Pahpa oh Nohno kan—Kaiahnehda Noumwa Seri kan ni Elen Limpoak
“Amwail doadoahk koaros en kin wiawi ni limpoak.” —1 KORINT 16:14.
1. Soangen pepehm dah kan me irail pahpa oh nohno kan kin pehm ni ahnsou me seri men kin ipwidi?
PAHPA oh nohno tohto pahn pwungki me ni ahnsou me seri men kin ipwidi, met wia ehu ahnsou me keieu en kaperen nan arail mour. Emen nohno me adaneki Aleah nda: “Ni ahnsou me I kilang nei seri pwelelo, I perenda. I medewe me ih me keieu en masamwahu nan seri kan.” Soangen ahnsou kaperen wet kak pil wia ahnsou kapwunod ehu ong pahpa oh nohno kan. En Aleah pwoudo nda: “Dahme I kin madamadau laudiki iei ma I pahn kak kaunopada nei serepeino mwahu ong soangen apwal akan me kin pwarada nan mour.” Pahpa oh nohno tohto kin ahneki soangen iren kapwunod pwukat oh re kin diarada me irail anahne kaiahnehda neirail seri kan ni elen limpoak. Ahpw, pahpa oh nohno Kristian tohto me kin men peneu neirail seri kan ni limpoak kin lelohng kahpwal kan. Ia ekei kahpwal pwukat?
2. Soangen apwal dah kan me pahpa oh nohno tohto kin lelohng?
2 Kitail momour ni imwin rahn akan en koasoandi suwed wet. Nin duwen me sansaldahr nan kokohp kan, sampah pahn direkihla aramas kan me sohte kin kasalehda limpoak. Pil nanpwungen peneinei kan, irail kin “sempoak” oh irail sohte kin ‘kasapahlkalahnganki mehkot, sohte kin poadidi, . . . pehmara, lemei.’ (2 Timoty 3:1-5) Ma peneinei Kristian akan kin kalapw patehng soangen aramas pwukat, e pahn pil kamwakid mwomwen arail kin ehupene nanpwungarail. Patehng met, pahpa oh nohno kan kin peiong pein arail luwet en soh kanengamah me irail sohsohki me kin kahrehiong irail en nda lokaia lemei kan me irail sohte uhdahn men nda, de kin wiahda tenek sapahrek kan ni ahl teikan.—Rom 3:23; Seims 3:2, 8, 9.
3. Iaduwen pahpa oh nohno kan kak en apwalihada seri kan me kin peren?
3 Mendahki soangen apwal pwukat, pahpa oh nohno kak kakairada neirail seri kan en wia seri peren kei me kin ahneki nanpwungmwahu rehn Koht. Iaduwe? Ni arail pahn idawehn kaweid wet me ntingdi nan Paipel: “Amwail doadoahk koaros en kin wiawi ni limpoak.” (1 Korint 16:14) Ei, limpoak iei ih me kin “kapatapene oh oarepene mehkoaros pwe en wiahla ehu ni mehlel.” (Kolose 3:14) Kitail tehkpene soahng siluh duwen limpoak me wahnpoaron Pohl kasalehda nan nah kisinlikou keieu ong irail mehn Korint kan oh koasoiapene ekei ahl akan me pahpa oh nohno kan kak doadoahngki ni arail kin kaiahnehda neirail seri kan ni limpoak.—1 Korint 13:4-8.
Anahnepen Kanengamah
4. Dahme kahrehda pahpa oh nohno kan anahne kanengamah?
4 Pohl ntingihdi: “Limpoak me kanengamah.” (1 Korint 13:4) Dahme kahrehda pahpa oh nohno kan anahne kanengamah? Ele pahpa oh nohno kan kak medewehda kahrepe tohto kei. Ahpw kitail tehk ekeite kahrepe kan. Seri kan sohte kin kalapw peki mehkot me irail mwahuki pak ehute. Mehnda ma pahpa oh nohno kan kin ndaier soh ni kehlail, ahpw serio mwein pahn pil pwurepwurehng peki pwe pahpa oh nohno en kak wekidala ara pasapeng. Irail me pwulopwul kan mwein kin kihda soangen kahrepe tohto pwehn kasalehda kahrepen arail men wia mehkot me pahpa oh nohno kan wehwehkier me e pweipwei en wia. (Lepin Padahk 22:15) Oh seri kan duwehte kitail koaros me kin kalapw wiahda sapwung ehu tohtohsang pak ehu.—Melkahka 130:3.
