Irelaud Waluh

Perehsang Omw Peneinei Soahng kan me Kak Kauweirailla

1-3. (a) Ia wasa me soahng kan me kin kauwehla peneinei kin kohsang ie? (b) Dahme pahpa nohno anahne wia pwe ira en pere ara peneinei?

NOUMW pwutako pahn kohla sukuhl, ahpw e keteu mosul. Dahme ke pahn wia? Ke pahn mweidohng en tangala pahn keteu ni eh sohte mehkot pwaindi? De ke pahn pwainkihdi likou tohto me pahn kahrehda e sohte kak mwekid? Ke sohte pahn wia soahng pwukat. Ke pahn kihongete ih dahme e anahne pwe en dehr wisekesekla.

² Pil ni ahlohte, pahpa nohno kan anahne ese wiepen arail pahn pere arail peneinei ni toupahrek sang soahng kan me kak kauweirailla me rasehng keteu. Soahng pwukat kin kohsang palien kamweit, palien nuhs de redio, sang pelierail kan oh ekei pak sang sukuhl. Ekei pahpa nohno sohte kin wia mehkot pwe ren pere arail peneinei. A ekei kin wiahki me soahng koaros likin arail peneinei keper. Ihme kahrehda re kin kalikasang neirail seri kan soahng tohto me kahrehda neirail seri ko kin pehm me irail mwopwula. Pahpa nohno kak toupahrek?

³ Ei ira kak. Nohn daulihala sohte mwahu oh kak kahrehda kahpwal. (Eklesiasdes 7:16, 17) Ahpw ia duwen pahpa nohno Kristian kan ar pahn esehla toupahrek ong pere arail peneinei? Medewe duwen ire siluh pwukat: sukuhl, werek oh mehn kamweit de mwadong.

IHS ME PAHN PADAHKI NOUMW SERI?

4. Ia duwen pahpa nohno kan ar anahne medewehki sukuhl?

⁴ Pahpa nohno Kristian kan kin kesempwalki sukuhl. Irail ese me sukuhl kin sewese neirail seri kan ren kak wadawad, nting oh kapehse oh pil esehla kamwahwihala kahpwal kan. Seri kan pil anahne esehla duwen arail pahn sukuhlki mehkot. Dahme seri kan kin esehla nan sukuhl kak sewese irail en pweida mendahki kahpwal kan nan sampah. Patehng met, ale kasukuhl mwahu ele pahn sewese irail en uhdahn koahiek nan doadoahk.—Lepin Padahk 22:29.

5, 6. Ia duwen seri kan ar kin alehdi likamw kan me pid wia nsenen pwopwoud nan sukuhl?

⁵ Ahpw, sukuhl pil kin kahrehiong seri kan ren patehng seri teikan me pali laud en irail kin ahneki madamadau sapwung. Karasepe, medewe duwen arail madamadau me pid wia nsenen pwopwoud oh tiahk. Nan ehu high sukuhl en Nigeria, serepein men me kin wendi rehn pwutak tohto kin padahkihong ienge tohnsukuhl teikan duwen wia nsenen pwopwoud. Re kin men rong ih mendahki dahme e koasoia likamwtohr oh e kin kihsang nan pwuhk en kilel suwed kan. Ekei serepein ko wia dahme e nda, oh met imwikihla emen irail liseianda oh mehkihla eh pein kapwilla eh liseiano.

⁶ E kansensuwed pwe ekei likamw me pid wia nsenen pwopwoud sohte kin kohsang seri kante, ahpw e pil kohsang sounpadahk kan. Pahpa nohno tohto kin pwunodikihda arail kin esehda me sukuhl kan kin padahkihong seri kan duwen wia nsenen pwopwoud ahpw sohte kin padahkihong irail duwen tiak mwahu oh dahme re pahn pwukoahki. Emen nohno me naineki serepein men me sounpar 12 nda: “Se kin kousoan wasa ehu me aramas kin poadidiong pelien lamalam oh tengediong arail tiahk, ahpw nan high sukuhl, re kin kihong seri kan mehn irehdi liseian (condom)!” Ih oh eh pwoudo pwunodada ni ara esehda me pwutak kan me uwehte neira serepeino kin peki neira serepeino ren wia nsenen pwopwoud. Ia duwen pahpa nohno kan arail kak perehsang arail peneinei soahng pwukat?

