Pwuhk Sarawi Kak Sewesei Iuk Kaweid Noumw Seri kan?
OCHID wia wahn rohs lingan ieu, ahpw e apwal en apwalihada. Ma ke pahn apwaliahda mwahu, ke pahn anahne kolokoliong uwen karakar ieu, uwen marain ieu oh pil uwen pekid me e pahn mih loale pil kesempwal. Wahn rohs orchid kin inenen litikitikiong mehnia soangen pwehl oh uwen koiasi me pahn kohieng oh soumwahu en tuhke oh pil mahn tikitik kan kin kauwehla. E kin kalap sohte pweida ni aramas ah pahn tepin apwalih wahn rohs orchid.
Apwaliahda seri kan inenen apwal sang apwalih wahn rohs orchid, oh kin anahne petehk keneinei. Kahrehda e kin kalap wiawi me pahpa oh nohno kan kin ahneki pepehm en soh itar ni ahnsou me ira kin apwahpwalih seri men. Me tohto irail kin anahne sawas, duwehte aramas en apwalih me semen. E sansalamwahu me pahpa oh nohno koaros kin men alehdi mehn kaweid me keieu mwahu. Iawasa soangen kaweid wet kak dierek ie?
Mendahki Pwuhk Sarawi a sohte wia pwuhk ehu ong duwen kakairada seri, Sounkapikpatail pil ketin kaweidki aramas akan me ntingihada Pwuhk Sarawi en pil kihda kaweidpen kakairada seri loale, ni ahl en kaweid konehng. Pwuhk Sarawi koasoia kesempwalpen kakairada irair kaselel akan me aramas tohto pepehm me kitail kin pak tohto sohte wia. (Episos 4:22-24) Ni irair wet, iren Pwuhk Sarawi kan ketikihong kitail dahme keieu kesempwal duwen kasukuhl me keieu toupahrek. Soangen kaweid wet kin wahdo kamwahu ong aramas tohto me kin kapwaiada audepe, e sohte lipilipil mehnia dihn aramas me re iang koukousoan loale, de pil mehnia keinek me re kohsang ie. Kahrehda, kapwaiada kaweid en Pwuhk Sarawi kak sewese iuk en pweida nan ahmw kaweid noumw seri kan.
Kahlemeng en Pahpa oh Nohno—Iei Elen Kasukuhl Keieu Mwahu
“Ke kin padahkih meteikan—a dahme ke sohte pil padahkihki pein kowe? Ke kin nda, “Dehr pirap”—a ia duwe, ke kin pirap? Ke pil kin nda, “Dehr kamwahl”—a ia duwe, ke kin kamwahl?”—Rom 2:21, 22, New World Translation.
Chairman en Board en Education nan Seoul koasoia: “Mehn kahlemeng ni lokaia oh wiewia iei mehn kasukuhl ong seri men me keieu mwahu.” Ma pahpa oh nohno sohte pahn wia mehn kahlemeng mwahu ni ara lokaia oh wiewia oh sohte kihda kaweid sansal mwahu, serio pahn mwadangete medemedewe me ira wia aramas mwalaun. Ahn pahpa oh nohno lokaia kan pahn sohla manaman. Karasepe, ma pahpa oh nohno me padahkihong neira seri men duwen lokaia mehlel, pein ira en lokaia mehlel. E kin kalap wiawi rehn ekei pahpa oh nohno, ma ira sohte men aramas en telephone ong ira, ira kin ndaiong neirail seri kan en sapeng telephone oh nda, “Pwuriamweikihla, ai pahpa (de nohno) sohte mie.” Serio me ale soangen kaweid wet pahn ahneki pepehm en namenek oh sohla kak ese dahme mehlel. Mwuri, e pahn tepida likamw, oh sohlahr ahneki pepehm me met mehkot sapwung, ma e pahn mih nan irair ehu me apwal. Kahrehda, ma pahpa oh nohno kan uhdahn men neirail seri kan en kin wia aramas mehlel, pein irail uhdahn pahn lokaia mehlel oh arail wiewia en pahrekiong dahme re kin nda.
