? Soangen peidek pwukat kin sewese noumw serio en kin medemedewe oh wehwehki me sapwellimen Koht kosonned kan kin mwahu oh katapan.—Deuderonomi 10:13.

19. Ma pahpa nohno kan kin kapwaiada kaweid en Paipel kan pwe ren sewese neirail seri kan, kapai laud dahieu me seri ko pahn ahneki?

¹⁹ Ni omw pahn kin wia mehn kahlemeng, werekiong, koasoakoasoiong serio oh wia sounpadahk men, ke kak sewese noumw serio sangete ni eh tikitik pwe en kakairada eh nanpwungmwahu rehn Siohwa Koht. Nanpwungmwahu wet pahn kangoange serio en kin peren nin duwen Kristian men. E pahn nantihong mourki dahme e kin kamehlele mehnda ma e kin lelohng kahpwal oh kasongosong sang rehn ienge kan. Sewese ih ahnsou koaros pwe en kesempwalki nanpwungmwahu wet.—Lepin Padahk 27:11.

KESEMPWALPEN PENEU

20. Dahkot peneu oh ia duwen met eh kak wiawi?

²⁰ Peneu iei kapwungala madamadau oh mohngiong en emen. Seri kan kin anahne met. Pohl kaweidki pahpa kan ren “kakairada [neirail seri kan] ni kaiahn oh madamadau en Siohwa.” (Episos 6:4, NW) Pahpa nohno kan anahne panawih neirail seri kan ni limpoak duwehte Siohwa. (Ipru 12:4-11) Ke kak wia peneu me poahsoankihda limpoak ni omw pahn kin sewese seri kan en pein medewe. Ihme kahrehda kaweid kohwong kitail en “rong kanahieng omw sounpadahk [“peneu,” NW].” (Lepin Padahk 8:33) Ia duwen peneu eh pahn wiawi?

21. Soangen kaweid dah me pahpa nohno anahne tamataman ni ara panawih neira seri kan?

²¹ Ekei pahpa nohno kin medewe me panawih neira seri kan iei en lokaia ni ngihl lemei, lipwoar de pil kauwe irail. Ahpw Pohl kaweidki met oh nda: “Kumwail dehr kamwakara mwahl noumwail seri kan.” (Episos 6:4) Paipel kangoange Kristian koaros ren ‘kin kadek ong aramas koaros, . . . kadek ni ar pahn kapwung pelierail kan.’ (2 Timoty 2:24, 25) Pahpa nohno kin pohnese me ira anahne tengediong dahme ira nda, ahpw ira pil anahne tamataman kaweid en Pohl ni ara kin panawih neira seri kan. Ekei pak, koasoiongete serio pwe en sewese ih en pein medewe sohte itar. Ele e pahn anahne kalokolok.—Lepin Padahk 13:24.

22. Ma seri men anahne kalokolok, dahme serio anahne wehwehki?

²² Seri kan kin wekpeseng oh peneu me kohwong irail pil kin anahne wekpeseng. Ke sohte kak “kapwungala” ekei seri “ni omw pahn lokaiaiongete.” Omw kaloke irail ekei pak pwehki arail sapeik mwein kak komourirailla. (Lepin Padahk 17:10; 23:13, 14; 29:19) Ahpw seri men anahne wehwehki ia kahrepen eh kalokolok. “Kamakam oh kapwungala seri mehkot mwahu.” (Lepin Padahk 29:15; Sohp 6:24) Ahpw dehr kaloke serio daulihala. Siohwa ketin mahsanihong sapwellime aramas akan: “Ni ei pahn kalokei kumwail, I uhdahn pahn wia ni me pwung.” (Seremaia 46:28b) Paipel uhdahn sohte pwungki ken lingeringer oh wokih de wia kamakam laud ong serio me pahn kak kahrehda en toaldi de ohla.—Lepin Padahk 16:32.

23. Dahme seri men anahne wehwehki ni ahnsou me e kalokolok?

²³ Ahnsou me Siohwa ketin padahkihong sapwellime aramas akan me e pahn ketin panawih irail, e ketin tepida ni eh mahsanih: “Kumwail dehr masepwehk . . . I pahn ketido rehmwail oh doareikumwailla.” (Seremaia 46:27, 28a) Pil duwehte, peneu en pahpa nohno me konehng ni wiepe sohte lipilipil en dehpa kahrehiong serio en pehm me ira sohte poakepoake. (Kolose 3:21) Ahpw serio anahne pehm me peneu kin wiawi pwehki eh pahpa de nohno uhdahn poakohng ih.

PERE NOUMW SERIO

24, 25. Kahpwal suwed dahieu me pahpa nohno kan anahne perehsang neirail seri kan?

²⁴ Aramas tohto kin tamanda me ahnsou me irail tikitik, e kin kaperen. Re kin tamanda pepehm en nsenamwahu pwehki re kamehlele me arail pahpa nohno pahn apwahpwalih irail ahnsou koaros. Pahpa nohno kan kin men neirail seri kan en ahneki soangen pepehm wet, ahpw pwehki sampah eh suwedla, e kin apwal en pere seri kan.

