Koht Kin Kupwurki Pelien Lamalam Koaros?

Pasapeng kan me kalapw kohda:

▪ “Pelien lamalam koaros kin kahluwalahng kitail rehn Koht.”

▪ “E sohte lipilipil dahme ke kamehlele ihte ken ahneki mohngiong mehlel.”

Dahme Sises Mahsanih?

▪ “Kumwail keid nan ewen kehl wetikitik, pwe elen kolahng nan ehl me tehlap oh mengei, oh aramas ngeder kin keid ie. A wenihmw me kolahng mour me wetikitik oh elen kolahng ie me apwal, eri, me malaulau me kin diar.” (Madiu 7:13, 14) Sises sohte ketin kamehlele me pelien lamalam koaros kin kahluwalahng kitail rehn Koht.

▪ “Me tohto pahn ndahng ie, ‘Maing at Kaun, Maing at Kaun! Se kohpadahr ni mwaromwi; ni mwaromwi se kausekihsangehr tepil kan, oh se wiadahr manaman tohto!’ A ngehi I ahpw pahn ndahng irail, ‘I sohte mwahn esei kumwail. Kumwail kohkohweisang ie, pwe I sehsei kumwail, kumwail me mouren tiahk suwed kan!” (Madiu 7:22, 23) Sises sohte kin ketin pwungki koaros me kose me re kin idawehn ih.

TOHTO aramas me kin poadidi ong arail palien lamalam kin kesempwalki dahme re kamehlele oh pil arail tiahk kan. Ahpw ia duwen ma arail padahk kan sohte kin pahrekiong mahsen en Koht nan Paipel? Sises ketin kasalehda duwen keper en idawehn tiahk en aramas kan, ni ahnsou me e mahsanihong kaun en pelian lamalam kan en eh ahnsou: “Eri ih duwen amwail kin mwamwahliki mahsen en Koht pwe kumwail en daur pein amwail tiahk kan.” Sises pil pousehlahte doadoahngki mahsen en Koht pwukat: “Aramas pwukat kin kahkahkin ie arail lokaiahte, a kapehdirail kan me inenen dohsang ie. Sohte katepen ar kin pwongih ie, pwehki re kin padahngkihwei kosonned en aramas dene e pwilisang rehn Koht!”​—Madiu 15:1-9; Aiseia 29:13.

Wiewia pil kesempwal, kaidehn dahme ke kamehlelehte. Paipel kin mahsanih duwen irail kan me dene irail kin kaudokiong Koht: “Irail kin kosekose me re kin ese Koht, ahpw arail wiewia kan sohte pahrekiong me re kin koasoia.” (Taitus 1:16) Ni mehlel, Paipel mahsanih duwen pali laud en aramas akan nan atail ahnsou me: “Re pahn inengieng pein arail peren laudsang kupwur en Koht. Re pahn kin liksansalamwahuki mwomwen atail pelien lamalam, ahpw re kin kahmahmki katepe. Kalekeiukasang aramas pwukat.”​—2 Timoty 3:4, 5.

Mohngiong mehlel kesempwal ahpw kaidehn ihte met me anahn. Dahme kahrehda? Pwehki aramas emen kak mehlel ahpw dahme e kin kamehlele kak sapwung. Eri padahk mehlel duwen Koht kin kesempwal. (Rom 10:2, 3) En esehla padahk mehlel oh mwekid pahrekiong dahme Paipel mahsanih pahn sewese kitail en kaperenda Koht. (Madiu 7:21) Eri ni mehlel, pelien lamalam mehlel kin pidada kahrepe pwung, kamehlele dahme mehlel, oh wiewia pwung. Oh wiewia pwung kin wehwehki en kapwaiada kupwuren Koht rahn koaros!​—1 Sohn 2:17.

Pwehn kalaudehla omw wehwehki dahme Paipel padahngki duwen Koht, menlau tuhwong Sounkadehdehn Siohwa kan pwehn kak tepida onop en Paipel ni soh isepe.

[Kawehwehpen kilel kan nan ehu ehu pali 9]

Pelien lamalam mehlel kin pidada kahrepe pwung, kamehlele dahme mehlel, oh wiewia pwung