7. Ia duwen pahpa nohno ara kak perehsang neira seri kan likamw kan me pid wia nsenen pwopwoud?

⁷ Ia duwe, e pahn mwahu en dehr padahkihong seri kan duwen wia nsenen pwopwoud? Soh. E pahn mwahu ma pein kowe me padahkihong noumw seri kan duwen met. (Lepin Padahk 5:1) Nan ekei wasa nan Iurop oh Amerika, pahpa nohno tohto kin namenengki koasoia ire wet. Pil nan ekei sapwen Aperika, pali laud en pahpa nohno sohte kin koasoiaiong neirail seri kan duwen wia nsenen pwopwoud. Emen pahpa nan Sierra Leone nda: “Mehn Aperika sohte kin wia met.” Ekei pahpa nohno kin medewe me arail padahkihong neirail seri kan duwen wia nsenen pwopwoud pahn kak kahrehiong neirail seri kan ren wia tiahk samin. Ahpw ia sapwellimen Koht madamadau ong met?

SAPWELLIMEN KOHT MADAMADAU DUWEN WIA NSENEN PWOPWOUD

8, 9. Ire mwahu dahkei me Paipel kin kihda me pid wia nsenen pwopwoud?

⁸ Paipel kin kasalehda ni sansal me e sohte wia mehkot kanamenek en koasoia duwen wia nsenen pwopwoud ni ahnsou me konehng. Nan Israel, sapwellimen Koht aramas akan kin pokonpene iangahki “seri kan” pwe ren rong wadawad en Kosonned en Moses. (Deuderonomi 31:10-12; Sosua 8:35) Kosonnedo kin koasoia ni sansal ire tohto me pid wia nsenen pwopwoud iangahki, wia soumwahu en lih, ohl emen pahn kakusiei pilen newe, nenek, kamwahl, ohl mwahuki ohl de lih mwahuki lih, ngengngersuwed oh eng rehn mahn. (Lipai 15:16, 19; 18:6, 22, 23; Deuderonomi 22:22) Mwurin wadawad eh kin wiawi, pahpa nohno kan uhdahn pahn sapengala peidek kan me neirail seri kan kin men ese.

⁹ Lepin Padahk irelaud 5, 6 oh 7 kin kasalehda kaweid limpoak en pahpa nohno me pid keperpen wia tiahk samin me pid wia nsenen pwopwoud. Ire pwukat kin kasalehda me ekei pak tiahk samin mwein kin wia mehn kasongosong. (Lepin Padahk 5:3; 6:24, 25; 7:14-21) Ahpw ire ko kin padahngki me e sapwung wia tiahk samin oh e kin imwikihla kahpwal laud. E kin kihda kaweid me sewese me pwulopwul kan ren liksang tiahk samin. (Lepin Padahk 5:1-14, 21-23; 6:27-35; 7:22-27) E pil kin kasalehda me tiahk samin uhdahn weksang nsenamwahu en wia nsenen pwopwoud nanpwungen me pwopwoud kan. (Lepin Padahk 5:15-20) Uhdahn mwahu pahpa nohno en kin idawehn elen padahk pwukat!

10. Dahme kahrehda omw kin padahkihong seri kan sapwellimen Koht madamadau me pid wia nsenen pwopwoud sohte pahn kin kahrehiong seri kan ren wia tiahk samin?