5. Dahme kak sewese pahpa oh nohno kan en kak kanengamah?
5 Dahme kak sewese pahpa oh nohno kan en kin kanengamahiong neirail seri kan? Nanmwarki Solomon ntingihdi: “Ma ke me loalokong, ke pahn kak kanengamahiong omw lingeringer.” (Lepin Padahk 19:11) Pahpa oh nohno kan kak song en wehwehki mwomwen tiahk en neirail seri kan ni arail pahn tamanda me pil pein irail mahs ar ‘lokaia kan, lamalam kan, pepehm kan, duwehte en seri.’ (1 Korint 13:11) Pahpa oh nohno kan, kumwail kin tamanda ahnsou me kumwail kin sakone amwail pahpa oh nohno pwe ira en kihong kumwail dahme kumwail mwahuki? Ni ahnsou me ke pwulopwul, ke kin medewe me ahmw pahpa oh nohno sohte kak wehwehkin uhk? Ma iei, ke pahn wehwehki tiahk en noumw seri kan oh dahme kahrehda ke anahne ken ahnsou koaros katamanehng irail ahmw koasoandi kan. (Kolose 4:6) E katapan en tehk mahsen en Siohwa ong pahpa oh nohno kan nan Israel duwen irail en kin “padahkihong” neirail seri kan duwen sapwellime kosonned kan. (Deuderonomi 6:6, 7) Lepin lokaia “padahkihong” ni lokaiahn Ipru kin wehwehki “en kapwukapwurehiong,” “en kin pwurepwurehng ndinda,” “en kamwakid.” Met wehwehki me pahpa oh nohno kan anahne en kapwukapwurehiong dahme ira kin ndaiong seri kan pak tohto pwe serio en kak mwuhr esehla kapwaiada kosonned en Koht. Iren kaweid en mour teikan pil anahne en kin kapwukapwurehiong.
6. Dahme kahrehda pahpa de nohno kanengamah men sohte kin nohn mweidala nsenen seri kan?
6 Ahpw pahpa de nohno kanengamah men sohte kin nohn mweidala nsenen serio. Koht mahsanih: “Ma seri men pahn mweimweiong pein nsene, e pahn kanamenekihala ine.” Ahpw en kauhdi soahng wet en dehr wiawi, lepin padahko pil doula mahsanih: “Kamakam oh kapwungala seri mehkot mwahu.” (Lepin Padahk 29:15) Ekei pak, seri kan kin pehm me sohte ahn pahpa oh nohno pwung en kapwungala irail. Ahpw ahn peneinei Kristian ehu koasoandi kan sohte pahn wia mwomwen koasoandi en democracy, me ahn pahpa oh nohno pwung en wiahda kosonned kan pahn kak pweida ihte ma seri ko kin pwungki. Siohwa, me wia Tapwin peneinei keieun lapalap, ketikihong pahpa oh nohno kan manaman en kasukuhlih oh panawih neira seri kan ni elen limpoak. (1 Korint 11:3; Episos 3:15; 6:1-4) Ni mehlel, peneu kin wia ehu elen limpoak me Pohl kin kasalehda.
Iaduwen Ahmw Pahn Kin Kihda Peneu ni Limpoak
7. Dahme kahrehda irail pahpa oh nohno kadek kan kin panawih neirail seri kan oh dahme kin iang pidada soangen peneu wet?
7 Pohl ntingihdi me “limpoak me . . . kadek.” (1 Korint 13:4) Pahpa oh nohno kan me uhdahn kin kadek kin panawih neirail seri kan ni ahl ehu me sohte kohwei kohdo. Ni arail kin wia met, irail kin kahlemengih Siohwa. Pohl ntingihdi: “Kaun-o kin ketin kapwungala me e kin ketin loalloale.” Menlau tehk me wehwehn en panawih wasaht sohte kin ahnsou koaros wehwehki en kaloke. E kin wehwehki en kasukuhlih oh padahkihong. Ia kahrepen en panawih? Pohl mahsanih met: “Kalokolok kin kahrehda popohl oh mour pwung ong irail kan me kin ale.” (Ipru 12:6, 11) Ni ahnsou me pahpa oh nohno kan kin ni elen kadek kasukuhlih neirail seri kan ni ahl me pahrekiong kupwuren Koht, irail kin kihong seri kan ahnsou mwahu en wiahla aramas popohl kei. Ma seri kan pahn mweidala ‘KAUN-O en kapwungirailla,’ irail pahn ale erpit, loalokong oh dehdehkihla—mepwukat kesempwalsang silper de kohl.—Lepin Padahk 3:11-18.
