PEIDEK KAN EN PAIPEL PASAPENGLA

Ia duwe, Koht kin ketin karonge kapakap koaros?

Koht kin ketin karonge aramas akan sang wehi koaros. (Melkahka 145:18, 19) Sapwellime Mahsen, Paipel, kangoange kitail en patohwanohng ih sohte lipilipil soahng dah me kin kapwunode kitail. (Pilipai 4:6, 7) Ahpw ekei kapakap sohte kin kaperenda kupwuren Koht. Karasepe, e sohte ketin kupwurki kapakap kan me kin kapwukapwurehiong lokaiaohte.​—Wadek Madiu 6:7.

Siohwa pil sohte ketin kupwurki kapakap kan en aramas me kin sapeikiong sapwellime kosonned. (Lepin Padahk 28:9) Karasepe, nan Paipel, Koht sohte kupwurki karonge mehn Israel kan me kin kemehla aramas. E sansal me kitail anahne kapwaiada dahme Koht kupwurki kitail en wia pwe en ketin karonge atail kapakap kan.​—Wadek Aiseia 1:15.

Dahme kitail anahne wia pwe Koht en ketin karonge kitail?

Kitail sohte kak kapakap ong Koht ma sohte atail pwoson. (Seims 1:5, 6) Kitail anahne kamehlele me e ketin mie oh me e ketin nsenohki kitail. Kitail kak kakehlakahda atail pwoson sang ni atail kin onop Paipel, pwehki pwoson mehlel kin poahsoankihda mehn kadehde kan me mi nan Mahsen en Koht.​—Wadek Ipru 11:1, 6.

Kitail anahne kapakap ni aktikitik oh mehlel. Sapwellimen Koht ohl, Sises, pil kin ketin aktikitik ni eh kin loulou. (Luk 22:41, 42) Eri kitail dehr patohwan ong Koht dahme e pahn ketin wia, ahpw kitail anahne song wehwehki dahme e ketin kupwurki sang ni atail wadek Paipel. Sang ni atail wia met, kitail kak kapakap pahrekiong kupwuren Koht.​—Wadek 1 Sohn 5:14.