¹⁰ Ia duwe, soangen padahk pwukat kin kahrehiong seri kan ren wia tiahk samin? Soh. Paipel padahngki: “Kupwurokong en me pwung kan kak doareiukala.” (Lepin Padahk 11:9) Ke sou men doarehla noumw seri kan sang soahng kan me mi nan sampah wet me kak kamwakid irail? Emen pahpa nda: “Sang ni ahnsou me nait seri kan tikitik, se kin uhdahn lokaia mehlel oh sansal ong irail ni at kin koasoia duwen wia nsenen pwopwoud. Ihme kahrehda, ni ahnsou me seri teikan kin koasoia duwen ire pwukat, irail sohte kin men rong pwe re wehwehkier.”

11. Ia duwen pahpa nohno ara pahn kak ekisekis padahkihong neira seri kan ire kesempwal kan me pid paliwararail?

¹¹ Nin duwen eh sansalehr nan irelaud en mwowe ko, kasukuhl me pid wia nsenen pwopwoud anahne mwadang tepida. Ni omw kin padahkihong noumw seri kan eden kisehn paliwar kan, ke dehr suwedki nda wasahn kaparapar pwe e de mwomwen me mepwukat soahng kei me kanamenek. Padahkihong irail uhdahn eden wasa pwukat. Ni ahnsou me seri kan kin lalaudla, e kesempwal ren kin ese dahme konehng de sohte konehng. E mwahu koaros pahpa oh nohno en kin padahkihong neira seri kan me soangen wasa pwukat me kesempwal oh ren dehr kasalehiong meteikan de mweidohng meteikan en doahke de pil koasoia duwe ni ahl sapwung. Ni seri kan arail kin lalaudla, pahpa nohno anahne padahkihong irail duwen paliweren ohl oh lih eh kin tuhpene pwe ira en wiahda seri men. Mwohn paliweren seri kan ar tepida wiahla paliweren aramas laud, irail anahne eseier me mie wekidekla kan me pahn wiawi. Nin duwen atail sukuhlkier nan Irelaud 5, soangen kasukuhl wet pil kak perehsang seri kan tiahk suwed.—Lepin Padahk 2:10-14.

DAHME PAHPA NOHNO ANAHNE WIA

12. Madamadau likamw dahkei me sukuhl kan kin padahngki?

¹² Pahpa nohno anahne kaunopada pwe ira en pelianda madamadau likamw kan me ele kin kohda nan sukuhl, me duwehte padahk en aramas loalokong kan me dene aramas kohsang mahn, uhki wehi, de padahk en pelien lamalam kan me uhwong padahk mehlel en Paipel. (1 Korint 3:19; pil kilang Senesis 1:27; Lipai 26:1; Sohn 4:24; 17:17.) Sounpadahk tohto kin nohn kesempwalki sukuhl laud. Mendahki tohnsukuhl kan me pahn pein pilada, ekei sounpadahk kin kamehlele me ihte ahl me re pahn kak pweikihda.a—Melkahka 146:3-6.

13. Ia duwen pahpa nohno ara kak perehsang neira seri kan me ieiang sukuhl madamadau sapwung kan?

¹³ Pahpa nohno anahne ese dahme neira seri kan kin suksukuhliki pwe ira en kin pelianda padahk sapwung de likamw kan. Eri pahpa nohno, mie amwa doadoahk en wia roporop. Kasalehda amwa uhdahn men ese dahme noumwa seri kan kin sukuhlki. Koasoiong irail mwurin sukuhl. Idek rehrail dahme re sukuhlki, dahme re keieu perenki oh dahme re keieu apwalki. Kilang arail homework kan, dahme re ntingihedi nan neirail pwuhk kan oh pil neirail des kan. Song kumwa en esehla arail sounpadahk kan. Kasalehiong sounpadahk kan me kumwa kin kalahnganki arail doadoahk oh kumwa men sawas ma kak.

