Dahme Kahrehda Aramas Kin Kapakap?

Ke kin kapakap ahnsou koaros? Aramas tohto kin kapakap, pil ekei irail me sohte kamehlele Koht. Ahpw dahme kahrehda aramas kin kapakap? Ehu ripoht sang France kasalehda me elep en tohn wasao kin ekei ahnsou kapakap de doudouloale soahng kan “pwehn nsenamwahula.” Duwehte mehn Iurop tohto, irail sohte kin kapakap pwehn kaudokiong Koht. Ahpw re kin rapahki “nsenamwahu me kapakap kin wiahiong emen.” Ni pali teio, ekei kin kapakapohng Koht ihte ni ahnsou me re anahne sawas oh kasik me arail pekipek kan pahn mwadang pasapengla.​—Oseia 5:15.

Ia duwen pein kowe? Ke leme me kapakap kin wiahte ahl ehu pwehn kameleileidi omw madamadau? Ma ke kamehlele Koht, ke kin kilang me kapakap kin seweseiuk nan omw mour? De e mwomwen me omw kapakap kan sohte kin pasapengla? Paipel kak seweseiuk ken kilangwohng kapakap nin duwen ahl kaselel ehu me ken karanihala Koht, a kaidehn ihte pwehn kansenamwahwihukala.