Ke kin men kaiahnehda noumw seri men en tiahk mwahu? Eri, ke uhdahn pahn kasalehda mehn kahlemeng mwahu. Noumw serio pahn mwadangete alasang uhk. Sung-sik, wia pahpa men me naineki seri pahmen, oh e nda: “Ngehi oh ai pwoud piladahr sen dehr kin nda lokaia kansensuwed. Se kin kasalehda wauneki emenemen oh sohte kin lipwoar mendahte ma se lingeringer. Wia mehn kahlemeng mwahu mwahusang lokaia. Se inenen kapingki me nait seri kan kin ese wauneki aramas oh karakarahk ni arail kin koasoai ong mehteikan.” Pwuhk Sarawi mahsanih nan pwuhken Kalesia 6:7: “Dahme aramas emen kin kamwakamwere, met ihme e pahn dolung.” Pahpa oh nohno kan me men neirail seri kan en tiahk mwahu pein irail en tapiada oh wiahda kasalepen mour mwahu kan.
Kolokol Elen Koasoakoasoipene en Langalang Nanpwungen Kumwa oh Noumwa Seri kan
“Padahkiong noumwail seri kan. Katamankin irail ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.”—Deuderonomi 6:7.
Madamadau en wiahda overtime nan wasahn doadoahk mehkot me wia lalaudla. Ahnsou me ohl pwopwoud oh lih pwopwoud ira koaros kin doadoahk en mwohni, e kin wiaiong mehkot laud nan mour en seri kan. Ahnsou kan me pahpa oh nohno tohto kin kihong neirail seri kan kin tikitikla. Ni ara kin lel ni imwara, ira kin kalap wia doadoahk en nan ihmw oh pil doadoahk teikan oh kin pwangada. Nan soangen irair wet, iaduwen omw pahn kak koasoakoasoiong noumw seri kan? Mwein ele ahnsou mwahu en koasoakoasoi kak pwarada ma kumwa oh noumwa seri kan pahn wiahpene doadoahk kan en nan ihmw. Emen tapwin peneinei kin pil kihsang TV nan imwarail, pwe ih oh ah peneinei tikitik en kak kalaudehla ahnsou en arail koasoipene. E diarada me: “Nin tapio seri kan sangatki arail sohte TV, a I kin iang irail wia mwadong me ede puzzle oh kin koasoiapene pwuhken me audepe kaperen, irail eri mwuri pwungki me wekidekla wet inenen mwahu.”
E kesempwal seri kan, sangete ni arail tikitik, en kaiahniong koasoakoasoiong arail pahpa oh nohno kan. Pwe ma soh, ahnsou me seri kan pahn laudla oh wiahla peinakapw oh mwahnakapw oh tepida loiong kahpwal akan irail sohte pahn medewehda wiahki pahpa oh nohno en wia kompoakpahrail me re kak koasoaiong. Eri, iaduwen amwa pahn kak sewese irail en riting iong kumwa loalarail kan? Lepin Padahk 20:5 mahsanih: “Madamadau en aramas kin rasehng pihl me mih nan pwarer loal, ahpw mehmen me ahneki erpit kak idipasang.” Ni atail pahn kin doadoahngki peidek kan me pahn kahrehiong aramas emen en kak koasoia duwen ah pepehm akan, me duwehte “Ia ahmw pepehm?” met pahpa oh nohno kak sewese neirail seri kan en kin saledek en koasoiahda arail madamadau oh pepehm akan.
Dahme ke pahn wia ma noumw seri men wiahda sapwung laud ehu? Iei ahnsou me e anahne wiewia kadek. Kanengamahiong ahmw pepehm ni omw pahn rong dahme noumw serio pahn nda. Pahpa men koasoia met duwen dahme kin wia nan soangen irair wet: “Nin doken seri kan arail kin wiahda sapwung, I kin nantihong ien dehr kasalehda lingeringer. I kin mwohndi oh rong dahme re pahn nda. I kin song wehwehkihla irairo. Ni ai kin diar me e apwal en ireire ai lingeringer, I kin awih ekis oh kameleilei ai madamadau.” Ma ke pahn kolokol ahmw pepehm akan oh rong kanahieng, kaweid me ke pahn kihong serio pahn mengei en alehda.