IENGEN NOUMW SERI KAN

14. Dahme kahrehda e kesempwal ong seri kan me wauneki Koht ren pilada kompoakparail kan me mwahu?

¹⁴ “Ia wasa ke rongasang men?” Mwein pahpa nohno tohto kin idek peidek wet ni arail kin pwuriamweikihla neirail seri men eh nda de wia mehkot me e sohte kin wia. Mwein pasapengo kin pidada kompoakepahn serio men me kapw nan sukuhl de mehn mparail men me kapw. Ei, iangatail kan kin kamwakid kitail laud mehnda ma kitail pwulopwul de mah. Wahnpoaron Pohl kaweidkin kitail: “Kaleke kumwail pitida pahn meteikan! Pwe ‘Werekiong aramas suwed kan e kin kauwehla tiahk mwahu.’” (1 Korint 15:33; Lepin Padahk 13:20) Me pwulopwul kan me kin keieu mengei en lohdi nan kasongosong sang pelierail kan. Re kin kalapw peikasalki pein irail oh mwein ekei pak arail kin men kaperenda iangarail kan kin poweiraildi. Eri ia uwen eh kesempwal irail en pilada kompoakparail kan me mwahu!

15. Ia duwen pahpa nohno ara kak kaweid neira seri kan ren pilada kompoakparail kan?

¹⁵ Nin duwen me pahpa nohno koaros kin ese, seri kan sohte pahn kin ahnsou koaros wiahda pilipil mwahu; re kin anahne kaweid. E sohte wehwehki me ke pahn pilada ihs me re pahn kompoakepahnki. Ahpw ni arail kin lalaudla, padahkihong irail duwen arail pahn kasawih aramas oh pil sewese irail en wehwehki mehnia irair kan me kompoakparail kan ahneki me re pahn kin kesempwalki. Irair me keieu mwahu iei limpoak ong Siohwa oh poakohng wia dahme pwung mwohn silangi. (Mark 12:28-30) Padahkihong seri kan ren poakohng oh wauneki irail kan me kin mehlel, kadek oh pwerisek. Nan amwail Kaudok en Peneinei, sewese seri kan ren esehla irail kan me kin ahneki soangen irair pwukat nan Paipel oh tehk ma ihs nan mwomwohdiso me pil kin ahneki soangen irair pwukat. Wiahda mehn kahlemeng ni omw kin doadoahngki ahl wet pwe ken rapahkihda kompoakepahmw kan.

16. Ia duwen pahpa nohno ara pahn kin tetehk ihs me neira seri kan kin kompoakepahnki?

¹⁶ Ia duwe, ke ese ihs kompoakepahn noumw seri kan? Ke sou ndaiong noumw seri kan ren kahreiraildo ni imwamwailo pwe ken kak eseirailla? Ke kak idek rehn noumw seri ko dahme seri teikan medewehki kompoakparail ko. Ia duwe, aramas kin ese me re kin lelepek de re kin mour riau? Ma re kin mour riau, eri sewese noumw seri kan ren kak medewe oh kilang kahrepen arail kin werekiong soangen kompoakepah pwukat eh kak kauweirailla. (Melkahka 26:4, 5, 9-12) Ma ke kin kilang wekidekla me sohte konehng nan mouren noumw serio me pid eh tiahk, likou, madamadau de lokaia, kumwa anahne koasoiaipene duwen kompoakepah kan. Mwein noumw serio kin werekiong kompoakepah men me kin kamwakid ih ni ahl sapwung.—Pil kilang Senesis 34:1, 2.

17, 18. Likin panawihekin irail werek suwed, dahme pahpa nohno pil kak wia?

¹⁷ E sohte itar en kin padahkihongete noumw seri kan ren dehr kin werek suwed. Sewese irail ren kak rapahkihda kompoakepah me mwahu. Emen pahpa koasoia: “Ahnsou koaros se kin rapahkihda mehkot me pahn wiliandi. Ni ahnsou me ahn nait pwutako sukuhlo men en iang arail pwihn en football, ngehi oh ei pwoud kin mwohndi reh oh koasoiaiong kahrepen met eh sohte mwahu pwehki irail kan me e pahn werekiong. Ahpw se koasoanehdi sen luke ekei seri nan mwomwohdiso ren iang kiht kohla football wasahn mwadongo. Met kin pweida.”