²⁵ Mehkot me inenen suwed me kin lalaudla nan ahnsou pwukat iei tiahk suwedih seri kan. Nan Malaysia, rongen seri me aramas tiahk suwedih kin pak pahieu laudla nan erein sounpar eisek. Nan Sehmen, mpen seri 300,000 me kin lelohng kahpwal wet nan ehuehu sounpar. A ehu wehi nan South Amerika, roporop ehu kasalehda me ehuehu pahr mpen seri 9,000,000 kin lelohng kahpwal wet! E kin kansensuwed pwehki pali laud en seri pwukat kin lelohng kahpwal wet nan imwarail sang rehn aramas me re ese oh likih. Ahpw pahpa nohno kan anahne nantihong pere neirail seri kan. Ia duwen arail kak wia met?

26. Ia ekei ahl me pahn pere seri kan ren dehr lelohng kahpwal, oh ia duwen loalokong eh kak pere seri men?

²⁶ Soahng kan me wiawiher kin kasalehda me aramas kalapw tiahk suwedih seri me sehse duwen tuhpenehn paliwar. Kahrehda mehn perepe me keieu mwahu iei en kasukuhlih seri men en wehwehkihla duwen met mehnda ma e pil tikitik. Loalokong kak pere ‘sang ih aramas akan me kin wiahda kahpwal sang ni arail koasoi.’ (Lepin Padahk 2:10-12) Soangen loalokong dahieu? Loalokong en kaweid en Paipel oh loalokong me pid tiahk pwung oh sapwung. Pil loalokong en ese me ekei aramas laud kin wia me suwed oh aramas pwulopwul men sohte anahne peikiong ma e nda ira en wia mehkot me sohte konehng. (Pil kilang Daniel 1:4, 8; 3:16-18.) E sohte itar en kasukuhlih ih pak ehute. Pali laud en seri pwulopwul kan anahne pwurepwurehng ale kasukuhl pwe ren kak tamataman mwahu. Ni ahnsou me seri kan ekis laudla, pahpa men anahne wehwehki me nah serepeino pahn kin men kelehpwla ekei ahnsou. Nohno men anahne wehwehki me nah pwutako pil anahne met. Met pahn sewese serio en wehwehki ahn aramas laud arail kin kasalehda wahu. Dahme pahn keieu pere serio sang soangen tiahk suwed wet iei ahn pahpa oh nohno ara pahn kin tetehk mwahu serio.

RAPAHKI SAPWELLIMEN KOHT KAWEID

27, 28. Ihs me pahn keieu sewese pahpa nohno ni ara pahn wia doadoahk apwal en kakairada seri men?

²⁷ Ni mehlel, kaiahne seri men sang ni eh pwelel kin apwal, ahpw pahpa nohno me pwoson sohte anahne kelehpw wia met. Ni mwehin sounkopwung kan, ni ohl emen me adaneki Manoha eh esehda me e pahn wiahla pahpa men, e peki kaweid sang rehn Siohwa ong eh pahn kakairada nah serio. Siohwa ketin sapengala eh kapakap ko.—Sounkopwung 13:8, 12, 24.

²⁸ Ni ahlohte, ni pahpa nohno me pwoson ara kin kakairada neira seri kan rahnpwukat, ira pil kak kapakapohng Siohwa. En wia pahpa de nohno kin doadoahk laud, ahpw ketingpara pahn laud. Pwopwoud Kristian ehu nan Hawaii koasoia: “Sounpar eisek riaute me ke ahneki pwehn kanekehla omw doadoahk mwohn ahnsou apwal ni seri ko ar pahn lel sounpar 13 kohda. Ahpw ma ke nantihong doadoahngki kaweid kan en Paipel, ke pahn ahneki peren oh popohl ni ahnsou me re medewehda ren papah Siohwa sang mohngiongirail.” (Lepin Padahk 23:15, 16) Ni ahnsou me noumw serio pahn wiahda pilipil wet, ke pahn pil iang nda: “Seri kan, iei kisakis ehu sang rehn KAUN-O; uhdahn kapai ehu sang reh.”

[Nting tikitik me kileldi pah]

IA DUWEN IRE MEHLEL EN PAIPEL PWUKAT EH KAK SEWESE . . . PAHPA NOHNO KAN REN KAIAHNE NEIRAIL SERI KAN?

Likih Siohwa.—Lepin Padahk 3:5.

Kapwaiada pwukoa.—1 Timoty 5:8.

Siohwa ketin wia Sahm limpoak men.—Lepin Padahk 8:22, 30.

Pahpa nohno kan kin pwukoahki padahkih neirail seri kan.—Deuderonomi 6:6, 7. 

Peneu kin anahn.—Episos 6:4.

[Koakon nan pali 70]

PENEU ME MWAHU

Ehu wiepen peneu me mwahu iei en mweidohng seri kan ren pehm kasuwedpen arail wiewia sapwung. (Kalesia 6:7; Eksodus 34:6, 7) Karasepe, ma noumw serio kasaminehla wasakis oh pein ih kamwakelehda wasao, e pahn uhdahn pehmada me dahme e wiahdao sohte mwahu. Ia duwen ma e wiahda mehkot me sohte mwahu ong emen? Omw padahkihong ih me e anahne peki mahk rehn aramaso pahn kapwungala eh madamadau. Pil ehu wiepen peneu iei en irehsang ih soahng kei erein ahnsou kis pwe met en kahrehiong serio en wehwehkihla kaweido. Ni ahl wet, serio pahn sukuhlkihdi kamwahupen peikiong kaweid pwung kan.

[Kilel nan pali 65]

Pahpa nohno, kumwa en wia mehn kahlemeng, werekiong, koasoakoasoiong serio oh wia eh sounpadahk