Kaweid Me Kin Poasoankihda Limpoak Wia Mehkot Kesempwal
“Kumwail sahm oh ihn kan, kumwail dehr kamwakara mwahl noumwail seri kan, ahpw kekeirailda ni kaiahn oh madamadau en Siohwa.”—Episos 6:4.
Pwe ahmw kaweid en pweida mwahu, kihda kaweid limpoak wia mehkot kesempwal. Iaduwen pahpa oh nohno kan arail kak ‘kamwakara mwahl neirail seri kan’? Ma kaweido sohte kin pahrekiong toutou en sapwungo de ma e kin wiawi ni elen lemei, serio pahn uhwong. Ahnsou koaros kaweid en kohda ni elen limpoak. (Lepin Padahk 13:24) Ma ke pahn kihda kaweid ni ahmw kawehwe mwahu ong noumw seri kan, irail pahn pehmada me ahmw kaweid ong irail kin wiawi ni limpoak.—Lepin Padahk 22:15; 29:19.
Ahpw weksang met, e mwahu ohng seri kan en loiong pepehm kansensuwed akan me kohsang arail wia tiahk suwed ehu. Karasepe, ma seri men wiahda mehkot suwed ong emen aramas, ke kak ndingki ih en peki mahk. Ahnsou me e kawehla kosonned en peneinei, kihong kalokepe en dehr iang wia soahng kei me kaperen ong ih, pwe en kak kasalehiong ih kesempwal en kapwaiada kaweid de kosonned.
E mwahu en kihda kaweid ni ahnsou me konehng. Eklesiasdes 8:11 kasalehda: “Dahme aramas kan kin mengeiki wiahda sapwung laud? Pwehki ar sohte kin mwadangete ale kalokepe.” Ihme kahrehda, seri tohto kin men song en diarada kilang ma re soh pahn pitsang ale kalokepen sapwung ieu me re wiahda. Kahrehda ma ke ndaiong seri men me e pahn kalokolok ma e wiahda sapwung ieu, kilang pwe dahme ke nda dehr sapwungala.
Mehn Kamweit Mwahu Wia Mehkot Kesempwal
“Mie . . . ahnsoun peren . . . oh ahnsoun kahlek.”—Eklesiasdes 3:1, 4.
Ahnsou en mwemweit oh ahnsou ong mwadong me konehng kan oh dehr dauliala wia mehkot kesempwal ong kekeirda ni madamadau oh paliwar en seri men. Ni ahnsou me pahpa oh nohno kin iang irail mwadong, kolokolpenehn peneinei kin teng oh seri kan kin ahneki koapworopwor. Soangen mwomwen mwadong dah me tohn peneinei kak perenki wiapene? Ma ke pahn song medewe, ke pahn kak diarada soahng kaperen tohto me kumwail kak wiapene. Mie mwadong en likin ihmw tohto, me duwehte dak pwaisikel, mwadongki mpwei duwehte tennis oh volleyball. Medewehla ia pahn uwen kaperen ma peneinei ehupene kesengki soangsoangen mehn keseng kan. Soahng tohto kitail kak kin katakataman ni atail kin kohla kilikilang seli nan wahl akan.
Ni soangen irair pwukat, pahpa oh nohno kak padahkiong neirail seri kan madamadau toupahrek duwen mwadong. Ohl Kristian emen me mie nah seri pwutak silimen koasoia: “I kin iang nei seri ko mwadong ahnsou kan me I diar ahnsou me kak. Karasepe, ma re pahn mwadong nan computer I kin idek ia mwomwen mwadongo. Ni arail kin perenda oh kawehwe, I kin doadoahngki ahnsou mwahu wet oh koasoaiong irail oh kawehwe duwen mwadong me sohte katepe oh suwed. I kin kilangada me irail kin sohla wia mwadong kan me sohte konehng.” Ehi, seri kan me kin perenki iang peneinei mwadong kin kalap sohte kilang prokram en TV kan, kasdo kan oh mwadong kan nan internet me kin pid pei, tiahk samin nanpwungen ohl oh lih oh me kin pid ale wini en kasahliel kan.
