Dehr Mweidohng Mehkot en Kadohwanoweiukasang Siohwa

1-3. (a) Dahme kahrehda Sosua wia mehn kahlemeng mwahu ong kitail? (b) Dahme kitail anahne tamataman ni atail wiahda pilipil kan?

PILIPIL kan me kitail kin wiahda uhdahn kesempwal. Re kak sewese kitail en kaweid mwomwen atail doadoahngki atail mour. Met kin duwehte emen me alialu pohn ahl ehu oh ahlo eri wetpeseng. E anahne pilada mehnia ahl me e pahn keid ie. Mwein e pahn pilada ahl me pahn kahrehiong ih en kerenlahng wasa me e pahn kohla ie, ahpw kaidehn ahl me dohsang wasa me e pahn kohla ie.

² Paipel mahsanihong kitail duwen aramas tohto me anahne wiahda pilipil kesempwal kan. Karasepe, Kain anahne pilada ma e pahn kaunda eh lingeringer de soh. (Sen. 4:6, 7). Sosua anahne pilada ma e pahn kaudokiong Koht mehlelo de koht likamw kan. (Sos. 24:15) Ong Sosua, e uhdahn kesempwal en keid nan ahl pwung. E men karanih Siohwa, eri e wiahda pilipil ehu me pahn sewese ih en wia met. Ahpw Kain wiahda pilipil ehu me katohrehla ih sang Siohwa.

³ Ekei pak kitail pil kin anahne wiahda pilipil kesempwal kan pwe kitail en kak mi nan ahl me pwung. Kitail anahne tamataman me atail pilipil kan kak wahdo kaping ong Siohwa oh sewese kitail en karanih ih de re kak katohreikitailsang ih. (Wadek Ipru 3:12.) Nan iren onop wet oh pil iren onop en mwuhr, kitail pahn koasoiapene soahng isuh nan mour me pahn sewese kitail en keid nan ahl pwung oh tehk mwahu me atail pilipil kan sohte pahn katohreikitailsang Siohwa.

DOADOAHK EN MWOHNI

4. Dahme kahrehda e kesempwal kitail en doadoahk?

⁴ Kristian kan anahne doadoahk en mwohni pwe ren apwalih arail peneinei oh pil pein irail. Paipel kasalehda me ma emen sohte men apwalih eh peneinei, e suwedsang emen me sohte eh pwoson. (2 Des. 3:10; 1 Tim. 5:8) Eri e kesempwal kitail en doadoahk. Ahpw ma ke sohte kanahieng, omw pilipil kan ong doadoahk kak tepida katohreiuksang Siohwa. Ia duwen?

5. Dahme ke anahne medemedewe mwohn omw pahn ale doadoahk ehu?

⁵ Ahpw ia duwen ma ke anahne rapahki omw doadoahk? Ma e apwal en diar doadoahk nan omw wasa, ele e pahn mie kasongosong en ale sohte lipilipil soangen doadoahk dah me emen pahn kihong uhk. Ahpw ia duwen ma mie kaweid kan en Paipel me padahkihong uhk me soangen doadoahk wet sohte mwahu ken ale? De ia duwen ma doadoahko anahne omw ahnsou laud kahrehda solahr omw ahnsou ong kalohk oh mihting ape de omw peneinei? Ke pahn ale doadoahk wet pwehki ke medewe me en ahneki soangen doadoahk wet mwahusang sohte omw doadoahk douluhl? Tamataman, omw pilipil kan kak seweseiuk ken karanihala Siohwa de katohreiuksang ih. (Ipru 3:12) Mehnda ma mie omw doadoahk de ke medemedewe en wekidala omw doadoahko ong ehu doadoahk tohrohr, ia duwen omw kak wiahda pilipil mwahu?

6, 7. (a) Kahrepe riau dah me emen ele ahneki pwehn alehda doadoahk? (b) Mehnia rehra me pahn kasalehda me e men karanih Siohwa? Dahme kahrehda?

