Pahpa oh Nohno kan—Sewese Noumwail Seri kan en Ese Koahiek en Madamadau
1. Dahme kahrehiong emen me sounpar 15 en tepiada simoak oh dahme sewese ih en uhdihsang?
1 Robin me sounpar 15 tepida simoak kaidehn pwehki e men, ahpw meteikan kin wia. E katamanda: “Mwuri I tepida medemedewe, ‘I sohte mwahuki met. Dahme kahrehda I wiahki?’ Eri, I solahr simoak.” Pwehki pein ih me medewehda, e kakehr powehdi kasongosong sang ienge kan!—Lep. Pad. 2:11, 12.
2. (a) Soangen peidek dah kan me pahpa oh nohno kan en pein idek rehrail? (b) Dahme kin kaweidih wiewia en irail me tohto nan Micronesia?
2 Pahpa oh nohno kan, noumwail seri kan ese medewehda ong pein irail duwehte me serepeino wia? Re kak pein medewehda oh wia arail pilipil kan me poahsoankihda kaweid en Paipel, mendahki dahme arail peneinei oh iengerail kan pahn wia? Aramas nan Micronesia, pil irail kan me mi wasa teikan, sang ni arail pwulopwul kin alasang mwekid en irail kan me mih limwahrail. Re sohte kin pein medewehda ong pein irail oh wiahda pilipil me poahsoankihda kaweid kan, ahpw re kin alasang kahlemeng en arail peneinei oh iengerail kan.
3. Dahme kahrehda pahpa oh nohno kan anahne sewese neirail seri kan en kekeirda koahiek en madamadau?
3 Dahme Pahpa oh Nohno kan Kak Wia: Pahpa oh nohno kan anahne kasukuhlih seri kan en medewehda ong pein irail. Ahnsou kohkohdo re anahne pein wiahda arail pilipil, oh kasukuhl sang ahnsoun pwulopwul kak sewese irail. Paipel kin uhdahn kangoange en kekeirda koahiek en madamadau, oh met mehkot me kesempwal pahpa oh nohno kan en sewesehki neirail seri kan. Seri kan anahne sawas en medewe dahme Paipel padahkihong kitail duwen Siohwa oh sapwellime ahl kan. Lepin Padahk 5:1, 2 mahsanih: “Samwa, tehk oh rong kanahieng ei kupwurokong oh erpit. Ke ahpw pahn esehla weweidki ei kaweid kan, oh omw koasoi kan pahn kasalehda me ke ahneki loalokong.”
4. Wiepe dah kan me Sises kin doadoahngki pwehn sewese en kakairada koahiek en madamadau?
4 Pahpa oh nohno kan nantihong alasang mehn kahlemeng en Sises ni eh kin kangoange me rongorong ih en kakairada koahiek en madamadau. Nan Madiu 17:25 Sises ketin keinemwe: “Saimon, dahme omw lamalam ong irair wet? Nanmwarkien sampah kan kin rikasang ia ar daksis kan, de ar nohpwei kan? Sang rehn sapwellimarail seri kan, de sang rehn mehn liki kan?” Ahn Sises peidek kan kin kamwakid madamadau en Piter oh sewese ih en lel madamadau pwung me pid duwen pwain daksis. Pahpa oh nohno kan kak doadoahngki wiepe ohte pwehn sewese neirail seri kan en kekeirda koahiek en madamadau.
5. Iaduwen pahpa oh nohno kan kak doadoahngki wiepe kan me Sises ketin doadoahngki?
5 Koahiek en madamadau kak kekeirda ekis ekis ni en seri men lalaudla. Mweidohng noumw seri en wiahda pein eh kisin pilipil. Ke kak idek reh, “Dahme ke lemeleme me keieu mwahu en wia?” Mwein eh pasapeng kan pahn kasalehda me e anahnehte ekis sawas. Sewese ih en pein medewe pwehn wia pilipil pwung. En dehr mwadang lingeringer de sohte kanengamah. Sewese noumwail seri kan en pousehlahte kekeirda koahiek en madamadau ni ar kin lalaudla.
6. Ihs me pahpa oh nohno kan anahne sohpeiong pwehn ale kaweid en kasukuhlih neirail seri kan, oh pwekida?
6 E sohte mengei en sewese seri kan en kekeirda koahiek en madamadau, ahpw pahpa oh nohno kan kak sohpeiong Siohwa pwehn ale kehl oh kaweid. (1 Kor. 3:10-15) Seri kan me ale kasukuhl mwahu kin wia kaperen ong arail pahpa oh nohno kan oh kalinganahda Koht. Ei, e wia nsenamwahu oh peren laud en sewese seri kan en esehla koahiek en madamadau.