Kahpwalpen Kakairada oh Kaweid Seri kan Rahnpwukat
NI IMWILAHN mehkoaros ni soutiko, ohl emen me ahneki imwen mwenge ieu kaunopadahr en ritingedi oh kohkohlahr ni imwe. Ahpw, lih riemen oh kisin pwutak emen pedolong oh oahte kenarail mwenge. Me ahneki imwen mwenge eri medewehda ndahng irail me e ritingdier pwehki e pwangadahr, ahpw e pilada en wiahda arail oahten mwenge. Ahnsou me lih riemeno wie mwengemwenge oh koasoakoasoai, kisin serio wah kene kukihs ahpw wie tangatangseli nan ihmwo oh kamwakamwerehseli kene kukihs oh kin tietiakseli. Ahpw, ahn serio nohno sohte lipwoare ahpw wie kisikisin kouruhr. Ni arail mwenge nek irail eri mweselda, ohlo me ahneki imwen mwengeo pwangadahr ahpw e anahne pwurehng kamwakelehda wasahn mwengeo.
Mwein ke ese, me karasaras mehlel wet kin wiawi nan peneinei tohto, me seri sohte kin kohieng peneu. Kahrepe kan me tohto. Ekei pahpa oh nohno kin mweidala seri kan en pein diarada dahme mwahu, oh irail kin lemeleme me seri kan anahne keirada ni saledek. De pil ekei pahpa oh nohno kan pwehki irair en arail mour nohn kedirepw oh sohte ahnsou en tetehk neirail seri kan oh kihong irail kaiahn me anahn. Ekei pahpa oh nohno ahneki madamadau me dene ahn neirail seri sukuhl me keieu kesempwal kahrehda re kak saledek en wia dahme re mwahuki ma arail deng nan sukuhl me mwahu oh iang sukuhl laud me wadawad.
Ahpw, ekei kin koasoia me madamadau en pahpa oh nohno oh aramas teikan me kin pid tiahk kan anahne wekidekla. Irail kin nda me seri kan kin iangehr wia soangsoangen tiahk suwed tohto oh pei oh lemei nan sukuhl kin susuwedla rahn koaros. Kaun en sukuhl men nan middle sukuhl (pwihn kaweneu lel kawaluh) nan Seoul, Republic of Korea, me koasoia me kaiahnehda tiahk en seri kan en wia mehkot me keieu kesempwal ong pahpa oh nohno. E koasoia: “Mwurin ahmw pahn kaiahnehda tiahk mwahu ah loalokong ahpw uhd pahn kohdo.”
Pahpa oh nohno tohto me kin men neirail seri kan en iang sukuhl laud (college) oh pweida nan arail mour kin sohte men rong kaweid. Ma komwi emen pahpa de nohno, soangen aramas dah me ke men noumw seri en wiahla? Ke men noumw seri en wiahla aramas laud oh ahneki koahiek en kasawiahda dahkot tiahk mwakelekel oh kak kesempwaliki ah pwukoah? De ke pil men en wia soangen aramas me nsenohki kamwahupen meteikan, oh kak mengei en werekiong oh sohte kin men akamai? Ma ei, a ken tehk audepen artikel en mwurin met.