⁶ Omw pilipil pahn poahsoankihda dahme ke men wia nan omw mour. Idek rehmw: ‘Dahme I mwahuki ei doadoahko en wiahiong ie?’ Ma uhdahn kahrepen omw ahneki doadoahk iei en apwalih iuk oh omw peneinei pwe ken kak pousehlahte papah Siohwa, e pahn ketin seweseiuk. (Mad. 6:33) Siohwa ketin mwahngih ia duwen eh pahn ketin seweseiuk ni ahnsou me sohla omw doadoahk de ahnsou me kahpwal en mwohni laudla. (Ais. 59:1) E “ketin mwahngih kapitasang me poadidi kan nan ar apwal akan.”​—2 Pit. 2:9.

⁷ Ahpw ia duwen ma uhdahn kahrepen omw ahneki doadoahk iei en wiahda mwohni tohto? Mwein ke kak wia met. Ahpw e keper en ahneki doadoahk ihte pwe ken kak kepwehpwehla. (Wadek 1 Timoty 6:9, 10.) Ma mwohni oh omw doadoahko iei me keieu kesempwal nan omw mour, eri ke pahn katohreiuksang Siohwa.

8, 9. Soangen peidek dah kan me pahpa oh nohno anahne idek duwen arail doadoahk? Dahme kahrehda?

⁸ Ma kowe emen pahpa de nohno, tamataman me noumw seri kan kin sukuhl sang mwomwen omw kin wiahda pilipil kan. Dahme re kin medewe me keieu kesempwal nan omw mour? Omw doadoahk? De omw nanpwungmwahu rehn Siohwa? Ma ke kin songosong en ndandla de wiahda mwohni tohto, ke leme noumw seri kan pahn wiahda soangen pilipil suwed duwehte met ni arail laudla? De re sohla pahn waunekin uhk nin duwen pahpa de nohno men? Emen Kristian pwulopwul nda me ihte me e kak tamanda iei eh pahpao kin ahnsou koaros wiahki eh doadoahko me keieu kesempwal nan eh mour. E nda: “Nin tapio, e kin mwomwen me e kin doadoahk laud pwehki e mwahuki at peneineio en ahneki dahme keieu mwahu. E men apwalih kiht mwahu. Ahpw nan sounpar kan me kerendo, mehkot reh wekidekla.” Eh pahpao kin doadoahk ahnsou koaros oh pwainda dipwisou pweilaud kan me peneineio sohte anahne. Imwilahn met, meteikan kin esehki peneineio nin duwen peneinei ehu me naineki mwohni tohto, ahpw kaidehn kangoange meteikan ren papah Siohwa. Serepeino koasoia me e pahn perenki ma eh pahpao doadoahk laud pwe irail en karanih Siohwa ahpw kaidehn en doadoahk laud pwehn wiahda mwohni tohto.

⁹ Pahpa oh nohno kan, kumwail en tehk mwahu me kumwail en dehr mweidohng amwail doadoahk en katohreikumwailsang Siohwa. Wiahda mehn kahlemeng mwahu ong noumwail seri kan. Kasalehiong irail me kumwail uhdahn kamehlele me en ahneki nanpwungmwahu rehn Siohwa kin kesempwal sang mwohni de dipwisou kan.​—Mad. 5:3.