¹⁸ Pahpa nohno erpit kan kin sewese neirail seri kan ren rapahkihda kompoakparail mwahu kan oh re kin iang irail mwadong. Ahpw ong pahpa nohno tohto, pilada mehn kamweit oh mwadong sohte kin mengei.

SOANGEN MWADONG DE KAMWEIT DAH?

19. Mehnia karasaras en Paipel me kin kasalehda me kaidehn dihp ehu peneinei en ahneki ahnsou kaperen?

¹⁹ Ia duwe, Paipel kin uhwong en ahneki peren? Uhdahn soh! Paipel kin mahsanih me mie “ahnsoun peren . . . oh ahnsoun kahlek.”b (Eklesiasdes 3:4) Sapwellimen Koht aramas akan nan Israel kin perenki keseng, kahlek, mwadong oh wia kahk kan. Sises Krais pil ketin iang towehda lapalahn kamadipw en kapwopwoud ehu oh pil “lapalahn kamadipw ehu” me Madiu Lipai wiahiong ih. (Luk 5:29; Sohn 2:1, 2) Sises sohte kin ketin irehsang meteikan arail peren. Amwail peneinei en dehr wiahki me kokouruhr de pereperen dihp ehu.

20. Dahme pahpa nohno pahn tamataman ni ara kin pilada mehn kamweit kan ong peneinei?

²⁰ Siohwa iei “Koht en peren.” (1 Timoty 1:11, NW) Eri kaudokiong Siohwa kin wia utupen peren a kaidehn mehkot me kin kihsang ahn aramas kin perenki mour. (Pil kilang Deuderonomi 16:15.) Seri kan kin diren peren oh kehl ong mwadong oh mehn kamweit. Mehn kamweit mwahu sohte kin kihdahte peren. E pil kin wia mehn kasukuhl ong seri men pwe en kak koahiekla. Moangen peneinei me pwukoahki kihda anahn koaros ong eh peneinei, met pil iangahki mehn kamweit. Ahpw met en kin wiawi ni toupahrek.   

21. Keper dah me kin kohsang mehn kamweit kan rahnwet?

²¹ Duwehte me Paipel kohpadahr, “imwin rahn akan” wia ahnsou apwal ekei me sampah kin direkihla aramas me kin “inengieng pein arail peren laudsang kupwur en Koht.” (2 Timoty 3:1-5) Mehn kamweit me kin keieu kesempwal nan mouren aramas tohto. Uhdahn tohto mehn kamweit oh e kak kihsang ahnsou ong soahng kan me kesempwal. Patehng met, pali laud en mehn kamweit nan atail ahnsou kin kasalehda tiahk samin me pid wia nsenen pwopwoud, tiahk lemei, doadoahngki wini en kasahliel oh wiewia suwed teikan. (Lepin Padahk 3:31) Dahme pahpa nohno kak wia pwe ira en perehsang me pwulopwul kan mehn kamweit suwed kan?

22. Ia duwen pahpa nohno ara kak kaiahnehda neira seri kan ren kin wiahda pilipil mwahu ong mehn kamweit?

²² Pahpa nohno anahne koasoanehdi soahng kan me ira pahn kalikedi. Ahpw me laudsang met, ira anahne padahkihong neira seri kan duwen arail pahn kin ese kasawihada mehnia mehn kamweit me suwed oh dehr daulihala me konehng. Soangen kaiahn wet kin anahne ahnsou oh nanti. Karasepe, mie pahpa men me naineki pwutak riemen me kilangada me nah pwutak laudo kin kalapw rong redio station kapw ehu. Eri ehu rahno ni eh tangatangahki were sidohsa kolahng doadoahk, ohlo kapiralahng redio station me nah pwutak laudo kin rongorong. Ekei pak e kin uhdi oh ntingihedi lokaiahn ekei koul ko. Mwurin mwo, e mwohndi rehn nah pwutak ko oh koasoiaiong koul kei me e rongo. Pwe en kak esehda ara madamadau, e tepikihda peidek wet “Dahme kumwa medemedewe?” oh e kin rong mwahu ara pasapeng ko. Mwurin arail doadoahngki Paipel oh medemedewe oh koasoiapene ireo, pwutak ko pwungkihda me ira sohla pahn rong redio stationo.

