Armakedon​—Dahme Ekei Aramas Kin Ndahki?

“Ngehn ko eri kapokonepene nanmwarki kan wasa me adaneki ni mahsen en Ipru Armakedon.”​—KAUDIAHL 16:16.

DAHME ke kin medewe ni omw kin rong lepin lokaia wet “Armakedon”? Ele ke pahn medewe kahpwal laud ehu. Mendahki lepin lokaia wet pwarada pak ehute nan Paipel, palien rohng oh kaunen pelien lamalam kan kin kalapw doadoahngki lepin lokaia wet.

Ia duwe, dahme pali laud en aramas kin kamehlele duwen Armakedon kin pahrekiong dahme Paipel padahngki? E kesempwal ken ese pasapengpen peidek wet. Dahme kahrehda? Pwehki me mehlel duwen Armakedon kak kihsang masak me kitail sohte anahne ahneki, oh e kak kihong uhk koapworopwor en ahnsou kohkohdo oh e kak kamwakid omw madamadau duwen Koht.

Tehk peidek siluh pwukat oh kapahrekihpene dahme pali laud en aramas kin kamehlele duwen Armakedon oh dahme Paipel uhdahn padahngki.

1. IA DUWE, ARMAKEDON KAHPWAL LAUD IEU ME ARAMAS ME KAHREHDA?

Sounnting kan oh soun roporop kan kin kalapw doadoahngki lepin lokaia “Armakedon” pwehn kawehwehda kahpwal laud kan me aramas kin kahrehda. Karasepe, Mahwen Keieu oh Mahwen Keriau en Sampah kin adaneki Armakedon. Mwurin mahwen ko, aramas kin masak me wehin Amerika oh Soviet Union pahn mahwenkipene pakudang kehlail kan me kak kemehla tohnsampah pwon. Palien rohng kin kahdaneki met Armakedon me kak kemehkihla tohnsampah koaros pakudang kehlail pwukat. Rahnpwukat, soun roporop kan kin masak me saminlahn nan wehwe pahn kahrehda wekidekla laud nan sampah oh re kin ndahki wekidekla wet Armakedon me pahn kereniong wiawi.

Dahme arail kawehwe kasalehda: Aramas akan me pahn keieu kamwakid laud dahme pahn wiawi ahnsou kohkohdo ong sampah oh mour koaros loale. Ma koperment sohte pahn mwekid ni elen loalokong, sampah pahn ohla douluhl.

Dahme Paipel Kin Padahngki: Koht sohte pahn ketin mweidohng aramas akan ren kauwehla sampah. Paipel kamehlelehiong kitail me Siohwaa sohte ketin kapikada sampah “ni mwomwen sapwtehn ehu.” Ahpw e ketin wiahda pwe “aramas en kousoan ie.” (Aiseia 45:18) E sohte pahn ketin mweidohng aramas en kauwehla douluhl sampah, ahpw Koht pahn ketin “kauwehla irail kan me kin kauwehla sampah!”​—Kaudiahl 11:18.

2. ARMAKEDON IEI KAHPWAL LAUD EHU DUWEHTE RERRER EN SAHPW APE?

Ekei sounnting kan kin doadoahngki lepin lokaia “Armakedon” pwehn kahdaneki kahpwal laud kan me duwehte rerrer en sahpw ape. Karasepe, nan pahr 2010, ehu rohng koasoia me Armakedon wiawi nan Haiti. E koasoia duwen lokolok laud, ohla laud oh aramas tohto mehkihla rerrer en sahpw laud ehu me lel sahpwo. Pwihn en rohng oh soun wiahda kasdo kan sohte kin doadoahngkihte lepin lokaia wet ong soahng kan me wiawiher, ahpw re pil kin doadoahngki ong soahng kan me re masak me pahn wiawi. Karasepe, re kin doadoahngki lepin lokaia “Armakedon” pwehn kawehwehda dahme re medewe me pahn wiawi ma lapalahn takai ehu pahn pwupwudiong sampah oh kauwehla.

Dahme arail kawehwe kasalehda: Armakedon mehkot me kin wiawi ni sohkasikpe oh kemehla aramas sohte lipilipil. Ke sohte kak wia mehkot pwe ken pitsang.

Dahme Paipel Kin Padahngki: Armakedon kaidehn mehkot me kin wiawi ni sohkasikpe oh kemehla aramas sohte lipilipil. Me suwed kante me pahn sohrala ni Armakedon. Paipel inoukihda me kereniong “aramas suwed kan pahn sohrala; ke pahn rapahkin irail, ke ahpw sohte pahn diar irail.”​—Melkahka 37:10.

3. IA DUWE, KOHT PAHN KETIN KASOHREHLA SAMPAH NI ARMAKEDON?

Tohto tohn sarawi kan kin kamehlele me mahwen laud ehu pahn wiawi nanpwungen me mwahu oh me suwed me pahn imwikihla imwin sampah. Ehu roporop nan Amerika kasalehda me persent 40 en aramas laud kin kamehlele me imwin sampah pahn wiawi nan “mahwen en Armakedon.”​—Princeton Survey Research Associates.

Dahme arail kawehwe kasalehda: Aramas sohte pahn mour kohkohlahte nin sampah oh sampah sohte wiawihda pwehn mihmi kohkohlahte. Koht ketin kapikada aramas pwe irail koaros en mehla ehu ahnsou.

Dahme Paipel Kin Padahngki: Paipel kasalehda ni sansal me Koht “ketin koasoanehdi teng sampah pohn poahsoane, oh e sohte mwahn pahn mwekid kohkohlahte.” (Melkahka 104:5) Paipel mahsanihki duwen tohnsampah: “Me pwung kan pahn koukousoan nan sahpwo [“sampah,” NW] oh re pahn sapwenikihla kohkohlahte.”​—Melkahka 37:29.

E sansal me dahme Paipel mahsanih kin weksang dahme aramas tohto kin kamehlele duwen Armakedon. Eri dahme mehlel duwen Armakedon?

[Nting tikitik me mi pah]