Sukuhlki Sang Mahsen En Koht
Dahme Pahn Wiawi ni Rahnen Kadeiko?
Ire wet pahn koasoia peidek kan me ke kak ahneki oh e pahn kasalehda ia wasa nan Paipel me ke kak diarada pasapeng kan. Sounkadehdehn Siohwa kan pahn perenki iang uhk koasoiapene pasapeng pwukat.
1. Dahkot Rahnen Kadeiko?
Nin duwen eh sansal nan kilel me mi pali koahiek, aramas tohto kin medewe me ni Rahnen Kadeiko, aramas lik kei pahn wisikdohng mwohn mwoalen Koht oh ale kadeik pwehki arail wiewia kan en mahs, ekei pahn ale ketingparail en mour nanleng a ekei pahn ale kalokolok nan kisiniei. Ahpw Paipel kasalehda me kahrepen Rahnen Kadeiko iei en kapitasang aramas akan koasoandi sapwung. (Melkahka 96:13) Koht ketin idihada Sises pwehn wia Sounkopwung me pahn kapwurehdo pwung pahrek ong aramas.—Wadek Aiseia 11:1-5; Wiewia 17:31.
2. Ia duwen Rahnen Kadeiko eh pahn kapwurehdo pwung pahrek?
Ni ahnsou me tepin ohlo Adam nsenkihda uhwongada Koht, e kahrehiong kadaudoke koaros en lelohng dihp, lokolok oh mehla. (Rom 5:12) Pwehn kapwungala koasoandi sapwungo, Sises pahn ketin kaiasada aramas lik kei. Pwuhken Kaudiahl kasalehda me met pahn wiawi erein pahr kid en kaundahn Krais Sises.—Wadek Kaudiahl 20:4, 11, 12.
Irail me iasada ko sohte pahn ale kadeik pwehki arail wiewia kan mwohn arail mehla, ahpw re pahn ale kadeik ni ahnsou me audepen “pwuhk ko” me kileldi nan Kaudiahl irelaud 20 pahn sansalda. (Rom 6:7) Nanpwungen irail kan me pahn iasada oh ahneki ahnsou mwahu en esehla Koht iei irail kan me wahnpoaron Pohl koasoia “me mwahu oh suwed.”—Wadek Wiewia 24:15.
3. Dahme Rahnen Kadeiko pahn kapwaiada?
Irail kan me melahr me sohte ahneki ahnsou en esehla Siohwa Koht oh papah ih pahn ahneki ahnsou mwahu en wekidala arail mour oh wia me mwahu. Ma re pahn wia me mwahu, arail kaiasada pahn wia “iasadahng mour.” Ahpw ekei me pahn iasada sohte pahn men sukuhlki sapwellimen Siohwa ahl akan. Arail kaiasada pahn wia “iasadahng kadeik.”—Wadek Sohn 5:28, 29; Aiseia 26:10; 65:20.
Ni kaimwiseklahn pahr kid en Rahnen Kadeiko, Siohwa pahn ketin kapwuredohng aramas peik kan irair en unsekla. (1 Korint 15:24-28) Ia uwen met eh wia koapworopwor kaselel ehu ong aramas peik kan! Ni kaimwiseklahn kasongosongo, Koht pahn ketin lapwahda Sehdan me Tepil sang nan pwoahr loal soh kapio, wasa me e sensel ie erein pahr kid. Sehdan pahn pwurehng kahrehiong aramas en sohpeisang Siohwa, ahpw irail kan me pahn soikala Sehdan pahn mour kohkohlahte nin sampah.—Wadek Aiseia 25:8; Kaudiahl 20:7-9.
4. Ia ehu rahnen kadeik tohrohr me pahn kapaiada aramas?
Paipel pil doadoahngki lepin lokaia “rahnen kadeik” me kin dokedoke mwekid ehu me pahn kaimwisekala koasoandi wet. Rahnen kadeik wet pahn kohdo mwadang duwehte Nohliko ni mwein Noha, me kasohrehla soahng suwed koaros. Kasohrlahn “me suwed kan” me pahn kereniong wiawi pahn kahrehdo sampah kapw, wasa “me pwungen kalahngan en Koht pahn poadada ie.”—Wadek 2 Piter 3:6, 7, 13.
Pwehn kalaudehla omw wehwehki duwen met, menlau kilang pali 244-246 en pwuhk wet, Dahme Paipel Uhdahn Padahngki?, me me Sounkadehdehn Siohwa kan wiahda.
[Kilel nan pali 16]
“The Last Judgement” (KAIMWISEKLAHN KADEIK), Sang Gustave Doré, 1832-1883
[Credit Line]
Nting kan sang Doré