8. Dahme kin kalapw imwikihla ni ahn pahpa oh nohno kan sohte kin panawih neirail seri kan?
8 E sohte wia elen kadek ma pahpa oh nohno kan sohte kin panawih neirail seri kan. Siohwa kamwakid Solomon en ntingihdi: “Ma ke sohte pahn kaloke noumw seri, eri, ke sohte poakepoake. Ma ke poakepoake, ke pahn kapwungala.” (Lepin Padahk 13:24) Seri kan me kin tikida oh sohte ale peneu kin kalapw roporop ong pein irail oh re sohte kin peren. Weksang met, seri kan me arail pahpa oh nohno kin poakepoake irail oh kin kihong irail kosonned kan kin kalapw pweida nan sukuhl, ese ehuong meteikan oh kin mour peren. Eri, pahpa oh nohno kan me kin panawih neirail seri kan kin kasalehda kadek ong irail.
9. Dahme pahpa oh nohno Kristian kan anahne padahkihong neirail seri kan, oh dahme seri kan anahne wehwehki duwen koasoandi kesempwal kan?
9 Dahme kin pidada mwomwen ahmw pahn kin panawih seri kan ni elen kadek oh limpoak? Pahpa oh nohno kan anahne en kawehwehiong neirail seri kan ni sansal dahme irail anahne en wia. Karasepe ehu, sangete ni ahn seri kan tikitik, pahpa oh nohno Kristian kan kin padahkihong irail soangen padahk mengei kan nan Paipel oh pil irail anahne en iang kapwaiada mehkan me pidada kaudok mehlel. (Eksodus 20:12-17; Madiu 22:37-40; 28:19; Ipru 10:24, 25) Seri kan anahne en ese me irail anahne en uhdahn kapwaiada koasoandi kesempwal pwukat.
10, 11. Dahme kak kahrehiong pahpa oh nohno kan en pil medemedewe duwen dahme seri kan mwahuki ni ahnsou me irail kin wiahda kosonned kan nan arail peneinei?
10 Ekei pak, pahpa oh nohno kan kak mweidohng seri kan en iang wiahda ekei koasoandi kan nan imwarail. Ma me pwulopwul kan kin iang kihda ar ire kan ni ahnsou me peneinei kin koasoiapene duwen koasoandi kan en nan imwarail, ele e pahn mengeiong irail en kapwaiada. Karasepe, ma pahpa oh nohno koasoanehdi ira en kihong neira seri kan kuloak ehu me irail anahne en lel imwarail, ah ira kak pein pilada kuloak me konehng seri kan en mihmi nan imwarail. De, ira kak mweidohng seri ko en pilada kuloak depe me mwahu oh kawehwehda ia kahrepen arail pilada kuloako. Mwuri, pahpa oh nohno kak kihda kuloak depe ira pwungki oh dahme kahrehda met konehng. Ma pilipil kan wekpeseng, eri dahme pahn konehng wiawi? Nan ekei irair kan, pahpa oh nohno mwein kak koasoanehdi en kihong dahme serio mwahuki ma e sohte pahn uhwongada kosonned kan en Paipel. Iaduwen, met kin wehwehki me pahpa oh nohno kin kihdi ara manaman en kaunda?
11 En sapengla peidek wet, tehk mwomwen ahn Siohwa kin ni limpoak doadoahngki sapwellime manaman ni eh kin apwalihala Lohd oh eh peneinei. Mwurin ara kahrehla Lohd, eh pwoud, oh nah serepein ko sang nan Sodom, tohnleng ko ndaiong irail: “Tenge nahna kan, pwe ke de pil iang kamakamala.” Ahpw, Lohd ahpw sapeng: “Soh, maing! Kaidehkin men me pahn wiawi.” Lohd eri doula peki ehu ahl: “Komw mahsanih kisin kahnimwen? I kak lellahng mwo pwe me keren. Komw mweidohng ie I en patolahng mwo-wasa tikitk kis.” Iaduwen Koht sapeng met? E mahsanih: “Eri, me mwahu!” (Senesis 19:17-22) Eri iaduwen, Siohwa kihdi eh manaman en kaunda? Uhdahn Soh! Ahpw, e medemedewe duwen ahn Lohd pekipeko oh pilada en kalaudehla eh kadek ong Lohd ni irair wet. Ma kowe pahpa de nohno men, mie ahnsou me ke kin kak medemedewe mahs duwen dahme noumw seri kan mwahuki mwohn ahmw pahn kin wiahda kosonned kan en peneinei?
