PEIDEK KAN EN PAIPEL PASAPENGLA
Kitail kak mour kohkohlahte?
Tepin ohl, Adam, mourki sounpar epwiki kei. Kedekedeo, e mahla oh mehla. Sang ahnsowo kohdo, aramas akan kin song ni ahl tohto pwe ren dehr mahla. Ahpw saikinte emen me kak pitsang mehla. Dahme kahrehda? Adam mahla oh mehla pwehki e dipada ni eh sapeikiong Koht. Kitail kin mahla pwehki kitail sohsohki dihp sang Adam, me kalokepe iei mehla.—Wadek Senesis 5:5; Rom 5:12.
Pwe kitail en ahneki mour kohkohlahte, kitail anahne emen en pwainkitailda. (Sohp 33:24, 25) Pweipwei ehu anahne wiawi pwehn kasaledekihala emen, oh kitail anahne saledek sang mehla. (Eksodus 21:29, 30) Sises ketin pwainla pweipwei wet ni eh ketin pwoukinkitailla.—Wadek Sohn 3:16.
Ia duwen atail kak ahneki mour kohkohlahte?
Kaidehn koaros pahn saledek sang soumwahu oh mahla. Ni mehlel, aramas akan me sapeikiong Koht, duwehte Adam, pahn katihasang pai kaselel en mour. Irail kante me ale mahkpen diparail iei me pahn ahneki mour kohkohlahte.—Wadek Aiseia 33:24; 35:3-6.
Pwehn ale mahkpen dipatail, kitail anahne wia mehkot. Kitail anahne esehla Koht sang ni atail onopki sapwellime Mahsen, Paipel. Paipel kin padahkihong kitail ia duwen atail en ahneki mour mwahu oh pil ia duwen atail kak kenikenla rehn Koht oh pil ahneki mour kohkohlahte.—Wadek Sohn 17:3; Wiewia 3:19.