Sewese Noumw Seri Kan Wia Kompoakepah Mwahu
“Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.”—Lepin Padahk 13:20.
Pahpa Kristian emen me pweida mwahu ni ah apwaliada nah seri pahmen nda: “Kesempwal ihs me irail kin pilada en wia kompoakpahrail. Emente kompoakepah suwed kak kauwehla doadoahk en nanti koaros me ke kin wiewia.” Pwehn sewese seri kan diar kompoakpahrail mwahu, ohlo ni elen loalokong idek soangen peidek me duwehte: Ihs kompoakepahmw me keieu karanih iuk? Dahme ke poakpoakehki ih? Iaduwen aramaso ke men alasang ih? Emen pahpa tohrohr koasonehdi nah seri kan en lukehda ni imwarailo kompoakpahrail akan. Ih eri kak kilang oh mwuri kihda ong seri kan kaweid me konehng.
E pil kesempwal en padahkihong seri kan me irail kak wiahki kompoakepahrail aramas mah kan oh pil irail akan me arail dih. Bum-sun, me nah pwutak silimen, nda: “I sewese nei seri kan en wehwehki me kompoakeparail kan sohte anahnehte irail en soangen sounpar duwehte irail, me duwehte Depit oh Sonadan nan Pwuhk Sarawi. Ni mehlel, I kin kasamwo Kristian akan me soangesoangen sounpar ren kohdo oh werekiong nei seri kan. Imwilahn met, seri kan kin kalap werekih aramas akan me kaidehn arail dih.” Patehng aramas akan me mah kin kihong seri kan ahnsou mwahu en sukuhlkihsang irail soahng tohto.
Ke Kak Pweida Mwahu Ni Ahmw Kaiahnehda Seri Men
Nin duwen roporop ieu me wiawihier nan United States, pahpa oh nohno tohto me kin song en kaiahnehda nan loalen neirail seri kan, kanengamah, ese katonohng oh mour mehlel sohte kin pweida arail doadoahk. Dahme kahrehda e nohn apwaliki? Nohno men me sapeng peidek kan koasoia: ‘Me kapahtou pwehki ieite elen pere neitail seri kan iei en loahkeirailedi nan ehu perehn oh dehr mweidohng irail en kohla wasa teikan nan sampah.’ E kin koasoakoasoia me soahng kan me pidakih kitailpene, wasa me seri kan kekeirda loale, kin suwedsang mahs. Ni irair wet, atail kin kakairada seri kan kak pweida?
Ma ke men padok orchid ahpw ni ahnsowohte perki pwe mengila, ke pahn kahngala wia. Ma aramas semen men ohng apwali orchid kohdo oh kihong uhk kaweid mwahu, oh ih eri likihkin uhk nda, “E pahn pweida ma ke wia met,” ia uwen nsenamwahu me ke pahn wia! Siohwa, me Keieu Lapalap oh Semen mour en aramas, kin kihda kaweid ong wiepe me keieu mwahu ong kakairada seri kan. E mahsanih: “Sukuhlikiada pwutak emen nin duwen ahl ong ih, oh lel ni ah mahla e sohte pahn manokehla.” (Lepin Padahk 22:6, NW) Ni omw pahn kin kakairada noumw seri kan nin duwen kaweid en Pwuhk Sarawi, ke pahn kak perenki kilang noumw seri kan ahr pahn laudla oh wia aramas koahiek kei, ese lamalam ong aramas teikan, oh ese kilangada duwen mour mwakelekel. Mwuri aramas akan poakpoake irail ahpw laudsang koaros Samatail nanleng Siohwa pahn limpoak ong kitail.