Peidek Kan Sang Sounwadawad Kan . . .

Ia Sapwellimen Koht Madamadau ong Ei Kin Simoak?

▪ Aramas ele kak idek peidek wet pwehki sohte kosonned nan Paipel me koasoia duwen sika. Eri ia duwe, e kin apwal en wehwehki sapwellimen Koht madamadau ong ire mehlel wet? Uhdahn soh.

Paipel mahsanih me “audepen Pwuhk Sarawi unsek pwilisang rehn Koht.” (2 Timoty 3:16) Paipel kin audaudki kaweid oh mahsen sansal kan me kin kasalehda ia duwen Koht eh ketin kupwurki atail en apwalih paliwaratail. Keieu, kitail tehkpene dahme soun roporop kan diarada duwen dahme sika kin wiahiong roson en aramas. Mwuri kitail pahn tehk ia duwen kaweid kan en Paipel ar kin dokedoke dahme re diarada.

Sika kin kauwehla roson mwahu en aramas oh ih ehu me kin keieu kahrehda mehla. Nan wehin Amerika, nanpwungen aramas mehla limen, emen nanpwungarail kin mehkihla sika. Ehu ripoht koasoia me nan sahpwohte, sika kin kemehla aramas nan ehuehu pahr laudsang “sakau en wai, wini en kasahliel, kamaramas, emen eh kin kemehla pein ih, aksident en sidohsa oh soumwahu en AIDS” ar kin kemehla aramas.​—National Institute on Drug Abuse.

Me kin simoak kin kahrehda keper ong meteikan. Simoak inenen keper. Keperpen ahneki kanser en ngolungol oh soumwahu en mohngiong kin laudkihla persent 30 ong irail kan me sohte kin simoak ahpw kin esingekihla ediniei me kohsang irail kan me kin simoak. Nan pahr kan me neklahr ko, toahkte kan diarada ehu soangen keperpen simoak. Met iei soahng kan sang sika me kin tengla ni likou, carpet, oh pil wasa teikan mwurin eh sohla ediniei en sikao. Soangen pwoisin pwukat kin keieu keper ong roson en seri kan oh kak kapwandehla arail koahiek en koledi mehkot.

Sika kin kahrehda aramaso en apwalki kesehla. E kin kahrehiong aramaso en wiahla lidu en wiewia keper wet. Ni mehlel, soun roporop kan kin kamehlele me nicotine, soahng ehu me mi nan sika, iei ehu rehn mehkan me kahrehiong aramas kin keieu apwalki kesehla.

Ia duwen kaweid kan en Paipel ar kin dokedoke ire mehlel pwuko? Tehk ire pwukat:

Koht ketin kupwurki kitail en wauneki mour. Nan kosonned me Koht ketikihong wehin Israel, e ketin kasalehda me irail ko me men kaperenda ih anahne wauneki mouren aramas. (Deuderonomi 5:17) Mehn Israel ko anahne wiahda dihd karakarahk me pahn kapil keilen pwelengen imwarail kan. Dahme kahrehda? Pwehki pohn pwelengen ihmw kan patapat oh re kin doadoahngki ong wasahn kommoal. Dihdo kin pere peneineio de meteikan ren dehr pwupwudi oh ohla de mehla. (Deuderonomi 22:8) Patehng met, mehn Israel kan anahne tehk mwahu me neirail mahn kan en dehr kauwehla meteikan. (Eksodus 21:28, 29) Aramas emen me kin simoak kin kauwehla kaweid kan me utung kosonned pwukat. Pein ih me men kauwehla eh roson mwahu. Patehng met, eh kin simoak kin keper ong meteikan.

Koht ketin kupwurki kitail en poakohng ih oh mehn mpatail. Sises Krais mahsanih me sapwellime tohnpadahk ko anahne peikiong kosonned riau me keieu kesempwal. Re anahne poakohng Koht sang arail mohngiong, mour, madamadau oh kehl unsek oh poakohng mehn mparail duwehte arail kin poakohng pein irail. (Mark 12:28-31) Pwehki mour iei kisakis ehu sang rehn Koht, emen me kin simoak kin kasalehda me e sohte wauneki kisakiso oh e sohte poakohng Koht. (Wiewia 17:26-28) Eh wiewia kak kahrehda keper laud ong meteikan, kahrehda e sohte uhdahn poakohng mehn mpe.

Koht ketin kupwurki kitail en soikala wiewiahn tiahk samin. Paipel kaweidki Kristian kan ren kamwakele sang irail “mehkoaros me kin kasaminehla paliwar” oh madamadau. (2 Korint 7:1) E sansal me simoak kin kasaminehla aramas emen. Irail kan me men uhdihsang simoak pwehn kaperenda Koht kin ahneki kahpwal wet. Ahpw sang sapwellimen Koht sawas, re kak kesehla wiewia samin wet.