10. Dahme me pwulopwul men anahne medemedewe mwohn eh pahn pilada soangen doadoahk me e pahn wia?

¹⁰ Ma kowe emen me pwulopwul me medemedewe soangen doadoahk dah ke pahn wia ahnsou me ke laudla, ia duwen omw kak wiahda pilipil mwahu? Nin duwen me kitail sukuhlkier, omw pilipil pahn poahsoankihda dahme ke men wia nan omw mour. Ma ke medemedewe ken alehda kaiahn ong soangen doadoahk ehu, doadoahko pahn seweseiuk ken wiahki omw papah Siohwa me keieu kesempwal nan omw mour? De e pahn katohreiuksang Siohwa? (2 Tim. 4:10) Ke men duwehte tohnsampah wet me kin nsenamwahu ihte ma re naineki mwohni tohto? De ke pahn koapworopworki Siohwa duwehte me Depit wia? E koasoia: “Ni ei pwulopwul, oh met ni ei mahlahr, I saikinte kilang aramas mwahu men me KAUN-O ketin likidmeliehla, de nah seri kan pekipeki ar tungoal kisin mwenge.” (Mel. 37:25) Met kin duwehte omw pilada mehnia ahl me ke pahn keid ie. Tamataman me ehu pilipil pahn kak katohreiuksang Siohwa a ehu pilipil pahn kak kihong uhk mour me keieu mwahu. (Wadek Lepin Padahk 10:22; Malakai 3:10.) Mehnia pilipil me ke pahn wiahda?a

MWADONG KAN OH MEHN KAMWEIT KAN

11. Dahme Paipel padahkihong kitail duwen mwadong kan oh mehn kamweit kan? Dahme kitail anahne tamataman?

¹¹ Paipel sohte mahsanih me e sapwung en mwemweitseli, oh e sohte mahsanih me mwadong kan oh mehn kamweit kan kin kauwehla mwahl ahnsou. Pohl padahkihong Timoty me en eksersais kin mwahu ong paliwar. (1 Tim. 4:8) Paipel pil mahsanih me mie “ahnsoun peren” oh “ahnsoun kahlek,” oh e kin kangoange kitail en kommoal ni uwen me itar ong paliwaratail. (Ekl. 3:4; Mark 6:31) Ahpw ma kitail sohte kanahieng, mwadong kan oh mehn kamweit kan kak tepida katohreikitailsang Siohwa. Ia duwen? Sang ni atail kin pilada mwadong de mehn kamweit sapwung kan de nohn kihong ahnsou laud ong mepwukat.

12. Dahme ke anahne medemedewe ni omw pilada soangen mwadong kan oh mehn kamweit kan?

¹² Keieu, kitail en medewe duwen soangen mwadong kan oh mehn kamweit kan me kitail en pilada. Kitail uhdahn kak pilada mehn kamweit de soangen mwadong me mwahu. Ahpw pali laud en mehn kamweit kan nan sampah wet kin pidada soahng kan me Koht ketin kalahdeki, me iangahki tiahk lemei, wunahni, oh tiahk samin. Eri, ke anahne kanahieng soangen mwadong oh mehn kamweit kan ken pilada. Medewehla soangen peidek pwukat: Ia duwen mehn kamweit me I pilada eh kin kamwakid ie? E kin kangoange ien wia tiahk lemei de uhki ahi wehi? E kin kahrehiong ien medewe me I anahne kana ahnsou koaros? (Lep. Pad. 3:31) E nohn pweilaud? Ia duwe, ekei pahn suwedki ma re esehda me I pilada soangen mwadong oh mehn kamweit pwukat? (Rom 14:21) Soangen aramas dah kan me I men patehng? (Lep. Pad. 13:20) Soahng pwukat kin kahrehda I en men wia dahme sapwung?​—Seims 1:14, 15.

13, 14. Dahme kahrehda ke anahne medewe duwen uwen ahnsou me ke pahn kihong mehn kamweit kan?

¹³ Pil medewehla duwen uwen ahnsou me ke kin kihong mwadong kan de mehn kamweit kan. Idek rehmw: ‘I kin kihong ahi ahnsou laud ong mehn kamweit kan kahrehda e kin katikala ei ahnsoun kalohk oh mihting?’ Ma ke kin kihong omw ahnsou laud ong mwadong kan de mehn kamweit, re solahr pahn kaperen. Ni mehlel, ong irail kan me kanahieng ren dehr kihong ahnsou laud ong mehn kamweit kan, soangen ahnsou pwukat kin uhd kaperenla ong irail. Dahme kahrehda? Pwehki re ese me re wiahda mahs soahng kesempwal kan, kahrehda re sohte pehm me e sapwung ren mwemweit.​—Wadek Pilipai 1:10, 11.