23. Ia duwen pahpa nohno ara kak perehsang neira seri kan mehn kamweit suwed kan?

²³ Pahpa nohno koahiek kan kin tetehk keseng, prokram en TV, kasdo oh video game me neirail seri kan kin perenki. Re kin kilang kilel me mi ni kilio, lokaiahn koul kan oh wadek pali me kin koasoia mehn kamweit nan doaropwehn rohng kan. Me tohto kin pwuriamweikihla ekei “mehn kamweit” me wiawihda ong seri kan rahnwet. Irail me kin men perehsang neirail seri kan soahng suwed kan kin mwohndi rehn arail peneinei oh irail koasoiapene soahng keper kan ni arail kin doadoahngki Paipel oh sawaspen Paipel kan.c Ma pahpa nohno koasoanehdi teng dahme ira kalikedi ni toupahrek oh sohte kin wekwekseli, ira pahn kilang imwila mwahu.—Madiu 5:37; Pilipai 4:5.

24, 25. Ia ekei mehn kamweit kan me peneinei kak perenki wiapene?

²⁴ Ahpw ke anahne wia laud sang kalikedi mehn kamweit keper kan pwe ken kin pere noumw seri kan. Powehkihdi me suwed me mwahu pwe seri kan en dehr tepida keid nan ahl sapwung. Peneinei Kristian tohto kak tamanda ahnsou kaperen kan me arail peneinei kin ehupene me duwehte kohla pikinik, mwemweitla nanwel, pweidi ekis wasa, mwadong oh seiloakla rehn kisehrail oh kompoakparail kan. Ekei peneinei kin diarada me arail kin wadekpene mehkot kin kaperen. A ekei kin perenki koasoiapene soahng kan me kaperen. Ahpw ekei peneinei kin sukuhlki wiahda de parada mehkot sang tuhke, mahlen, kesengki soangsoangen mehn keseng kan, de sukuhlki sapwellimen Koht kapikipik kan. Seri me esehla wia soahng pwukat kin silasil sang mehn kamweit suwed kan oh re kin esehla me ahnsoun kamweit sohte wehwehki ren mwomwohdete oh kilikilang. Ahpw e kin kaperen en iang wia.

²⁵ Ahnsoun kohpene wia mehkot pil kak wia ahnsoun kamweit. Pahpa nohno en kin koasoanehdi oh tehk mwahu pwe e dehr nohn laudla de kihsang ahnsou laud. Met sohte pahn kaperendahte noumw seri kan, ahpw e pil kak kalaudehla limpoakpene nan mwomwohdiso.—Pil kilang Luk 14:13, 14; Sud 12.

OMW PENEINEI KAK KALOWEHDI SAMPAH

26. Mehnia irair me keieu kesempwal ni pahpa nohno ara kin pere ara peneinei sang soahng suwed kan?

²⁶ Ke uhdahn anahne doadoahk laud pwe ken perehsang omw peneinei soahng kan me kak kauweikumwailla nan sampah. Ahpw mie mehkot me pahn keieu sewese kumwail en pweida. Met iei limpoak! Ma omw peneinei kin limpoakpene oh kerenpene, omw peneinei pahn kin wia wasa ehu me sohte keper oh pahn sewese kumwail en kin koasoipene. Soahng pwukat kin uhdahn pere kumwail sang soahng suwed kan. Pil ehu, kakairada limpoak ong Siohwa kin kesempwal sang met. Ma tohnpeneinei koaros kin ahneki soangen limpoak wet, seri kan pahn laudla oh kailongki kansensuwedihada Siohwa sang ni ar lohdi pahn kasongosong en sampah. Oh pahpa nohno me poakohng Siohwa sang ara mohngiong pahn nantihong kahlemengih sapwellime limpoak oh toupahrek. (Episos 5:1; Seims 3:17) Ma ira pahn wia met, neira seri kan sohte pahn kin medewe me kaudokiong Siohwa iei koasoandi en soahng kan me re sohte mweimwei en wia, de elen mour ehu me sohte kaperen me re pahn men mwadang tangasang. Ahpw seri kan pahn kin kilang me kaudokiong Koht kin wia soangen mour ehu me keieu kaperen oh katapan.

