Ahnsoun Wiahda Pilipil
“Koht eri ketin wiahda aramas; e ahpw ketin wiahda aramas rasehng ih. E ketin wiahda ohl oh lih.”—Senesis 1:27.
MAHSEN pwukat me mi nan Senesis kin pid me Koht “ketin koasoanehdi ahnsou kan me konehng soahng koaros” pwehki e ketin kapikada pwopwoud unsek ehu. (Eklesiasdes 3:11) Siohwa Koht eri mahsanih: “Kumwa kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros. I kihong kumwa manaman en kaunda mwahmw akan, menpihr kan oh mahn lawalo kan koaros.”—Senesis 1:28.
Nan mahsen pwukat ong tepin pwopwoudo, Koht ketin kasalehda kupwure ong ira. Ira pahn kaparaparala oh apwalih sampah pwe e pahn wiahla paradais ehu ong ira oh kadaudokara kan. Koht sohte ketin koasoanehdi iahd me re pahn mehla. Koht ketin inoukihong ira mehkot me inenen mwahu. Ma ira pahn wiahda pilipil mwahu oh mourki mour me pahrekiong kupwuren Koht, ira pahn kak mour nsenamwahu kohkohlahte.
Ahpw ira wiahda pilipil sapwung kahrehda aramas koaros kin mahla oh mehla. Sohp koasoia: “Kitail koaros ipwidi luwet. Aramas koaros ahneki soangen mourteieu me mwotomwot oh diren apwal.” (Sohp 14:1) Ia duwen met wiawi?
Paipel mahsanih: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) “Aramas tehmen” iei Adam. E pein pilada en kauwehla sapwellimen Koht kosonned ehu. (Senesis 2:17) Sang ni pein eh pilipil, Adam kesehla koapworopwor en mour soutuk nan paradais pohn sampah. E pil kahrehda kadaudoke kan en katihasang kapai wet oh kahrehiong irail en sohsohki dihp oh mehla. Met mwomwen solahr arail koapworopwor. Ahpw ia duwe, mehlel ieu met?
Ahnsoun Onehda Sapahl
Sounpar kid kei mwuri, sounmelkahka men eri ntingihdi: “Me pwung kan pahn koukousoan nan sahpwo oh re pahn sapwenikihla kohkohlahte.” (Melkahka 37:29) Pwehn kasalehda me sapwellimen Koht inou me e ketin wiahda nan mwetuwel en Ihden pahn pweida, Mahsen en Koht kasalehda dahme e pahn ketin wia ni ahnsou keren: “E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” Eri Koht pein mahsanih: “Met I pahn onehda sapahl mehkoaros!”—Kaudiahl 21:4, 5.
Pwehki mie ahnsou ong soahng koaros, ehu peidek pahn pwarada, Iahd ahnsoun onehda sapahl pahn wiawi pwe sapwellimen Koht inou kan en pweida? Sounkadehdehn Siohwa kan me kin wiahda pwuhk wet kin nantihong sewesehki aramas akan en ese me kitail kin momour nan ahnsou ehu me Paipel kahdaneki “imwin rahn akan,” oh ahnsou me Koht pahn “onehda sapahl mehkoaros” kerendohr. (2 Timoty 3:1) Se kangoange uhk en onopki Paipel oh esehla koapworopwor kaselel wet me ke kak paiekihda. Se pil kangoange uhk en mwekidki luhk wet: “Kumwail sohpeiong KAUN-O oh kapakapohng nindokon eh sohte kin ketin dohsang kumwail.” (Aiseia 55:6) Imwilahn omw mour sohte kin koasoandier. Ke kak pilada pwe ken kak paiekihda mour kohkohlahte!
[Kawehwehpen kilel kan nan ehu ehu pali 8]
“Met I pahn onehda sapahl mehkoaros!”