IRELAUD 7
Ia Duwen Omw Kak Kasukuhlih Noumw Seri
“Dehr manokehla kosonned pwukat me I kihong kumwail rahnwet. Padahkihong noumwail seri kan.”—Deuderonomi 6:6, 7
Ni ahnsou me Siohwa ketin koasoanehdi koasoandi en peneinei, e ketikihong pahpa nohno kan pwukoa en apwalih neirail seri kan. (Kolose 3:20) Iei omw pwukoa nin duwen pahpa de nohno men en kaiahne noumw seri en poakohng Siohwa oh wiahla emen me ese apwalih eh pwukoa kan ni eh laudla. (2 Timoty 1:5; 3:15) Ke pil anahne esehla dahme mi nan mohngiong en noumw serio. Mehlel, omw mehn kahlemeng mwahu kin uhdahn kesempwal. Ke kak padahkihong noumw serio sapwellimen Siohwa Mahsen ma pein kowe kin kolokol met nan omw mohngiong.—Melkahka 40:8.
1 WIA EN MENGEI ONG NOUMW SERI EN KOASOIONG UHK
DAHME PAIPEL MAHSANIH: “Nan kapehd mwadang ong rong, ahpw dehr nan kapehd karuaru en lokaia oh lingeringer.” (Seims 1:19) Ke pahn men noumw seri en pehm me re kak koasoiong uhk ni saledek. Re anahne ese me ke kin onopadahng rong ni ahnsou me re men koasoiong uhk. Wiahda popohl nan imwamwail pwe ren mengeiki kasalehda arail madamadau. (Seims 3:18) Ma re kin leme me ke pahn lemei de kadeiki irail, ele re pahn sohte men kasalehda arail pepehm ong uhk. Kanengamahiong noumw seri, oh ahnsou koaros kamehlelehiong irail duwen omw limpoak.—Madiu 3:17; 1 Korint 8:1.
DAHME KE KAK WIA:
Kihong noumw seri kan ahnsou ma re men koasoi
Kowe oh noumw seri en kaukaule koasoipene, kaidehn ihte ahnsou me kin mie kahpwal kan
2 SONG EN WEHWEHKI DAHME NOUMW SERI UHDAHN MEN KOASOIA
DAHME PAIPEL MAHSANIH: “Meid kaperen ong aramas me kin loalokongla oh dehdehkihla.” (Lepin Padahk 3:13.) Ekei pak, ke pahn anahne tehk mwahu mwomwen en noumw seri koasoi kan pwehn wehwehkihla uhdahn ar pepehm kan. Me pwulopwul kan kin kalapw likamwkihda de ndahla koasoi kan me re sohte kin mehlel en men nda. “Rong mwohn omw pahn sapeng. Pwe ma soh, kowe aramas pweipwei.” (Lepin Padahk 18:13) Dehr mwadang en nsensuwedla.—Lepin Padahk 19:11.
DAHME KE KAK WIA:
Koasoanehdi ken dehr sopuk de lingeringerda, sohte lipilipil dahme noumw seri nda
Song en tamanda ia mwomwen omw pepehm ni ahnsou me ke wehte irail oh dahme mwomwen kesempwal ong uhk ahnsowo
3 KASALEHDA EHUPENE
DAHME PAIPEL MAHSANIH: “Samwa, rong mahsen en omw pahpa, oh rong kanahieng padahk en omw nohno.” (Lepin Padahk 1:8) Siohwa ketikihong pahpa kan oh pil nohno kan manaman en pwukoahki neirail seri. Kumwa anahne padahkihong noumwa seri en wauneki oh peikiong kumwa. (Episos 6:1-3) Seri kan kak pehm ma arail pahpa oh nohno sohte kin “ahnekipene lamalamteieu.” (1 Korint 1:10) Ma kumwa sohte pwungkipene mehkot, song en dehr kasalehda met mwohn noumwa seri kan pwe met kak katikala arail kin waunekin kumwa nin duwen pahpa oh nohno men.
DAHME KE KAK WIA:
Koasoiapene oh pwungkipene duwen ia mwomwen amwa pahn panawih noumwa seri
Ma mie ehu wiepe tohrohr duwen ia mwomwen kowe oh omw pwoudo pahn kaiahne noumwa seri, song en kilang ia en omw pwoudo madamadau duwen met
4 WIAHDA KOASOANDI
DAHME PAIPEL MAHSANIH: “Padahkihong kisin seri men duwen eh pahn momour.” (Lepin Padahk 22:6) Pweida mwahu en kasukuhlih noumw seri sohte kak pein wiawi. Ke anahne wiahda koasoandi duwen kaiahn me pahn pid omw panawih noumw seri. (Melkahka 127:4; Lepin Padahk 29:17) En panawih noumw seri sohte kin wehwehkihte ken kihong kalokepe, ahpw e pil kin pid ken sewese noumw seri en wehwehki kahrepen omw kosonned kan. (Lepin Padahk 28:7) Oh pil, padahkihong irail en poakohng sapwellimen Siohwa Mahsen kan oh wehwehki eh kaweid kan. (Melkahka 1:2) Met pahn sewese kakairada kadeikpen loalarail en mwahu.—Ipru 5:14.
DAHME KE KAK WIA:
Tehk mwahu ma noumw seri kan wehwehki me Koht uhdahn ketin mie, emen me re kak likih
Sewese irail en ese pein tehkada oh soikala soahng keper kan, me duwehte soahng me kin dierek nan Internet oh social network. Padahkihong irail ia mwomwen arail pahn kak soikala aramas suwed kan me kin song en angkehlailih seri kan
“Padahkihong kisin seri men duwen eh pahn momour”