12. Dahme kak sewese seri kan en pehm me mie pereparail?
12 Ei, seri kan anahne ese me kaidehn ihte kosonned kan ahpw pil kalokolok kan me irail pahn ale ma irail sohte kapwaiada. Ahnsou me pahpa oh nohno pahn padahkihong seri ko duwen kalokolok pwukat oh irail wehwehkier, ira anahne en doadoahngki kosonned ko. Pahpa oh nohno sohte kin kasalehda kadek ni ara kin ahnsou koaros katamankihong seri kan duwen kalokolok kan me irail pahn ale ma irail sohte pahn kapwaiada kosonned kan, ah ira ahpw sohte kin idawehn koasoandi en kalokolok kan. Paipel mahsanih: “Dahme aramas kan kin mengeiki wiahda sapwung laud? Pwehki ar sohte kin mwadangete ale kalokepe.” (Eklesiasdes 8:11) Mehlel me ele pahpa de nohno men sohte kin keme kaloke nah seri men wasa me aramas akan kin mihmihseli ie de limwahn kompoakepahn serio pwe serio dehr sarohdi. Ahpw, seri kan kin ahneki pepehm en me mie pereparail oh kin kakairada wahu oh limpoak ong arail pahpa oh nohno ni arail kin wehwehki me ahn arail pahpa oh nohno “Ei” wehwehki ei oh ara “Soh” wehwehki soh—mehnda ma met pil kin iangahki kalokolok.—Madiu 5:37.
13, 14. Iaduwen pahpa oh nohno kan kin alasang Siohwa ni arail kin kaiahnehda neirail seri kan?
13 Pwe en wia elen kadek, mwomwen kalokoloko en wiawi ni ahl ehu me serio pahn kakohng. Emen nohno me adaneki Pam nda: “Ahn nait seri riemeno anahn en peneu kin wekpeseng. Dahme kin doadoahk ong emen sohte kin doadoahk ong meteio.” Eh pwoud Larry kawehwehda: “Nait serepein laudo kin pali kehlail oh kin ihte rong peneu me kehlail kan. Ahpw nait serepein tikitiko kin rong kiht ma se lokaia kehlail de pil itarte ma se kin kasalehdahte at sohte pwungki sang ni mwomwen pohn masat kan.” Ei, pahpa oh nohno kadek kan kin song uwen arail kak en diarada soangen peneu dah me kin keieu en doadoahk ong emenemen neirail seri kan.
14 Siohwa kin ketikihda mehn karasepe mwahu ong pahpa oh nohno kan pwehki eh kin mwahngih duwen kehl oh pil luwet kan en emenemen sapwellime ladu kan. (Ipru 4:13) Patehng met, ni ahnsou me Siohwa kin ketikihda kalokolok kan, e sohte kin nohn limeidihd de pil nohn mweidala aramas en saledek daulihala. Ahpw, e kin ahnsou koaros panawih sapwellime aramas kan “ni pwung.” (Seremaia 30:11) Pahpa oh nohno kan, kumwail ese ia en noumwail seri kan kehl oh luwet kan? Kumwail pahn kak doadoahngki met ni ahl me pwung oh kadek ni amwail pahn kin kasukuhlih irail? Ma ei, kumwail kin kasalehda me kumwail kin poakohng noumwail seri kan.
Sewese Seri kan en Kin Lokaia Mehlel ong Uhk
15, 16. Iaduwen pahpa oh nohno kan kak kangoange neirail seri kan en kin lokaia mehlel, oh elen peneu dah me pahpa oh nohno Kristian kan diarada me konehng?
