Sukuhlki Sang Mahsen En Koht

Ia Duwen Tohnleng oh Ngehn Saut kan Ar Kin Kamwakid Kitail?

Ire wet pahn koasoia peidek kan me ke kak ahneki oh e pahn kasalehda ia wasa nan Paipel me ke kak diarada pasapeng kan. Sounkadehdehn Siohwa kan pahn perenki iang uhk koasoiapene pasapeng pwukat.

1. Ihs tohnleng kan?

Tohnleng kan iei ngehn akan me kin kousoan nanleng. Irail kehlail sang aramas. Koht mehlelo, me pil wia ngehn emen, ketin kapikada tohnleng kan mwohn eh ketin kapikada sampah. (Sohp 38:4, 7; Madiu 18:10) Siohwa ketin kapilkipene ih tohnleng ngedehrie.​—Wadek Melkahka 103:20, 21; Kaudiahl 5:11.

2. Ia duwe, tohnleng kan kin sewese aramas?

Tohnleng kan me sewese ohl lelepek Lot. E kin kousoan nan kahnimw ehu me Koht ketin koasoanehdier en ketin kasohrehla pwehki wiewia suwed en aramas ko. Tohnleng riemen padahkihong Lot oh eh peneinei ren tangasang wasao. Ekei aramas ko wiahki me met kamwan ehu oh pohnsehsehla. Ahpw, Lot oh nah serepein ko pitila pwehki ar peikiong kaweid me Koht ketikihong irail sang ni eh ketin doadoahngki tohnleng ko.​—Wadek Senesis 19:1, 13-17, 26.

Nin duwen me Paipel mahsanih, tohnleng kan kin sewese aramas akan rahnwet ni arail kin kaukaweid doadoahk en irail ko me kin lelepek kalohki rongamwahu en Wehin Koht. (Madiu 24:14) Rongamwahwo pil kin kihda kaweid kan. Duwehte kaweid me kowohng Lot, met kaidehn kamwan ehu. E kohsang rehn Koht sang ni eh ketin doadoahngki tohnleng kan.​—Wadek Kaudiahl 1:1; 14:6, 7.

Koht kak ketin doadoahngki tohnleng kan ren kakehle kitail ni atail kin lelohng kasongosong kan. E ketin doadoahngki tohnleng men pwehn kakehlakahda Sises.​—Wadek Luk 22:41-43.

Ahnsou keren Koht pahn ketin doadoahngki tohnleng kan ni ahl tohrohr ehu pwehn kasohrehla aramas suwed kan me kin kahrehda lokolok. Met pahn wahdo nsenamwahu ong aramas akan.​—Wadek 2 Deselonika 1:6-8.

3. Ia duwen ngehn saut akan ar kin kamwakid kitail?

Duwehte aramas akan nin sampah ar kin wia me suwed ni arail kin sapeikiong Koht, tohnleng tohto nanleng pil pelianda Koht. (2 Piter 2:4) Tohnleng sapeik kan adaneki ngehn saut kan. Ahpw me keieu rehrail iei Sehdan me Tepil. Sehdan oh nah ngehn saut kan kin pitipitih tohnsampah.​—Wadek Kaudiahl 12:9.

Sehdan kin doadoahngki pesines mwersuwed kan, koperment kan en aramas oh pelien lamalam likamw kan pwehn kahrehiong aramas akan ren sohpeisang Koht. Kahrehda Sehdan me pwukoahki kopwung sapahrek kan, tiahk lemei oh lokolok me kin lelohng tohnsampah.​—Wadek 1 Sohn 5:19.

4. Ia duwen ngehn saut akan ar kin pitih aramas?

Sehdan kin pitih aramas tohto ni eh kin padahngki me me melahr akan kin wiahla ngehn kei me kak koasoiong irail. Ahpw Paipel mahsanih me me melahr akan sohte kak wia mehkot. (Eklesiasdes 9:5) Ngehn saut akan kin kalapw pitih aramas akan sang ni arail kin mwomwehda ngilen emen kompoakepahmw me melahr. (Aiseia 8:19) Ngehn saut akan kin pitih aramas ni ar kin doadoahngki sounkapwour eni, soun kosetipw, wunahni oh soun kasawih usu kan. Mahsen en Koht kin panawihekin kitail en soikala soahng pwukat koaros. Eri kitail anahne kesehla soahng koaros me kitail ahneki me pidada ngehn saut akan oh wunahni.​—Wadek Deuderonomi 18:10, 11; Wiewia 19:19.

Ma kitail poakohng Siohwa, kitail sohte anahne masak ngehn saut akan. Ni atail kin onopki Mahsen en Koht oh kapwaiada dahme e mahsanih, kitail kin pelianda Tepilo oh karanihala Koht. Siohwa uhdahn ketin kehlail sang ngehn saut akan. Sapwellime tohnleng lelepek kan kak kakehlaka kitail ni ahnsou me kitail anahne.​—Wadek Melkahka 34:7; Seims 4:7, 8.

Pwehn kalaudehla omw wehwehki met, menlau kilang irelaud 10 en pwuhk wet, Dahme Paipel Uhdahn Padahngki?, me Sounkadehdehn Siohwa kan wiahda.