¹⁴ Mendahki e kaperen en kihong ahnsou laud ong mehn kamweit kan, e kak katohreikitailsang Siohwa. Emen sister me sounpar 20 me adaneki Kim lelohng soangen irair wet. E nda me e kin kohla iang mwemweitseli ni imwin wihk kan koaros, Ni Alem, Rahn Kaunop oh Rahn Sarawi. Ahpw met e eselahr me mie soahng kan me kesempwal sang met me e anahne wia. E nda: “Karasepe, nin duwen pioneer men, I anahne pirida kuloak 6 ni menseng pwehn kohla kalohk. Eri I sohte kak mwemweit lao lel kuloak ehu de riau ni sohrahn. I ese me e sohte suwed en patehng meteikan mwemweit, ahpw irail kakete kerempwaiehla laud.” E sukuhlkier me e anahne kanahieng dehr kihong ahnsou laud ong mwemweit rehn meteikan.

15. Ia duwen pahpa oh nohno kan ar kak sewese neirail seri kan ren pilada mehn kamweit mwahu?

¹⁵ Pahpa oh nohno kan anahne apwalihala anahn en arail peneinei. Re pil ahneki pwukoa en sewese arail peneinei ren karanih Siohwa oh pil ren nsenamwahu oh pehm me mie me poakepoake irail. Ma kowe pahpa men de nohno men, dehr medewe me mehn kamweit koaros suwed. Ei, ekei mehn kamweit kan oh mwadong kan kin suwed. (1 Kor. 5:6) Ahpw ma ke nantihong ken pilada mehn kamweit oh mwadong kan ni keneinei, ke kak diarada ahl akan me omw peneinei kak ehupene oh ahneki ahnsou mwahu.b Ni ahl wet, omw pilipil duwen mehn kamweit kan sohte pahn katohreiuksang Siohwa.

NAN PENEINEI

16, 17. Soangen irair kansensuwed dah me pahpa oh nohno tohto kin lelohng? Ia duwen atail ese me Siohwa ketin mwahngih arail nsensuwed?

¹⁶ Pahpa nohno kan oh neirail seri kan uhdahn kin poakpene nanpwungarail. Siohwa pil ketin mahsanih me e ketin poakohng sapwellime aramas akan duwehte nohno men eh kin poakohng nah seri. (Ais. 49:15) Ni emen sang nan peneinei ehu kin kohkohsang Siohwa, e kin uhdahn kansensuwed. Emen sister me nah serepeino piskenla koasoia: “I uhdahn nsensuwedla. I kin medewe, ‘Dahme kahrehda e kohkohsang Siohwa?’ I pehm me ngehi me pwukoahki dahme wiawi.”

¹⁷ Ma ke mi nan soangen irair wet, Siohwa ketin mwahngih omw pepehm. Ni ahnsou me tepin sapwellime aramas uhwongada ih, “kupwure eri toutoukihla.” E pil ketin kupwurtoutoukihla ahnsou me pali laud en aramas ako mwohn Nohliko sohte rong Noha. (Sen. 6:5, 6) Irail kan me saikinte lelohng irair wet ele sohte pahn wehwehki ia uwen kamedek en pepehm wet. Ahpw e pahn keper en mweidohng tiahk sapwung en kisehmw men me piskenla en katohreiuksang Siohwa. Ia duwen omw kak dadaurete omw nsensuwedkihla emen tohn omw peneinei eh kohkohsang Siohwa?