15 Pil ehu kasalepen limpoak iei “sohte kin perenkihda me sapwung, pwe me mehlelete me e kin perenki.” (1 Korint 13:6) Iaduwen pahpa oh nohno kak kaiahnehda neira seri kan en limpoakohng dahme pwung oh mehlel? Ehu me re anahne wia iei en kangoange neira seri kan en kin kasalehda arail pepehm ni mehlel, mehnda ma dahme seri kan pahn nda kin apwal ong pahpa oh nohno en pwungki. Ei mehlel, pahpa oh nohno kin peren ni ahnsou me neira seri kan kin kasalehda arail pepehm kan me pwungiong dahme pwung. Ahpw ekei pak, pasapeng me seri men kin kapwarehda sang nan eh mohngiong kin kasalehda soangen madamadau oh pepehm kan me sohte mwahu. (Senesis 8:21) Iaduwen pahpa oh nohno pahn kin mwekidki met? Mwein ele dahme ira pahn tepin medewehda iei en kapwungala ni ahnsowohte soangen madamadau pwukat. Ma pahpa oh nohno kin mwekid ni soangen ahl wet, seri kan pahn uhd kin men koasoiahte dahme ira men rong. Mehlel me lokaia me sohte kasalehda wahu kan anahne en kapwungpwungla ni ahnsowohte, ahpw mie wekpeseng en padahkihong seri kan iaduwen arail pahn lokaia ni wahu oh dahme irail pahn nda.
16 Iaduwen pahpa oh nohno kan kak kangoange seri kan en lokaia mehlel? Aleha, me koasoiepe sansaldahr mwowe, nda, “Se kin wiahda en mengei ong koaros en kak saledek en koasoi ni at kin song en dehr nohn mwekid de lokaia daulihala ni ahnsou me nait seri kan kin ndaiong kiht mehkan me pahn kansensuwed ong kiht.” Pahpa men me ede Tom, nda: “Se kin kangoange nait serepeino en kin kasalehda eh madamadau ong kiht, itarete ma e sohte kin pwungki dahme se kin medewe. Se pehm ma se pahn kin ahnsou koaros kauhdi ih ni ahnsou me e kin koasoi oh itonehng ih dahme se mwahuki, e pahn nsensuwedla oh sohte pahn ndaiong kiht dahme uhdahn mihmi nan eh mohngiong. Ni pali teio, rongorong ih kin kangoange en pil kin rong kiht.” Mehlel, seri kan anahne peikiong arail pahpa oh nohno kan. (Lepin Padahk 6:20) Ahpw saledek en koasoi kin kihong pahpa oh nohno ahnsou mwahu en kin sewese neira seri kan en kakairada koahiek en madamadau. Vincent, pahpa men me nah seri pahmen, nda: “Pak tohto se kin koasoia duwen kamwahu oh kasuwedpen irair ehu pwe nait seri kan en kak pein kilang dahme keieu en konehng. Met kin sewese irail en kakoahiekihala arail madamadau.”—Lepin Padahk 1:1-4.
17. Dahme pahpa oh nohno kan kak kamehlele?
17 Mehlel, sohte pahpa de nohno men pahn kak en doadoahngki ni unsek kaweid en Paipel kan me pid kakairada seri kan. Mendahki met, ke kak kamehlele me noumw seri kan pahn uhdahn kalahnganki ahmw kin song en kakairada irail ni elen kanengamah, kadek oh limpoak. Siohwa pahn uhdahn kapaia uwen ahmw song en wia met. (Lepin Padahk 3:33) Kahrepen met iei pwehki pahpa oh nohno Kristian koaros mwahuki neirail seri kan en esehla poakohng Siohwa duwehte pein irail kin poakohng Siohwa. Iaduwen pahpa oh nohno kan kak lel mehn akadei mwahu wet? Artikel en mwuri pahn kasalehda iaduwe.
Ke Tamataman?
• Iaduwen madamadau pwung kin sewese pahpa oh nohno men en kin kanengamah?
• Iaduwen kadek oh panawih kin doadoahkpene?
• Dahme kahrehda en lokaia mehlel kin kesempwal nanpwungen pahpa, nohno oh seri kan?
[Kawehwehpen kilel kan nan ehu ehu pali 5]
Pahpa oh nohno kan, kumwail kak tamanda ni ahnsou me kumwail wia seri kei?
[Kawehwehpen kilel kan nan ehu ehu pali 6]
Ke kin kangoange noumw seri kan en kin lokaia mehlel ong uhk?