27. Ia duwen peneinei eh kak kalowehdi sampah?

²⁷ Peneinei kan kin kaperenda kupwuren Siohwa ma irail kin miniminpene papah Koht ni peren oh toupahrek, oh re kin nantihong kolokol arail “mwakelekel oh pwung” nan sampah suwed wet. (2 Piter 3:14; Lepin Padahk 27:11) Soangen peneinei pwukat kin idawehn Sises Krais ni eh ketin pelianda kasongosong koaros me kohsang ahn Sehdan sampah. Sises kak mahsanih ni eh kerenlahngehr imwin sapwellime mour nin sampah: “I kalowedier sampah!” (Sohn 16:33) Se koapworopworki me omw peneinei pahn pil kalowehdi sampah oh ahneki mour soutuk!

[Nting tikitik me kileldi pahs]

IA DUWEN IRE MEHLEL EN PAIPEL PWUKAT EH KAK SEWESE . . . IUK KEN PERE OMW PENEINEI?

Loalokong kin wahdo erpit me kak doarehla mouren emen.—Eklesiasdes 7:12.

“Mehkot me sampah wet kin wiahki loalokong, e wia mehkot mwahl mwohn silangin Koht.”—1 Korint 3:19.

Liksang wereksuwed.—1 Korint 15:33.

Mie ahnsoun mwadong de kamweit, ahpw en koasoandi mwahu.—Eklesiasdes 3:4.

[Koakon nan pali 113]

E SOHTE KIN PEHM ME E KATIHASANG MEHKOT

Ekei pak, Paul oh Lu-Ann, pwopwoud Kristian ehu, kin lukehdo aramas ni imwarao. Ira kin wiahda soangen koasoandi pwukat en dehr nohn laud pwe ira en kak apwalih. Ira kamehlele me neira seri ko kin paiekihda met.

Lu-Ann nda: “Nohnohn emen iengen nei pwutak Eric me sounpar weneu kohdo rehi oh ndaiong ie me e kin poakehla Eric pwehki e kin kelehpw mwomwohd oh sohte kin iang wia ipwidi me kin wiawi nan perehn sukuhl. Ngehi eri ndaiong: ‘I uhdahn kalahnganki omw kin nsenohki nei pwutako. I kak wehwehki soangen aramas dahmen kowe. Oh mwein sohte mehkot me I kak nda me ke pahn kak kamehlelehki me Eric kin pehm me e sohte kin katihasang mehkot.’ E pwungki. Kahrehda I ndaiong: ‘Pwe ken dehr pwunodki, menlau pein idek rehn Eric ia eh pepehm.’ Ni ei sohte mi rehn Eric, liho idek reh, ‘Ke sohte nsensuwedki ahmw sohte kin iang wia ipwidi kaselel pwukat?’ Eric pwuriamwei kilengda oh nda: ‘Ke lemeleme me minit eisek, cupcake kei oh koul pwoat iei kamadipw ehu? Ke anahne kohdo ni imweio oh kilang duwen uhdahn kamadipw!’” Mwomwen ahn pwutako koasoi kin kasalehda me e sohte kin pehm me e katihasang mehkot!

[Kilel nan pali 115]

Kamweit mwahu kan me duwehte me peneinei wet wia ni arail kohla piknik oh pweidi kak sewese seri kan ren sukuhlkihdi mehkot oh kekeirda mwahu