18. Dahme kahrehda pahpa oh nohno kan en dehr kapwukoahki pein irail ma neirail seri kan kohkohsang Siohwa?

¹⁸ Dehr kapwukoahkin uhk dahme wiawi. Emenemen tohnpeneinei me inoukihda eh mour ong Siohwa oh papidaisla anahne “pein wa eh wisik” oh pilada ma e pahn papah Siohwa. (Kal. 6:5) Mwohn silangin Siohwa, me dipano me pwukoahki eh pilipil kan. Koht sohte ketin kapwukoahkin uhk dahme wiawi. (Esek. 18:20) Pil ehu, ken dehr kapwukoahki meteikan. Ken wauneki mwomwen Siohwa eh kin ketin panawih sapwellime aramas akan. Dehr kapwukoahki elder kan, irail me kin pere mwomwohdiso. Ahpw ken pelianda Tepil oh dehr mweidohng irair wet en katohreiuksang Siohwa.​—1 Pit. 5:8, 9.

19, 20. (a) Ia duwen pahpa nohno kan me neirail seri piskenla kak dadaurete pahn arail nsensuwed? (b) Koapworopwor dahieu me pahpa nohno kan en ahneki?

¹⁹ Dahme pahn wiawi ma ke pilada en lingeringerda pahn Siohwa pwehki dahme wiawihong noumw serio? Omw pepehm kan kak katohreiuksang Siohwa. Ni mehlel, tohn omw peneinei me ke kesempwalki anahne ese me ke kin koasoanehdi teng ken poakohng Siohwa laudsang omw poakohng irail. Eri, pwe ken dadaurete pahn omw nsensuwed, doadoahk laud pwe ken kolokolte omw nanpwungmwahu rehn Siohwa en kehlail. Ken kin kalapw werekiong iengomw Kristian lelepek kan. (Lep. Pad. 18:1) Kapakap ong Siohwa oh patohwanohng ih omw pepehm kan ni mehlel. (Mel. 62:7, 8) Dehr song en rapahki kahrepe kan me kin uhwong sapwellime kehkehlik duwen koasoandi en piskenla. Kitail en dehr rapahki kahrepe kan pwehn patehng tohnpeneinei men me piskenla de doadoahngki e-mail de delepwohn pwehn ahnekihte nanpwungmwahu reh. (1 Kor. 5:11) Kedirepwki doadoahk en papah Siohwa. (1 Kor. 15:58) Sistero me kitail koasoiapene mwoweo koasoia: “I ese me I anahne kedirepwki ei papah Siohwa oh kakehle ei nanpwungmwahu reh pwe ni ahnsou me nei serepeino pahn pwurodo rehn Siohwa, I pahn kak sewese ih.”

²⁰ Paipel mahsanih me limpoak kin sewese kitail en “liki Koht.” (1 Kor. 13:4, 7) E sohte sapwung en koapworopworki me me ke poakohngo pahn pwurodo rehn Siohwa. Sounpar koaros, me tohto me piskenla kin koluhla oh pwurodo nan sapwellimen Siohwa pwihn. Siohwa sohte kin ketin kolokolte sapwellime engieng mwurin arail koluhla. Ahpw e kin ketin “diren mahk.”—Mel. 86:5.

WIAHDA PILIPIL MWAHU KAN

21, 22. Soangen pilipil dah kan me ke men wiahda nan omw mour?

²¹ Siohwa ketikihongehr aramas akan pwuhng en wiahda pilipil kan nan arail mour. (Wadek Deuderonomi 30:19, 20.) Ahpw met kin wehwehki me kitail pwukoahki wiahda pilipil mwahu kan. Emenemen Kristian anahne pein idek: ‘I kin wiewiahte pilipil kan me sewese ien kekeid nan ahl pwung? I kin mweidohng ei doadoahk, mwadong oh mehn kamweit kan, de nanpwungmwahu rehn ei peneinei en katohreiehsang Siohwa?’

²² Siohwa sohte ketin tokedihsang eh ketin poakohng sapwellime aramas akan. Eri sohte mehkot kak katohreikitailsang Siohwa, ihte ma kitail wiahda pilipil sapwung kan. (Rom 8:38, 39) Met sohte anahne wiawi! Tehk kanahieng pwe ken dehr mweidohng mehkot en katohreiuksang Siohwa. Iren onop en mwuhr pahn koasoia soahng pahieu nan mour me kitail anahne kanahieng ni atail kin wia pilipil kan.