Peidek Ehu ong Sises

Aramas tohto me kin poadidiong sarawi kin pehm me pelien lamalam anahne patehng palien politik. Re kamehlele me pelien lamalam kak sawas kamwahwihala kahpwal kan me aramas akan ahneki. Ahpw, ekei me kin poadidiong sarawi kin medewe me pelien lamalam oh palien politik en dehr patpene. Dahme ke medewehki pelien lamalam arail kin pidada palien politik? Ia duwe, pali kehlail riau pwukat kak doadoahkpene?

ARAMAS kin ndahki Sises Krais nin duwen emen me “keieu kamwakid laud aramas nan poadopoad en pelien lamalam.” Eri, medewehla ma kitail kak idek reh peidek wet, E konehng pelien lamalam en patehng palien politik? Dahme e pahn ketin sapengki? Ni eh ketiket sampah, Sises ketin sapengala peidek wet sang ni sapwellime mahsen oh wiewia kan. Karasepe, nan sapwellime Kapahrek en Pohn Dohl, e ketikihda kaweid kan me sewese sapwellime tohnpadahk ko ren ese pwukoa dahieu re anahne wia nan arail wasahn kousoan. Kitail pahn koasoiapene ekei ire kan nan sapwellime kapahrek ndando.

Kamwakid Mour en Meteikan

Sises ketin kawehwehda soangen madamadau oh pepehm kan me sapwellime tohnpadahk ko anahne ahneki duwen sampah. E mahsanih: “Kumwail me soahlepen sampah. Eri, ma nemenemen soahl pahn sarasang, sohte mehkot kitail pahn wiahiong pwe nemenemen soahlo en pwurehng miehla. Solahr katepen soahlo, ihte me pahn mwahuwong, en lekdekla wasa me aramas akan pahn tiakpeseng ie. Kumwail me kamarainpen sampah. . . . Amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.” (Madiu 5:13-16) Dahme kahrehda Sises ketin karasahiong sapwellime tohnpadahk ko soahl oh marain?

Sang ni Sises eh ketikihda karasaras wet, e kupwurki kasalehda kamwahu me tohnpadahk ko kak wiahiong arail wasahn kousoan. Sohte katepen soahl ma e sohte doaloaiong mwenge. Lamp sohte kak kamarainih nan pere ehu ma e sohte mi nan pereo. E mwahu en tehk me sapwellimen Sises mahsen kan kin kasalehda me sapwellime tohnpadahk ko duwehte soahl, kaidehn ongete me malaulau, ahpw ong aramas koaros. Re duwehte marain, kaidehn ongete me malaulau ahpw ong koaros me men kilang mwahu. Sises sohte ketin padahkihong sapwellime tohnpadahk ko ren kohkohla ekis wasa me sohte sarawi ie pwe ren wiahda ekei sarawi kan. E sohte pil ketin kangoange sapwellime ko ren katohreirailsang aramas akan oh pil soikala ehuiong meteikan me sohte kin kamehlele dahme re kamehlele. Ahpw, nin duwen soahl eh kin doalohng mwenge oh marain eh kamarainihada wasa rotorot, Kristian akan anahne kamwakid mour en meteikan.

“Kaidehn Kisehn Sampah”

Ahpw, sapwellimen Sises kaweid kan me sapwellime ko anahne ehuiong aramas kin kihda peidek kesempwal ehu duwen ahn Kristian kan madamadau oh pepehm kan duwen palien politik. Dahme kahrehda? Mwohnte eh pwoula, Sises ketin kapakapkiong Koht duwen sapwellime tohnpadahk kan: “I sohte peki rehmwi pwe komwi en ketikinirailsang nin sampah, ahpw pwe komwi en ketin perehsang irail Me Suwedo. Duwehte ngehi me kaidehn kisehn sampah, pil ih duwen irail, kaidehn irail kisehn sampah.” (Sohn 17:15, 16) Eri, ia duwen Kristian kan arail kak sohte wia kisehn sampah, ahpw ni ahnsowohte kin pidada dahme kin wiewiawi nan arail wasahn kousoan? Pwe kitail en ese met, kitail pil pahn tehkpene peidek riau:

• Ia duwen Sises eh ketin kilangwohng palien politik?

• Dahme Kristian akan anahne wia rahnwet?